You are here:መነሻ ገፅ»አንዳንድ

 

አምስቱ ጓደኛሞች በሩሲያ እየተካሄደ ያለውን የዓለም ዋንጫ በጋራ ለመመልከት ቃል የተግባቡት ከ6 ዓመታት በፊት ነበር። እነዚህ ብራዚላዊያን ይሄንን ምኞታቸውን እውን ለማድረግ ገንዘብ መቆጠብም ጀምረዋል። ጊዜው ሲደርስም በሀገራቸው ባንዲራ ቀለም ባጌጠ ተሽከርካሪ ወደ ሩሲያ ለመጓዝ ዝግጅታቸውን አጠናቀቁ። በዚህ መሀል ግን አንደኛው ጓደኛቸው ያልተጠበቀ መርዶን አረዳቸው። ሚስቱ ጉዞውን እንዳልፈቀደችለት እና በቃሉ መገኘት አለመቻሉን አስረዳቸው። ሚስት ብትለመን፣ ብትባል ብትሰራ አሻፈረኝ አለች። በዘህን ጊዜ ጓደኞቹ ከአንድ ስምምነት ላይ ደረሱ። በጉዞው ላይ ባልተሳፈተው ጓደኛው ቁመት ልክ እና መልክ በካርቶን ቅርጽ አውጥተው በሚጓዙበት አውቶቢስ ላይ ከመካከላቸው አስቀመጡ። በዚህ ብቻ አላበቁም። ቅርፁን “ሚስቴ እንድሄድ አልፈቀደችልኝም” የሚል ፅሁፍን አሰፈሩበት። ከጎኑም የውሃ ኮዳ አስቀመጠው በህይወት ያለ ለማስመሰል ሞክረዋል። በጓደኛቸው ሚስት ውሳኔ ቢበሳጩም በራሳቸው ፈጠራ ራሳቸውን ማፅናናት ችለዋል ሲል ያስነበበው ኤቢሲ ኒውስ ነው።

 

·                     በአንድ ጠብታ ደም ውስጥ 10ሺህ ነጭ የደም ሴሎች እና 250 ሺህ ፕላትሌቶች ይገኛሉ።

·                 የአንድ ሰው አንጎል ቢዘረጋ አንድ መደበኛ መጠን ያለውን የትራስ ልብስ ያህል ይሰፋል። አንድ ሰው ለረጅም ዓመታት ታሞ ቢቆይ መጨረሻ ላይ የአንጎሉ መጠን  በወጣትነት ዕድሜው የነበረውን 90 በመቶ መጠን ይኖረዋል።

·                     የሰው ልጅ ጉበት በተለያዩ ምክንያቶች የተወሰነ ክፍሉ ቢወገድ ተመልሶ የማደግ ባህሪይ አለው።

·                     በምድር ላይ 100 ፓውንድ ክብደት ያለው ሰው ማርስ ላይ ቢወጣ የሚኖረው ክብደት 38 ፓውንድ ብቻ ነው።

·                     ካች አፕ በድሮ ጊዜ እንደመድሐኒት ይታዘዝ ነበር።

·                     የስፔን ብሔራዊ መዝሙር ግጥ የለውም።

·                     የድመት ጆሮ 32 ጡንቻዎች አሉት።

·                     ጆርጅ ዋሽንግተን ታዋቂ ውስኪ ጠማቂ ነበር።

·                     የቀንድ አውጣ ጥርስ በዓለማችን ላይ ካሉ ጠንካራ ነገሮች አንዱ ነው።

·                     ሻምፓኝ በ20ኛው ክፍለ ዘመን ለጫማ ማሳመሪያ አገልግሎት ይውል ነበር።

·                     ንግስት ኤልዛቤት ታዋቂ መካኒክ ነበሩ።

 

ሕግ ሕግ ነው የሚለው አባባል እውነተኛነት እየተስተዋለ ነው ያሰኛል የሰሞኑ የኦዲቲ ሴንትራል ዘገባ። አንዲት እርጉዝ ላም ሀገር አማን ብላ ከአሳዳሪዎቿ በማምለጥ ወደ ጎረቤት ሀገር በማምራቷ የሞት ቅጣት ሊጣልባት ነው። ቡልጋሪያዊቷ ላም ሳታውቅ ድንበር አቋርጣ ወደ ሰርቢያ ትገባለች። ከአሳዳሪዋ አምልጣ ወደ ሰርቢያ የገባቸው ይህች ላም፣ አሳዳሪዎቿ ከሁለት ሳምንታት ፍለጋ በኋላ ያለችበትን ቢደርሱባትም ወደቤታቸው ይዘዋት መመለስ ግን አልቻሉም። ፔንካ የተባችው ይህች ላም ድንበር አቋርጣ የገባችበት ሰርቢያ የአውሮፓ ህብረት አባል ሀገር ባለመሆኗ ህጋዊ የይለፍ ወረቀት ሳትይዝ ወደ ሀገሯ መመለስ አትችልም። ይልቁንም በህገ ወጥ መንገድ ድንበር በማቋረጧ በሞት እንድትቀጣ ተፍረዶባታል።

የሰርቢያ እንስሳት ህክምና ተቋም የላሟን ጤንነት በማረጋገጥ ወደ ሀገሯ መመለስ እንደምትችል ቢገልጽም የድንበር ጠባቂዎች ግን አሻፈረን ብለዋል። ጠባቂዎቹ እንዳሉትም በአውሮፓ ህብረት ሀገራት የጋራ መተዳደሪያ ደንብ መሠረት ላሟ ወደ ቡልጋሪያ ለመመለስ የይለፍ ወረቀት ያስፈልጋታል። ላሚቷ ይህን ወረቀት ስላልያዘችም ህገ ወጥ በመሆኗ በሞት እንድትቀጣ ተወስኖበታል። ላሟ ልትወልድ ቀናት የቀሯት ብትሆንም ህጉ ተፈፃሚ ይሆን ዘንድ በሞት እንድትቀጣ ተወስኖባታል ተብሏል።

 

·                     በ2011 ዓ.ም ኤሚ ዴቪሰን የተባለች ሴት አንድ ምንም የማይታይ ስእልን በ10ሺህ ዶላር ገዝታለች።

·                     ሳዳም ሁሴን ዘቢባ እና ንጉሱ የሚል የፍቅር ልብ ወለድ ደራሲ ነው። ይህ መፅሐፍ እ.ኤ.አ. በ2000 ዓ.ም በስውር ኢራቅ ውስጥ ታትሟል።

·                     በታይዋን አንድ ምግብ ቤት ምግብ ማቅረቢያዎቹ በመፅደጃ ቤት ሳህን ቅርፅ የተሰሩ ናቸው።

·                     ልዑል ቻርልስ እና ዊሊያም ሁልጊዜም በረራ ሲያደርጉ የሚጓዙት በተለያየ አውሮፕላን ነው። ምክንያቱም አደጋ ቢፈጠር አንደኛቸው እንኳን ለመትረፍ ነው።

·                     በጨካኝነቱ የሚታወቀው አዶልፍ ሂትለር፣ አሉሮ ፎቢያ የሚባል የድመት ፍራቻ አለበት። ታላቁ አሌክሳንደር፣ ናፖሊዮን እና ሙሶሎኒም የዚሁ የድመት ፍራቻ ተጠቂዎች ናቸው።

·                     ቻርልስ ዳርዊን በምርምር ያገኛቸውን የእንስሳ ዝርያዎች ሁሉ ይመገብ ነበር።

·                     የዓለማችን ሰፊ ቤተሰብ ያለው ሰው ህንዳዊው ዚዮና ቻና ነው። ይህ ሰው 39 ሚስቶች ያሉት ሲሆን፤ 94 ልጆች፣ 14 የልጅ ሚስቶች እንዲሁም 33 የልጅ ልጆች አሉት። ቤተሰቡም ባክትዋንግ በተባለች ከተማ ውስጥ ባለ መቶ ክፍል እና ባለ አራት ፎቅ ቤት ውስጥ ይኖራል።

·                     ብራድ ፒት ሰባት ዓመታትን በቲቤት በሚባለው ፊልም ላይ በነበረው ድርሻ ምክንያት ወደ ቻይና እንዳይገባ እገዳ ተጥሎበት ነበር፡፤

·                     ዬሬታ የተባለ አንድ ግለሰብ ለሚስቱ መታሰቢያ የሚሆን የጊታር ቅርፅ ለመስራት 2ሺህ ያህል ዛፎችን ተክሎ ነበር።

·                     በመጽሐፍ ቅዱስ ውስጥ ያለውን ይሁዳን ሆነው ሲተውኑ የነበሩ ሁለት ተዋናዮች በትወና ላይ ሳሉ ህይወታቸውን አጥተዋል።

 

·         አንድ ሰው በአንድ ደቂቃ ውስጥ ከ15 እስከ 20 ጊዜ አይኑን ያርገበግባል።

·         የሰው ልጅ ከሚያያቸው ህልሞች መካከል 90 በመቶዎቹን አያስታውሳቸውም።

·         ማንም ሰው ራሱን ኮርኩሮ ማሳቅ አይችልም። ምክንያቱም እጅ የትኛው የሰውነት ክፍል ላይ እንደሚያርፍ አስቀድሞ ስለሚያውቀው ነው።

·         ወንዶች በህልማቸው ከሚያዩዋቸው ሰዎች መካከል ከፍተኛውን ቁጥር የሚይዙት ወንዶች ናቸው።

·         እግራችን 52 አጥንቶችን የያዘ ሲሆን፣ ይህም ከሰውነታችን ውስጥ ካሉት አጥንቶች ሩብ ያህሉ ናቸው።

·         በማስነጠስ ወቅት ከአፍና አፍንጫ የሚወጡት ነገሮች 20 ጫማ ያህል ርቀት የመጓዝ አቅም አላቸው።

·         የአንድ ሰው ትንሽ አንጀት ቢዘረጋ የቁመቱን አራት እጥፍ (ከ18 እስከ 23 ጫማ) ርዝመት ይኖረዋል።

·         አንድ ሰው አንገቱን አቀርቅሮ በሚቀመጥበት ወቅት መጥፎ ትዝታዎችን የማስታወስ እድሉ የሚጨምር ሲሆን፤ ቀና ብሎ ሲቀመጥ ደግሞ በብዛት ጥሩ ትዝታዎችን ያስታውሳል።

·         አጋዘን ጣፊያ የሌለው እንስሳ ነው።

·         በአንድ ሄክታር ሳር ላይ በአማካይ 50ሺህ ሸረሪቶች ይኖራሉ።

 

አይበገሬ ለፈተና… የብረት ቆሎ ፎጠና

ወጣት… ቋጥኝ የሚንድ ደማሚት ዕቶን እሳት

የቆመውን የሚያጋድም

የተጋደመውን የሚያቆም የለውጥ ፍላት

   ወጣት … የነብር ጣት

   ፈተናን የሚፈትን

   ቋጠሮን የሚፈታ ድድርን የሚበትን

   ድንጋይን የሚያቀልጥ እቶን እሳት

ወጣት - የነብር ጣት

የልውጣ አልውጣ ሀይል እምቃት

   ወይንስ! ወጣት

   ቅቤ የማይንድ የበረዶ ትኩሳት?

   ከሰንበት፣ ሰንበት፣ የሎሽን፣

   የክሬም፣ ውልውላት

የጄል፣ የቀለም፣ ልቅልቃት

የጸጉር ግርጣት ጉንጉናት

የሰበር ሰካ እርምጃ - የትከሻ ውዝውዛት

የሚዶ፣ የቡርሽ፣ የመስታውት፣ ባላባት

የእጅ በኪስ ኩራት

በውኑ ይኸም ወጣት? የነብር ጣት?

   ሰኞ፣ ማክሰኞ፣ ሮብ፣ ሐሙስ፣ አርብ ሰንበታት

   ከመጾው እስከ ጥቢ - ከበጋ እስከ ክረምት

   ከጧት እስከ ማታ - ከመአልት እስከ ሌሊት

   መዘነጫ፣ መሽቀርቀሪያ፣ መወዝወዣ፣ መጎለቻ፣

   መጀበኛ - መፈረሻ - ከበርቻቻ

ይሄም ወጣት - የነብር ጣት?

ሰርክ ከአዘቦት - ሁሌም እረፍት

ከስክሪን፣ ከዲሽ ጋር -ፍጥጣት

ግብ የለሽ - በሌላው ግብ የሚያቅራራ

ስለ ሰው ገድል - የሚያወራ

ይሄም ወጣት? የነብር ጣት?

ግዙፍ ሆኖ - ግዝፈቱን ያላመነ

ቋያ ቃቄ -ወኔውን ያደፈነ

ለሽምግልናው- ጉልበቱን የከዘነ

ይሄም ወጣት? የቋያ እሳት?

ማጣት - የነብር ጣት

ስልሞውን ፈጥርቆት

አሻ!

            ዋኔዋ - በአስናቀ አካልነህ

“የተወለድሁት መሀል ፒያሳ ነው፤” አለኝ፤ እና ምን አባህ ላድርግህ ልለው አሰኝቶኝ ነበር፤ ግን ከፈቃዴ ውጭ ጆሮዬን ሰጠሁት።

“አባቴ በጊዜው በአዲስ አበባ ከሚኖሩ ጥቂት ስመ ጥር ሰዎች አንዱ ነበር፤ እንዲያውም የፒያሳው ብርሃን ተብሎ ይጠራ ነበር።”

“ሊቅ ነበሩ ማለት ነው!”

“ኖ! የፒያሳው ብርሃን የተባለው ላምባ ሻጭ ስለነበር ነው!”

“ገባኝ!”

“የሆነ ጊዜ ላይ አባቴ ሀብታ ሆነ! ግን የኑሮ ነገር አልሆነለትም፤ መጠጣት፣ ሴት መተኛት፣ መደባደብ ሆነ ሥራው። አባቴ አጭር እና ቅንዝረኛ ስለነበረ ሰዎች ስንዝሮነቱን እና ቅንዝረኛነቱን አስተባብሮ የሚገልፅ ስም ሰጡት - ቅንዝሮ ብለው ጠሩት። የድሮ ቅጽል ስሙ ተረሳ። አንድ ቀን በሚጠጣበት ቤት ውስጥ በተፈጠረ አምባጓሮ በድንጋይ ተፈንክቶ ሞተ፤ አብሮ አደግ ጓደኛውም በእለቱ አብሮት ሞተ። አየህ፣ ጓደኛ መስተዋት ነው የተባለው ተረት እና ምሳሌ እውነትነቱ የገባኝ ያኔ ነው። አዎ! ጓደኛ መስተዋት ነው፣ ከሚወረወር ድንጋይ አያስጥልህም!

“የአባቴ ጓደኛ መቼም በጣም ሊቅ ነበር። “አንድ ሊቅ ከሞተ አንድ ቤተ መፃሕፍት ተቃጠለ ማለት ነው” ሲባል ሳትሰማ አትቀርም። አባዬ ግን ከመጠጣት በቀር ምንም አያውቅም። ምን ታደርገዋለህ! አንድ ቤተ መፃህፍት ሲቃጠል ከጎኑ ያለ ጠጅ ቤት አብሮ መቃጠሉ አይቀርም። ደከመህ መሰል?”

“ኧረ እየሰማሁህ ነው!”

“አባዬ ከሞተ ከጥቂት ጊዜ በኋላ እማማ ታማ ሆስፒታል ገባች። ወደ ውጭ አገር ሄዳ እንድትታከም ተወሰነ። ከዚያ፣ አሜሪካ ለሕክምና በሄደችበት በዚያው የፖለቲካ ጥገኝነት ጠየቀች።

“የፖለቲካ ጥገኝነት እንዴት ተሰጣቸው?”

“Well, ሆስፒታል ውስጥ እያለች የኢትዮጵያ ሕመምተኞች አብዮታዊ ፓርቲ የሚባል ድርጅት አቋቁማ ነበር። ትዝ ይለኛል፣ ልጠይቃት በሄድሁ ቁጥር እሷ ያነቃቻቸው ህመምተኞች መድኃኒት መድኃኒት በሚሸት ክፍላቸው ውስጥ ተሰብስበው፣

“እንደ ቼጉቬራ፣ እንደ ቼጉቬራ፣”

“እንደ ቼጉቬራ፣ እንደ ቼጉቬራ፣”

በማለት በታላቅ ወኔ ይዘምሩ ነበር። አየህ ቼጉቬራም በህይወት ዘመኑ ሙሉ የአስም ህመምተኛ ነበር!”

መውጣትና መግባት - በዕወቅቱ ስዩም

 

ጥያቄ፡- አጠቃላይ ሰው ለአንተ ምንድነው?


“እንግዲህ መጻህፍቱ ይነግሩናል እንጂ እግዚአብሔርን በውል አናውቀውም። አላሸተትነውም፣ አልዳሰስነውም፣ እንግዲህ የእሱን ተአምራት የምንመለከተው በሰው ነው። ሰው እግዚአብሔር እስኪገኝ የምድር ላይ ተለዋዋጭ አምላክ ነው ብትፈልግ። ከሰውም ደሞ ሴት። ወንድ ትንሽ ሙቀት ከሰጣት እሷ ለመፍጠሩ ትበቃለች። እናት ብቻ ሳይሆን ሚስትም የምትሆነው ያቺው ሴት ነች። ልጅ ሆና ህይወት የምትቀጥለው በሷ ነው። ታዲያ እንዴት ከፈጠረች፣ ህይወት እንዲቀጥል ካደረገች አምላክ አትሆን? የወንድ ሥራ ዓለምን ማስተዳደር ብቻ ነው አጋፋሪነት። ሕይወት የሴት ናት።


ጥያቄ፡- ይቺ ገለፃህ ሩቅ ምሥራቅ ያለ የሕይወት ምንጭን የማምለክ ሥርዓት አስታወሰኝ። ከሚወልደውና ከሚወስድበት ብልት በላይ አምላክ የለም ይላሉ። አኗኗራቸውም ይሄንኑ ይከተላል። ለመሆኑ የእነሱ፣ የሩቅ ምሥራቆቹ አኗኗር አስቀንቶህ አያውቅም።


“አያስቀናኝም! ለምን ያስቀናኛል? ሩቅ ሆነው በጣም ደስ ይላሉ። ፀሐይ ልትጠልቅ ስትል ወደ ምዕራብ በኩል ያለው የደመናዎቹና የተራራዎቹ ቀለም ወደ ፅጌረዳ ማዘንበሉ በጣም ደስ ይልሃል። በቃ ከሱ ጋር ትቆያለህ። ግን እንደሱ በሆንኩ አትልም። የእነሱም የህይወት አተያይ እንደዛ ነው። እዛ ተወልጄ ቢሆን ደስ ይለኝ ነበር። እዚህ መወለዴ ግን ያ ቀረብኝ አያሰኘኝም። ከሩቅ ማየት በቂ ነው። እዚህ ላይ ነው ደግሞ የአባትህ የእናት ተፅዕኖ ጎልቶ የሚታየው። በምንም መንገድ፣ እንደገና መወለድ ቢቻል ከነድህነቱ፣ ከነጉድለቱ ወላጆቼ መልሰው ቢወልዱኝ ነው የምመርጠው። ሌላ ወላጅ ጥበብ የሚያውቅ፣ በቦቅስ የአለም አንደኛ የሆነ አልፈልግም።”


ጥያቄ፡- ጥያቄውን ከአንተ አንጻር አይቼ ነው ያነሳሁት። ወደ ሩቅ ምሥራቅ የተለየ እምነት ብቻ ሳይሆን አኗኗርም አለ። ሲያሻቸው ራቁታቸውን ይሄዳሉ (እንደ ማሃቬራ)፣ የተገለጠላቸውን ያስተምራሉ፣ ያልተስማማቸውን ይነቅፋሉ… እዚህ መፅሐፍ ፅፈህ ከ30 ዓመት በላይ እንዲታተም አልተፈቀደልህም። ፍላጎትህን፣ ምኞትህንም ባሰኘህ ሁኔታ እንዳትገልጽ ኅብረተሰቡ ክልከላ ጥሎብሃል። እነዚህ ገደቦች አቅጣጫ ስተህ እንድትፈስ የሚያደርግ አመፅ ሊፈጥሩብህና ሌሎችን የመሆን ምኞት ሊያሳድሩብህ ይችላሉ በሚል ነው።


“ሰዎቹ በሚጥሉት ክልከላ ታዛዥ የሆነ ባህርይ ያለው ይታዘዛቸዋል እንጂ እኔኮ ታዝዤያቸውም አላውቅም። ግን እንደ መንግሥቱ ገዳሙ “ያው አፈርሳቸዋለሁ!” እያልኩ በአደባባይ አላውጅም። ደንብ፣ ህግ ብትል እኔ በጣጥሼ ነው የምሄደው። ሰው እስካልጎዳሁ ድረስ ይሄ ህግ ለህዝቡ፣ ለሃገሩ ያስፈልጋል፣ ያለሱ እንዴት እንኖራን የሚባልበት ካልሆነ አልታዘዘውም። እግዜር ከፈለገ በኋላ የሚቀጣኝ ከሆነም (አይመስለኝም እንጂ) ይቅጣኝ ከፈለገ። አሁን እኔ ሙሴ እንዲህ አታድርግ አሉኝና ምኔ ናቸው? ምኔም አይደሉም። ስትወድደው ነው፤ ካልወደድከው ምንህም አይደል። ቅድም እንደ ተጨዋወትነው ነው። ሰው ለጊዜውም ቢሆን ፊት ለፊቴ የሚያየው፣ የሚዳስሰው፣ የሚጨብጠው ፈጣሪው ወላጁ ነው። ግን ደግሞ ካልተመቸው ለእሱም ጠላት ሆኖ “አጥፋኝ ወይ ላጥፋህ” ይለዋል። እንዲያ ነው።”
ስብሐት ገ/እግዚአብሔር - ህይወትና ክህሎት በአለማየሁ ገላጋይ

 

· ናይጀሪያን የመሰሉ ብዙ ቋንቋዎች የሚናገር ህዝብ ያላቸው አገሮች መስማት የተሳነው ፕሬዝዳንት ነው የሚያስፈልጋቸው።

· አዳምና ሄዋን ታይናዊያን ቢሆኑ ኖሮ እስካሁን ድረስ በገነት ውስጥ በኖርን ነበር። ምንክንያቱም የእፀ በለስ ፍሬውን ትተው እባቡን በበሉት ነበር።
· ከአንድ በላይ ሰው የምታፈቅር ከሆነ ውስጥህ ያለው ልብ ሳይሆን ሚሞሪ ካርድ ነው።
· ትዳር እያለህ ከተማሪ ሴቶች ጋር መቅበጥ ደስ የሚልህ ከሆነ ለሚስትህ የተማሪ ዩኒፎርም ግዛላት።
· አስቀያሚ ከሆንክ አስቀያሚ ነህ ስለውስጥ ውበት አትናገር። ምክንያቱም ኤክስ ሬይ እያየን አይደለም የምንሄደው።
· ነጮች በቡድን ወደ አፍሪካ ከመጡ ቱሪስት ይባላሉ። አፍሪካዊያን በብዛት ወደ አውሮፓ ሲሄዱ ግን ስደተኞች ይባላሉ።
· አምላክ ምርጥ ተመራማሪ ነው። ምክንያቱም ከወንድ ልጅ የጎድን አጥንት ወስዶ ድምፅ ማጉያ ፈጠረ።

 

ዢንግዞንግ የ15 ዓመት ውሻ ነው። ይህ ውሻ የዛሬ ስምንት ዓመት ገደማ በአንድ ግለሰብ አሳዳጊነት ተወሰደ። አሳዳጊው በቻይናዋ ዡንግዚንግ ግዛት ነዋሪ ሲሆን፤ ስራውን ሲከውን ውሎ ከ12 ሰዓታት ቆይታ በኋላ ነው ወደ ቤቱ የሚመለሰው። የሚገርመው ነገር ታድያ ውሻውም አሳዳጊው ወደቤቱ ሳይመለስ ወደቤት አለመግባቱ ነው። አሳዳጊው ለሥራ ከቤቱ ሲወጣ ተከትሎ የሚወጣው ውሻው፤ ለ12 ሰዓታት በሊዚባ ባቡር ጣቢያ ይጠብቀዋል። አሳዳሪው እስከሚመጣ ድረስም ሌላ ሰው የሚሰጠውን አንዳች ነገር ቅምስ አያደርግም። ይህን የታማኝነት ድርጊት ውሻው የሚተገብረው በየዕለቱ ሲሆን፣ ላለፉት ስምንት ዓመታትም ያለምንም ማቋረጥ ተግባራዊ ሲያደርገው ቆይቷል። በጣቢያው የሚተላለፉ በሺዎች የሚቆጠሩ መንገደኞች ቢተረማመሱም እርሱ ግን ምንም እንደማይመስለው የተነገረለት ቡቺ፣ ልክ አሳዳጊውን ሲያይ ግን በደስታ እና በፈገግታ ከተኛበት እንደሚነሳ ያስተዋሉት ተናግረዋል። ውሻው ይሄን ተግባሩን በየዕለቱ የሚተገብረው ማንም ሳያስታውሰው እና ሳያሳየው በራሱ ተነሳሽነት መሆኑም ተገልጿል። በዚህ ድርጊቱ እውቅናን ያተረፈው ይህን ውሻ ለመጐብኘት በርካቶች ወደ ባቡር ጣቢያው እየጐረፉ መሆናቸው ተገልጿል።

ውሻ ከሌሎች እንስሳት ሁሉ ታማኝ እንስሳ መሆኑ በተደጋጋሚ ሲገለፅ ይሰማል። ከዚህ በፊት ካፒቴን የተባለ ውሻ የአሳዳሪው መቃብር ላይ ለአስር ዓመታት ሲተኛ መቆየቱ እንዲሁም የአሳዳጊውን ሆስፒታል መግባት ተከትሎ አሳዳጊው ህይወቱ እስከሚያልፍ ድረስ ለአራት ወራት በሆስፒታል በራፍ ላይ ሲጠብቅ የቆየው ውሻ ታሪክ የሚታወስ ነው ሲል የኦዲቲ ሴንትራል ዘገባ አመልክቷል።

Page 1 of 52

Sendek Newspaper

Bole sub city behind Atlas hotel

Contact us