በቻይናዋ ሁናን ግዛት ለ15 ቀናት የሚቆይ የሚጥሚጣ ቃሪያ መመገብ ፌስቲቫል በመካሄድ ላይ ይገኛል። ቻይና ዴይሊ እንዳስነበበው ፌስቲቫሉ በየዓመቱ ከፈረንጆቹ ሐምሌ አጋማሽ እስከ ነሐሴ መጀመሪያ የሚከናወን ሲሆን፤ በፌስቲቫሉ ላይም ጠንካራ ሚጥሚጣ ደፋሪ ነን ያሉ ተወዳዳሪዎች የሚጥሚጣ ቃሪያ ቀርቦላቸው በመመገብ ይወዳደራሉ። ተወዳዳሪዎች (ለውድድር የሚቀርቡት ሰዎች) እያንዳንዳቸው 50 ሚጥሚጣ ቃሪያዎች የሚቀርቡላቸው ሲሆን፤ እነዚህን ሚጥሚጣዎች ቀድሞ በልቶ የጨረሰ ሰውም አሸናፊ ይሆናል ተብሏል። ለተወዳዳሪዎች የሚቀርቡት ሚጥሚጣ ቃሪያዎች የቀሉ እና የማቃጠል ደረጃቸውም ከፍተኛ መሆኑ በምርምር የተረጋገጠ መሆናቸው ተገልጿል። በዘንድሮው ፌስቲቫልም አስር ተወዳዳሪዎች ለፍልሚያ የቀረቡ ሲሆን፤ ለውድድሩ የቀረቡት ሚጥሚጣ ቃሪያዎችም የማቃጠል ደረጃቸው በመለኪያ መሣሪያው ከ30 ሺህ እስከ 50 ሺህ ባለው መካከል የሚገኙ መሆኑ ተገልጿል። በውድድሩ ወቅት የተለየ ችግር የተከሰተበትን ተወዳዳሪ ለመርዳት በማሰብም በፌስቲቫሉ ስፍራ ዶክተሮች እንዲገኙ ተደርጓል። ተወዳዳሪዎቹ በእንባ እየታጠቡ ሚጥሚጣዎቹን ሲያዳሽቁ ታይተዋል። በየዕለቱ አስር አስር ተወዳዳሪዎች እንደሚኖሩ የተገለፀ ሲሆን፤ ፌስቲቫሉ እስከ ነሐሴ መጀመሪያ እንደሚዘልቅም ተነግሯል።¾

 

እጅግ የሚዋደዱ ባልንጀራሞች ነበሩ። ያንደኛው እናት ሞቱና ሌላኛው ሳይቀብር በመቅረቱ ሲሸሸግ አንድ ቀን በመንገድ ላይ ይገናኛሉ። መውጫ ቀዳዳ የሌለበት ቦታ ስለነበረ ፊት ለፊት መጋፈጡን ተያያዘው።

 

“እማማ የሞተችለት ሰው በዝቶ ጋቢህን ይዤ ብጐትትህ አልሰማኽኝም። ከዚያም ወዲህ በጠና ታምሜ አሁን ሲሻለኝ ወዳንተ እየመጣሁ ሳለ በድንገት ተገናኘን” አለው አፉ እየተንቀጠቀጠ። ባልንጀራውም አለመምጣቱን በሚገባ ይረዳ ነበርና “ለመሆኑ የትኛው ቤተክርስቲያን ነበር የተቀበረችው?” ይለዋል።

 

“እንዴ! የተቀበረችውማ እናቲቱ ማርያም ነው” አለ በደመነፍስ።

 

“ኧኧ! እናቲቱ ማርያም?”

 

“አይ ልጅቱ ማርያም”

 

“ኧ! ልጅቱ ማርያም?” ብሎ ቢያጣድፈው “እንዲያውም አልተቀበረችም” ብሎ ሮጠ።  

 

ሙሻዙር - በመርሳዔ ሀዘን አበበ¾

 

ደበበ አቁማዳህ ያዞርካት ለመላ

ባዶ እንዳለች አለች ዛሬም ሳትሞላ።

      ችግሬን ደብቀህ ችግርክን ደብቄ

      ከባዶዬ ዘግነህ ከባዶህ ዘግኜ

      አንተ ወዳጅ አምነህ እኔ አንተን አምኜ፤

ችለን እንዳላለፍን አጥንታችን ገጦ

ዛሬ እንዲህ ሆነልን ታሪክ ተለውጦ።

      በየእምነቱ ሥፍራ መንገድ ላይ ተኝቶ

      እጁን ለምጽዋት ከፍ አድርጎ ዘርግቶ

      ሁሉም ለማኝ ሆኗል ኩራቱን ሰውቶ።

 

ጭራ’ንጓ -የግጥም መድብል

በአስናቀ ወልደየስ 2010

 

እግር ኳስ የአብዛኛው የዘመናችን ትውልድ የልብ ትርታ እየሆነ መጥቷል። አሁን አሁን እንደምንመለከተውም ሰዎችን በቡድን እየከፋፈለ ለከፍተኛ ፀብ እና ውዝግብም እየዳረገ ይገኛል። ከሰሞኑ በመካሄድ ላይ ያለው የ2018ቱ ዓለም ዋንጫም 14 አመታትን ያስቆጠረውን ትዳር አፍርሷል ይለናል የስካይ ኒውስ ዘገባ። ነገሩ እንዲህ ነው። የ40 ዓመቱ አርሰን እና የ37 ዓመቷ ላድሚይላ ሁለቱም ቅልጥ ያሉ የእግር ኳስ አፍቃሪዎች ናቸው። ጥንዶቹ የሚደግፉት የሀገራቸውን ተቀናቃኝ ቡድን ነው። ትዳር ለመመስረት የበቁትም እ.ኤ.አ. በ2002 በተካሄደው የዓለም ዋንጫ ወቅት ኳስ ለመመልከት በተገኙበት ስፍራ በተጠነሰሰ ፍቅር ነበር። ትዳራቸው ለ14 ዓመታት በሰላም የዘለቀ ቢሆንም፤ የ2018ቱ ዓለም ዋንጫ ግን የግንኙነታቸውን ክር በጥሶታል።

ባል እንደገለፀው ከሆነ ከባለቤቱ ጋር ብዙ ጊዜ በሊዮኔል ሜሲ እና በሮናልዶ ጉዳይ ይበሻሸቃሉ። ባል የሜሲ አድናቂ ሲሆን፣ ሚስት ደግሞ ስለ ሮናልዶ አውርታ የማትጠግብ ናት። የሰሞኑ የዓለም ዋንጫ እየተካሄደ ባለበት ወቅትም ሚስት እንደተለመደው ሜሲ ጨዋታ የማይችል መሆኑን አያነሳች ባሏን ማብሸቅ ትጀምራለች። ባል ለረጅም ጊዜ ማስቱን ቢታገሳትም እርሷ ግን ረገብ ልትል አልቻለችም። በሚስቱ ድርጊት አንጀቱ ያረረው ባልም፤ ሚስቱን በጥፊ ከመታት በኋላ እሷ ስለምታደንቀው ሮናልዶ እና የእግር ኳስ ክለብ መጥፎነታቸውን ይገልፁልኛል ያላቸውን ቃላት ሁሉ ይናገራታል። ይሄም አልበቃ ብሎት በቀጣዩ ቀን በከተማዋ ወደሚገኘው ፍርድ ቤት በማምራት ጋብቻውን ማፍረሱን የሚገልፅ የፍቺ ማመልከቻ አስገብቶ ከሚስቱ ጋር ተፋቷል። ኳስ የጠነሰሰው ትዳርም በ14 ዓመቱ በኳስ ፈርሷል።¾

 

የጥንት ግሪኮች ሜርኩሪ የሚባል አምላክ ነበራቸው። ይህም አምላክ በነበረበት ጊዜ አንድ እንጨት ሰባሪ ድሃ ሰው ይኖር ነበር። ይህም ሰው ጥልቅ ውሃ አጠገብ ከበቀለ ዛፍ ላይ ወጥቶ በምሳር ሲቆርጥ ሳያስበው ምሣሩ እጥልቁ ውሃ ውስጥ ወደቀበት። በዚህ ጊዜ፣ “ምሣሬ! ምሣሬ! እንጨት እየቆረጥኩ በመሸጥ ራሴንና ቤተሰቤን የምመግብበት ምሣሬ ጥልቅ ውሃ ውስጥ ገባችብኝ!” ብሎ ምርር ብሎ አዘነ። ምርር ብሎ ሲያዝንም ሜርኩሪ የተባለው የግሪክ አምላክ ሰማና ለምን እንደሚያዝን ጠየቀው። እንጨት ሰባሪውም ብዙ ልጆች እንዳሉትና ልጆቹን የሚመግብበት ምሣር በድንገት እንደወደቀችበት ነገረው።

ሜርኩሪ ይህን ሲሰማ አዘነና ወደ ውሃ ውስጥ ጠልቆ በመግባት አንድ የወርቅ ምሣር አመጣለት። እንጨት ሰባሪውም “ይህ የኔ አይደለም ጌታዬ” አለው።

ሜርኩሪ ለሁለተኛ ጊዜ ጠልቆ በመግባት አንድ ክብር የተሰራ መጥረቢያ አመጣለት። እንጨት ሰባሪውም “ይህም የኔ አይደለም ጌታዬ” ሲል መለሰለት።

ሜርኩሪ ለሦስተኛ ጉዜ ጠለቀና የራሱን መጥረቢያ ሲያመጣለት “በጣም አመሰግናለሁ ጌታዬ የኔ ንብረት ይኸው ነው” በማለት እጅግ ደስ እያለው ተቀበለው።

ሜርኩሪም የሰውየውን እውነተኛነት ሲያይ “በል ሁለቱንም ውሰዳቸው” በማለት የወርቁንና የብሩን መጥረቢያ ጨምሮ ሰጠው።

እንጨት ሰባሪው የወርቁንና የብሩን መጥረቢያ ይዞ እንደተመለሰም ሜርኩሪ በደግነቱ እንደሰጠው ለወዳጁ ነገረው።

ወዳጁም በመደሰት ፋንታ በውስጡ የምቀኝነት ስሜት አደረበት። ብዙም ሳይቆይ አሮጌ መጥረቢያውን ይዞ ወደ ተባለው ስፍራ ሄደ። እዚያ እንደደረሰም ዛፉ ላይ ወጣና እንጨት የሚቆርጥ መስሎ መጥረቢያውን ጣለው። ቀጥሎም “ኡ! ኡ! መጥረቢያዬን! መጥረቢያዬን! መጥረቢያዬን! ጣልኩ” እያለ መጮህ ጀመረ።

በዚህ ጊዜ ሜርኩሪ መጣና “ለምን ትጮሀለህ?” ሲል ጠየቀው። ሰውየውም “ይኸውና እንጨት ቆርጬ የምሸጥባት ያማረች መጥረቢያ ነበረችኝ። እሷም ውሃ ውስጥ ገባችብኝ። ከእንግዲህ ልጆቼን በምን እንጨት ቆርጬ አሳድጋቸዋለሁ” አለ።

ሜርኩሪ ወደ ውሃ ውስጥ ገብቶ አንድ በጣም ያማረ የወርቅና የብረት መጥረቢያ አወጣና “መጥረቢያህ የቱ ነው? የወርቁ ነው ወይስ የብረቱ?” ሲል ጠየቀው።

እንጨት ቆራጬም በጣም ስግብግብ ስለነበር “አዎን! እሱ ነው! የወርቁ ነው!” አለው።

ሜርኩሪ የሰውየውን መስገብገብና ሸፍጠኛ መሆን ተናደደና “ለዚህ እንኳንስ የወርቅ የብረትም አይገባውም” አለና ሁለቱንም ወደ ውሃው ወርውሮ ተሰወረበት ይባላል።

የራስ ያልሆነ ነገር ለማግኘት መሞከር የራስን ማጣት ብቻ ሳይሆን ከፍተኛ ትዝብት ላይም ሊጥል እንደሚችል አባቶች ሲያስተምሩ ልብ ብለን ልናደምጣቸው ይገባል።   

የኤዞፕ ተረቶች - ተሸመ ብርሃኑ - እንደገና እንደተረከው

 

ቻይናዊው ወጣት ውሃ አጣጩን ለማግኘት ያደረገው ጥረት እጅጉን ፈታኝ ሆኖበታል። ኒዩ ዢያንግፊንግ የተባለው የ31 ዓመት ወጣት ብታምኑም ባታምኑም 80 ሺህ ጊዜ የጋብቻ ጥያቄ አቅርቦ አንዱም ሳይሳካለት ቀርቷል። ኦዲቲ ሴንትራል እንዳስነበበው ወጣቱ ላለፉት ስምንት አመታት የህይወት ዘመን አጣማሪውን ፍለጋ እግሩ እስከሚነቃ ቢኳትንም፤ እስካሁን ግን አልተሳካለትም። ወላጅ አባቱ ከአመታት በፊት መሞታቸውን የገለፀው ኒዩ፣ የምትስማማውን ሚስት አግብቶ በእድሜ የገፉ እናቱን ለማስደሰት እና ቤተሰብ ለመመስረት ያደረገው እልህ አስጨራሽ ጥረት ዛሬም አልተሳካለትም። ኒዩ በ2013 ጀምሮ በቤጂንግ ጐዳና ላይ ሚስት እንደሚፈልግ የሚገልፅ ምልክት እና የማኅበራዊ ሚዲያ መገኛውን በማንገብ ወዲያ ወዲህ ይዘዋወር ነበር። አሁን ግን ያንን ዘዴ ትቶ የተለያዩ የመቀጣጠሪያ ድረ ገጾችን በመጐብኘት በርካታ ሴቶችን ለጋብቻ ጠይቋል። ያም ቢሆን፤ ውጤት ሊያስገኝለት አልቻለም።

ኒዩ እንደሚለው ባለፉት ስምንት ዓመታት ውስጥ 80 ሺህ ጊዜ የጋብቻ ጥያቄ አቅርቦ ሁሉም ውድቅ ሆኖበታል። በእነዚህ ዓመታት ውስጥ 60 ሺህ የጋብቻ የፅሁፍ መልዕክቶችን ለኢንተርኔት ቀጥታ-ለሴቶች የላከ ሲሆን፣ አብዛኞቹ ጥያቄውን እንደማይቀበሉት ሲገልፁለት፤ ሌሎች መልስም አልሰጡትም። በቤጂንግ ጐዳና ላይ እየተዘዋወረ የጋብቻ ጥያቄ ባቀረበባቸው ጊዜያት ውስጥም ቢያንስ ከ20 ሺህ እስከ 30 ሺህ ለሆኑ ሴቶች ጥያቄውን እንዳቀረበ ገልጿል። ከእነዚህ ሁሉ ሴቶች መካከል አንዷም ልታገባው ፈቃደኛ አልሆነችም። ኒዩ በእነዚህ ሁሉ ዓመታት እና ሙከራዎች ሚስት ማግኘት ላለመቻሉ የራሱ የሆነ ምክንያት ሰጥቷል። ቁመቱ አጭር እና መልኩም የማይስብ መሆኑ ሚስት እንዳሳጣው ነው የሚናገረው። የዘመኑ ሴቶች ረጅምና መልከመልካም የሆነ እንዲሁም ጣፋጭ ቃላትን መደርደር የሚወድ እና ከፍተኛ ደመወዝ እና በከተማ ውስጥ ቤት ያለው ወንድ ነው የሚፈልጉት ያለው ኒዩ፤ እርሱ ግን ከእነዚህ ሁሉ ነገሮች አንዱም እንደሌለው ገልጿል። ሴቷን ለማስደመም እና ወደራሱ ለመሳብ ሲልም ያልሆነውን ነኝ ብሎ ሀሰት የመናገር ፍላጐት እንደሌለው ሲናገር፣ ሌሎች ግን ኒዩ የአጠያየቅ ስልት ባለማወቁ እና ፍቅርን በግዳጅ ማግኘት መፈለጉ ለዚህ እንደዳረገው እየጠቀሱ ይገኛሉ።¾

 

ትዳር አለሽ ወይ አንቺ የሃያ አንድ እርጉዝ

ጥሪሽ በዝቶብናል ትወልጂ ይሆን ንጉስ

      ውል የለሽ አንቺ ሴት ምጥሽም ቢከፋ

ተስፋ እናድርግ ወይ ሆድሽ ስለገፋ

ልጅ እዳ እንዳይሆን ቤታችን የሚያስከፋ

      ለሰርግም ለለቅሶም ጥሩንባ ይነፋል

      እድርተኛው ነፍሴ መቼ አርፎ ያውቃል

      ያልቆረጠ ቁርጠት ሲያስከፋው ይኖራል።

            ተራራ የፈሩ እታች የሰፈሩ

            በጎርፍ ሲጠረጉ ስንት ቀን አፈሩ

            ድፍረት ላይጋሩ ፍርሃት ተበደሩ   

            የቆሙበት መሬት ሸሻቸው አፈሩ

      ጠይቆ የመጣ!

      እጅ ያውጣ (2x)

      እጅ ያውጣ (2x)

      እነማን ነበሩ?

            መንደሩ ጭር ብሏል ሰው የለም ባገሩ

            ትዳር ፈተው ፈተው ሚስታቸው የዳሩ

            ነውር ተረስቷል ተሰብሯል ድንበሩ

ሞትን ሞት ይሙተው - በፈይሳ ተመስገን¾

 

እቴጌ ጣይቱ ጀግና ልብ የነበራቸውን ያህል ለምለም ማህፀን አልነበራቸውም። መካን ነበሩ። ይሁንና አንጥረኞች ከብሩም ከነሐሱም የሕፃን አሻንጉሊት እየሠሩ ያመጡላቸዋል። አንድ ወቅት አንድ የአናጢነት ሙያ የነበረው ሰው ከሰም የተሠራች ማለፊያ ሕፃን አምጥቶ ይመለከታሉ። በመሃሉ አለቃ ይገባሉ።

“ደስ ይበልዎ አለቃ ልጅ ወለድሁ” አሉ እቴጌ።

“እንኳን አብሮ ደስ አለን” አሉ አለቃ። “ይቺ ሕፃን ደስ አትልም? በተለይ ዓይኗ?” ይላሉ እቴጌ።

“በኃይል እንጅ” አለቃ። “ብቻ” የእቴጌ ልጅ ሆና በዓይንማ አትታማም አሉ አለቃ መልሰው ለቅኔው መንገድ ሲያስተካክሉ።

“ብቻ ምን?” አለቃ! የእርስዎ ነገር አያልቅብዎ - እኮ “ብቻ ምን” እቴጌ ጠየቁ

“ብቻማ የንጉሠ ነገሥት ልጅ ነችና ስድ አደግ ሆና እንዳትቀልጥብዎ ብዬ ነው እንጅ አሉ” አለቃ።

ሙሻዙር - በመርስዔ ሐዘን አበባ¾

 

ሌብነት በየጊዜው መልኩን እየቀያየረ ሲመጣ እንሰማለን፤ እናያለን እንጂ ሌብነት የሌለበት ነገር አለ ብለን የምንገምት አይመስለኝም። ዩሮኒውስ ግን የዓለማችን ሌብነት የሌለባትን ከተማ ሰሞኑን ይፋ አድርጓል። ይህች ከተማ አቤንታል የምትባል ሲሆን፤ የምትገኘውም በምዕራብ ሮማኒያ ነው። በዚህች ሀገር ላይ በብዛት የሚኖሩትም የቼክ ጎሳዎች ናቸው። በዚች ከተማ ፖሊስ ጣቢያ የሚባል ነገር የለም። ለነገሩ አስፈላጊም አይደለም። ህዝቦቿም እርስ በርሳቸው የሚከባበሩ እና አንዳቸው የሌላኛውን ንብረት የማይነኩ ናቸው። ህዝቡ ሰላማዊ ህይወትን የሚመራ እና ወንጀልም የማይፈፅምበት ከተማ ነው።

ከወንጀሎች አንዱ የሆነው ሌብነትን ስናይ ደግሞ በዚህች ከተማ በፍፁም የለም። አንድ ሰው ዳቦ መግዛት ሲፈልግ ገንዘቡን እና የሚፈልገውን መጠን ጽፎ በቦርሳ አድርጎ ጎዳና ላይ በማስቀመጥ ወደፈለገበት ይሄዳል። ዳቦ አከፋፋዩም ገንዘቡን ወስዶ የታዘዘውን ያህል ዳቦ እና ገንዘቡም መልስ ካለው መልሱን በአንደ ላይ አድርጎ በመብራት ፖል ወይም በግለሰብ አጥር ላይ ይሰቅለዋል። ያን ቦርሳ ባለቤቱ መጥቶ እስከሚወስደው ድረስ ማንም የሚጠብቀው ሰው ባይኖርም ከባለቤቱ ውጪ ንክች የሚያደርገው ግን የለም። በዚህ መልኩ እየኖሩ ታዲያ ላለፉት ሀያ ዓመታት አንድም ሰው ገንዘቤ ጠፋብኝ፣ ዳቦው አልደረሰኝም ወይም ሌላ ስርቆሽ ተፈጸመብኝ ብሎ አላመለከተም።

ይህች ከተማ እ.ኤ.አ. ከ1996 ዓ.ም ጀምሮ ነው በዚህ ዝናዋ የምትታወቀው። ዝናዋ ከሌብነት የነፃች ከተማ በመሆኗ ብቻ አይደለም። ይልቁንም ህዝቡ እርስ በርሱ የሚከባበር ሲሆን፤ አንዱ የሌላውን ንብረት ያለፈቃድ በፍፁም አይነካም። አንድ ሰው ወደ ሰው ቤት ሲያመራ በር ላይ ቆሞ የባለቤቱን ስም ይጠራል። ከቤቱ ውስጥ ሰው ወጥቶ እንዲገባ ከጋበዘው ብቻ ነው ወደ ውስጥ የሚዘልቀው። ከውስጥ ምላሽ የሚሰጠው ሰው ከሌለ ግን ወደመጣበት ይመለሳል። በከተማ የጋራጅ ባለቤት የሆነ አንድ ግለሰብ እንደገለፀውም ጋራጁ ሁልጊዜም ክፍት እንደሆነ ገልጾ ያለምንም ጥበቃ ውሎ እንደሚያድር እና ማንም ሰርቆት እንደማያውቅ ገልጿል።

 

-    የሌሊት ወፍ ልጇን የምትወልደው በእንጨት ቁልቁል ተዘቅዝቃ በመሰቀል ሲሆን፤ ልጇንም በክንፏ መሬት ከማረፉ በፊት ትይዘዋለች።

-    ንብ ልክ እንደ ሰው ልጅ ሁሉ በግብረ ስጋ ግንኙነት በሚተላለፉ በሽታዎች ትያዛለች።

-    ድመት የጣፋጭን ቃና የሚለይ የሰውነት ክፍል ስለሌላት ስኳርን አታጣጥምም

-    በ1924 አንድ የላብራዶር ዜጋ የሀገሪቱን ገዢ ድመት በመግደሉ በሞት ተቀጥቷል።

-    በ18ኛው ክፍል ዘመን በእንግሊዝ የነበሩ ቁማር አጫዋቾች ፖሊስ ሲመጣ የመጫወቻ ኳሱን የሚውጥ ሰው ይቀጥሩ ነበር።

-    ካላማ በተባለው የቺሊ በረሃ ላይ እስከ አሁን ድረስ ዝናብ ዘንቦ አያውቅም።

-    የኢንዲያና የኒቨርስቲ በዓመት አንድ ኢንች ያህል ይሰምጣል።

-    በቤታችን ውስጥ ከሚገኙ ቆሻሻ ነገሮች መካከል አብዛኞቹ ከሞቱ ሴሎች የሚመጡ ናቸው።

-    በአንድ ሰው ቆዳ ላይ የሚገኙት ህይወት ያላቸው ነገሮች በምድራችን ላይ ካሉ የሰው ልጆች ቁጥር በላይ ነው።

-    ህፃናት ሲወለዱ የጉልበት ሎሚ የሌላቸው ሲሆን፣ ሎሚው የሚፈጠረው ከሁለት እስከ ስድስት ዓመት ባለው እድሜ ውስጥ ነው።

Page 1 of 53

ድርጅትዎ ያስተዋውቁ!

  • Advvrrt4.jpg

እዚህ ያስተዋውቁ!

  • Aaddvrrt5.jpg
  • adverts4.jpg
  • Advertt1.jpg
  • Advertt2.jpg
  • Advrrtt.jpg
  • Advverttt.jpg
  • Advvrt1.jpg
  • Advvrt2.jpg

 

Advvrrt4

 

 

 

 

Who's Online

We have 40 guests and no members online

Sendek Newspaper

Bole sub city behind Atlas hotel

Contact us