ጊዜ ቆጣቢው ሥራ አስኪያጅ

Wednesday, 18 January 2017 10:08

 

ሥራ አስኪያጁ ዕድሜው በግምት ሃምሳ ዓመት የሚጠጋው ጎልማሳ ነው።  ጀርመን አገር ተምሮ ከመጣ ወዲህ የጀርመኖች ታታሪነት ተጋብቶበት፣ በቀሪው ሕይወቱ አንዲት ሰከንድ ላለማባከን ቃል ገብቷል ይባላል።  ለምሳሌ፡- የሚለብሰው ሹራብ በፊትም በጀርባም ኪስ አለው፣ ምክንያቱም አዙሬ ለበስሁት አለበስሁት የሚለውን በማጣራት ጊዜ እንዳያባክን ነው።  ሽንት ቤት ሲገባ እንኳ የጀመረውን ሥራ ይዞ ይገባል፤ ታዲያ የሽንት ቤቱ በር ሲንኳኳ መጸዳጃ ቤት ውስጥ መሆኑን ዘንግቶት፣ “ይግቡ” ብሎ ይጋብዛል፤ ይባላል።  ከዕለታት አንድ ቀን ባለቤቱ፣ “የኔ ውድ! ምነው የሻይ ሰዓት እንኳ የለህም?” ብትለው፣ “በሻይ ንግድ እንጂ በሻይ ሰዓት የከበረ ሕዝብ የለም፣” ብሎ መልሶላታል ይባላል።  ከስንት አንድ እሁድ ለሁለት ሰዓታት ያህል ዕረፍት ያደርጋል።  በዚህ ጊዜ የሚወደው የጊዜ ማሳ ለፊያ እጁን ወደ ኋላ ሸርቦ በእግር መንሸራሸር ነው፤ ታዲያ በእግሩ እየተንሸራሸረም ሥራ እንዳይፈታ፤ እርምጃዎቹን ይቆጥራል ይባላል።

ሥራ አስኪያጁ ቢሮ ገብቼ፣ ጉዳዬን በጥቂት ቃላት አስረድቼ ከቋጨሁ በኋላ ውሳኔውን ጥበቃ ዐይን ዐይኑን ማየት ጀመርሁ።  መልስ ሳይሰጠኝ ከፊቱ የነበረውን የስልክ እጄታ አንስቶ ቁጥር ከመታ በኋላ፣ ለእሱ ከካፌ ማኪያቶ እንዲላክለት አዘዘ፣ ወደ እኔ ፊቱን መልሶ፣ “Was Mochten Sie?” (ምን ትወስዳለህ?)ብሎ ጠየቀኝ።  መቼም በአማርኛ ሊጠይቀኝ ይችል ነበር።  ግን ይህ ሰው ምንም ነገር ማባከን አይፈልግም፣ ባንድ ዐረፍተ ነገር ግብዣ ማቅረብ ብቻ ሳይሆን ጀርመንኛ መፈተን እንደሚቻልም ያምናል።

ዳቦ እና ሻይ እንዲጋብዘኝ ፈልጌ ነበር፤ ግን ዳቦ እና ሻይ በጀርመንኛ ምን ማለት እንደ ሆነ አላወቅሁም፤ አላዋቂነቴን ከማጋለጥ ዳቦ እና ሻዩን ማጣት መርጨ፣ “Wasser (ውኃ)” ብዬ መለስሁ።  እነሆ እሱ ማኪያቶውን እያጣጣመ፣ እኔ ጉንጭ የሚቆረጥም ቀዝቃዛ ውኃ እየተጋትሁ ቁጭ ብለናል።  

ሥራ አስኪያጁ ማኪያቶውን እየጠጣ የሆነ ነገር በወረቀት ላይ ጽፎ አቀበለኝ።  ለሶስት ቀናት የሚቆይ ፈቃድ ማግኘቴን የሚገልፅ ወረቀት ነው፤ ላመስግነው ብድግ አልሁ፣ ግን ምስጋናዬ ጊዜውን እንዳያባክንበት  ሰግቼ በቀጥታ ወደ በሩ አመራሁ።  ወዲያው ግን ምናለ የመታከሚያ ገንዘብ ቢሰጠኝ የሚል ምኞት መጣብኝ።  ምኞቴ ተስፋ ሆነና ከአሁን አሁን ይጠራኛል በማለት አረማመዴን እያዘገየሁ ተራመድሁ።  እውነትም የበሩን እጀታ እንደ ጨበጥሁ ከኋላዬ ጠራኝ።

“አቤት”

“ሃያ ሁለት ማዞሪያ የሚገኘውን ሶፍ ዑመር ባንክ ታውቀዋለህ?” ሲል ጠየቀኝ።

“አዎ!” አልሁ፣ ባንድ በኩል ፈገግታዬን በቁጥጥር ሥር ለማዋል እየሞከርሁ፣ በሌላ በኩል ከጠረጴዛው ላይ የቼክ ደብተር በዐይኔ እየፈለግሁ።

“ከባንኩ አጠገብ ዘመናዊ ክሊኒክ ተከፍቷል፣ እዚያ ብትሄድ ጥሩ ነው!” አለኝና ወደ ስሌት መኪናው አቀረቀረ።  በጣም አዝኜ ወጣሁ።  ለነገሩ ጥፋቱ የእኔ ነው።  ጥፋቴ፣ ተስፋን የሙጥኝ ማለቴ።  በውነቱ፣ ተስፋ የገቢ ምንጭ የሚሆነው ለሎተሪ አዟሪዎች ብቻ ነው።  ግን ምነው መተዛዘን ጠፋ? “ሁለት ኮት ያለው አንደኛውን ኮት ለባልንጀራው ይስጥ!” ተብሎ በወንጌል ተጽፏል? አንባቢ ሆይ፣ በዚህ ዘመን፣ አበበ ሁለት ኮት ካለው አንደኛውን ኮት ለከበደ ከሰጠው፣ ከበደ ላውንደሪ ቤት አለው ማለት ነው።  

                        መግባትና መውጣት - በእውቀቱ ስዩም

ይምረጡ
(0 ሰዎች መርጠዋል)
411 ጊዜ ተነበዋል
በዚህ አምድ: « ማ? ፅናት »

ድርጅትዎ ያስተዋውቁ!

  • Advvrrt4.jpg

እዚህ ያስተዋውቁ!

  • Aaddvrrt5.jpg
  • adverts4.jpg
  • Advertt1.jpg
  • Advertt2.jpg
  • Advrrtt.jpg
  • Advverttt.jpg
  • Advvrt1.jpg
  • Advvrt2.jpg

 

Advvrrt4

 

 

 

 

Who's Online

We have 949 guests and no members online

Sendek Newspaper

Bole sub city behind Atlas hotel

Contact us