ተስፋ እንደ ምትሐት

Thursday, 13 July 2017 14:30

 

ነጋ

 

 

የግዜር ስውር  መዳፍ

ልክ እንደፓፒረስ፣ እንደግብጦች መጣፍ

ወይም እንደጥንቱ፣ ያበጅፋር ምንጣፍ

ጨለማውን ስቦ፣ በወግ ሸበለለ

ሰማይ የጠፈር ዓይን፣ ብርሃን ተኳለ

ከዶሮ ጩኸት ውስጥ፣ አዲስ ጎሕ ተወልዶ

ፍጥረቱ በሙሉ፣ ማርያም ማርያም አለ፤

 

ነጋ

 

 

አልጋየን ሰብሬ

አንሶላ ተርትሬ

ባዲሱ ጉልበቴ

በታደሰ አሞቴ

ልኖር ተዘጋጀሁ

እንደጣዝማ ቅንጣት

ከሚጣፍጥ ሞቴ

ትንሳኤየን ዋጀሁ፤

 

ነጋ

 

እንደምትሐተኛ፣ ተስፋ ሲያታልለኝ

አዲሱ ማለዳ፣ “ዛሬን ሞክር” ሲለኝ

የዛሬው እጣየ

ከትናንት ጣጣየ

የሚለይ መሰለኝ።

(“የማለዳ ድባብ” - ከተሰኘው አዲሱ የበዕውቀቱ ሥዩም የግጥም መድብል የተወሰደ)

ይምረጡ
(0 ሰዎች መርጠዋል)
204 ጊዜ ተነበዋል

Sendek Newspaper

Bole sub city behind Atlas hotel

Contact us