“እንደፈራነው አይደለም…”

Wednesday, 28 March 2018 12:32

ባንድ አገር ጦርነት ተነሳና ለአካለ መጠን የደረሰ ወንድ ልጅ በሙሉ እንዲሰለፍ ታወጀ። ሁሉም ስንቁን ባህያ አመሉን በጉያ ይዞ ዘመተ። አንድ ፈሪ “አልዘምትም” ብሎ ሲያንገራግር ከቆየ በኋላ “ካልዘመትህ መሬት አታገኝም፣ ሚስት አታገባም፣ ከሰው አትቆጠርም” ብሎ ምስለኔው አዘመተው። ከሱ ሰፈር ዘጠኝ ጎበዛዝት ጓደኞቹ አብረው ዘምተዋል።

 

ይህ ነፍሱን በነጠላው ጫፍ የቋጠረ ዛርጢ ጥይት ሳይሰማ በድርጭት እንቅስቃሴ እየበረገገ ስላስቸገረ ከጦርነቱ መሀል ገብቶ ስም ከሚያጠፋና ሬሳ ከሚያበዛ ስንቅ አጋስስና አህያ እንዲጠብቅ ተወሰነ። እንደልማዱ እየበረገገ መንጋ ሲጠብቅ ከርሞ ተመለሰ። ጀግኖቹ እየጣሉ ወድቀው አገራቸውን አስከብረው ቀሩ።


ዛርጢ ከተማ ሲገባ ዋና ወሬ አላስጨብጥ አለ። ስለጦርነቱም ማብራሪያና መግለጫ ለመስጠሰት ከጀለ። የጦር ሜዳውን ሁኔታ እያነሳ አስቸገረ።


“ለመሆኑ የት ነበር የዘመትኸው?” አለው አንዱ
“ራያ” አለ ዛርጢ
“ስንት ሆናችሁ ዘመታችሁ?”
“አስር ነበርን”
“ስንታችሁ ተመለሳችሁ?”
“እንደፈራነው አይደለም። ከአስሩ እኔ ተመለስሁ” አለ ዛርጢ።


ሙሻዙር
ከመርስዔ ኀዘን አበበ

ይምረጡ
(0 ሰዎች መርጠዋል)
57 ጊዜ ተነበዋል

Sendek Newspaper

Bole sub city behind Atlas hotel

Contact us