ከአክሱም ጫፍ አቁማዳ

Wednesday, 25 April 2018 12:38

 

ትግራይ ላከ ወሎጋ አበድረኝ ብሎ አንድ ቁና ጤፍ

ወሎም አፈረና የለኝም ማለቱን ባህሉን መዝለፍ

                        ቆሌውን መንቀፍ

ላከ ወደ ሸዋ ምናልባት ቢሰጠው ለሰው እሚተርፍ።

ሸዋም አፈረና የለኝም ማለቱን ወደሐረር ዞረ

ሐረርም መልሶ ባሌን አተኮረ

ባሌም ወደአርሲ፣ አርሲ ሲዳሞን

ሲዳሞም ተክዞ፣ ግን የለኝም ብልሳ ማን ያምነኛል ብሎ

ወደጋሞ ላከ አቁማዳ ጠቅሎ።

ጋሞን ብርድ መታው ሐዘን ገባውና

የራሱን ምንዳቤ የግል ስቅየቱን ችሎት በጥሞና

በጋቢ ደቡኖ የልቡን ጠባሳ ሲኖር እንደደህና

ዛሬ የወንድሙን የእርዳኝ አቤቱታ መስማት አልቻለና።

አውጥቶና አውርዶ ላከ ወደ ከፋ እጅግ አስተዛዝኖ

ከሀፍረት ያድነኛል፣ ከረሀብ ያወጣኛል ሲል ባያሌው አምኖ።

ከፋ እንደደረሰው በድንገት አቁማዳው በነብሱ ዋይታ

ሐራራው ተሰማው የሥጋው ድንፋታ

በብልሀት እዛጋ ቆይቶ ቆይቶ የተስፋ ጠል ቀዳ

ሲልክ ከኢሊባቦር አበድረኝ ብሎ እህል በአቁማዳ።

ጭምቱ ኢሊባቦር ይኖር የነበረ የቤቱን ጉድ ጓዳ

      በሞኛሞኝ ገላው ቆዳወ ውስጥ ወሽቆ

ጠየቀ ወለጋን ሐፍረቱን ደብቆ ኩራቱን ዘቅዝቆ።

ኬት አመጣ ብሎ ወደኔ ላከብኝ እያ ወለጋ እጅጉን ተደሞ

ሄደ ወደጎጃም ዛሬን ሁነኝ ብሎ ሊማጸነው ቁሞ።

ጎጃምም ተሰምቶት፣ ሰቀቀን ሐዘኑ፣

      ደረት እየመታ፣ ቅኔ እያወረደ፣ እንባ እያፈሰሰ

ወግና ኩራቱን በየቦዳው መሀል እየነሰነሰ

      ዐባይን ተሻግሮ ከጎንደር ደረሰ።

ፋሲል ላይ ተነጥፎ፣ ጎንደርም ሐዘን ላይ ነበረ ተቀምጦ

ተድላ ልጁ ሙቶ፣ ገናን ክንዱ ታጥፎ፣ በዘመን ተድጦ

ጎጃም መጣ ሲሉት የእዝን የተመኝን ልቡን በታዘበ

      የኩራት ካባውን ሊጥል ባንጓበበ

የወንድሙ መምጣት፣ እቅጩ መንስዔ፣ መሆኑን ሲረዳ ረሀብ አበሳ

ጥንትም አልሆነኝም ከእንግዲህ ይበቃኛል ለይሉኝታ አልሳሳ

      ብሎ ከኤርትራ እህል ለመበደር በርትቶ ተነሳ።

የዘመዱ እጦት ነበርና እጦት በዝቶ ሰቀቀኑ

ኤርትራ ታመመ ደም ጎረፈ ከዓይኑ

ወደትግራይ ላከ መላ ባገኝ ብሎ ከአደራ ደብዳቤ

“እባክህ ላክልኝ አንድ አቁማዳ እህል ልሞት ነው ተርቤ።”

ትግራይ አስተውሎ አቁማዳው የራሱ መሆኑን ለይቶ

ረሀብ ዕጣቸው የሁሉ ወንድሞቹ መሆኑን አካቶ

ሐዘኑ አነቀው፣ ትንፋሹ መረረው ትካዝ ሆዱ ገብቶ።

“እኔና ወንድሞቼ” አለ በለዘብታ

ለራሱ እንዲያወራ የራሱን ስሞታ፣

“እኔና ወንድሞቼ ሁላችን.. ሁላችን

ከባዶ አቁማዳ ነው እሚዛቅ ፍቅራችን

ይህ ነው አንድነታችን

ይን ነው ባህላችን

ዘመን ማዛጋቱ በያንደበታችን።

ለኋላ ትውልዶች ተረት እንዳይመስል ይህ ብካይ እሮሮ

ይህ ጠፍ ሰብእና ይህ ስቁይ አእምሮ

እንዳኖረው ያሻኛል ይህንን አቁማዳ ከፍ ካለስፍራ

      መጥቶ እንደባንዲራ

ምንም ባዶ ቢሆን በውስጡ አይጠፋና የታሪክ አዝመራ።”

ይህን ተናግሮ ከአክሱም ሐውልት ዘንድ ትግራይ ተጠግቶ

አንዴ እየፀለየ አንዴ እያወዘመረ ያለመጠን ተግቶ

ጫፉ ላይ ሰቀለው ያን አቁማዳ አውጥቶ።

           የብርሃን ፍቅር (ለራስ የተፃፈ ደብዳቤ) - ደበበ ሠይፉ

ይምረጡ
(0 ሰዎች መርጠዋል)
94 ጊዜ ተነበዋል

ድርጅትዎ ያስተዋውቁ!

  • Advvrrt4.jpg

እዚህ ያስተዋውቁ!

  • Aaddvrrt5.jpg
  • adverts4.jpg
  • Advertt1.jpg
  • Advertt2.jpg
  • Advrrtt.jpg
  • Advverttt.jpg
  • Advvrt1.jpg
  • Advvrt2.jpg

 

Advvrrt4

 

 

 

 

Who's Online

We have 461 guests and no members online

Sendek Newspaper

Bole sub city behind Atlas hotel

Contact us