You are here:መነሻ ገፅ»ርእሰ አንቀፅ
ርእሰ አንቀፅ

ርእሰ አንቀፅ (202)

 

ኢትዮጵያ ሠላምና መረጋጋት ርቋታል። የህዝብ ተቃውሞዎች የዜጎች ሞትና አካል መጉደል ብሎም የንብረት ውድመት መከሰት ከጀመረ ሶስት ዓመታት ተቆጥረዋል። መንግስት በሀገሪቱ ላሉት ተቃውሞዎች ምላሽ ለመስጠት በርካታ እርምጃዎችን ሲወስድ የቆየ ቢሆንም፤ ይህ ነው የሚባል መፍትሄ ግን ሊመጣ አልቻለም።

በኦሮሚያና በአማራ ክልሎች የተነሱትን ህዝባዊ አመፆች ተከትሎ መንግስት አስቸኳይ ጊዜ አውጆ፤ በዚሁ አስቸኳይ ጊዜ ውስጥ በነበሩት ጊዜያት ለችግሮቹ መፍትሄ ለማፈላለግ በርካታ የፓርቲና የመንግስት ሥራዎች ሲሰሩ ቆይተዋል። በወቅቱ በተለያዩ ቦታዎች ተነስተዋል በተባሉት ህዝባዊ አመፆች በህግ ጥሰት ተሳትፈዋል ተብለው በቁጥጥር ሥር የዋሉ በርካታ ወጣቶች የተሃድሶ ትምህርት የተሰጣቸው መሆኑ ከተገለፀ በኋላ “አይደገምም” የሚል ቲሸርት ለብሰው በቴሌቭዥን መስኮት ሲታዩ፤ በእርግጥም ነገሮች እዚያ ላይ የሚቋጩ ይመስል ነበር።

 

 ሆኖም ከዚያ በኋላም ገዢው ፓርቲ እንደ ግንባር ብሎም አባል ድርጅቶቹ በተናጠል የየራሳቸውን ውስጠ ድርጅታዊ ግምገማ በማድረግ በሀገሪቱ ለተፈጠሩት ችግሮች “መፍትሄ ነው” ያሉትን ሀሳብ በማቅረብ ለተግባራዊነቱ ህዝባዊ ጥሪ ቢያቀርቡም ዛሬም ተቃውሞው ሊቆም አልቻለም።

 

ይህ ከሆነ መንግስት ለተፈጠረው ፖለቲካዊ ችግር “ደረስኩበት” ካለው ችግር በላይ ሌላ የገዘፈ ሀገራዊ ችግር አለ ብሎ መናገር ያስደፍራል። በመሆኑም ገዢው ፓርቲ ሀገሪቱን ከመፃኢ ፖለቲካዊ ምስቅልቅል በዘላቂነት ለመታደግ ወደ መፍትሄው ከመሮጥ ይልቅ በመጀመሪያ የችግሩን መንስኤ ግዝፈትና ጥልቀት በሚገባ መለየት መቻል አለበት። ስር ለሰደደ አገራዊ ችግር የዕለት ፖለቲካዊ መፍትሄ በመስጠት ጉዳዩን ቀለል አድርጎ ለማለፍ መሞከር መንግስትን መልሶ በእሳት ማጥፋት ሥራ ውስጥ እየከተተው ይገኛል። በኢትዮጵያ አሁን ባለው በተጨባጭ ሁኔታ እየታየ ላለው ፖለቲካዊ ችግር ዘላቂ መፍትሄ ለመስጠት በቅድሚያ የችግሩን ምንነትና ምንጭ መለየት አስፈላጊ ከሆነ፤ ይህ ጉዳይ የሚመለከተው ገዢውን ፓርቲ ብቻ ሳይሆን “በኢትዮጵያ ጉዳይ ያገባናል” የሚሉ ልዩ ልዩ ኢትዮጵያዊያን  የፖለቲካ ኃይሎችን ጭምር መሆን አለበት።

 

በሀገሪቱ እየታዩ ላሉት የፖለቲካ መመሰቃቀሎች ፓርቲው ይበጃል ያላቸውን የመፍትሄ ሀሳቦች ባቀረበበት ሁኔታ ህዝባዊ ተቃውሞዎች ከቀጠሉ ችግሩ ሊታይ የሚችለው በሶስት አቅጣጫ ነው። አንደኛው መንግስት በሚወስናቸው ውሳኔዎች ተግባራዊነት ህዝብ አመኔታ እያጣ መሄዱን የሚያሳይ ሲሆን ይህ ካልሆነ ደግሞ በፓርቲው በኩል የቀረቡት የመፍትሄ ሀሳቦች በህዝቡ በኩል ተቀባይነት አላገኙም ማለት ነው። በሶስተኛ ደረጃ ሊታይ የሚችለው በኢትዮጵያ ፖለቲካ ውስጥ ከገዢው ፓርቲ ባለፈ ሌላ ተጨማሪ መፍትሄ አፈላላጊ አካል መኖር ያለበት መሆኑን ነው።

 

 ኢህአዴግና አባል ድርጅቶቹ ያቀረቡት የመፍትሄ ሀሳብ በእርግጥም መፍትሄ መሆን ካልቻለ ዘለቄታዊ መፍትሄው መፈለግ ያለበት ከራሱ ተቃሞውን እያሰማ ካለው ህዝብ ነው። ህዝብን በፖለቲካ መዋቅር ጠርንፎ ከማወያየት ይልቅ በራሱ ነፃ መድረክ ችግሮቹን እንዲያቀርብ ማድረግ ግድ የሚልበት ሰዓት አሁን ነው። በእነዚህ ህዝባዊ መድረኮች የሚቀርቡ ሀሳቦች የፓርቲው የውሳኔ ግብዓቶች መሆን ከቻሉ የዚያን ጊዜ መፍትሄ ማግኘት ይቻላል።

 

 የህዝቡ ጥያቄ በፓርቲው እንደ ቀኖና የሚታዩ የፖለቲካ ዶክትሪኖችን ጭምር የሚንድ ከሆነ፤ ፓርቲው ለዚህ ጥያቄ አዎንታዊ ምላሽ ለመስጠት ዝግጁ መሆን መቻል አለበት። አለበለዚያ በሄድንበት መንገድ እየተመለስን ራሳችንን በዜሮ ድምር ፖለቲካ ውስጥ ዘፍቀን ወደ ከፋ የፖለቲካ ምስቅልቅል ለመግባት የምንገደድበት ሁኔታ ይፈጠራል። ይህ ደግሞ ለማንም አይጠቅምም። ከኢህአዴግ በፊት ለሺህ ዘመናት የነበረችው ኢትዮጵያ ህልውናዋ ከፓርቲ ህልውና ጋር እንዲያያዝ ማድረግ ግን በመጨረሻ የሚያስከትለው ውጤት ለማንም የሚጠቅም አይሆንም።      

በአዳማ ለአስር ቀናት የኦሮሞ ሕዝብ ዴሞክራሲያዊ ድርጅት ማዕከላዊ ኮሚቴ ባደረገው ስብሰባ “በኦሮሚያ ክልል ፖለቲካ ውስጥ ያገባኛል” ከሚሉ በሀገር እና በውጭ ሀገር ከሚገኙ ተቀናቃኝ የፖለቲካ ኃይሎች ጋር በጋራ ለመስራት ውሳኔ አሳልፏል።

በግልጽ ቋንቋ ለማስቀመጥ ከኦሮሞ ሕዝብ ብዛት እና ፍላጎት አንፃር ሲመዘን በአንድ የፖለቲካ ፓርቲ ጥረት ብቻ ምላሽ መስጠት ከበድ ይላል፤ ፈጽሞ አይቻልም ብሎም መደምደም አደጋች ነው። ቁም ነገሩ ያለው በአሳታፊና ዴሞክራሲያዊ ምርጫ የሕዝብ ሥልጣን በሚያዝበት መንገድ ኃላፊነት ለመቀበል አንድ ኦሮሚያን የሚወክል ፓርቲ ከበቃ፤ ከሕዝብ ድጋፍ ጋር የሚጠበቅበትን ምላሽ ለመስጠት አይቸገርም። ምክንያቱም በምርጫ አሸናፊውም፣ ተሸናፊም፤ ከምርጫ ውጤት በኋላ በኦሮሚያ ጉዳይ ላይ በአንድነት ለመቆም ስለማይቸገሩ ነው። ይህን ለማምጣት፣ በኦሮሚያ ፖለቲካ ውስጥ የሚገፋ ባለድርሻ አካል እንዳይኖር ጠንክሮ መስራት ይጠበቃል።


ሁለተኛው፣ የማዕከላዊ ኮሚቴው አጀንዳ የነበረው፣ “የሀገሪቷን፣ የአፍሪካን እና የዓለምን የፖለቲካ ሁኔታ በመገምገም የህዝባችንን ጥቅም እና ፍላጎት ባገናዘበ መልኩ” የመከሩበት ጉዳይ ነው። ከዚህ አጀንዳ መረዳት የሚቻለው በአቶ ለማ መገርሳ የሚመራው የኦሕዴድ ሥራ አስፈፃሚ፣ የኦሮሚያን ክልል ከ“Geography center” ወደ “Political center” ለማሸጋገር የወጠኑትን እቅድ ነው። በርግጥ ክልሉ ካለው የሕዝብ ብዛት እና የቆዳ ስፋት አንፃር ኦሮሚያ የፖለቲካ ማዕከል መሆን ከቻለች፣ የዴሞክራሲ ምህዳር ከመስፋቱም በላይ በሀገሪቷ ውስጥም መረጋጋትን ለማምጣት ምትክ አልባ እርምጃ ተደርጎ የሚወሰድ ነው።


ሶስተኛው፣ ማዕከላዊ ኮሚቴው የቀድሞውን የኢፌዴሪ ፕሬዝደነት ነጋሶ ጊዳዳን ለማገዝ የወሰነው ውሳኔ ጠቀሜታው ላቅ ያለ ነው። በኢትዮጵያ ፖለቲካ በአቋም መለየትና የተለያ አስተሳሰብ መያዝ የሚያስከፍለው ዋጋ በጣም ከባድ ነው። በ1993 በኢሕአዴግ ውስጥ በተፈጠረው የአስተሳሰብ እና የኃይል አሰላለፍ ልዩነት “አሸንፎ” የወጣው ቡድን “ተሸነፈ” በተባለው ቡድን ላይ የተከተለው መንገድ እንደደርግ ተቀናቃኝ ኃይሎች ናቸው ብሎ፤ እርምጃ አለመውሰዱ በበጎነት ቢታይለትም፣ ከማሕበራዊ ተሳትፎቸውና ከሚገባቸው የአገልግሎት ጥቅም ውጪ እንዲሆኑ የተደረገበት መንገድ ግን አስተማሪነት የሚጎድለው ነው።


የኦሕዴድ ማዕከላዊ ኮሚቴ የቀድሞ ፕሬዚደንት ዶክተር ነጋሶ ጊዳዳ ሊጠብቅላቸው የፈለገው መብቶች ተገቢ ናቸው። ሆኖም ማዕከላዊ ኮሚቴው ዶክተር ነጋሶ ጊዳዳ የተከለከሉት ጥቅማጥቅሞች በሕገወጥ መንገድ ነው ብሎ ከወሰደ፤ በኢሕአዴግ ሥራ አስፈፃሚ አቅርቦ በፌደራል ደረጃ ጥቅማቸው እንዲከበር መሥራት አለበት፤ ይገባልም። ምክንያቱም ዶ/ር ነጋሶ ጊዳዳ ከሚጠበቅላቸው ጥቅም በላይ፣ የህግ የበላይነትን ማስፈጸም ትርጉሙ ከፍ ያለ ነው። አስተማሪነቱም ተደማሪ ነው።


አራተኛው፣ ማዕከላዊ ኮሚቴው የኢህአዴግ ስራ አስፈፃሚ በቅርቡ የወሰነው ውሳኔ በፍጥነት ለመተግበር መዘጋጀቱን ገልጿል። ማዕከላዊ ኮሚቴው የፓርቲውን ውሳኔ ለመተግበር ያለውን ቁርጠኝነት ይፋ ማድረጉ፣ በቅርቡ በኢሕአዴግ አባል ድርጅቶች ሊቀነመናብርት በጋራ የሰጡትን መግለጫ ያጠናክራል። እንዲሁም ሊቀመናብርት በሰጡት መግለጫ አቀራረባቸው የተለያየ በመሆኑ በተለያዩ ወገኖች ቀርበው የነበሩ መላምቶችን ወደ አንድ መስመር ሊከታቸው ይችላል። መረጋጋትም የማምጣት እድሉ ከፍተኛ ነው።


አምስተኛው፤ በኢሕአዴግ ምክር ቤት ውስጥ ከሚሳተፉት የኦሕዴድ 45 አባላት መካከል አስሩን አሰናብቷል። አባላቱን ማሰናበቱ የድርጅቱ መብት ነው። ሆኖም ከኃላፊነት ያነሳቸው አባላት በኦሕዴድ ውስጥ ከፍተኛ ሚና የነበራቸው በመሆኑ ለምን እንደተነሱ ይፋ ቢደረግ ውሳኔ ሙሉ ይሆን ነበር። በተለይ የተነሱት አባላት በሌሎች እህት ድርጅቶች ከተነሱት አባላት ጋር ተመሳሳይነት ያለው እርምጃ በመሆኑ ነው።


በመጨረሻ የኦሕዴድ ማዕከላዊ ኮሚቴ ያወጣውን መግለጫ የሚመጥን የፖለቲካ ቁመና ለመያዝ ከፍተኛ ሥራ እንደሚጠብቀው እሙን ነው። ከላይ ያሰፈርናቸውን ያልተሄደባቸው መንገዶች ለመሄድ መሞከሩም በውሳኔ ደረጃ፣ ያስመሰግነዋል።


በውጭ ሀገር የሥራ ስምሪት ላይ በመንግሥት ተጥሎ የነበረው እገዳ ከትላንት ጥር 22 ቀን 2010 ዓ.ም ጀምሮ እንዲነሳ የሚኒስትሮች ምክርቤት መወሰኑ ተሰምቷል። እርምጃው እጅግ ዘግይቷል ከመባሉ ውጪ በአዎንታ ሊታይ የሚገባው ነው። ይህም ሆኖ ከአራት ዓመታት በላይ የውጭ ሀገር ጉዞ ሲታገድ ዓላማው ምን ነበር፣ ምንን ለማሳካት ታስቦ ነበር የሚለውን ማንሳት ተገቢ ይሆናል።


የዜጎች የመዘዋወርና በመረጡት አካባቢና ሀገር የመኖር መብት ሕገመንግሥታዊ ነው። መንግሥት ሲፈልግ የሚሰጠው ወይም ሲፈልግ የሚነሳውም አይደለም። እናም ከአራት ዓመታት በፊት የውጭ ሀገር ሥራ ስምሪት ለመታገድ መነሻ የሆነው ዋንኛ ምክንያት ዜጎች በመካከለኛው ምስራቅ ሀገራት የሚደርስባቸው የመብት ረገጣ እያየለ መምጣት ጋር የተያያዘ ነው። ተገቢውን ክፍያ አለማግኘት፣ የሰብዓዊ መብት መጣስ እና የመሳሰሉ ችግሮች መንግሥት ጉዳዩን ቆም ብሎ እንዲያስብና ዜጎችን ተጠቃሚ በሚያደርግ መልኩ ሕጉን እንዲከልስ ማስገደዱ አሁንም በአዎንታ መውሰድ የሚቻል ነው።


ነገር ግን ከፈረሱ ጋሪው እንዲሉ ሕጉ ገና ሳይረቀቅ የውጭ ሥራ ስምሪት ላይ እገዳ መጣሉ በተዘዋዋሪ ለሕገወጥ አዘዋዋሪዎች በርን ወለል አድርጎ የመክፈት ያህል ነበር። በሕገወጥ መንገድ መሄድ ያልቻሉ ወገኖችም መስራት እየቻሉ ከእነቤተሰባቸው ችግር ላይ እንዲወድቁም ያደረገ፣ በዘርፉ የተሰማሩ ወገኖችም ሠራተኞቻቸውን በትነው ድርጅቶቻቸውን እንዲዘጉ ያስገደደ አሳዛኝና አንድ ጎንዮሽን ብቻ የተመለከተ ውሳኔ ነበር። እንደሀገር ሲታይ ደግሞ የውጭ ምንዛሪ ገቢ ላይ አሉታዊ ጫና ማሳረፉ ሊስተባበል የሚችል አይደለም። ከእገዳው በፊት የሚመለከታቸው ወገኖች በጉዳዩ ላይ ሳይመክሩበት፣ ሃሳባቸው ሳይጠየቁ መከናወኑ ትልቁ ስህተት ነበር ብሎ መውሰድ ይቻላል።


ዛሬስ፤ እርግጥ ነው፤ የቀድሞ አዋጅ ተሻሽሎአል። በአዋጁ መሠረት ግን መንግሥት ከተቀባይ ሀገራት ጋር ማድረግ ያለበት የሁለትዮሽ የሥራ ስምሪት ስምምነት ገና በጅምር ላይ ያለ ነው። ከሀገራት ጋር ስምምነት ማድረጉ የመጀመሪያውና ትልቁ ፋይዳ ዜጎች መብትና ጥቅማቸውን በተረጋገጠ መልኩ የሥራ ስምሪት እንዲያደርጉ ለመርዳት ነበር። እናም ይህ ሒደት ግልጽ ባልሆነ ምክንያት እንደታሰበው አለመሄዱ የሚታወቅ ነው። አዲሱ አዋጅ ከደነገጋቸው ጉዳዮች ሌላኛው የስራ ሥምሪት ተጠቃሚዎች ከጉዞ በፊት በቂ ሥልጠና እንዲወስዱ የማድረግ ጉዳይ ነው። ይህም በሠራተኛና ማህበራዊ ጉዳይ ሚኒስቴርና በሚመለከታቸው አካላት በኩል በቂ የሆነ ዝግጅት የተደረገበት አለመሆኑ ግልጽ ነው። በቂ የሆነ የዝግጅት ሥራ ባልተከናወነበት በዚህ ወቅት ታግዶ የቆየው የውጭ ሀገር ስምሪት መነሳቱ ብቻውን ከመነሻ የታሰበው እንዳልተሳካ አመላካች ነው።


እናም መንግሥት ከዚህ ግብታዊ ውሳኔ ብዙ ትምህርት እንደወሰደበት እናምናለን። አሁንም አዋጁን ለማስተግበር ወይንም የዜጎችን ተጠቃሚነትና መብት ለማስከበር ሁለንተናዊ ጥረት ይደረግ ዘንድ ማስታወስ እንወዳለን። 

ወልድያ!

January 24, 2018

 

 

የቱንም ያህል የፖለቲካ ተቃውሞ ቢኖር  ባልተመጣጠነ እርምጃ ንጹሃን ዜጎችን መሞታቸውን፣ መቁሰላቸውን፣ መጎዳታቸውን፣ ሐብትና ንብረት መውደሙን በፍጹም አንደግፍም!! የፌዴራሉ መንግሥት ከአማራ ክልል አስተዳደር ጋር በመሆን አጥፊ ወንጀለኞችን በፍጥነት ለሕግ ያቀርባል ብለን እናምናለን።

በበዓለ ጥምቀት ሰማዕት ለሆኑ ንጹሃን ወገኖች ቤተሰቦች እንዲሁም ለመላው ኢትዮጵያዊያን ወገኖቻችንን ፈጣሪ መበርታትን፣ መጽናናትን ያድላችሁ ዘንድ እንመኛለን።¾

የኢህአዴግ የሥራ አስፈጻሚ ኮምቴ ተነጋግሮ ባሳለፈው ውሳኔ መሠረት ሀገራዊ መግባባት ለመፍጠር ሲባል የፖለቲካ ፓርቲ አባላትን ጨምሮ ሌሎች ፍርደኛ እና ፍርደኛ ያልሆኑ እስረኞች ለመልቀቅ መወሰኑን ልክ የዛሬ አሥራ አምስት ቀን ተነግሮናል፡፡ የግንባሩ የሥራ አስፈጻሚ ኮምቴ ውሳኔ በበርካታ ዜጎች ውስጥ የተደበላለቀ ስሜትን ፈጥሮ የነበረ ሲሆን አፈፃፀሙ መዘግየቱ ግን የግንባሩን ቁርጠኝነትና ለውሳኔው ተገዥነት ላይ ከበድ ያለ ጥርጣሬን አስከትሏል፡፡

 

እጅግ ዘግይቶም ቢሆን የፌዴራል የጠቅላይ ዐቃቤ ሕግ ሚኒስትሩ ከፌዴራል እና ከደቡብ ብሔር ብሔረሰቦችና ሕዝቦች ክልል በድምሩ 528 እስረኞች ከዛሬ ጀምሮ እንደሚፈቱ ገልጸዋል፡፡ ከክልሎች ለምን ደቡብ ብቻ ለሚለው ጥያቄ የተሰጠው መልስ ሌሎች ክልሎች ስላላቀረቡ ነው የሚል ነው፡፡ ይህ መልስ ስለሚፈቱ እስረኞች ጉዳይ ከፖለቲካ ውሳኔ ባሻገር በቂ ዝግጅት አለመደረጉን ጠቋሚ ነው፡፡


ጠቅላይ አቃቤ ሕግ እስረኞች የሚፈቱበት መስፈርት የሚከተሉት ናቸው ብሏል፡፡
- ሕገ-መንግሥታዊ ሥርዓቱን የመናድ እንቅስቃሴ ላይ ያልተሳተፉ ወይም ያልመሩ፣
- በከፍተኛ የኢኮኖሚ አውታሮች ላይ ጉዳት ለማድረስ በተደረጉ እንቅስቃሴዎች ላይ ያልተሳተፉ ወይም ያልመሩ፣
- የሰው ህይወት ያላጠፉ ወይም በአካል ላይ ከባድ ጉዳት ያላደረሱ፣
- በሥርዓቱ ተጠቃሚ ሆነው ሳለው በሌሎች ገፋፊነት ወደ ሁከትና ብጥብጥ የገቡ ናቸው ሲል ያስቀምጣል፡፡


በዚህ መሰፈርት መሠረት ሊፈቱ የሚችሉት በተራ ደረቅ ወንጀል የተከሰሱ ሰዎች ብቻ ይመስላል፡፡ በሌላ መልኩ ደግሞ ከሕገመንግሥቱ ጋር ተያይዞ በቀረበባቸው ክስ የታሠሩት ዶ/ር መረራ ጉዲና ይፈታሉ መባል የመስፈርቱን አስፈላጊነት ጥያቄ ውስጥ የሚጥል ነው፡፡


እናም ኢህአዴግ በገባው ቃል መሠረት የተሻለ ሃገራዊ መግባባትን ለመፍጠርና የዲሞክራሲ ምህዳሩን ለማስፋት ከልብ ቁርጠኝነት ካለው በተለይ ፖለቲከኞችንና ጋዜጠኞችን ያለምንም ቅድመ ሁኔታ ሊፈታ ይገባል፡፡ ነገሮችን በቅድመ ሁኔታ ለመሸብለል መሞከሩ ቀናኢነትንና ለመታደስ ያለ ቁርጠኝነትን አያሳይምና ጉዳዩ ሰከን ብሎ እንደገና ቢያጤነው እንላለን፡፡

በኢትዮጵያ ከሁለት አስርት ዓመታት በላይ በስልጣን ላይ የቆየው ኢህአዴግ በፈተና ውስጥ ነው። ፓርቲው የገጠመውን ፈተና ለመወጣት በበርካታ ፓርቲያዊ ስብሰባዎች በማድረግ ላይ ተጠምዷል። ኢህአዴግ በዚህ አይነት ፈተና ውስጥ የገባው ከባድ ህዝባዊ ተቃውሞ ከገጠመው በኋላ ነው። ፓርቲው አሁን ባለው ቁመና ሲታይ ራሱን ካለው ነባራዊ ሁኔታ ጋር እያስተካከለ የመሄድ ችግር እንዳለበት የሚያሳዩ በርካታ ማሳያዎች አሉ። ለምሳሌ፤ የሕግ የበላይነት አለመኖር፣ የኔትወርክ መረብ አባዜ፣ ሕገ-መንግስታዊ ሥርዓቱን በአደባባይ መጣስ የመሳሰሉ ናቸው። እነዚህም ሁኔታዎች ኢህአዴግ እንደ ፓርቲ ብሎም እንደ መንግስት ከባድ ፈተና ውስጥ እንዲገባ አድርጎታል። ምርጫ 97 ተከትሎ ፓርቲው የወሰዳቸው በርካታ እርምጃዎች ዛሬም መልሰው ጠልፈው ለመጣል እያንገዳገዱት ይገኛሉ። በፓርቲው ውስጥ ሊፈተሹ ከሚገባቸው መሠረታዊ ጉዳዮች መካከል አንደኛው ፓርቲው ራሱን የሚያይበት መነፅርና ይሄንንም ተከትሎ በተግባር የሚሄድበት የፖለቲካ መስመር ነው።

 አሁን ባለው ራስን የማደስ ሂደት ውስጥ ሊፈትሻቸው ከሚገቡ በርካታ ጉዳዮች አንዱ የአውራ ፓርቲ አስተሳሰቡ ነው። በድርጅቱ የቅርብ ታሪክ መሰረት የኢህአዴግ መለያ ባህሪያት ተደርገው ከሚነሱት ጉዳዮች መካከል አንዱ ፓርቲው ለራሱየአውራ ፓርቲነትስያሜን መስጠቱ ነው።

 በዚህ የፓርቲ ፅንሰ ሀሳብ መሰረት አንድ ፓርቲ አውራ ፓርቲ ከሆነ በተግባር ለመድብለ ፓርቲ ዲሞክራሲ ያለው አተያይ ያን ያህል ገንቢ ሆኖ አይታይም።አወራ ፓርቲ ነኝብሎ ራሱን የሰየመ አንድ ፓርቲ በሀገር ፖለቲካ ውስጥ ለራሱ ያለው አተያይ ፍፁም የገዘፈ ነው።

 በአንፃሩ ሌሎች ተፎካካሪ ፓርቲዎችን የሚመለከተው ለብሄራዊ ዲሞክራሲ ሊኖራቸው በሚችለው በጎ ግብዓት ሳይሆን በስልጣን ባላንጣነት መነፅር ብቻ ነው። አውራ ፓርቲ እንደ ኮሚኒስት ፓርቲ ራሱን ብቸኛ የሀገር ወኪልነት በመቁጠር የሌሎች ዜጎችን በፓርቲ ተደራጅቶ የመታገል ተግባርን በህግ ደንግጎ ክልከላ የሚያደርግበት ሁኔታ የለም። ይህ ብቻ ሳይሆን ተፎካካሪ ፓርቲዎቹ ህልውና እንዲኖራቸው የህግ ድጋፍ ሲሰጣቸውም ይታያል።

ሆኖም ተፎካካሪ ፓርቲዎች የፖለቲካ ሜዳው ተመቻችቶላቸው ወደ ገዢነት ሥልጣን እንዳይመጡ ግን በተግባር አምርሮ ይታገላቸዋል። የፖለቲካ ሜዳ መደላድል እንዳይፈጠርላቸው ያደርጋል። በማንኛውም አጋጣሚ መንግስታዊ ሥልጣን ሊይዙ ይችላሉ ብሎ ያሰባቸውን ተፎካካሪዎች  በሀሳብ ቀርቦ ከመወያየትና በውድድሩ ሜዳ ከመፎካከር ይልቅ በባላንጣነት ፈርጆ በጥብቅ ይታገላቸዋል። አውራ ፓርቲ ራሱን እንደብቸኛ የሀገር ባላደራስለሚቆጥር የሌሎችን ተፎካካሪ ፓርቲዎች አስተሳሰብና አቋም ያለርህራሄ ይፈርጃል ፤ይታገላልም።

 ፓርቲው ራሱን እያገዘፈ የሚሄደው ሌሎችን በማቀጨጭ ነው። ዋርካ ሥር ያሉ ሌሎች ዛፎች ዋርካው አርጅቶ እስካልተገነደሰ ድረስ በቂ ምግብና አየር አግኝተው እንደማያድጉ ሁሉ በአውራ ፓርቲ ገዢ ፓርቲ ሥር በሚተዳደር ሀገር ውስጥ ያሉ ተፎካካሪ ፓርቲዎችም እጣ ፈንታ ይህ ነው። ኢህአዴግአውራ ፓርቲ ነኝብሎ ራሱን እስከሰየመ ድረስ ፓርቲው የሚፈተሸውና የሚታየውም በዚሁ የአውራ ፓርቲ ትርጓሜና ባህሪ ነው።

 ኢህአዴግ በሚሊዮን ይቆጠራሉ በሚላቸው በአባላቱ ብዛት፣ የወጣትና ሴቶች ሊግ እያለ በሚጠራቸው አደረጃጀቶች ራሱን አግዝፎ ሲታይ፤ ተቃዋሚ ፓርቲዎች በአንፃሩ ይህ ነው የሚባሉ ፅህፈት ቤቶች እንደዚሁም ደጋፊዎቻቸውንና አባላቶቸውን ሊያደራጁ የሚችሉበት ድርጅታዊ መዋቅር እንኳን የላቸውም። ቀላል የማይባሉት ፓርቲዎች የምርጫ ሰሞን ብቅ ብለው በምርጫው ማግስት ደብዛቸው የሚጠፋ ነው።

ከዚህም ባለፈ ኢህአዴግ የሚፈልገው በፖለቲካ መስመር ልዩነት በነጠረ አቋም የሚታገለው ጠንካራ ተቃዋሚ ፓርቲ ሳይሆን ታማኝ ፓርቲ (Lolayl Party) መሆኑን በተግባር እያሳየ ነው። አሁን በኢትዮጵያ እየተከሰተ ያለው ችግር በሀገሪቱ የመድብለ ፓርቲ ሥርዓት መዳበርን የግድ የሚል ሆኖ እየታየ ነው። ለዚህ መፍትሄ የሚሆነው ደግሞ ገዢው ፓርቲ ከሁሉም በፊት ራሱን ከሰቀለበት የአውራ ፓርቲነት ማማ ማውረድ ሲችል ነው። ፓርቲው በፖለቲካ ፕሮግራሙ ቅኝት ብቻ ሳይሆን በህገመንግስቱ የመድብለ ፓርቲ ዲሞክራሲ መርህ ሊመራ ይገባል። ዜጋና ህዝብ በፓርቲ አደረጃጀትና በልዩ ልዩ አደረጃጀቶች እየተደራጀ መታገል፣ አማራጭ ሀሳቦችን ማቅረብና የመንግስት ስልጣንን ጭምር ሊይዝ የሚችልበት እድል ካልተፈጠረ ውጤቱ የቀውስ አዙሪት ነው።

ኢህአዴግአውራ ፓርቲ ነኝበሚል አስተሳሰብ በስልጣን ማማ ላይ ተኮፍሶ ሲደክመው እያረፈና ሲያረጅ እየታደሰ በገዢነት መቀጠል እንደሚችል አድርጎ ከማሰብ አስተሳሰብ መውጣት አለበት።¾

የኢህአዴግ ሥራ አስፈፃሚ ኮሚቴ ለ17 ቀናት ሲያካሂድ የቆየውን ስብሰባ ባሳለፍነው ሳምንት መጨረሻ ሲያጠናቅቅ ያወጣው መግለጫ ሰፊ የመነጋገሪያ ርዕሰ ጉዳይ ሆኖ ከርሟል። ሥራ አስፈጻሚው በተለይም ባለፉት ሁለት ዓመታት በአንዳንድ አካባቢዎች ያጋጠሙት የሠላምና የጸጥታ መደፍረስ ችግሮች መነሻ በማድረግ  የመፍትሔ ሀሳቦችን አስቀምጧል። እነዚህ በስምንት ነጥቦች የተቀመጡና ድርጅቱ በቀጣይ ትኩረት ሰጥቶ የሚሰራባቸው ጉዳዮች የሚከተሉት ናቸው።

-  ሕዝብን የሚያውኩ ማናቸውንም እንቅስቃሴዎች መቆጣጠር፣ የተፈናቀሉ ወገኖችን መመለስ፣

-  እያንዳንዱ ብሔራዊ አባል ድርጅት ከፍተኛ አመራሩን ገምግሞ ግልጽነትና ተጠያቂነትን እንዲያሰፍን ማድረግ፣

-  የክልሎችን የልማት ተሳትፎ የማሳደግ ሥራ ማከናወን፣

-  የሲቪል ሰርቪሱን ሪፎርም ማፋጠን፣

-  ሕዝብን ማዳመጥ፣ ተሳትፎውን ማረጋገጥ፣

-  የፓለቲካ ምህዳሩን ማስፋት፣ ተቀናቃኝ ፓርቲዎችን፣ ምሁራንን ማሳተፍ፣

-  የሕዝብ ሰብዓዊና ዴሞክራሲያዊ መብቶችን ለማስከበር ተጨማሪ እርምጃዎችን መውሰድ፣

-  አፍራሽ ተግባር ውስጥ የተሰማሩ፣ የሁከትና ግርግር መልዕክት የሚያሰራጩ የግልና የመንግሥት መገናኛ ብዙሀን ላይ እርምጃ መውሰድ የሚሉት ናቸው።

በተጨማሪም ሥራ አስፈጻሚ ኮሚቴው ለተፈጠሩ ችግሮች ሁሉ ኃላፊነቱን ከመውሰድ በተጨማሪ ሕዝብን በይፋ ይቅርታ ጠይቋል።

እነዚህ እርምጃዎች ወደፊት ሊቀጥሉ የሚችሉት ግን ከቃል አልፈው በተግባር መተርጎም ሲችሉ ብቻ ነው። ኢህአዴግ በእስካሁኑ ሒደቱ ችግሩን ማወቅ፣ የመፍትሄ አቅጣጫ ማስቀመጥ ላይ ችግር የለበትም። ያወቀውን ችግር ግን ተከታትሎ በማያዳግም ሁኔታ በመፍታት ረገድ ግን ግዙፍ ችግር አለበት። በዚህም ምክንያት “ኢህአዴግ ቃል እንጂ ተግባር የለውም” የሚል ትችትን ሁሉ ሲያስከትልበት ኖሯል።

እናም የኢህአዴግ ሥራ አስፈጻሚ ኮሚቴ በራሱ ግምገማ ብቻ ያያቸውና ለማስተካከል ቃል የገባባቸው ጉዳዮች ምንም እንኳን በሀገሪቱ ከሚታዩት እጅግ በርካታ ጥያቄዎችና ፍላጎቶች ጋር ሲነጻጸር አነስተኛ ሆኖ ቢታይም በዚህም ደረጃ ያሉትን ችግሮች ለመፍታት ማሰቡ በቀላሉ የሚታይ አይደለም። ችግርን ማወቅ አንድ ጥሩ ነገር ሆኖ የታወቀውን ችግር ከስር ከስሩ መፍታትና ቆርጦ መጣል አለመቻል ሌላ ዙር ችግር ወይም ቀውስ ከመፍጠር ያለፈ ፋይዳ የሚኖረው አይደለም። እናም ኢህአዴግ ለተግባር ልዩ ትኩረት ሰጥቶ ቃሉን በመተግበር ላይ ሊተጋ ይገባል።¾

የኦሮምያ ክልል በአዲስ አበባ ከተማ ላይ ያለውን ልዩ ጥቅም በሚመለከት ለሕዝብ ተወካዮች ምክርቤት የቀረበው ረቂቅ አዋጅ ላይ የሕዝብ አስተያየት ለማሰባሰብ ባለፈው ዓርብ ዕለት የተጠራው ስብሰባ በዋንኛነት በፓርላማ አባላት ተቃውሞ ምክንያት ለሌላ ጊዜ መተላለፉን ሰምተናል።

 

ስብሰባው ሊራዘም የቻለው የፓርላማው የሕግና ፍትህ አስተዳደር እና የከተማ ልማትና ኮንስትራክሽን ቋሚ ኮምቴዎች የህዝብ አስተያየት ለማሰባሰብ በጠሩት መድረክ ከፓርላማ አባላት መካከል አብዛኛዎቹ የኦህዴድ አባላት ሕዝባችን ችግር ላይ ባለበትና ከስር ጀምሮ በቂ ውይይት ባልተደረገበት ሁኔታ ይህ ዓይነቱ ስብሰባ መጠራት የለበትም የሚል አቋም በመያዛቸው መሆኑን በተለያዩ መገናኛ ብዙሃን መዘገቡ የሚዘነጋ አይደለም።


ዋናው ነገር የፓርላማ አባላቱ ተቃውሞ ማሰማት አይደለም። የፓርላማ አባል ሆኖ መደገፍም ሆነ መቃወም እንደመደበኛ ሥራ የሚወሰድ ነው። አንድ የፓርላማ ተመራጭ ወክሎ የላከውን ሕዝብ ጥቅም ለማስከበር መቆሙ ምንም ስህተት የለውም። በዘመነ ኢህአዴግ አሁን በሥራ ላይ የሚገኘው አምስተኛው ምክርቤት ነው። ባለፉት አራት ዙር የፓርላማ ተመራጮች ቆይታ ለኢህአዴግ ማዕከላዊነት ሰጥ ለጥ ብሎ ከመገዛት ባለፈ ኢህአዴግ የሚያቀርበውን ረቂቅ አዋጅ ጠንከር አድርጎ የሚሞግት አባል እንኳን ማግኘት የሚታሰብ አልነበረም። እናም ዘንድሮ እንዲህ ዓይነት አባላት መፍለቃቸው ከምንም በላይ ለራሱ ለገዥው ፓርቲ ትልቅ ጥቅም የሚሰጥ ነው። በሕግ አወጣጥ ሒደት ጠንካራ ግብዐት የሚሰጥ ፓርላማ ካለ የህዝብ ተጠቃሚነት እንዲያድግ አስተዋጽኦ ለማድረግ ያስችላል። በሌላ በኩል አስፈጻሚው አካል በተቃራኒው ሕግ አውጭውን እጅ መጠምዘዝ የሚችልበትን በር መዝጋት ያስችላል።


ስለሆነም የፓርላማው የጠያቂነትና መቃወም ባለበት ጉዳይ ግልጽ ተቃውሞውን የማሰማት ጅምር እንዲጠናከርና ይበልጥ ሰፍቶና አደጎ እንዲታይም ያስፈልጋል። ፓርላማው ሞቅ ያለ የሃሳብ ፍጭት የሚታይበት፣ ሕግና ሥርዓትን ያልተከተሉ አካሄዶች የሚስተካከሉበት መድረክ እንዲሆን አሁንም ከፓርላማ አባላቱ ተጨማሪ ጥረቶችን ይጠይቃል። 

አካባቢያዊ ግጭቶች ለኢትዮጵያዊያን አዲስ አይደሉም። በተለይ በአርብቶ አደሩ አካባቢዎች ከግጦሽና ከድንበር ጋር በተያያዙ እዚህም እዚያም ብልጭ ድርግም የሚሉ ግጭቶች ባለፉት 25 ዓመታት ብቻ ሳይሆን ቀደም ባሉት መንግሥታትም ነበሩ። እነዚህ ግጭቶች ይነሰም ይብዛ የሰዎች ሞትና ጉዳት የሚያስከትሉ በመሆናቸው በዘላቂነት እንዲቀረፉ ብዙ ጥረቶች ሲደረጉም ቆይተዋል። ባለፉት ሁለት ዓመታት ግን ግጭቶች መልካቸውን ቀይረው የብሔር መሠረትን እየያዙ መምጣታቸው ለእኛ ለኢትዮጵያዊያን አስደንጋጭ ክስተት ሆኖብናል። ሰዎች ዘራቸው መርጠው ይወለዱ ይመስል አንተ የዚህ አካባቢ ተወላጅ ነህ፣ አንቺ የዚያ ነሽ እየተባባሉ በዩኒቨርሲቲ ደረጃ የሚገኙ ተማሪዎች ሳይቀር ጦር የሚማዘዙበት እየሆነ መምጣቱ እንደሀገር ያስደነግጣል፣ ያሳፍራል፣ ያሸማቅቃል። ሰሞኑም በምዕራብ ሐረርጌ በዳሩ ለቡ ወረዳ ጋዱላ ቀበሌ ለደህንነታቸው ሲባል በአካባቢው በሚገኘው ፖሊስ ጣቢያ የተጠለሉ የኢትዮጵያ ሶማሌ ክልል ተወላጆች ላይ የደረሰው የጅምላ ጭፍጨፋ የዚሁ የተሳሳተ አስተሳሰብና ድርጊት ነጸብራቅ አድርጎ መውሰድ ይቻላል።

 

ማንም ለምንም ዓላማ ይፈጽመው ዘረኝነት የሚወገዝ ድርጊት ነው። ዘረኝነትን በቀጥታም ሆነ በተዘዋዋሪ የሚያበረታቱ፣ ድጋፍ የሚሰጡ አካላት ማስቆም ካልተቻለ መጪው ጊዜ ለኢትዮጵያዊን ጨለማ መሆኑ አይቀሬ ነው።


የፌዴራሉ መንግስት ከክልሎች ጋር በመተባበር ከጥቃቶች ፊትና ጀርባ ያሉ አካላትን በመመንጠር መሰል ድርጊቶች ዳግም እንዳይከሰቱ በርትቶ ሊሰራ ይገባል። ሕዝብም መንግሥትን በማገዝ ረገድ የበኩሉን ሊወጣ ይገባል። 

በኢትዮጵያ የፖለቲካ አለመረጋጋት ውስጥ ከገባች ከሦስት ዓመታት በላይ ጊዜያት ተቆጥረዋል። ያለፉት ዓመታት ተከታታይ ግጭቶች በዜጎች ላይ የህይወት መጥፋት፣የንብረት ውድመትና ያለመረጋጋት ሥነ ልቦናዊ ጫናን አሳድረዋል። በእነዚህ ጊዜያት የታዩት ግጭቶች በዋነኝነት መነሻቸውና መድረሻቸው ሆኖ የታየው ፅንፍ የወጣ የብሄርተኝነት አመለካከት ነው።

ይህ ፅንፍ የረገጠና የሌሎችን የመኖር ህልውና ሳይቀር የሚጋፋ አደገኛ የብሄርተኝነት አስተሳሰብ ዛሬ ከፖለቲካው ምህዳር አልፎ የዜጎችን በፍቅር ተቻችሎ የመኖር ባህልን እየሸረሸረና እየናደ ይገኛል። ገዢው ፓርቲ “ተሀድሶና ጥልቅ ተሃድሶ” በሚለው ፓርቲያዊ አሰራር የተፈጠረውን ሀገራዊ ችግር ከመልካም አስተዳደር እጦት ጋር በማያያዝ ባለው መንግስታዊ መዋቅር መፍትሄ ሊሰጠው ሞክሯል።

 

ከዚሁ ጋር በተያያዘም በክልሎቸና በፌደራል ደረጃ ለቁጥር የሚታክቱ የግምገማ ስብሰባዎች ተካሂደዋል። “ሥልጣናቸውን ህዝብ ጥቅም ከማዋል ይልቅ የግል ጥቅማቸውን ለማሳደድ ተጠቅመውበታል” በሚል ከሀላፊነት የተነሱ ብሎም ጉዳያቸው ወደ ህግ ተጠያቂነት ያመራ ኃላፊዎችም መኖራቸው ይታወቃል።

 

 ከእነዚህ እርምጃዎች ጎን ለጎንም ህብረተሰቡን ለምሬትና ለፖለቲካ አለመረጋጋት የዳረጉ ችግሮች እየተፈቱ መሆኑ ሲነገር ቆይቷል። ሆኖም ከእነዚህ ተከታታይ የፖለቲካ እርምጃዎች በኋላም ቢሆን በሀገሪቱ ያለው የፖለቲካ ከባቢያዊ አየር መልካም ጠረን እየሸተተ አይደለም።

 

ከእነዚህ ሁሉ እርምጃዎች በኋላም ቢሆን ስፖርታዊ ጨዋታዎች በብሄር ጥላቻ እየታመሱ ነው፣ መልካም ዜጋን ቀርፀው ያወጣሉ ተብለው ተስፋ የተጣለባቸው ከፍተኛ የትምህርት ተቋማት፤ ተማሪዎቻቸው በብሄር ተቧድነው ነፍስ እስከመዋደቅ የደረሱባቸው የፍልሚያ አውድማዎች ሆነዋል። በዚሁ በየዩኒቨርስቲዎች ከሚነሳው የብሄር ግጭት ጋር በተያያዘ በርካቶች ትምህርታቸው እስከማቋረጥ ደርሰዋል። ትምህርት ሚኒስቴርም ቢሆን የከፍተኛ ትምህርት ተቋማት ተማሪዎች ቁጥር መቀነሱን አምኗል።

 

 ባለፉት ሁለት አስርት ዓመታት በኢትዮጵያ ከፍተኛ ትምህርት ተቋማት ውስጥ እየታየ ያለው ብሔርን መሰረተ ያደረገ ግጭት ችግሩ ሲፈጠር እሳት የማጥፋት ሥራን ከመሰራት ያለፈ መፍትሄ ሲሰጠው አልታየም። በከፍተኛ ትምህርት ተቋማቱ የሚነሱት ግጭቶችና አለመረጋጋቶች መፍትሄ የሚያሻቸው አጠቃላይ የኢትዮጵያ ፖለቲካ ነፀብራቆች እንጂ በራሳቸው ተነጥለው የቆሙ ልዩ ጥያቄዎች አይደሉም።

 

 አሁን ባለው የኢትዮጵያ ተጨባጭ ሁኔታ አንድ ሰው በጅምላ በብሄሩ ተፈርጆ ህልውናው ጥያቄ ውስጥ የሚገባበት ሁኔታ ተፈጥሯል። ማንም ተወልዶ እንጂ ፈልጎ ባላመጣው ብሔር፤ በጥላቻ መፈረጅ ግድ ሆኖበታል። ይህ ሁኔታ ቀላል በማይባለው የህብረተሰብ ክፍል ውስጥ ሰርፆ መገኘቱ አደጋውን የከፋ የሚያደርገው በመሆኑ አሁንም ቢሆን ሳይረፍድ ከችግሩ ይለቅ መፍትሄው ላይ ትኩረት ማድረግ ያሻል። ብሄርተኝነቱ ለፅንፈኛ ብሄርተኝነቱ ግብዓትና መንገድ ጠራጊ የመሆን  ያለመሆኑ ጉዳይ ሊፈተሽ ይገባል።

 

መሰረታዊ የፖለቲካ አካሄድ ለውጥ የሚያስፈልጋቸው ጉዳዮችም ካሉም ኢትዮጵያን አድኖ በትውልድ ለመቀጠል እስከበጀ ድረስ ሊለወጥ ይገባል። ሀገር ቁልቁል እየወረደና የዜጎች የመኖር ህልውና አደጋ እየወደቀ ባለበት ሁኔታ በጀመሩት የፖለቲካ መስመር ዶግማዊና ቀኖናዊ አካሄድ መግፋቱ ብዙም አያስኬድም። ያሉትን ነባራዊ ሁኔታዎች ከያዙት የፖለቲካ ፕሮግራምና አካሄድ ጋር ፈትሾ እያጣጣሙ የመሄዱ ሁኔታ ስልጡንነት እንጂ ተሸናፊነት አይደለም። 

Page 1 of 15

Sendek Newspaper

Bole sub city behind Atlas hotel

Contact us