ትውልደ ኢትዮጵያዊቷ ሰዓሊት የ2015 የአሜሪካ መንግሥት ተሸላሚ ሆነች

Wednesday, 11 February 2015 12:14

በጥበቡ በለጠ


የአሜሪካ ስቴት ዲፓርትመንት በዘንድሮው የ2015 ዓ.ም ከሸለማቸው ምርጥ ሰዓሊያን መካከል ትውልደ ኢትዮጵያዊቷ ሰአሊት ጁሊ ምሕረቱ አንዷ በመሆን ተሸላሚ ሆናለች።

ጁሊ ምሕረቱ ለሽልማት ያበቃት በአለማችን ውስጥ ያሉ ህዝቦችን፣ ሐገራትን በስዕል ጥበቧ ባህላቸውን እና ታሪካቸውን እያቀለመች የማቀራረብና የመግለፅ ችሎታዋ ከእለት ወደ ዕለት አስደማሚ እየሆነ በመምጣቱ እንደሆነም ተገልጿል።

ጁሊ ምህረቱ እ.ኤ.አ. በ1970 ዓ.ም በአዲስ አበባ ከተማ ውስጥ የተወለደች ሲሆን እ.ኤ.አ. በ1977 ዓ.ም ደግሞ ወደ አሜሪካ በመጓዝ ትምህርቷም ሆነ ሥራዋ በዚህችው አሜሪካ ውስጥ ሆኗል። በግማሽ ጎኗ ከኢትዮጵያዊ ቤተሰብ የተወለደችው ይህች ሰዓሊት በአሁኑ ወቅት በአሜሪካ ውስጥ ካሉት ዘመናዊ ሰዓሊያን ተርታ ስሟ ከፍ ብሎ የሚጠራ ነው።

በኒውዮርክ ከተማ ነዋሪ የሆነችው ጁሊ ምሕረቱ በሥዕል ችሎታዋ አያሌ የአሜሪካንን ሽልማት ያገኘች ስትሆን ስራዎቿም በልዩ ልዩ የአሜሪካን ታላላቅ ጋላሪዎችና ሙዚየሞች ውስጥ የተቀመጡላት ናት።

በአሜሪካ መንግሥት ስቴት ዲፓርትመንት አማካይነት የባሕል ዲፕሎማሲን በማስፋፋት ረገድ ተጠቃሽ መሆኗ የተነገረላት ጁሊ ምህረቱ፤ በእንግሊዝና በአሜሪካ፣ በኢትዮጵያ እና በአሜሪካ ብሎም በሌሎችም ሀገራት ውስጥ ያሉ የባህል ትስስሮችን አጉልታ በማሳየት ስሟ ከፍ ብሎ ይጠራል።


የ2015 ዓ.ም የስቴት ዲፓርትመንት ተሸላሚ መሆኗም በዓለም አቀፉ ደረጃ በእጅጉ ከሚከበሩ ሰዓሊያን ተርታ የሚያስገባት መሆኑም ተነግሮላታል።

ጁሊ ምህረቱ፤ በተለያዩ ታላላቅ መድረኮች ላይ ተሸላሚ እንደሆነ የሚነገርለትን እና በዚህ በኢትዮጵያ ውስጥ ደግሞ የአያሌ ጭቅጭቆች፣ ክሶች እና ውዝግቦች ማዕከል የሆነውን “ድፍረት” የተሰኘውን ፊልም ኤግዘኪዩቲቭ ፕሮዲዩሰር እንደሆነችም ይታወቃል።

ይምረጡ
(7 ሰዎች መርጠዋል)
1503 ጊዜ ተነበዋል

Sendek Newspaper

Bole sub city behind Atlas hotel

Contact us