የኢትዮጵያ በቱሪስቶች ምርጫ ከምርጥ 10 የዓለማችን ሀገራት አንዷ ሆነች

Wednesday, 11 February 2015 12:17

በጥበቡ በለጠ


በዓለም አቀፉ ደረጃ በአያሌ ቱሪስቶች የሚነበበው `Rough Guides` በመባል የሚታወቀው የህትመት ውጤት በቅርቡ ለአንባቢዎቹ አንድ ጥያቄ አቅርቦ ነበር። ይህም ጥያቄ እ.ኤ.አ. በ2015 ዓ.ም ማየት የምትፈልጓቸውን አስር የዓለማችን ሀገራትን ጥቀሱ የሚል ነበር። በዚሁ እጅግ ተነባቢ በሆነው የቱሪስቶች ጋይድ መፅሐፍ ውስጥ በተሰጠው ምላሽ ኢትዮጵያ ከተመረጡት አስር ሀገራት መካከል የሰባተኛ ደረጃን ማግኘቷን ድርጅቱ በድረ-ገፁ ባሰራጨው ዜና ይፋ አድርጓል።

ኢትዮጵያ በምርጫው ውስጥ መካተቷ እና የዚህ ሁሉ ቱሪስት የፍላጎት አቅጣጫ መሆኗ ወደፊት ሀገሪቱ ከዚሁ ዘርፍ ልትጠቀምበት የምትችልበት እድል በእጅጉ ፈክቶ እያንፀባረቀ መሆኑን አስተያየት ሰጪዎች ገልጸዋል።

በዚሁ `Rough Guides` በተሰኘው የቱሪስቶች መፅሀፍ ውስጥ አስር ምርጥ የቱሪስቶች ምርጫ የሆኑት የ2015 ዓ.ም ሀገራት ይፋ ሆነዋል። እነዚህም የሚከተሉት ናቸው፡-

  1. 1. ዩናይትድ ኪንግደም (UK)
  2. 2. ግሪክ
  3. 3. አይስ ላንድ
  4. 4. ኢንዶኔዥያ
  5. 5. ጃፓን
  6. 6. ቺሊ
  7. 7. ኢትዮጵያ
  8. 8. ቱርክ
  9. 9. ዩናይትድ ስቴትስ ኦፍ አሜሪካ (USA

  10. 10. አየርላንድ

ሆነው በቱሪስቶች ተመርጠዋል።

ኢትዮጵያ ከነዚህ አስር ሀገራት ውስጥ በቱሪስቶች ምርጫ ውስጥ መካተቷን በተመለከተም የመፅሐፉ ድረ-ገፅ ማብራሪያ ሰጥቶበታል። እንደ ድረ-ገፁ ገለፃ ኢትዮጵያ በአፍሪካ ውስጥ አያሌ የቱሪዝም መስዕብ ያላት ሀገር መሆኗ ተዘግቧል። በተለይ ደግሞ በተፈጥሮ መስዕብም ቢሆን ከታላቁ የኢትዮጵያ ስምጥ ሸለቆ ጀምሮ ልዩ ልዩ ግዙፍ ተራሮች ያሏት ሀገር በመሆኗ መልክአ ምድሯም እንድትመረጥ አስተዋፅኦ እንዳደረገ ዜናው በሚከተለው መልኩ ገልጾታል፡-

From the dramatic Great Rift Valley to the lush highlands, the diversity of Ethiopia’s landscapes might surprise you.

በማለት ገልጿል።

ይህን የ2015 ዓ.ም ምርጥ አስር የዓለማችን የቱሪስቶች ምርጫን ይፋ ያደረገው ድረ-ገፅ roughguides.com/best-places/2015/peoples- choice/ የሚሰኝ ሲሆን፤ ኢትዮጵያንም በተመለከተ አዲስ መፅሐፍ በቅርቡ አሳትሞ ይፋ እንደሚያደርግ ገልጿል።

ይምረጡ
(7 ሰዎች መርጠዋል)
2095 ጊዜ ተነበዋል

Sendek Newspaper

Bole sub city behind Atlas hotel

Contact us