ጥበበኞቹና በጎ ተግባራቸው

Wednesday, 11 February 2015 12:24

በጥበቡ በለጠ

 

የኪነ-ጥበብ ሰዎች በሕዝብ ዘንድ ያላቸውን ተቀባይነትና ፍቅር መሠረት በማድረግ ለበጎ ተግባር ራሳቸውን ማሰለፍ ባደጉት ሀገራት በአብዛኛው የተለመደ ነው። የኪነ-ጥበብ ሰዎች ለበጎ አድራጎት ተግባር አድናቂዎቻቸውን ሲጋብዙ እና የተለያዩ ጥበባዊ ሥራዎችን ሲያከናውኑ ከፍተኛ ገቢ ማሰባሰብ እና ያንን ገቢ ደግሞ ለምግባረ ሰናይ አገልግሎት ሲያውሉ ሕዝባዊና ማህበራዊ ጥሪያቸውን ኃላፊነታቸውን ተወጡ ተብሎም ይነገራል።

ማህበራዊ ኃላፊነት /Social Responsibility/ በኪነ-ጥበብ ውስጥ ጉልህ ስፍራ የሚሰጠው ነው። ጥበበኞች ለሕዝባቸው፣ ለወገናቸው፣ ለሐገራቸው ልማት ብልፅግና እንዲሁም ርዕይ ከሁሉም ቀድመው ከፊ መሰለፍ እንደሚገባቸው ብዙዎች ያምናሉ።

በቀደመው ዘመን ኢትዮጵያ በረሀብ ስትመታ እነ ማይክል ጃክሰን፣ ቦብ ጊልዶፍና፣ እነ ሄሪ ቤላሮንቴን የመሳሰሉ ታላላቅ ጥበበኞች የጥበብ ተሰጥኦዋቸውን ሰንቀው ለሀገራችን ችግር ቀድመው የደረሱልን ነበሩ። በዝግጅቶቻቸውም ትልቅ ገቢ አሰባስበዋል።

በሀገራችንም ቢሆን ጥበበኞች ብዙም ሳይሆን አልፎ አልፎ ሙያቸውን ለበጎ ተግባራት ሲያውሉ ይታያሉ።

ከሰሞኑ ደግሞ ኒውዮርክ ውስጥ ያሉ ወጣት ሰዓሊያን ከተለያዩ ዓለማት ተሰባስበው የተሠጣቸውን የጥበብ ፀጋ ለበጎ ተግባር አውለውታል። እነዚህ የጥበብ ባለሙያዎች በዕድሜያቸው በጣም ወጣቶች ናቸው። የተሰበሰቡትም ከኢትዮጵያ፣ ከካናዳ ከአሜሪካ እና ከልዩ ልዩ የአውሮፓ ከተሞች ነው።

ለዚህ ለበጎ ተግባራቸውም የሰጡት መጠሪያ Artists for Charity (AFC) ወይም ወደ አማርኛ ስንመልሰው አርቲስቶች በግብረ ሰናይ ዓላማ እንደ ማለት ነው። በማናታን ኒውዮርክ የተሰባሰቡት እነዚህ ጥበበኞች ልዩ ልዩ ሥራዎቻቸውን በጨረታ በመሸጥ ፣ ታዳሚዎቻቸውን ደግሞ የሚግቢያ ዋጋ በማስከፈል ለበጎ ተግባር የሚል ገንዘብ አሰባስበዋል። ገንዘቡ በHIV ኤድስ ምክንያት ወላጆቻቸውን ላጡ ህፃናት እንዲሁም ደግሞ ከዚሁ ባይረስ ጋር አብረው የተወለዱ ልጆችን መደጎሚያ ብሎም ደግሞ ልጆቹ ወደፊት ለመሆን የሚፈልጉትን ነገር ህልማቸውን ማሳኪያ ይሆን ዘንድ የተቻላቸውን አድርገዋል።

እነዚሁ ወጣት የስዕል ባለሙያዎች በዩናይትድ ስቴትስ ርዕሰ ከተማ በዋሽንግተን ዲሲ ውስጥ ይህን ጥበብን ለበጎ ተግባር የማዋል መርሃ ግብራቸውን ከሰሞኑ ያካሂዳሉ። ወጣቶቹ ሰዓሊያን የሚባሰቡበት ለ8ኛ ጊዜ በሚካሔደው የጥበበኞች የበጎ ሥራ ቀን ላይ ተሳትፈው በብዙ ችግሮች ውስጥ ላሉ ህፃናት መደጎሚያ የሚሆን ገቢ ለማሰባሰብ ነው።

ከአዘጋጆቹ መካከል የሆነው ኢትዮጵያዊው ወጣት አርቲስት እንደሚናገረው ከሆነ ይህ መርሃ ግብር የሚካሔደው በጎ ፈቃደኛ በሆኑ የጥበብ ሰዎች አማካይነት ነው። እነዚህ ሰዎች ጊዜያቸውን እና ሙያቸውን ብሎም ገንዘባቸውን ለዚህ ለተቀደሰ ዓላማ የሚያውሉ መሆናቸውን ተናግሯል።

እነዚህ በጎ ፈቃደኛ ሰዎች ከተለያዩ የጥበብ መስኮች ውስጥ የተውጣጡ ብሎም ደግሞ ከአሜሪካ፣ ከካናዳ እንዲሁም ከአውሮፓና ከአፍሪካ መምጣታቸውንም ተናግሯል።

ከበጎ ፈቃደኞቹ መካከል አንዷ የሆነችው አሜሪካዊቷ ሀና ስትናገር ልጆች ህልም አላቸው፣ አንደ ለመሆን የሚያልሙት ነገር አለ። ውስጣቸው የሚነግራቸው ነገር አለ። እዚያ ነገር ላይ ለመድረስ ደግሞ አጋዥ ይፈልጋሉ። ምክንያቱም አቅም የላቸውማ። ስለዚህ እኛ ደጀን ልንሆናቸው ይገባል የሚል ሀሳብ ሰንዝራለች።

በተለይ ከዚሁ ከHIV ቫይረስ ጋር የሚኖሩት ህፃናትም የወደፊት ህልማቸውን ሲናገሩም ተደምጠዋል።

-    ሳድግ አርቲስትነት መሆን ነው የምፈልገው፣

-    ሳድግ ፓይለት ነው መሆን የምፈልገው፣

-    ሳድግ ደራሲ ነው መሆን የምፈልገው፣

-    ዳንሰኛ ነው መሆን የምፈልገው፣

-    ኢንጂነር /መሀንዲስ/ ነው መሆን የምፈልገው፣

እነዚህ ከHIV ቫይረስ ጋር የሚኖሩትን ህጻናት ጥበበኞች የትም ቦታ ቢኖሩ መረዳት እንደሚገባቸው አዘጋጆቹ ይናገራሉ። ህፃናቱ በHIV ወላጆቻቸውን ያጡ በመሆናቸውና ከቫይረሱ ጋርም ስለሚኖሩ ክብካቤ እንደሚያስፈልጋቸው አዘጋጆቹ ወጣት አርቲስቶች ይናገራሉ።

በዚሁ በአርቲስቶች ድጋፍ ተጠቃሚ የሆኑ ታዳጊ ህፃናትም ስለ HIV ኤድስ ቫይረስም ማብራሪያ ሰጥተዋል። እነዚህኑ ልጆች መሠረት አድርጎ በተሰራው ዶክመንተሪ ፊልም ወስጥ የሚከተለውን ብለዋል። “ነገን ለማየት ህልም አለን። ያንን ህልማችንን ደግሞ እውን የምናደርገው እኛም ጠንክረን እናንተም ስትወዱን ስታቀርቡን ነው” ሲሉ ተናግረዋል።

በነዚህ ወጣት አርቲስቶች የሚደገፉት ህፃናት ኑሯቸው ከቀን ወደ ቀንም እየተሻሻለ መምጣቱን ይናገራሉ።

ከአሜሪካ ሆነው ኢትዮጵያዊያን ህጻናት የሚረዱትን ወጣቶች በማስተባበር እየሰራች ያለችውና በሃያዎቹ የእድሜ አጋማሽ ላይ የምትገኘው ታታሪዋ ወጣት አበዛሽ ታምራት ነች። በእርሷ አማካይነት የኪነ-ጥበብ ባለሙያዎች ከተለያዩ አለማት እየተሰባሰቡ ሙያቸውን ለበጎ ዓላማ እያዋሉት ይገኛሉ።

እንደ አበዛሽ አባባል፣ አሁን ከተለያዩ የዓለማችን ሀገራት የተውጣቱ በጎ ፈቃደኛ ሰዎች ለውጥ ማምጣት ችለዋል። ለእነዚህ ህጻናት አጋርነታቸውን ገልጸዋል። ወደፊትም በሌሎች ሀገራት ያሉና የእኛን ድጋፍ ለሚሹ ህፃናት በሙሉ ከጎናቸው መቆም አለብን ብላለች።

    በአጠቃላይ ሲታይ፣ እነዚህ ወጣት የኢትዮጵያ አርቲስቶች ጥበብን ለበጎ ተግባር ማከናወኛ አድርገው ብዙ እየተጓዙ ነው። ሌሎችም የእነርሱን አርአያነት ከተከተሉ ጥበብ ማህበራዊ አገልግሎቷ ሰፊ ይሆናል ተብሏል።

ይምረጡ
(2 ሰዎች መርጠዋል)
1955 ጊዜ ተነበዋል

Sendek Newspaper

Bole sub city behind Atlas hotel

Contact us