የኃይሉ ፀጋዬ ቴአትር በአዶት ሲኒማ መታየት ጀመረ

Wednesday, 22 July 2015 13:44

በጥበቡ በለጠ

 

በቅርቡ እዚህ በመዲናችን አዲስ አበባ ውስጥ ብስራተ ገብርኤል አካባቢ የተገነባው እጅግ ዘመናዊው አዶት ሲኒማ እና ቴአትር፣ በኃይሉ ፀጋዬ ተደርሶ በተስፉ ብርሃኔ የተዘጋጀውን “ከራስ በላይ ራስ” የተሰኘውን ቴአትር ማሳየት ጀመረ።

 

ከራስ በላይ ራስ ሐምሌ 8 ቀን 2007 ዓ.ም በአዶት አዳራሽ አያሌ ሕዝብ በታደመበት ስነ-ስርዓት ተመርቋል። በእለቱ ንግግር ያደረጉት የአዶት ሲኒማ እና ቴአትር ዋና ሥራ አስኪያጅ አቶ ዘላለም ብርሃኑ እንደተናገሩት፣ አዶት ኢንተርናሽናል ትሬዲንግ ኃላፊነቱ የተወሰነ የግል ማህበር ከሰላሳ ሚሊዮን ብር በላይ ወጪ አድርጎ ይህ የኪነ-ጥበብ ማዕከል ገንብቶና አሟልቶ ሥራውን ሲያስጀምር ትርፉ እሩቅ እንደሚሆን፣ በአንፃሩ ግን በባህሉና በኪነ-ጥበቡ ዘርፍ በሚያግዘው ነገር ከወዲሁ ውጤታማ እንደሚሆን እርግጠኛ ነበር ብለዋል። አክለውም እንደገለፁት፣ ዛሬ በመደበኛነት የመድረክ ቴአትርን ለመጀመር በኃይሉ ፀጋዬ ተደርሶ፣ በተስፉ ብርሃኔ ተዘጋጅቶና በፕሮሜቲዎስ ፕሮዳክሽን ሥራ አስኪያጅ በሙሉ ቀን ተሾመ ፕሮዲዩስ የተደረገውን “ከራስ በላይ ራስ” ቴአትርን አበበ ተምትም፣ ፍቃዱ ከበደ፣ ሄኖክ ብርሃኑ እና ሄለን በድሉ ሲጫወቱ ልናሳያችሁ በመታደላችን ደስ ብሎናል ሲሉ ተናግረዋል።

 

አዶት ሲኒማና ቴአትር የተመረጡ ፊልሞችን ብቻ ለማሳየት ባደረገው ጥረት የበሰሉ እና ጥሩ የኪነ-ጥበብ ጣዕም ያላቸው ተመልካቾችን ለማግኘት ችለናል ሲሉ ሥራ አስኪያጁ ተናግረዋል። አያይዘውም እነኚህ የኛው ደንበኞች ደረጃቸው ከፍ ያለ የመድረክ ትርኢቶችን እንደየቤታቸው በሚያዩት በአዶት ሲኒማና ቴአትር እንዲመለከቱ ስንጥር ቆይተን ዛሬ ለዚህ የምረቃ ቀን ስለበቃን እናንተንም ደስ እንደሚላችሁ እርግጠኞች ነን ሲሉ ተመልካቹ በሙሉ ድምፅ ድጋፉን ለግሷቸዋል።

ከራስ በላይ ራስ ዘወትር ረቡዕ በአዶት ሲኒማና ቴአትር አዳራሽ መታየት መጀመሩንም በይፋ ተናግረዋል።

ይምረጡ
(2 ሰዎች መርጠዋል)
1174 ጊዜ ተነበዋል

Sendek Newspaper

Bole sub city behind Atlas hotel

Contact us