ጥምቀት እና አሣሣቢው ጉዳይ

Friday, 22 January 2016 12:42

 

በጥበቡ በለጠ

 

የጥምቀት በዓል አከባበር በኢትዮጵያ እና በኤርትራ ተመሣሣይ ነው። ሁለቱ ሐገሮች ሁለት ከመሆናቸው በፊት አንድ ነበሩ። እናም የበዓሉ አከባበር አንድ ነው። ኤርትራ ስትገነጠል የጥምቀት አከባበሩን አብሯት አለ። በዚህ የተነሣም ለተባበሩት መንግሥታት የትምህርት የሣይንስ እና የባሕል ድርጅት ማለትም ለዩኔስኮ (UNESCO) ጥምቀትን የኔ ቅርስ ነው፤ ይገባኛል የሚል ጥያቄ ማቅረቧ ይታወሣል። ከዚህ በፊትም የመስቀልን በዓል የይገባኛል ጥያቄ ማቅረቧ ይነገራል። ነገር ግን ኮሚሽኑ የመስቀል በዓል የኢትዮጵያ ቅርስ መሆኑን በማመን የአለም ቅርስ አድርጐት መዝግቦታል።

 

በጥምቀት በዓል ላይ ኢትዮጵያ አጣብቂኝ ውስጥ እየገባች መሆኗን ልብ ማለት ይቻላል። ለኤርትራ ሊሠጥ ይችላል። ስለዚህ መንግሥት፤ ቤተ-ክርስትያን፤ ቅርስ ጥበቃ ባለስልጣን፤ ተሠሚነት ያላቸው ግለሠቦችና ተቋማት ጥምቀት የኢትዮጵያ መሆኑን ለማመልከት ከምን ግዜውም በላይ መጣር ይጠበቅባቸዋል።

 

በርግጥ ኤርትራም ለመከራከሪያ የምታቀርባቸው ታሪኮቿ አሣማኝ ሊሆኑ ይችላሉ። ኤርትራ የኢትዮጵያ አናት ሆና በመኖሯ ብዙ የሐይማኖታችን ታሪኮች ኤርትራን አቋርጠው ወደ እኛ መምጣታቸው ይታወቃል። ኤርትራ የእምነት የስልጣኔ መግቢያ በር ነበረች። ቀይ ባሕርን ተታካ ያለች እጅግ ጠቃሚ የሆነች የኢትዮጵያ አካል ነበረች። አሁን በመገንጠሏ ደግሞ በታሪክ እና በእምነት ውስጥ የይገባኛል ጥያቄ በማቅረብ ላይ ነች። ስለዚህ ዩኔስኮ በጥያቄዋ ካመነ ጥምቀትን ለኤርትራ ሊሰጥ ይችላል።

 

የኢትዮጵያ ቅርሶችን የአለም ቅርስ አድርጐ ለማስመዝገብ የሚንቀሣቀሠው አካል በሁሉም ነገር ፈጣን የሆነ እርምጃ መውሠድ አለበት። ይህ ሁሉ ሚሊየን ኢትዮጵያዊ በነቂስ ወጥቶ የሚያከብረው ጥምቀት ከኢትዮጵያ ተነጥቆ እንዳይወጣ ብርቱ ትግል ማድረግ ያስፈልጋል።

 

በተለይ ጽላተ-ሙሴው እዚሁ ኢትዮጵያ ውስጥ ከመሆኑ አንፃር እና ያሉን ታቦታትም የዋናው ፅላት ብዜት (Replica) ከመሆናቸው አንፃር ኢትዮጵያ የጥምቀት በዓል ላይ የባለቤትነት ድርሻዋ ምንም የሚያጠራጥር አይደለም። የመከራከሪያ የማሣመኛ ነጥቦቻችን አያሌ ናቸው። እነሡን ይዞ መቅረብ ግድ ይላል። ኤርትራ እንዳይሄድብን ብርቱ ጥንቃቄ ማድረግ ይጠበቅብናል።

ይምረጡ
(0 ሰዎች መርጠዋል)
1046 ጊዜ ተነበዋል

Sendek Newspaper

Bole sub city behind Atlas hotel

Contact us