የጥምቀት በዓል በኢትዮጵያ መቼ ተጀመረ?

Friday, 22 January 2016 12:49

 

 

በጥበቡ በለጠ

 

በጥምቀት በዓል በኢትዮጵያ ውስጥ ያሉት ታቦታት በሙሉ ከመንበረ ክብራቸው ተነስተው ጉዞ ያደርጋሉ። ጉዞው ወደ ጥምቀተ ባሕር ነው። ከፍተኛ በሆነ የሕዝብ አጀብ እና እልልታ ነው ጉዞው የሚደረገው። በዓሉ ጥር 10 ቀን ተጀምሮ ጥር 12 ቀን ይጠናቀቃል። በአንዳንድ አካባቢዎች ለምሣሌ ጐንደርን ጨምሮ ደግሞ በአሉ ለቀናት ይቀጥላል። ባብዛኛው ግን ከጥር 10-12 ባሉት ቀናት በመላ ሐገሪቱ ውስጥ ይከበራል።

 

ታቦታት ከመንበረ ክብራቸው ተነስተው ጉዞ እንዲያደርጉ እና አሁን ያለውን የጥምቀት በዓላችንን አከባበር የጀመረው ማን ነው? መባሉ አይቀርም። አሁን ያለውን የጥምቀት በዓል አከባበራችን የተጀመረው በ12ኛው መቶ ክፍለ ዘመን እንደሆነ የቤተ-ክርስትያን መረጃዎች ያመለክታሉ። ጀማሪውም ቅዱስ ላሊበላ ነው።

 

ቅዱስ ላሊበላ ኢትዮጵያን ከ1157 ዓ.ም ጀምሮ ለአርባ አመታት የመራ ታላቅ ንጉስ ነው። ንግሥናው አስገራሚ ነው። ላሊበላ ቄስ ነው። ላሊበላ ንጉስ ነው። መስቀል ይዞ ያሣልማል፤ የቤተ-ክርስትያን ሰርዓት ያስፈፅማል። ኢትዮጵያንም ያስተዳድራል። ይህ ንጉስ በኢትዮጵያ ኦርቶዶክስ ኃይማኖት ውስጥ ሊቅ የሚባልም ነው። የሐገሩን የቤተ-ክህነት ትምህርት ጠንቅቆ የተማረ ነው። ከዚያም ወደ እየሩሳሌም ሔዶ 12 አመታት ቆይቶ ብዙ ተምሯል። ኢብራይስጥ እና አረብኛ ቋንቋን ሁሉ ያውቃል። ከአለም ታላላቅ ሠዎችና ፍልስፍናዎች ጋር ተዋውቋል። ሐገሩ ኢትዮጵያን በሐይማኖቱም ሆነ በስልጣኔው የማዘመን (Modern) የማድረግ ሕልም የነበረው ንጉስ ወቄስ ነው።

 

እናም ዛሬ ሰሜን ወሎ እየተባለች በምትጠራው በላስታ ወረዳ ሮሃ ከተባለች ቦታ ላይ ነገሠ። በነገሠ በ23 አመት ውስጥ በሰው ልጅ አእምሮ ውስጥ እስከ አሁን ድረስ እንቆቅልሽ የሆኑትን 10 አብያተ-ክርስትያናትን ከአለት ፈልፍሎ ካለ ምንም የኮንሥትራክሽን ስህተት ሠራ። ኪነ-ሕንፃዎቹ ዳግማዊት እየሩሳሌም በኢትዮጵያ የሚወክሉ ናቸው። ኢትዮጵያን እየሩሳሌምን የማድረግ ኘሮጀክት ነው።

 

ቄስ የነበረው ይህ ንጉስ እየሩሳሌም በኖረበት ወቅት የታዘባቸውን ብዙ ነገሮች ሀገሩ ላይ የተሻሉ አድርጐ መንፈሣዊ ሕይወት ሠጥቷቸው የማከናወን ሕልም ነበረው። ከነዚህ ውስጥ አንዱ ጥምቀት ነው። ሁሉም አብያተ-ክርስትያናት ከምዕምኖቻቸው ጋር ሆነው ፍፁም ሀሴት በተሞላው ስርዓት እንዲያከብሩ ያደረገ ቀዳማይ ንጉስ።

 

በዚሁ በጥምቀት በዓል ላይ በኢትዮጵያ ኦርቶዶክስ ኃይማኖት ውስጥ እጅግ መንፈሣዊ ክብር የሚሠጣቸው ታቦታት' መስቀሎች' ፅናፅሎች' ዣንጥላዎች' ታላላቅ ድርሣናት' ብርቅና ድንቅ የሆኑ ቅርሶች ወዘተ ይወጣሉ። ካሕናት በአልባሣት ያሸበርቃሉ። ምዕምናን እና ምዕመናት ፀዐዳ ልብሶቻቸውን ይለብሣሉ። ሕፃናት ክርስትና ለመነሣት ይዘጋጃሉ። የኢትዮጵያ ኦርቶዶክስ ተዋህዶ ቤተ-ክርስትያን ደምቃ እና ገዝፋ የምትታይበት የፈጣሪን ታላቅነት የምታሣይበት አበይት በዓሏ ጥምቀት ነው። ቅዱስ ላሊበላ ዛሬ የምናከብረውን ይህን መንፈሣዊ ትውፊት ያጉናፀፈን የጥበብ አባት ነው።

ይምረጡ
(2 ሰዎች መርጠዋል)
1476 ጊዜ ተነበዋል

Sendek Newspaper

Bole sub city behind Atlas hotel

Contact us