ተናገር አንተ ሐውልት

Wednesday, 18 May 2016 13:35

በጥበቡ በለጠ

      ተናገር አንተ ሐውልት

                በግርማ ታደሰ 1964 ዓ.ም

ተናገር አንተ ሐውልት

ተናገር አንተ ሐውልት አንተ አክሱም ያለኸው

አስከ ዛሬ ድረስ ብዙ ጉድ ያየኸው፤

አንተ ህያው ደንጊያ ብዙ ያሣለፍከው።

ሦስት ሺ ዘመናት እዚያ ተገትረህ

እስቲ ያየኸውን ንገረኝ ዘርዝረህ

እኔ ብዕር ይዤ ታሪክ ልፃፍልህ።

       ንገረኝ! ንገረኝ! አንተ ጥርብ ደንጊያ

       እስከ አሁን የቆምከው ሁሉን አርገህ ትብያ

       ተናገር አንተ ሀውልት ታሪክ ኢትዮጵያ

       ያነፁህ መሐንዲስ ያሳነፁህ ንጉሥ

       እነዚያ የሠሩህ ላባቸው እስኪፈስ

       እነዚህ ሁሉ አልፈው በፍፁም ተረስተው

       ምን ልትሠራ ነው አንተ የተገተርከው?

ተናገር አንተ ሐውልት አክሱም ላይ የቆምከው

በሞቴ! ንገረኝ፣ ተናገር አንተ ሐውልት

እንደምን አቆሙህ ጠረቡህስ እንዴት

ንገረኝ ምስጢሩን ዛሬ እንድንሠራበት።

ታዲያ ያ ሁሉ እውቀት፣ ያ! አንተን የሠራ

የት ገባ ንገረኝ? አስቲ በል እኮ አውራ፤

ተናገር አንተ ሐውልት ማንንም አትፍራ።

አንተን ያነፁ እጆች አንተን የጠረቡ

ንገረኝ አንተ ሐውልት የት ገባ ጥበቡ

በል እስቲ አትሸሽገኝ ንገረኝ የት ገቡ?

       ተብለህ ይሆን ወይ ለሰው አትናገር

       ያንተን ጊዜ ጥበብ፣ ያንተን ጊዜ ምስጢር

       ይበልጥ ተሠርቶ እንዳትፎካከር

       ጡብ ድንቅ! እየተባልክ አንተ ብቻ እንድትኖር?

       ንገረኝ አንተ ሀውልት ግዴለም ተናገር።

እስቲ ልጠይቅህ እረ ለመሆኑ

ያነፁህ መሐንዲስ እነማን ይሆኑ?

አልጋው ላይ ማን ነበር፤ ንጉሥ ወይም ንግሥት

ያኔ ስትሠራ አንተ የአክሱም ሐውልት፤

ንገረኝ እባክህ ታሪክ ልማርበት

አንተን ሠርቶ ማቆም ስንት አመት ወስደ

ስንት ሙያተኛ በኃይል ተገደደ፤

በሌትር ቢሰፈር ስንት ላብ ወረደ?

      ሦስት ሺህ ዘመናት እዚያ ስትገተር

      እንዴት አይደክምህም? ወድቀህ አትሠበር?

      ሦስት ሺህ ክረምቶች የጣሉት ዶፍ-ዝናብ

      መብረቅ ነጐድጓዱ ስንት አገር የሚያወድም፤

      እንዴት ወይ አልመቱህ ወይ አላሟሙህም?

      ተናገር አንተ ሀውልት እስቲ ግድየለህም?

      ምን ምኑን ቀብተው ምን አርገው አኖሩህ?

      ዘላአለም እንድትቆም ሁልጊዜ አዲስ ሆነህ

      እስቲ ስንት ጊዜ መሬት ተናወጠች

      በአክሱም አካባቢ አንተ እንደቆምክ እዚያች

      እንዴት ተቋቋምከው? ምነው አልሆንክ አንዳች?n

ይምረጡ
(2 ሰዎች መርጠዋል)
1048 ጊዜ ተነበዋል

Sendek Newspaper

Bole sub city behind Atlas hotel

Contact us