የኮሎኔል ፈቃደ ገብረየሱስ የጥናትና የምርምር ውጤት የሆነው የአመራር ሳይንስና ጥበብ የተሰኘው መጽሐፍ ባሳለፍነው ሳምንት መጨረሻ በኢትዮጵያ ቅርስ ጥበቃ ባለስልጣን አዳራሽ ተመርቋል። 704 ገጾች ያሉትን መጽሐፍ በ300 ብር ለገበያ ያቀረቡት ኮሎኔል ፈቃደ ከዚህ ቀደም ድርጅታዊ የጤና ምርመራ እና ካይዘን የተሰኙ መጽሐፍትን ለአንባቢያን አቅርበዋል። የአሁኑ መጽሐፋቸው በኢትዮጵያ፣ በተለያዩ የአፍሪካ አገራትና በአሜሪካ ያሉ የፖለቲካ መሪዎችን የአመራር ጥበብ ጨምሮ ታላላቅ የስፖርት አሰልጣኞችን የአመራር ብቃት ተሞክሮም የዳሰሰ ነው። መጽሐፉ በተመረቀበት ሥነ ሥርዓት ላይ የተገኙ እንግዶች ስለ መጽሐፉ እንዲሁም ስለ ህይወት ልምዳቸው ለታዳሚያን ያካፈሉ ሲሆን፤ ግጥም እና ወግ ደግሞ የምርቃቱ አካል ነበሩ።¾

 

በየዓመቱ ክረምት ወቅት ላይ የሚካሄደው ንባብ ለህይወት የእወቀትና የንባብ ሳምንት ዘንድሮም የተለዩና አዳዲስ ሃሳቦችን አካቶ በአዲስ አበባ ኢግዚቪሽን ማዕከል ይካሄዳል። ላለፉት ሶስት ተከታታይ ዓመታት የተካሄደው ይኸው የንባብና የእውቀት ሳምንት እንዳለፉት ዝግጅቶች ሁሉ ዘንድሮም የዓመቱ ብዕረኛ የሚሸለም ሲሆን፤ ከ200 በላይ አሳታሚዎችና መጽሐፍት አከፋፋዮች ስራዎቻቸውን ለአምስት ቀናት በሚቆየው ኢግዚቪሽን ላይ ቀርባሉ ሲል አዘጋጁ የማስታወቂያ ባለሙያው ቢኒያም ከበደ ለሰንደቅ ጋዜጣ ተናግሯል። አዘጋጁ አክሎም ከ20 ሺህ በላይ የኤሌክትሮኒክስ መጽሐፍትም ለአንባቢያን የሚታደሉ መሆናቸውን ተናግሯል።


ከዚህ በፊት በስነ ጽሁፉ ዘርፍ ተሸላሚ የሆኑት ሁሉም የአማርኛ ቋንቋ ጸሀፊያን በጾታም ወንዶች ብቻ መሆናቸው ይታወቃል። ዘንድሮ ምን አዘጋጅታችኋል? ለሚለው የሰንደቅ ጋዜጣ ጥያቄ ምላሽ የሰጠው ጋዜጠኛና የማስታወቂያ ባለሙያ ቢኒያም ከበደ፤ የተነሳው ጥያቄ ተገቢና ትክክለኛ መሆኑን ገልጾ ሆኖም በዚህ ዓመት ባይሆንም ከቀጣዮቹ ዓመታት ጀምሮ በተለያዩ ቋንቋዎች የተሰሩ ጽሑፎችንና ጸሐፊያንን የሚያከብሩበት እቅድ እንዳለ ተናግሯል። ከኦሮሚያ ወጣቶችና ባህል ቢሮ ጋር በመተባበርም ስራውን እንደጀመሩት አስታውቋል።


ዝግጅቱን በዚህ ዓመት ከሌሎቹ ለየት የሚያደርገውን ምክንያት በተመለከተ ሲናገርም ‹‹የማያነብ ጋዜጠኛ አገርን ይገድላል፤ የማያነብ ሀኪምም ህዝብን ይገድላል›› የሚለው አዘጋጁ ቢኒያም ከበደ፤ ‹‹ንባብና ጋዜጠኝነት፣ ንባብና ህክምና….›› በሚል ርዕስ የተለያዩ ሙያዎችና ንባብ ያላቸውን ዝምድና አስመልክቶ የጥናትና ውይይት መድረክ መዘጋጀቱን ተናግሯል። ኢግዚቪሽኑን የማስታወቂያ ባለሙያና ጋዜጠኛ ቢኒያም ከበደ ከተባባሪ አካላት ጋር ነው ያዘጋጁት።

በይርጋ አበበ

 

የገጣሚ አስናቀ ወልደየስ ስራ የሆነውና 100 ግጥሞችን በመቶ ገጽ የያዘው ጭራ’ንጓ ለገበያ የቀረበው በያዝነው ሳምንት መጀመሪያ ነው።

 

የግጥም መጽሃፉ ማህበራዊ ጉዳዮችን በስፋት የሚዳስስ ሲሆን ታሪክንና ማህበረ ፖለቲካንም በመጠኑ ይዳስሳል።

 

ጭራ’ንጓ በሁሉም መጽሀፍት መደብሮች እና መጽሃፍት አዟሪዎች እጅም የሚገኝ ሲሆን ለገበያ የቀረበበት የመሸጫ ዋጋው ደግሞ 40 የኢትዮጵያ ብር ነው።¾

 

በይርጋ አበበ

የንግድና ማህበራዊ ህይወት አማካሪ፣ ተመራማሪ እና የትምህርት ባለሙያ የሆኑት ዶክተር ተፈሪ ብዙአየሁ ደርሲስ መጽሀፍ የተመረቀው ባሳለፍነው ቅዳሜ እና እሁድ ነው።

 

የኦሮማራ ወግ የሚል ርዕስ የተሰጠው ይህ መጽሃፍ የኦሮሞን ህዝብ ትግል ከመሰረቱ እስከ ወቅቱ የዳሰሰ ሲሆን፤ በተለይ ከቅርብ ዓመታት ወዲህ የኦሮሚያ እና አማራ ወጣቶችን ህብረት እንዲሁም የሁለቱን ብሔረሰቦች ታሪካዊ ግንኙነት የሚዳስስ መጽሃፍ ነው።

 

መጽሃፉን የኦፌኮው ሊቀመንበር ዶክተር መረራ ጉዲና፣ የመድረኩ ስራ አስፈጻሚ አባል ፕሮፌሰር በየነ ጥሮስ እና የስነ መለኮት ምሁሩና የታሪክ ተመራማሪው ዶክተር ዘካርያስ አምደብርሃን ገምግመውታል።

 

አራት ክፍሎችን የያዘው ኦሮማራ በ212 ገጾች የተዘጋጀ ሲሆን 120 ብር ደግሞ ለገበያ የቀረበበት ዋጋው ነው። በሁሉም መጽሃፍት መደብሮች እና መጽሃፍት አዟሪዎች እጅ የሚገኝ መሆኑን ደግሞ ደራሲው ዶክተር ተፈሪ ተናግረዋል።

 

‹‹የኦነግ ሰራዊት ወደካምፕ እንዲገባ ማነው የተስማማው? በአራቱም መንግስታት የዘመናዊቷ ኢትዮጵያ ታሪክ የቀውስ ማዕከል የሆነችው ኦሮሚ ለምንድን ነው? የእነ ለማ ቡድን ወደ ስልጣን እንዴት ወጣ ምንስ ለውጥ ይጠበቅበታል? አቶ በቀለ ገርባ እና የዚህ መጽሃፍ ደራሲን ጨምሮ ከነቀምቴ መምህራን ኮሌጅ እንዴት ተባረሩ? ኢትዮጵያስ እንደ አገር የምትቀጥለው እንዴት ነው?›› የሚሉትን ጨምሮ በርካታ ሃሳቦችን የያዘ መጽሃፍ ነው¾

 

በይርጋ አበበ

 

የደራሲ ያሬድ ነጋሽ አዲስ መፅሐፍ “የካድሬው ንሰሃ” የፊታችን አርብ ከአመሻሹ ፀሐይ ከመጥለቋ በፊት ይመረቃል።

በዋቢ ሸበሌ ሆቴል ከአብራጃው 11፡00 የሚመረቀው የካድሬው ንሰሃ ላይ ዶ/ር ዮናስ ባህረ ጥበብ፣ አርክቴክት ሚካኤል ሽፈራው፣ ገጣሚያኑ ማርቆስ አውራሪስ፣ ልዑል ሀይሌ፣ ስጦታው አስማረ፣ ብሩክ ሚፍታህ እና መላኩ ስብሃትን ጨምሮ ጥሪ የተደረገላቸው እንግዶች ይገኙና መፅሐፉን “ከአይን ያውጣህ” ሳይሆን ለአይን ያብቃህ ብለው ይመርቁታል።

 

በይርጋ አበበ

አንጋፋው የታሪክ ተመራማሪ ንጉሴ አየለ ተካ ለ18 ዓመታት ያካሄዱት የምርምር ስራ የሆነው “ታላቁ ጥቁር ኢትዮ-አሜሪካ ዘዳግማዊ ምኒልክ” ለገበያ የቀረበው በያዝነው ሳምንት መጀመሪያ ነው።

በዳግማዊ አፄ ምኒልክና በቀደምት ኢትዮጵያ ላይ የሚያተኩረው ይኸው ወርደ ሰፊና ሀሳበ ብዙ መፅሐፍ 473 ገፆች አሉት። ቀጣይ ክፍል እንዳለው የተገለፀው ይህ መፅሐፍ 25 ምዕራፎች ሲኖሩት ኢክሊፕስ ማተሚያ ቤት ደግሞ የህትመት ስራውን ያከናውነው ድርጅት ነው።

ሁለት መቶ ብር በማይሞላ ገንዘብ ለገበያ የቀረበው “ታላቁ- ጥቁር” ጸሐፊውን ሰፊ የምርምርና የጥናት ጊዜ እንደወሰደባቸው ተገልጿል። ታላቁ ጥቁር ኢትዮ- አሜሪካ ዘዳግማዊ ምኒልክ በ195 ብር ብቻ በሁሉም መፅሐፍት መደብሮችና የመፅሀፍት አዟሪዎ እጅ ላይ አፄ ምኒልክን በዙፋናቸው ላይ በክብር አስቀምጦ በክብርና በኩራት የሚገኝ መጽሐፍ ነው።

 

በይርጋ አበበ

ወጣቱ ደራሲ ሳምሶን ከፍያለው “ከዕለታት አንድ ቀን” የተሰኘ የግጥም መድብል እና “መወልወያ አዟሪውና ሌሎችም” የተሰኘ የአጫጭር ልቦለዶች ስብስብ መፅሀፎቹን ለንባብ አብቅቷል።

የወጣቱ መፅሀፎች በሁሉም መፅሀፍት መደብሮችና መፅሀፍ አዟሪዎች እጅ የሚገኙ መሆናቸውን ደራሲው ለሰንደቅ ጋዜጣ ተናግሯል።

ከዕለታት አንድ ቀን 60 ግጥሞችን የያዘ ሲሆን በ91 ገፆች የታቀፈ ነው። መወልወያ አዟሪውና ሌሎችም ደግሞ በአምስት ክፍሎች የታቀፈ ባለ 140 ገፆች ነው። የግጥም ስብስቦችን የያዘው መፅሀፍ በግማሽ መቶ ብር ለአንባቢያን ሲቀርብ፤ አጫጭር ልቦለዶችን ያሰባሰበው መወልወያ አዟሪው ደግሞ መቶ ብር 30 ብር ጉዳይ ለገበያ የቀረበበት የዋጋ ተመን ነው።

 

ደራሲ ደሳለኝ ስዩም በ61 ብር ለገበያ ያቀረበው እህ’ናት ወይም የሀፍረት ቁልፍ በያዝነው ሳምንት ለንባብ በቅቷል።

ደራሲና ጋዜጠኛ ደሳለኝ ስዩም ከዚህ ቀደምም ሌሎች መጽሃፍትን ለአንባቢያን ያቀረበ ሲሆን ይህ በሶስት ክፍሎች የተከፈለና 196 ገጾችን የያዘ ነው። የአጻጻፍ እንግድነት የሚታይበትና የስነ ፅሁፍ አዋቂዎችን ቀልብም የሚስብ እንደሆነ ደራሲው አስታውቋል።

 

ለአንድ ወር የሚቆየውና በሰዓሊ ሰሎሜ ሙለታ የተሳሉ ስዕሎችን ለዕይታ የሚያበቃው አ-ዙሪት የስዕል አውደ ርዕይ ነገ ምሽት በፈንድቃ የባህል ማዕከል ይከፈታል።

የአውደ ርዕዩ አስተባባሪዎች ለሰንደቅ ጋዜጣ እንደገለጹት ሰዓሊዋ ለእይታ እንዲበቁ ያዘጋጀቻቸው የስዕል ስራዎቿ ለስድስት ዓመታት ስትሰራቸው የቆዩ ናቸው። ሴትነት፣ ክብነት፣ መሬታዊነት፣ ጠርዝ አልቦ የምስልና የሃሳብ ፍሰት የሚታይባቸው እንደሆኑ የገለጹት አዘጋጆቹ፤ የስዕል ስራዎቿ በብዛት ትኩረት ያደረጉት በጎዳና የወደቁ እህቶችን ህይወት የሚዳስስ የአብስትራክት ስራ መሆኑን አስታውቀዋል።

“ተፈጥሮና ሴት ውስጥ ጠርዝ የለም” የምትለው ሰዓሊዋ፤ ደብረዘይት ተወልዳ ያደገች ሲሆን በእንጦጦ ሙያና ቴክኒክ ትምህርት ቤት እንዲሁም በአቢሲኒያ የስነ ጥበብ ትምህርት ቤት በመማር ሙያዋን አሳድጋለች። ተደጋጋሚ እግዚቪሽኖችንም በሀዋሳ እና በአዲስ አበባ የኦሮሞ ባህል ማዕከል አሳይታለች። እንጄራን ከስራዬ ጋር አልቀላቅልም ብላ የምትናገረው ሰዓሊ ሰሎሜ፤ በአሁኑ ወቅት በአንድ የቤትና የቢሮ እቃ ማምረቻ ድርጅት (ፈርኒቸር) በዲዛይነርነት ትሰራለች። የስዕል አውደ ርዕዩ ከነገ ሰኔ 21 እስከ ሃምሌ 21 ቀን 2010 ዓ.ም ድረስ ካዛንቺስ በሚገኘው ፈንድቃ የባህል ማዕከል ለዕይታ ክፍት ሆኖ ይቆያል። በነጻ ገብቶ አውደ ርዕዮቹን መከታተል ደግሞ ለታዳሚያን የቀረበ ገጸ በረከት ነው።

 

የቀድሞው የአውራምባ ታምስ እና ጎግል ጋዜጦች አዘጋጅና ዘጋቢ ጋዜጠኛ ውብሸት ታዬ ከሰባት ዓመት እስር በኋላ ከእስር በወጣ በወራት ልዩነት “ኢትዮጵያዊነትን የመመለስ ተጋድሎ” የሚለውን መጽሀፉን ለአንባቢያን አቀረበ።

“እስር ቤት በነበርኩበት ጊዜ ጀምሮ እጽፋቸው የነበሩ ስራዎችን ነው በአንድ ላይ አሰባስቤ ያሳተምኩት” ሲል ለሰንደቅ ጋዜጣ የተናገረው ጋዜጠና ውብሸት ታዬ፤ እንዳለፉት መጽሀፎቹ ሁሉ የአሁኑ መጽሃፉም አገራዊ ጉዳዮችን የያዘ ነው። 120 ብር ከአንባቢያን ኪስ የሚጠይቀው “ኢትዮጵያዊነትን የመመለስ ተጋድሎ”፤ 228 ገጾች የመጽሀፉ ከፍታ ልኬቶች ናቸው።

ጋዜጠኛ ውብሸት በዚህ ስራው በብዛት ስለ እስር ቤት ቆይታውና ብሎም በእስር ቤት ስላጋጠሙት የኢትዮጵያዊያን ሰቆቃ የሚዳስስ ሲሆን፤ አገሪቱ ውስጥ ያሉ መጽሃፍ አዟሪዎች “ኢትዮጵያዊነትን የመመለስ ተጋድሎ”ን አንባቢን ባሉበት ቦታ ለማድረስ እጃቸው ላይ ይዘውት ይዞራሉ። አንባቢንና የመጽሃፍ ገዥዎች ወደ መጽሃፍ አከፋፋዮች መደብር ጎራ የሚሉ ከሆነ ደግሞ በአከፋፋዮች መደብር መደርደሪያ ላይ “ኢትዮጵያዊነትን የመመለስ ተጋድሎ”ን በክብር ተቀምጦ ገኙታል። ለሸሬታ የቀረበበት ዋጋ 120 ብር ብቻ መሆኑን ግን ልብ ይሏል።

Page 1 of 42

ድርጅትዎ ያስተዋውቁ!

  • Advvrrt4.jpg

እዚህ ያስተዋውቁ!

  • Aaddvrrt5.jpg
  • adverts4.jpg
  • Advertt1.jpg
  • Advertt2.jpg
  • Advrrtt.jpg
  • Advverttt.jpg
  • Advvrt1.jpg
  • Advvrt2.jpg

 

Advvrrt4

 

 

 

 

Who's Online

We have 31 guests and no members online

Sendek Newspaper

Bole sub city behind Atlas hotel

Contact us