የማይታከም መካንነት የለም

Wednesday, 04 April 2018 13:58

ዶ/ር ፌሩዝ ሱሩር


መካንነት በብዙዎቻችን ዘንድ ልጅ አለመውለድ እንደሆነ እና አንድ ጊዜ ከተከሰተ ሊስተካከል እንደማይችል ነው የምንረዳው። ምክንያቱንም በተለያየ መንገድ ማስቀመጥ የተለመደ ነው። ይሄን ጉዳይ በተመለከተ በዘርፉ የተሰማሩ ባለሞያ አነጋግረን የሚከተለውን መረጃ ይዘን ቀርበናል። ባለሞያው ዶክተር ፌሩዝ ሱሩር ሲሆኑ፤ ዶ/ር ፌሩዝ በቅዱስ ጳውሎስ ሚሊኒየም ሜዲካል ኮሌጅ በማህጸንና ፅንስ ሀኪም እና የመካንነት እና ስነ ተዋልዶ ህክምና ክፍል ኃላፊ ናቸው።

 

ሰንደቅ፡- መካንነት በተለምዶ ልጅ አለመውለድ ተብሎ ነው የሚተረጎመው። በህክምናው ያለው ትርጓሜስ ምን ይመስላል?


ዶ/ር ፌሩዝ፡- መካንነት በተለመደው እና በቀጥታ አነጋገር መውለድ አለመቻል ነው። በህክምና አገላለፅ መውለድ አለመቻል የሚረጋገጠው አንዲት ሴት ለአንድ ዓመት ያህል ምንም አይነት የወሊድ መከላከያ ሳትጠቀም እና በቂ የሆነ ወሲባዊ ግንኙነት እያደረገች ጽንስ መጸነስ ሳትችል ስትቀር ነው። ይህ የጊዜ ገደብ ወደ ስድስት ወራት ዝቅ የሚልበት ጊዜም አለ። ሴቷ እድሜዋ የገፋ እና ከ35 ዓመት በላይ ከሆነ የመካንነት ችግር አለና ምርመራ ያስፈልጋል የሚባለው ለስድስት ወራት ያህል ያለ ምንም አይነት የወሊድ መከላከያ በቂ የሆነ ግንኙነት እያደረገች መፀንስ ሳትችል ስትቀር ነው። መካንነት በተለምዶ አነጋገር ካየነው ዘላቂ የሆነውን መካንነት ይገልፃል። አንዲት ሴት መካን ናት ሲባል መውለድ አትችልም ወደሚለው ድምዳሜ ይወሰዳል። የአማርኛው ቃል አንድ ትርጉም ቢኖረውም እንግሊዘኛው ግን infertility ወይም subfertility እና sterility በሚል በሁለት ይከፍለዋል። ኢንፈርቲሊቲ ወይም ስብፈርቲሊቲ የሚባለው በተለያዩ ምክንያቶች የእርግዝና መዘግየት ሲሆን፤ ስቴሪሊቲ የሚባለው ደግሞ ሁሉም አይነት ህክምና ተደርጎ ነገር ግን ማስተካከል ሳይቻል ሲቀር ነው። ይሄንኛው የበለጠ ከአማርኛው ትርጉም ጋር ይቀራረባል።


ሰንደቅ፡- መካንነት ብዙ ጊዜ ከተፈጥሮ ጋር ይያያዛል። በአብዛኛውም በሴቷ በኩል የሚመጣ ተደርጎ ነው የሚወሰደው። በሳይንሱ በኩልስ የሚጠቀሱ ምክንያቶች ይኖራል? የወንዶች ድርሻስ ምን ያህል ነው?


ዶ/ር ፌሩዝ፡- ምክንያቶቹን በተለያየ መንገድ መመልከት ይቻላል። በአጠቃላይ ሲታይ ለመካንነት የሴቷ ድርሻ 40 በመቶ፣ የወንዱ ደግሞ 30 በመቶ ሲሆን፤ 15 በመቶው የሁለቱም ድርሻ ነው። ቀሪው 15 በመቶ ግን ምክንያቱ አይታወቅም። መካንነት የአንድ ሰው ችግር ሳይሆን የጥንዶች ችግር ነው። ስለዚህ የመካንነት መንስኤዎችን የወንዱ፣ የሴቷ፣ የጋራ እና ምክንያቶቹ የማይታወቁ በሚል በአራት መክፈል ይቻላል።


የመካንነት ምክንያቶችን ከመደርደር አስቀድሞ አንዲት ሴት ለማርገዝ የሚያስፈልጋትን መሠረታዊ ነገሮች መግለፅ ያስፈልጋል። የመጀመሪያው በቂ የሆነ እና ጤናማ የሆነ የወሲብ ግንኙነት ማድረግ ያስፈልጋታል። በቂ ግንኙነት ማለት ሳይንስ እንደሚያስቀምጠው በአንድ ሳምንት ውስጥ ቢያንስ ሁለት ጊዜ አሊያም ሴቷ እንቁላል በምታዘጋጅበት ወቅት በቂ ድግግሞሽ ያለው ግንኙነት ማድረግ ይኖርባታል። በተጨማሪም ግንኙነቶቹ ከስንፈተ ወሲብ እና በተለያዩ የወሲብ ችግሮች የፀዱ መሆን ይጠበቅባቸዋል። ይሄም ሆኖ ሁልጊዜ እርግዝና የመከሰት እድሉ ዝቅተኛ ነው። ሁሉም ነገር ተሟልቶ በሳምንት ሁለት ጊዜ ግንኙነት እያደረገች እንኳን አንዲት ሴት የመፀነስ እድሏ በመጀመሪያው ወር ከ30 እስከ 45 በመቶ ነው። በሁለተኛው ወር ላይ ወደ 50 በመቶ፣ በአራተኛው ወር ወደ 60 በመቶ ከፍ እያለ ይሄዳል። ልክ እንደ ዕጣ የግንኙነት ድግግሞሹ እየጨመረ በሄደ ቁጥር እድሉም ይጨምራል።


ሁለተኛው መሠረታዊ ነገር የወንዱ የዘር ፍሬ በብዛት እና በመጠን የተሟላ መሆን አለበት። በግንኙነት ወቅት ወደ ሴቷ የሚተላለፉት የወንዱ የዘር ፍሬዎች በቁጥርም ሆነ በአይነት በቂ እና ጥሩ መሆን አለባቸው፤ መደበኛ የሆነ የራሳቸው ቅርጽ ያላቸው እና በቂ እንቅስቃሴ የሚያደርጉ መሆን ይኖርባቸዋል።


ሶስተኛው መሠረታዊ ነገር ደግሞ ፅንስ የሚቀመጥበት የሴቷ ውስጥ አካል የወንዱን የዘር ፍሬ በቀላሉ የሚያስተላልፍ እና በኋላም ጽንሱን ለመሸከም እና ለማሳደግ የሚችል መሆን አለበት። አራተኛው ደግሞ በማህፀን ጎንና ጎን ያሉት እና በኦቫሪ የሚመረተውን እንቁላል ወደ ማህጸን የሚወስዱ እና የወንዱን ዘር ፍሬ ከእንቁላሉ ጋር የሚያገናኙት ቱቦዎች (fallopian tubes) ክፍት መሆን አለባቸው። ጽንስ በእነዚህ ቱቦዎች ውስጥ ከተፈጠረ በኋላ ነው በአምስተኛው ቀን ወደ ማህጸን የሚገባው። ስለዚህ እነዚህ ቱቦዎች ክፍት መሆን ይኖርባቸዋል።


አምስተኛው መሟላት ያለበት ነገር ደግሞ ሴቷ በየወሩ እንቁላል ማምረት ይኖርባታል። በእንቁላል ቋት ውስጥ በየወሩ ጽንስ ለመፍጠር በርካታ እንቁላሎች ቢዘጋጁም አንዷ አይላ ትወጣለች። በአንደኛው ወር ከግራ በቀጣዩ ወር ደግሞ ከቀኙ የማህጸን ክፍል የሚወጣ እንቁላል ነው፤ ከወንድ ዘር ፍሬ ጋር ተዋህዶ ፅንስ የሚፈጥረው። ይሄ የእንቁላል ማምረት ሂደት ከተዛባ እርግዝና ላይፈጠር ይችላል። እነዚህ መሠረታዊ የሆኑት ናቸው እንጂ ሌሎች አስፈላጊ ነገሮችም አሉ። በማህፀን በር አካባቢ የወንድ የዘር ፍሬ ፀር የሆኑ ኬሚካሎች መኖር፣ ሌሎች ጠቅላላ የውስጥ ደዌዎች አለማርገዝን ሊያስከትሉ ይችላሉ። ምርመራ የሚካሄድበቸው መሠረታዊ ነገሮች እነዚህ ናቸው።


ወደ ምክንያቶቹ ስንመለስ በእኛ ሀገር በዋናነት የመካንነት ምክንያቱ ከማህጸን እና ቱቦ መዘጋት ጋር የተያያዘ ነው። ቱቦዎች በተለያዩ ምክንያቶች የሚዘጉ ሲሆን ዋናው ግን የማህጸን ኢንፌክሽን ነው። እነዚህ የማህፀን ኢንፌክሽኖች አንዳንድ ጊዜ ምልክት ይሰጣሉ፤ አንዳንድ ጊዜ ደግሞ ምልክት አያሳዩም። ሴቲቱ ራሷ ኢንፌክሽን እንዳላት ሳታውቀው ውስጥ ለውስጥ ሊኖርባት ይችላል። በተጨማሪም ከአባላዘር በሽታ ጋር ተያይዘው የሚከሰቱ ኢንፌክሽኖች ምልክት ያሳያሉ። እነዚህ ነገሮች ሴቷ እንዳትፀንስ የማድረግ ባህሪይ አላቸው። ከዚህ በተጨማሪም ከኦፕራሲዮን ጋር የተያያዘ ችግሮች፣ ከሳንባ ህመም ጋር የተያያዙ እንዲሁም ሌሎች በሆድ ውስጥ ጠባሳ ጥለው የሚያልፉ ችግሮች በአጠቃላይ የቱቦ መዘጋትን ሊያመጡ ይችላሉ። በሌላ በኩል ደግሞ ማህፀን በተለያዩ ምክንያቶች ችግር ሊኖርበት ይችላል። በአፈጣጠር ችግር ሊኖርበት ይችላል፤ በማህጸን ውስጥ የሚፈጠሩ እጢዎች ሊኖሩ ይችላሉ፤ የማህፀኑ የውስጠኛው ግድግዳ የተጎዳ ሊሆን የሚችልበት አጋጣሚ ይኖራል። ግድግዳው ጽንሱ ተጣብቆ እንዳያድግ ለማድረግ ምቹ የማይሆንበት ሁኔታ ሊኖር ይችላል። እነዚህ እነዚህ ችግሮች አለመውለድን የሚያመጡ ምክንያቶች ናቸው።


ሌላው ከሴቷ በኩል የሚጠቀሰው ምክንያት የማህፀን እንቁላል አለማምረት ነው። ማህፀን እንቁላል ማምረት እንዲያቆም ከሚያደርጉት ውስጥ በጣም ታዋቂዎች እና የተለመዱ አሉ። አንደኛው ፖሊስቲክ ኦቫሪያን ዲዚዝ የሚባለው ችግር ነው። ይህ ችግር ብዙውን ጊዜ ሰውነታቸው ወፈር ያለ እና እድሜያቸው በ20ዎቹ ውስጥ የሚገኙ ሴቶችን ያጠቃል። እነዚህ ሴቶች የስኳር ህመም በቤተሰባቸው ውስጥ ያለባቸው ናቸው። እነርሱም የስኳር ህመም ያለባቸው ሊሆኑ ይችላሉ፤ ነገር ግን ላይታይ ይችላል። እነዚህ ሴቶች የወር አበባቸው የተዘበራረቀ ሆኖ በየሁለት ወሩ፣ በየሶስት ወሩ አሊያም በየስድስት ወር የሚመጣ ነው። ይሄ ችግር ደግሞ የውስጥ ሆርሞኖች መዛባት የሚያመጡት ችግር ነው። ሌላኛው ደግሞ እንቁላል የማምረቱ ሂደት መቆም ካለበት ጊዜ ቀድሞ ሲያቆም ነው። ብዙውን ጊዜ እንቁላል የማምረት ሂደቱ እስከ 48 ዓመት የሚሄድ ሲሆን፤ አንዳንድ ጊዜ ደግሞ ቀደም ብሎ ሊያቆም ይችላል። እንቁላል ያልቅና የማምረት ሂደቱ ይቆማል። አንዳንድ ጊዜ ይሄ ችግር እድሜን ካለማወቅ ጋር ተያይዞ የሚከሰት ችግር ነው። ትክክለኛ እድሜን አለማወቅ ለዚህ ችግር መንስኤ የሚሆንበት ጊዜ አለ። በተጨማሪም ሌሎች የሆርሞን መዛባቶች የእንቁላል መመረት ሂደትን ሊያዛቡት ይችላሉ። ብዙ ከመወፈር አልያም ብዙ ከመክሳት ጋር ተያይዘው እንዲሁም ብዙ የአካል ብቃት እንቅስቃሴ ከማድረግ ጋር ተያይዞ የእንቁላል መመረት ሂደቱ የተዛባ ሊሆን ይችላል።


በወንዶች በኩልም የመካንነት ምክንያቶች አሉ። ይኸውም የወንድ የዘር ፍሬ ማነስ አልያም ሙሉ ለሙሉ መጥፋት አንዱ ነው። ለዚህ የወንድ የዘር ፍሬ መቀነስ እና ሙሉ ለሙሉ መጥፋት መንስኤው አይታወቅም። ልክ እንቁላል የማምረት ሂደቱ የተዛባ እንደሚሆን ሁሉ የወንድ የዘር ፍሬ የማምረት ሂደቱም ሊዛባ ይችላል። ይህ መዛባት በተፈጥሮ የመጣ፣ ካደጉ በኋላ የተከሰተ አሊያም በልጅነት ወቅት በገጠመ ኢንፌክሽን ሳቢያ የመጣም ሊሆን ይችላል። በተጨማሪም ከደም ስር ጋር የተያያዘ፤ ከአባላዘር በሽታዎች ጋር ተያይዞ የመጣ ሊሆንም ይችላል። ሌላው ደግሞ የዘር ፍሬ ተመርቶ የዘር ፍሬው የሚተላለፍበት መንገድ ተዘግቶ የዘር ፍሬው መውጣት የማይችልበት ጊዜም አለ። አልፎ አልፎ ደግሞ ከላይ ከአንጎል የሚረጭ ሆርሞን የወንድ የዘር ፍሬ እንዲዛባ የሚያደርግበት ጊዜም አለ።


ከላይ የተጠቀሱት ምክንያቶች እንዳሉ ሆነው አንዳንድ ጊዜ ደግሞ እስከ 20 በመቶ የሚሆኑት ጥንዶች የመካንነታቸው ምክንያት አይታወቅም። መደረግ የሚገባው ህክምና እና ምርመራ ሁሉ ተደርጎ ምንም አይነት ምክንያት ላይገኝ ይችላል።


ሰንደቅ፡- እንደመርፌ ያሉ የወሊድ መከላከያዎችን መውሰድ ለመካንነት ይዳርጋል የሚል ስጋት እና አስተሳሰብ ስላለ በተለይ ልጅ ያልወለዱ ሴቶች ባይወስዱ የሚመከርበት ጊዜ አለ። ይሄ ምን ያህል እውነተኛ መረጃ ነው?


ዶ/ር ፌሩዝ፡- ብዙ ሴቶች እኛ ጋርም ሲመጡ እነዚህ መከላከያዎች መካንነትን ያመጡብናል ብለው ይጨነቃሉ። የወሊድ መከላከያዎች በተለያየ መልኩ የሚሰጡ ናቸው። መርፌውን በተመለከተ የፕሮጀስትሮን ሆርሞን ያለው መከላከያ ነው። ይሄ ሆርሞን በሁሉም የወሊድ መከላከያዎች ውስጥ የሚገኝ ሲሆን፣ ሆርሞኑ በራሱ ችግር የሚፈጥር አይደለም። በመርፌ የሚሰጠው ፕሮጀስትሮን እንደሌሎቹ ሳይሆን የራሱ የሆኑ የጎንዮሽ ጉዳቶች አሉት። አንደኛ የወር አበባን ያዛባል። በተጨማሪም የክብደት መጨመር እና እርግዝናን የማዘግየት ባህሪይ አለው። ይሄ ፕሮጄስትሮን እርግዝናን ያዘገየዋል እንጂ አያስቀረውም። መርፌው አንድ ጊዜ ተወስዶ ለሶስት ወራት የሚያገለግለው ፕሮጀስትሮኑ በሰውነት ስብ ውስጥ ተከማችቶ ቀስ በቀስ ጥቅም ላይ ስለሚውል ነው። ልክ እንደ ጠቀሜታው ሁሉ ከሰውነት ውስጥ የሚወጣውም በሂደት ነው። ስለዚህ ከሰውነት ወጥቶ ለማለቅ ጊዜ ስለሚያስፈልገው ከተቋረጠ በኋላ ወዲያው ለማርገዝ አስቸጋሪ ነው።
ስለዚህ የሚመከረው ነገር መከላከያውን አቋርጣ ወዲያው ማርገዝ የምትፈልግ ሴት መርፌውን እንዳትጠቀም ነው። ከዚህ ውጪ ለወለደች ሴት ወይም ላልወለደች ሴት የሚባል ሳይሆን በሁሉም ሴቶች ላይ እርግዝናን የማዘግየት ባህሪይ አለው። ሌላው መገንዘብ የሚያስፈልገው መርፌው እድሜዋ ለገፋ ሴት አይመከርም። እድሜዋ የገፋ ከሆነ መርፌውን አቁማ ለማርገዝ የተወሰነ ጊዜ መጠበቅ ይኖርባታል። በዚህ ጊዜ ውስጥ ደግሞ ወደ ማረጥ ስለምትሄድ እርግዝና ላይከሰት ስለሚችል አይመከርም። ከ30 ዓመት በላይ ያለች ሴት መርፌውን ወስዳ አቋርጣ ተጨማሪ ጊዜ ለመጠበቅ ጊዜው ስለማይኖት ባትወስድ ይመከራል።


ሰንደቅ፡- መካንነት የተለያዩ አይነቶች ሊኖራት እንደሚችሉ ሳይንሱ ያስቀምጣል። እነዚህ አይነቶች ምን ምን ናቸው፤ መገለጫቸውስ ምንድን ነው?


ዶ/ር ፌሩዝ፡- መካንነት በሁለት ይከፈላል። አንደኛው ቀዳሚ መካንነት (primary infertility) ይባላል። ይህ አይነቱ መካንነት ከዚህ ቀደም ምንም አይነት እርግዝና ተከስቶበት የሚያውቅበት መካንነት ነው። ሁለተኛው ደግሞ ሁለተኛ መካንነት (secondary infertility) ነው። ይሄንኛው መካንነት ሴቷ የሆነ ጊዜ አርግዛ ውርጃ ተከስቶ፣ ከማህፀን ውጪ እርግዝና ሆኖ፣ በህይወት ተወልዶም ሊሆን ይችላል። ይህች ሴት አንድ ጊዜ ወይም ከዚያ በላይ ለሆነ ጊዜም አርግዛ ሊሆን ይችላል። ይሄ መካንነት የተከሰተው። ሴቷ ለመውለድ ስትፈልግ መውለድ ካልቻለች በዚህኛው የመካንነት አይነት ውስጥ ትካተታለች።


ሰንደቅ፡- ወደ ህክምናው ስንመጣ የሚሰጠው ህክምና ምን ይመስላል?


ዶ/ር ፌሩዝ፡- የማይታከም መካንነት የለም ማለት ይቻላል። የመጀመሪያው ህክምና ጉዲፈቻ ነው። ጉዲፈቻ (የሌላን ሰው ልጅ ማሳደግ) በቀላሉ ክብደትን በማስተካከል፣ ጭንቀትን በማስወገድ ልጅ ማጣትን ስለሚያስወግድ የመጀመሪያው የመካንነት ህክምና ነው ማለት ይቻላል። ወደ ሳይንሱ ሲገባም የተለያዩ ህክምናዎች አሉ። የመካንነት ምክንያቶቹ የተለያዩ እንደመሆናቸው ህክምናዎቹ የተለያዩ ናቸው።


ለሴቶች የሚደረጉት ህክምናዎች የሚከተሉት ናቸው። አንዲት ሴት የወር አበባዋ የሚዘበራረቅ ሆኖ እንቁላል የማምረት ችግር ካለባት ምርመራ ተደርጎ እንቁላል የማምረት ሂደቱን የሚረዱ መድሐኒቶች ይሰጧታል። ሁሉም ነገሮች ተሟልተው እንቁላል የማምረት ችግር ከሆነ የገጠማት ውፍረት የመቀነስ እና ሌሎች ሌሎች የሆርሞን መዛባቶችን የማስተካከል ህክምና ይሰጣታል። ችግሩ በማህፀን አካባቢ ከሆነ እና እንደ ማህፀን እጢ ያሉ ችግሮች ከሆነ እነርሱን በማውጣት እንድታረግዝ የማድረግ ህክምና ይሰጣታል።


ሌላው ህክምና የቱቦ መዘጋት ችግርን በኦፕራሲዮን ማከም ነው። ቱቦው በጣም ቀጭን ስለሆነ በቀላሉ ክፍት ዝግት አይደረግም። ኦፕራሲዮን ሊሞከር ይችላል ግን ውጤታማነቱ በጣም ጥቂት ነው። ለዚህ ችግር ተግባራዊ የሚደረገው አማራጭ ውጪ ላይ ፅንስ መፍጠር ነው። የሴቷን እንቁላል ከእንቁላል ማህደር በመርፌ በመውሰድ እና የወንዱን የዘር ፍሬ በመውሰድ ውጪ ላይ ፅንስ እንዲፈጠር ማድረግ ነው። ፅንሱ ከተፈጠረ በኋላ በ5ኛ ቀኑ ወደ ማህፀን እንዲገባ በማድረግ በማህፀን ቱቦው ላይ ያለውን ችግር መዝለል ይቻላል። በአሁኑ ወቅት ጥሩ መፍትሄ የሆነው ይሄ ህክምና ነው።


በወንዶች ላይ ያለውን የመካንነት ችግርም ማከም ይቻላል። ችግሩ የወንድ የዘር ፍሬ ማነስ ከሆነ የተለያዩ መድሃኒቶችን በመስጠት እንደ ማጨስ፣ መጠጣት ያሉ ነገሮችን በማስወገድ፣ አመጋገቡን፣ በማስተካከል፣ በጣም ሙቀት የሚያመነጩ አለባበሶችን በማስወገድ መጠኑን ለማስተካከል ህክምና ይሰጣል። ከዚህ በተጨማሪም ከወንዱ የዘር ፍሬ ላይ አንዷን በመውሰድ ወደ ሴቷ ማህፀን በማስገባት ፅንስ እንዲፈጠር የማድረግ ህክምና ይሰጣል። ሴቷ እንቀላል ማምረት ካቆመች ደግሞ ከሌላ ሰው እንቁላል በመዋስ የወንዱን የዘር ፍሬ በመውሰድ ፅንስ እንዲፈጠር ይደረጋል። ወንዱ የዘር ፍሬ ማምረት ሲያቆምም በተመሳሳይ የሌላ ሰውን የወንድ የዘር ፍሬ በመውሰድ ከሴቷ እንቁላል ጋር በማድረግ ፅንስ እንዲፈጠር ይደረጋል። ችግሩ የማህፀን ፅንስ መሸከም አለመቻል ከሆነ ደግሞ የማህፀን ኪራይ ህክምና ይሰጣል። የሴቷ እንቁላልና የወንዱ ዘር ፍሬ ተወስዶ በሌላ ሰው ማህፀን ውስጥ ፅንስ እንዲፈጠር በማድረግ ሴትየዋ በሆርሞን ተዘጋጅታ ሲወለድ እንድታጠባ ይደረጋል።


ሰንደቅ፡- በሀገራችንም ለመጀመሪያ ጊዜ በተለይ ከማህፀን ቱቦ ጋር የተያያዘ መካንነት ላጋጠማቸው ሴቶች ህክምና ለመስጠት ዝግጅት ተጀምሯል። ለዚህ ህክምና ብቁ የሆኑት ሴቶች በምን አይነት ሁኔታ ውስጥ ያሉት ናቸው?


ዶ/ር ፌሩዝ፡- የመካንነት ምርመራ ለማድረግ ጤናማ ግንኙነት ያላት ሴት አንድ ዓመት መጠበቅ አለባት ይባላል። ነገር ግን ግልፅ የሆኑ የመካንነት ምክንያት ያላቸው ሴቶች ያን ያህል ጊዜ መጠበቅ አይኖባቸውም። ከዚህ በፊት ኦፕራሲዮን አድርጋ እንቁላሉ ከወጣ፣ የወንዱ የዘር ፍሬ በተለያዩ ምክንያቶች ችግር እንዳለበት ከታወቀ፣ የወር አበባዋ የተዘበራረቀ ከሆነ እና ሌሎች ግልፅ የሆኑ ችግሮች ካሉ በፍጥነት ወደ ህክምና መሄድ ያስፈልጋል። እዚህ ላይ መገንዘብ ያለባቸው መካንነት የሴቶች ጉዳይ ብቻ ሳይሆን የወንዶችም ችግር ስለሆነ ወደምርመራው መምጣት ያለባቸው ሁለቱም ናቸው። በእኛ ሀገር ግን ችግሩ የሴቶች ብቻ ተደርጎ ነው የሚወሰደው። አንዳንዶቹ እንዲያውም ከባሎቻቸው ተደብቀው ነው ወደ ህክምና መሄዳቸው ትክክል አይደለም።

 

ይምረጡ
(0 ሰዎች መርጠዋል)
530 ጊዜ ተነበዋል

ድርጅትዎ ያስተዋውቁ!

  • Advvrrt4.jpg

እዚህ ያስተዋውቁ!

  • Aaddvrrt5.jpg
  • Addvvrt1.jpg
  • Adv.jpg
  • Advverttt.jpg

 

Advvrrt4

 

 

 

 

Who's Online

We have 1076 guests and no members online

Sendek Newspaper

Bole sub city behind Atlas hotel

Contact us