እባክህ ዶ/ር እናቴን ግደልልኝ. . .

Wednesday, 07 May 2014 13:47

በኪዳኔ መካሻ (የሕግ ባለሙያ)

This email address is being protected from spambots. You need JavaScript enabled to view it.

       

  • በአልጋ ላይ የሚገኙ እናቷን አልገልም ያላትን ዶ/ር የከሰሰችው ሴት ክርክር በምን ተቋጨ?
  • እውነተኛና አስገራሚ እናቷ መሞት እንዲፈቀድላቸው አንዲት ልጅ ያቀረበችው በአሜሪካን ሀገር የተዳኘ ክርክር
  • የሌሎች ሀገሮችና የኛስ ሀገር ሕግ ስለጉዳዩ ምን ይላል?
  • እርስዎ ቢሆኑ ምን ይወስኑ ነበር?

እንዴት ናችሁ? ሰላም ነው? ዛሬ እኛም ሀገር ሊያጋጥም የሚችል የሞትና የህይወት ሙግት ለመዳኘት በአንድ የአሜሪካን ሀገር ፍ/ቤት ችሎት ላይ እንሰየማለን። ጉዳዩ አንዲት ሴት እናቷን እንዲገድልላት የእናቷ ሀኪም ላይ ያቀረበችው ክስ ነው። ዶክተሩ ጥያቄዋን ባለመቀበሉ ተከሶ ፍ/ቤት ቀርቧል። ዳኛው የመጨረሻውን ትዕዛዝ ይሰጣሉ እንጂ ዶ/ሩ የከሳሽዋን እናት እንድትሞ ማድረግ አለበት ወይስ የለበትም የሚለውን የሚወስነው እርሶና ሌሎች ከሕብረተሰቡ የተውጣጡ የጁሪው አካላት ናቸው። ለግንዛቤ ያህል የሀገራችን ሕግ በጉዳዩ ላይ ምን እንደሚል እናነሳለን። ወደ ችሎት ከመግባታችን በፊት የክሱን መነሻ ባጭሩ እንይ።

1.የማይሰሙት የማይለሙት ወ/ሮ ሮዛ

ሮዛ ሚስኮኒ የተባሉት የ92 ዓመት ባለፀጋ ባልቴት በጠና ታመው ነፍሳቸው ያለችው በተቀጠለላቸው ሰው ሰራሽ የመመገቢያ ቱቦ ነው። ራሳቸውን ማወቅ በማይችሉበት ሁኔታ ውስጥ ገብተው እንክብካቤ እየተደረገላቸው ይገኛሉ። መናገርም ሆነ መመገብ አይችሉም። አይኖቻቸው እንደተከፈቱ ቢሆንም አይተው ሰው አይለዩባቸውም ሀኪሞቻቸው ከዚህ በኋላ ለምን ያህል ጊዜ በህይወት እንደሚቆዩ መናገር አልቻሉም። ለወራት ወይም ለአመታትም ሊሆን ይችላል። ኤልሲ ዋርነር የተባሉት የ65 ዓመቷ የእማማ ሮዛ ልጅ እና ሞግዚት ሀኪማቸው ነፍሳቸውን የሚያቆየውን የምግብ ቱቦ እንዲነቅለውና በሰላም እንዲያርፉ ፈለጉ። ለዶክተሩም ወ/ሮ ኤሊስ እናቴ ከእንዲህ አይነት ሁኔታ ውስጥ ሆና መኖር አትፈልግም ነበር መናገርና ሃሳቧን መግለፅ ስላልቻለች ነው እንጂ ብለው አስረዱት።

የእማማ ሮዛ ሀኪም ዶ/ር ጉንተር ማርክስ እጆቼ ታስረዋልና የሚሉኝን ልፈፅም አልችልም፡፤ እማማ ሮዛ ስለዚህ ጉዳይ ያዘዙኝ ወይም የገለፁልኝ ነገር የለም ሲሉ መለሱ፡፤ ዶክተሩ እኔ የመመገቢያ ቱቦውን ከነቀልኩት እማማ ሮዛ መሞታቸው ነው የእኔ ስራ ደግሞ ህመምተኞችን እንዲኖሩ መርዳት እንጂ እንዲሞቱ መርዳት አይደለም። ሞታቸውን ማፍጠኑ ከህክምና ከስነምግባርም መርሆቼ ጋር የሚጋጭ ነው በማለት የመመገቢያ ቱቦውን እንዲነቅል የቀረበለትን ጥያቄ ለመቀበል አሻፈረኝ አለ።

ወ/ሮ ኤሊሳ ዶክተሩ የጠየቁትን የእናታቸውን ህይወት የቀጠለውን የምግብ ቱቦ እንዲነቅል እንዲታዘዝላቸው ለፍ/ቤት ከሰሱ። የወ/ሮ ኤሊሳን ጥያቄ የሚረብሽ አንድ ነገር አለ። እናትየው እማማ ሮዛ ሲሞቱ ወ/ሮ ኤሊሳ ከፍተኛ መጠን ያለው ገንዘብ ይወርሳሉ። እንግዲህ ክሱ ቀርቧል። የምግብ ቱቦው መነቀል አለበት ወይስ የለበትም የሚለውን ሚወስኑት እርሶ ኖት።

2.ችሎቱ ተጀመረ

መልከ መልካም እድሜያቸው በሰላሳዎቹ ማገባደኛ ላይ የሚገኙት ዳኛ ተከራካሪዎቹን በማስተዋወቅ ችሎቱን ጀመሩ። “እሳቸው ከሳሽ ናቸው ወ/ሮ ኤሊሳ ዋርነር” ይባላሉ።

ወ/ሮ ኤሊስ ከንፈራቸውን እንደመንከስ እያሉ ተነሱ ፀጉራቸው ገብስማ ነው። ፍ/ቤት ለመቅረባቸው የፈሩ ይመስላሉ። ወ/ሮ ኤሊስ ሲቀመጡ ጠበቃችው በርቺ በሚል ስሜት ክንዳቸውን ነካ አደረገችው ጆሴፌን ሴጋን ትባላለች ተከሳሹ ዶ/ር ጉንተር ማርከስ ከተቀመጠበት ተነሳና ዳኛዋ እሱንም ለችሎቱ አስተዋወቁት። ፀጉሩ መለጥ ያለ ጢሙን ያጎፈረ ሰው ሲሆን የሆነ ያልተመቸው ነገር ያለ ይመስላል። የወ/ሮ ኤሊሳን አልፎ አልፎ በቆሪጥ ከማየት በስተቀር አይናቸውን ሲሸሽ ያስታውቅበታል።

ዳኛዋ “ውሳኔ የሚያስፈልገው ጉዳይ በልጃቸው በወ/ሮ ኤልሳ ጥያቄ የወ/ሮ ሮዛን ህይወት የሚያቆየውን የምግብ ቱቦ በመንቀል አሮጊቷ እንዲሞቱ መፈቀድ አለበት ወይም የለበትም የሚለው ጥያቄ ነው። በርግጥ እንዲህ አይነት የፍትሀብሔር ክርክሮች በዳኛ ብቻ የሚወሰኑ ቢሆኑም ተከራካሪዎቹ ለውሳኔ የሚረዱ እውነታዎችን እናንተ እንዳትወስኑላቸው በመጠየቃቸው ነው። በውሳኔያችሁ መሰረት ፍ/ቤት የመጨረሻውን ትዕዛዝ ይሰጣል” በማለት ማብራሪያ ካደረጉ በኋላ ክርክሩ ተጀመረ።

የመጀመሪያው የከሳሽ ምስክር ቀጥ ያለ ቁመና ያለው የከሳሿ የኤሊሳ ልጅ የእማማ ሮዛ የልጅ ልጅ የሆነው ፒተር ዋርነር ሲሆን እድሜው 43 ዓመት መሆኑንና ከሚስቱና ከአራት ልጆቹ ጋር በሳንፍራንሲስኮ እንደሚኖር ለችሎቱ ገለፀ። የከሳሿ ጠበቃ ወ/ሮ ጆሴፊን ቀጥተኛ ጥያቄዋን ጀመረች

“አንተ የወ/ሮ ሮዛ ብቸኛ የልጅ ልጅ ነህ?”

ፒተር፡- አዎ

የከሳሽ ጠበቃ፡- የከሳሽ የወ/ሮ ሮዛ ልጅ የወ/ሮ ኤሊሳም ብቸኛ ልጅ ነህ?

ፒተር፡- ትክክል ነው

የከሳሽ ጠበቃ፡- አያትህን ብዙ ጊዜ ታገኛቸው ነበር?

ፒተር፡- አዎን

የከሳሽ ጠበቃ፡- አያትህ ከምታውቋቸው አንፃር በዚህ አሁን ባሉበት ሁኔታ እራሳቸውን ሳያውቁ በህይወት መቆየት ይፈልጋሉ የሚል አስተያየት አለህ?

የተከሳሹ የዶ/ር ጉንተር ጠበቃ ቀጭንና ቅብጥብጧ ወ/ሮ ኤልሳቤጥ ሪኮ ከመቀመጫዋ ዘላ በመነሳት “ተቃውሞ ምስክሩ የግል ሃሳቡን እንዲሰጥ መጠየቅ የለበትም” አለች።

ዳኛዋ፡- ተቃውሞን ተቀብያለሁ የከሳሽ ጠበቃ የክርክሩን መሰረት ሲያሲዝና እኔ ሳልፈቅድለት የምስክሩን አስተያየት መጠየቅ የለበትም” ሲሉ አዘዙ።

የከሳሽ ጠበቃ ጆሴፍን እጅ ነስታ ጥያቄዋን ቀጠለች።

አያትህ ለህይወት ያላቸውን አመለካከት የምታይበት እድል አግኝተህ ነበር?

ፒተር፡- አዎ አያቴ ህይወቷ በእንቅስቃሴ እና እራሷን ለሌሎች አሳልፋ በመስጠት የተሞላ ነበር። እንዲህ ሳትሰማ ሳትለማ አልጋ ላይ ተንጋላ መኖር ትፈልግ ነበር ብዬ አላምንም።

የከሳሽ ጠበቃ፡- ይህን ነግረውህ ነበር?

ፒተር፡- የለም ይህንጥያቄ አንስተን አናውቅም። ሆኖም ሁሌም ፈጣንና መንቀሳቀስ የምትወድ ነበረች።

የከሳሽ ጠበቃ፡- ሁሉም ነገር ውስጥ መሳተፍ ይፈልጉ ነበር?

ፒተር፡- አዎ ትክክል ነው።

የከሳሽ ጠበቃ፡- በድጋሚ ምስክሩን አያቱ በዚህ ሁኔታ በሞግዚት ነርስ እንክብካቤ እየተደረገላቸው መኖር ይፈልጋሉ የሚል አስተያየት እንዳለው ስትጠይቅ። የተከሳሽ ጠበቃ የዳኛውን ትዕዛዝ በመቃወም ወ/ሮ ሮዛ ለህይወት ያላቸውን አመለካከት ማወቅ ምንችለው በነዚህ በሚያውቋቸው ሰዎች በኩል ነው። እራሳቸውን እና ፍላጎታቸውን መግለፅ ላልቻሉ ቤተሰቦቻቸው ምን ማድረግ እንዳለባቸው ኑዛዜ አልተውም። ለሀኪሞችም ያዘዙት ነገር የለም። ምን እንደሚፈልጉ ያስቀመጡት ነገር ስለሌለ ሀሳባቸውን መርዳት ምንችለው አኗኗራቸውን በማየት ነው። እነኚህ ሁኔታዎች እሳቸው በዚህ ሁኔታ ምን እንደሚፈልጉ ይጠቁመናል ስትል አስረዳች።

ዳኛው ከአፍታ ፀጥታ በኋላ ደህና ትዕዛዙን ሽሬዋለሁ ምስክሩ መልስ መስጠት ይችላ ሲሉ ፈቀዱ።

ፒተር፡- እሞክራለሁ የተከበረው ፍ/ቤት አያቴ ጠንካራ የመኖር ፍላጎት ያላት ህይወትን በቁም ነገር የምታይና ሁሌ ማልዳ ተነስታ ነገሮችን መስራት የምትጀምር ነበረች። ሰው ሲታመም የምትንከባከብ በወቅቱ ኑዛዜ ይህን ነገር የመግለፅ ነገር ቢኖር ኑዛዜዋን በርግጠኝነት ትፈርም ነበር። አሁን ባለችበት ሁኔታ መኖር አትፈልግም ይሄ የኔ አስተያየት ሳይሆን እውነታ ነው።

በቀጣይነት ከሳሽ ወ/ሮ ኤሊሳ ተነሱ የእናታቸው የወ/ሮ ሮዛ ጠባቂና ተንከባካቢ ናቸው። ወ/ሮ ሮዛ ባላቸው ከሞተ በኋላ ከቤት ጠባቂዎች ጋር ለበርካታ አመታት ብቻቸውን ኖረዋል። እድሜያቸው ወደሰማኒያዎቹ መጨረሻ ሲጠጋ እየጃጁና የበለጠ እንክብካቤ እያስፈለጋቸው መጡ። የአልዛይመር (የመርሳት በሽታ) ምልክት ታየባቸው። በአዛውነቶች መንከባከቢያ ቤት ልጃቸው ሲያስገቧቸው በዊልቸራቸው ላይ እንዳሉ አምልጠው ወደ መንገድ ወጥተው ተገኙ። ከዚያ ወ/ሮ ኤሊሳ ቤት አመጧቸው እዛ ደግሞ ነገሮች የበለጠ ከባድ ነበሩ። የወ/ሮ ኤሊሳም ባለቤት ካንሰር ስለነበረበቸው ሁለት ሰው ማስታመሙ ይከብዳል። እናትና ልጅ የከፋ ባይሆንም አልፎ አልፎ በመጠኑ ይጨቃጨቁ ነበር። እርስ በእርስ ይዋደዳሉ። ወ/ሮ ኤሊሳ ሚፈልጉት ለእናታቸው የተሻለውን ነገር ነው።

በ2005 (እ.ኤ.አ) አንድ ቀን ወ/ሮ ሮዛ ምግብ ሲመገቡ ታንቀው በኦክሲጅን እጥረት በሞት አፋፍ ደርሰው በህክምና እርዳታ ከሞት ቢተርፉም ከፍተኛ የአይምሮ ጉዳት ደርሶባቸው ተመልሰው ሊያገግሙ አልቻሉም። ህሊናቸውን አያውቁም መናገር ብቻ ሳይሆን መላ አካላቸውን መቆጣጠር አቃታቸው። ወደ መንከባከቢያ ቤት አስገቧቸውና በአፍንጫቸው በኩል አልፎ ጉሮሮአቸው ጋር የሚደርስ የመመገቢያ ቱቦ ተቀጠለላቸው። ነርሶቹ በዚህ ቱቦ እነሆ ፈሳሽና አልሚ ንጥረ ነገሮች ሚመግቧቸው በራሳቸው መመገብም መዋጥም አይችሉም።

ወ/ሮ ኤሊሳ በዝምታ ያለቅሳሉ ጠበቃቸው ጠየቀቻቸው፡-

ዶ/ር ጉንተርን ቱቦውን እንዲነቅልላቸው ጠይቀውታል?

ወ/ሮ ኤሊሳ፡- አዎ

የከሳሽ ጠበቃ፡- ምን አልዎት?

ወ/ሮ ኤሊሳ፡- ከነቀልኩት አሮጊቷ ይሞታሉ አለኝ

የከሳሽ ጠበቃ፡- እርስዎስ ምን መለሱለት? ወ/ሮ ኤሊሳ፡- ስለእግዚያብሔር ስትል እሷም የምትፈልገው ነገር ነው። ቤተሰቧም የሚፈልገው ይህንኑ ነው። ለእርሷ ለራሷ ስትል እናቴ በዚህ ሁኔታ መሆኗን ትጠላዋለች አልኩት።

የከሳሽ ጠበቃ፡- እሱስ ምን መለሰሎት?

ወ/ሮ ኤሊሳ፡- ዶክተሩ እኔ እሺ ብል ነርሷ ትጠቁምብኛለች ሁኔታቸው በጣም ቢያሳዝነኝም እጆቼ ታስረዋል ስለዚህ የፍርድ ቤት ማዘዣ ማምጣት አለብሽ እንዳላቸው ገለፁ። እምባቸው አሁን በግልፅ ታየ ዳኛዋን ሶፍት እንዲሰጧቸው ጠየቁና ወደ ጁሪዎ አባላት ዞረው “እባካችሁ እናቴ በሰላም እንድትሞት ፍቀዱላት እንዲህ ሆና መኖሩን በፍፁም አትፈልገውም” ሲሉ ተማፀኑ።

ጠበቃቸው ወ/ሮ ሮዛ ደህና እያሉ በዚህ መልኩ መኖር እንደማይፈልጉ የገለፁባትን አጋጣሚ ስትጠይቃቸው። ወ/ሮ ኤልሳ እናታቸው እድሜያቸው በስልሳዎቹ ውስጥ እያለ የአዛውንቶች መንከባከቢያ ተቋማት ውስጥ የፈቃደኝነት አገልግሎት ይሰጡ እንደነበርና በሳቸው እድሜ የነበሩ ሰዎች ቢኖሩም በዚያ ሁኔታ መኖሩ አሰቃቂ እንደሆነ፣ “በዚህ አይነት ሁኔታ ከመኖር መሞትን እመርጣለሁ” ይሏቸው እንደነበርና ይህንም በተደጋጋሚ ሲናገሩ መስማታቸውን ገለፁ።

አሁን የተከሳሹ የዶ/ር ጉንተር ጠበቃ ተራ ደረሰና መቼ በዚህ ሁኔታ መኖር እንደማይፈልጉ ሲናገሩ እንደሰሙ ወ/ሮ ኤልሳን ስትጠይቃቸው ከሰላሳና ከአርባ አመት በፊት እንደነበር መለሱ። አሁን ስለሚገኙበት ሙሉ በሙሉ እራስን የመሳት ሁኔታ ግን ተነጋግረው እንደማያውቁም መሰከሩ።

የተከሳሽ ጠበቃ በመቀጠል ላፍታ ወ/ሮ ኤሊሳን አትኩራ ስትመለከት ቆየችና “ይህ ጥያቄ ጨዋነት የጎደለው ቢመስልም ስለሚያስፈልገኝ እጠይቃለሁ” እናቶት ሲሞቱ የሚወርሱት በርካታ ሀብት አለ አይደለም?”

ወ/ሮ ኤሊሳ፡- እኔ ገንዘቡን መውረስ አልፈልግም የገንዘብ ችግር የለብኝም አንቺ የራስሽን ግምት.. .

የተከሳሽ ጠበቃ፡- የራሴን አስተያየት አልሰጠሁም ጥያቄ ነው የጠየኩት።

ወ/ሮ ኤሊሳ፡- ይህ ቤተሰቡን መስደብ ነው።

የተከሳሽ ጠበቃ፡- እባክዎ ጥያቄዬን ብቻ ይመልሱልኝ ብቸኛ የሀብታቸው ወራሽ አይደሉም?

ወ/ሮ ኤሊሳ፡- ነኝ ግን በዚህ ጉዳይ ላይ ተነጋግረናል ገንዘቡ ለፒተር ልጆች ወይም ለኔ ልጅ ልጆች የሚሰጥ ነው።

በተከሳሽ ጠበቃ የወ/ሮ ሮዛ ሀብት 600,000 ዶላር እንደሚደርስ አረጋገጡና ጥያቄው አበቃ ወ/ሮ ኤሊሳ እዛው የምስክር መቆሚያው ውስጥ ለጥቂት ጊዜ ሲያነቡ ቆዩ።

የተከሳሽ ጠበቃ ዶ/ር ጎንተርን ወደ መመስከሪያ ቦታው እንዲመጣ ጠራቸውና የልብ ስፔሻሊስት መሆኑን ለ10 ዓመት የወ/ሮ ሮዛ ሀኪም መሆኑንና ከሰባት ዓመት በፊት የወ/ሮ ሮዛ ብቸኛ ወንድ ልጅ በመሞቱ አእምሮአቸው መለወጡን ከዚያም የወ/ሮ ኤሊሳ እህት የሆነችው ሴት ልጃቸው በመሞቷ አሁን ያሉት ብቸኛ ልጅ መሆናቸውንና ወ/ሮ ሮዛ ምግብ አንቋቸው ከታመሙ በኋላ አለማገገማቸውን ገለፀ።

ጠበቃው፡- የገንዘብ ክስ አልቀረብህም ታዲያ ለምን የምግብ ቱቦውን ለመንቀል እምቢ አልክ?

ዶ/ር ጉንተር፡- የወ/ሮ ኤልሳን ፍላጎት ባከብርም ከነቀልኩት ይሞታሉ የኔ ስራ ደግሞ ሰዎችን እንዲኖሩ እንጂ እንዲሞቱ መርዳት አይደለም ሲል መለሰ።

ዶ/ሩ በተሰቦቿ ልጃቸው ቢጠይቁም አላደርገውም ይህ የኔ መርህ ነው የሙያ ስነምግባር መርሄ እሳቸውም በዚህ ሁኔታ ውስጥ መሞት እፈልጋለሁ ብለው አልነገሩኝም። እነኛን ሁሉ አመታት የነገሩኝ ነገር የለም። የሚገኝበት ሁኔታ ሊያገግሙ የማይችሉበት ቢሆንም አእምሮአቸው አልሞተም። አልፎ አልፎ አይናቸው ቢንቀሳቀስም አያዩም። ህመም ይሰማቸው አይሰማቸው እንደማይታወቅና ከህክምና ሙያ አንጻር የምግብ ቱቦው መነቀሉ አግባብ መሆኑን ገለፀ። እሳቸው በግልፅ ኑዛዜ አስቀምጠው ቢሆን ኖሮ እንኳን በግሌ ይህን ማድረግ አልፈልግም ከሞራልም ከሙያም አንፃር ስህተት ነው አለ። ፍ/ቤት ቢያዘኝም እንኳን አላደርገውም ሲል አረጋገጠ።

ከዚያም አንደኛው የጁሪ አባል ባቀረበችው ጥያቄ ወ/ሮ ሮዛ የሚገኙበትን ሁኔታ በአካል ተገኝተው እንዲያዩ ተፈቀደላቸው እሳቸውም ወ/ሮ ሮዛ በክርክሩ ላይ በተጠቀሰው ሁኔታ እንደሚገኙ አረጋግጠው መጡ። ወደ ችሎት ከመግባታቸው በፊት በር ላይ 25 የሚጠጉ ሰዎች “ወ/ሮ ሮዛን መኖር አትከልክሏቸው” እናንተ ልትገሏቸው አትችሉም!” የሚል መፈክር የያዙ ሰዎች ብታየም ዳኛዋ የእነሱን ነገር ትኩረት አትስጡት ሲሉ መከሯቸው።

የነርቭ ሀኪም ዶ/ር ሹገርማንም የወ/ሮ ሮዛን የአእምሮ ሁኔታ ሲከታተል ነበርና ካደረገው ክትትል አንፃር ሙሉ በሙሉ ላያገግም መጎዳቱን አረጋገጠ። ክርክሩም በዚሁ ተጠናቀቀ።

እርስዎ ምን ወሰኑ የወ/ሮ ሮዛን ህይወት የሚያቆየው የምግብ ቱቦ መነቀል አለበት ወይስ የለበትም?

በነገራችን ላይ ይህ ጉዳይ አከራካሪ ነው። በአለም አቀፍ ደረጃ የምህረት ግድያ (Marcy killing or euthanasia) የሚባለውና በሀኪም እየተረዱ እራስን ማጥፋት (Physician-assisted suicide) በተወሰኑ ሀገሮች ብቻ ነው ተቀባይነት ያለው። ደጋፊዎቹ ለማይቀር ሞት ከመሰቃየት በፅኑ መታመሙና እራሳቸውን ለማያወቁ የመዳን ተስፋ ለሌላቸው ፍቱን ነው ሲሉ ተቃዋሚዎች ደግሞ ህይወት ያላትን የማይተካ ዋጋ በማስታወስ ይህ ነገር ከተፈቀደ በሀኪሞች አላግባብ ጥቅም ላይ ቢውልስ የሚል ስጋታቸውን ይገልጻሉ።

እ.ኤ.አ ከ2010 በኋላ ጥቂት ሀሮች የምህረት ግድያን ወይም በሀኪም ተረድቶ ራስን ማጥፋትን ፈቅደዋል። አልባኒያ፣ ቤልጅየም፣ ኔዘርላንድ፣ ሲወዘርላንድ፣ የአሜሪካ የተወሰኑ ግዛቶች አሪጎን፣ ዋሸንግተን፣ ዋንታና እና ቬርሞንት ውስጥ ተፈቅዷል። ጀርመን፣ ህንድ፣ ሜክሲኮ፣ ኮሎምቢያ ፣ ጃፓን፣ ተስፋ በሌለበት ሁኔታ መንቀሳቀስም ሆነ ራሳቸውን ማወቅ የማይችሉ ሰዎን በቤተሰብ እና በሀኪሞች ፈቃድ የሚደረግላቸውን እርዳታ ማቋረጥን ፈቅደዋል።

በሀኪም ተረድቶ ራስን መግደል ዶክተሩ በሚያዝለት ገዳይ መድሃኒት በሽተኛው ራሱንየሚገድል ሲሆን ኃላፊነቱን የሚወስደውም በሽተኛው ነው። የምህረት ግድያ ግን የጤና ባለሙያው አስቦበት ለህመምተኛው በሚሰጠው መድሃኒት የህመምተኛውን ህይወት ማቋረጥ ነው። ይህ በህመምተኛው ግልፅ ፈቃድ የሚደረግ ሲሆን ፈቃዱን መስጠት ካልቻለ ግን ቤተሰብ አባላቱ በተቀመጠው መመሪያ መሰረት ፈቃዳቸውን መስጠት ይችላሉ።

እኛስ ሀገር፡- እኛ ሀገር ሀኪምም ሆነ ማንኛውንም ሰው በማናቸውም ሁኔታ ሆነ ብሎ ወይም በቸልተኝነት ሰው መግደል በነፍስ ማጥፋት የሚያስቀጣ ወንጀል መሆኑ በወንጀል ሕጉ አንቀፅ 538 ጀምሮ እስከ 541 ተቀምጧል። በተለይ ደግሞ ሀኪምም ሆነ ሌላ ሰው ማንኛውንም ሰው ራሱን እንዲገድል ማነሳሳት ወይም መረዳት ግድያው ከተሳካ እስከ አምስት አመት በሚደርስ ፅኑ እስራት ያስቀጣል። ስለዚህ በኛ ሕግ ምንም ይሁን ምን ሰውን መግደል ወይም እንዲሞት መርዳት አይፈቀድም።

የወ/ሮ ሮዛ ጉዳይ፡- እርሶ ምን ወሰኑ? በእውነተኛው የጁሪው ውሳኔ ዶ/ሩ የምግብ ቱቦውን እንዲነቅል ተወሰነበት። ሆኖም ዶ/ር ጉንተር ፈቃደኛ ባለመሆኑ እና ሌላው ሀኪም ሊገኝ ስላልቻለ ወ/ሮ ሮዛ ለዚሁ ጉዳይ ወደሌላ ግዛት ተወስደው የነበረ ቢሆንም የምግብ ቧንቧው ከመነቀሉ በፊት አረፉ።

ምንጭ፡- ዳኛው አንተ ብትሆንስ 20 ምርጥ እውነተኛ የወንጀል የፍርድ ቤት ክርክሮች የሚለው በዳኛ ምርበርት ኤህረንፍረንድ ተፅፎ በ2008 እ.ኤ.አ የታተመ መፅሀፍ።

ይምረጡ
(4 ሰዎች መርጠዋል)
8640 ጊዜ ተነበዋል

ተጨማሪ ጽህፎች ከ news admin

ድርጅትዎ ያስተዋውቁ!

  • Advvrrt4.jpg

እዚህ ያስተዋውቁ!

  • Aaddvrrt5.jpg
  • adverts4.jpg
  • Advertt1.jpg
  • Advertt2.jpg
  • Advrrtt.jpg
  • Advverttt.jpg
  • Advvrt1.jpg
  • Advvrt2.jpg

 

Advvrrt4

 

 

 

 

Who's Online

We have 967 guests and no members online

Sendek Newspaper

Bole sub city behind Atlas hotel

Contact us