Items filtered by date: Wednesday, 14 February 2018 - Sendek NewsPaper

 

በይርጋ አበበ

ትኩረቱን ፍቅር ላይ ያደረገው የወጣቷ ደራሲ ሂክመት አብዱ የመጀመሪያ ስራ የሆነው “ከ…. እስከ” ልብ ወለድ መጽሃፍ ለንባብ በቅቷል።


በ87.99 ብር ዋጋ ለኢትዮጵያዊያን አንባቢዎች ለገበያ የቀረበው ይኸው መጽሃፍ ህትመቱን ፋር ኢስት ትሬዲንግ ነው የሰራው። ከ… እስከ በ184 ገጾች የተዘጋጀ ሲሆን 25 ንዑስ ርዕሶችን የያዘ መጽሃፍ ነው። ከኢትዮጵያ ውጭ ለሚገኙ የመጽሃፉ ፈላጊዎች መሸጫ ዋጋው 20 የአሜሪካ ዶላር ነው።


ጸሃፊዋ የስነ ልቦና ምሩቅ ስትሆን የከፍተኛ ትምህርቷን በምትከታተልበት ወቅት ገና የሁለተኛ ዓመት ተማሪ እያለች መጻፍ እንደጀመረች ለሰንደቅ ጋዜጣ ተናግራለች። ይህም ማለት መጽሃፉን አዘጋጅቶ ለማጠናቀቅ ከአምስት ዓመት ያላነሰ ጊዜ እንደወሰደባትም ጨምራ ተናግራለች።


መጽሃፉን ገዝተው ማንበብ ለሚሹ መሸጫ ቦታዎቹ በሁሉም መጽሃፍ አዟሪዎች እና በጃፋር፣ በዩኒቨርሳል፣ በእነሆ መጽሃፍ እና ሌሎች መጽሃፍ መደብሮች በኩል መሆኑን ከደራሲዋ ያገኘነው መረጃ አመልክቷል።

 

የስነ መለኮት ተማሪው ወጣት ሐበን ገብረ ሕይወት የመጀመሪያ ስራ የሆነው ‹‹ነገረ ልዩነት እና አንድነት›› ለገበያ የቀረበው በያዝነው ሳምንት መጀመሪያ ላይ ነው።


ትኩረቱን አምክንዮአዊ ፍልስፍና ላይ ያደረገው ይኸው መጽሃፍ 119 ገጾች ሲኖሩት በስምንት ምዕራፎች ተከፍሏል። ለአገር ውስጥ የመጽሃፉ ሸማቾች በ49.99 ብር ለገበያ የቀረበላቸው ዋጋ ሲሆን፤ 20 የአሜሪካን ዶላር ደግሞ ከኢትዮጵያ ውጭ መጽሃፉን ገዝተው ለሚያነቡ የተቆረጠለት ዋጋ ነው።


የደራሲ ሐበን ገብረ ህይወት መጽሃፍ ‹‹ፍቅር፣ ሚዛናዊነት እና እውነት›› የመጽሃፉ ዋና ጭብጦች ናቸው። ከዚህ መጽሃፍ በኋላ ለህትመት የተዘጋጁ አምስት መጽሃፎች እንዳሉት የገለጸው ደራሲው፤ በቅርቡ ለንባብ የሚበቃው ግን የዚሁ መጽሃፍ ቀጣይ ክፍል መሆኑንም ተናግሯል።
መጽሃፉን በአዲስ አበባ ሁሉም መጽሃፍ አዟሪዎች እንዲሁም በመቀሌ መጽሃፍት ቤቶች ገዝቶ ለማንበብ መገኛ ቦታዎቹ ናቸው።

በአንድነት ቶኩማ

‹‹ተበዳይ መናፍስት
ታፍነው የኖሩ
ወደ አርነት ዐውድ በድንገት ሲጠሩ
ያለጠባቂ ዘብ ተከፍቶ ሳለ በሩ
የገቡ አይመስላቸውም ቅጽሩን ካልሰበሩ››


(በእውቀቱ ስዩም ‹ምስጢረ አርነት›)


ሰሞኑን በሰንደቅ ጋዜጣም ሆነ በተለያዩ ሚዲያዎች ‹‹ከኦሮሞ ሕዝብ ዴሞክራሰያዊ ድርጅት ማዕከላዊ ኮሚቴ የተሰጠ ድርጅታዊ መግለጫ›› በሚል ሃሳባቸው ቀርቧል። መግለጫው ‹በአብዛኛው ተቀባይት ያለው ነው› ሲሉ ብዙዎች ይስማማሉ። መግለጫው የያዘውን ጭብጥ መተንተኑ ተገቢ የሚሆነው አብዛኛው ሕዝብ የተቀበለው ስለሚመስል ነው። ከዚሁ ጋር ይህ መግለጫ ማደናገሪያ ወይም የትግል ማኮላሺያ እንዳይሆን እና በተግባር በአስቸኳይ ተግባራዊ እንዲሆን ለማሳሰብም ነው።


መግለጫው ሲጀምር “የኦሮሞ ሕዝብ ዴሞክራሲያዊ ድርጅት ማዕከላዊ ኮሚቴ የተጀመረውን የለውጥ ጉዞና የወደፊት አቅጣጫ…ዝርዝር ግምገማ በማድረግ…ተጠናቋል” ይላል። አክሎም ስብሰባው በስኬት መጠናቀቁን ይነግረናል። ‹በስኬት መጠናቀቅ› ሲባል በስብሰባው ላይ የተነሱትን ግምገማዎች ፈትኖ ማሻሻያ ለሚያስፈልጋቸው እርምት ለማድረግ መውሰኑን ነው የሚጠቁመው። የተሳካው ምኑ ነው? መቼም ተግባሩ አይደለም! የተግባሩ መጀመሪያ ‹ሃሳቡን› ነው ስኬታማ ነበር ያሉት። ወይም አቅጣጫውን ነው። ከዚሁ ጋር በአንዳንድ አባላት ላይ የወሰደው ከድርጅቱ የማባረር እርምጃ የዚሁ አካል ነው።


መግለጫው ይቀጥልና ‹ድርጅታችን ኢህአዴግ የጀመረውን የለውጥ ንቅናቄ› ሲል ድርጅቱ የሚሰጠውን መግለጫ ትክክኛነት ወይም ቀጣይነት ለማሳየት ድርጅቱን ኢህአዴግን ዋስ ይጠራል። ቀይ ምንጣፍ ያስነጥፋል። ይቺ የመብረቅ መከላከያ ናት።


ከኢህአዴግ ግምገማ በመነሳት ‹‹ሀገራችን ኢትዮጵያ እና ክልላችን በፖለቲካ፣ ኢኮኖሚያዊና፣ እና በማህበራዊ መስኮች ያለችበትን ሁኔታ በዝርዝር በመገምገም ቀጣይ አቅጣጫ አስቀምጧል›› ሲል ይነሳል። በኢህአዴግ ግምገማ ላይ የተመረኮዘ ነው ሲል ድርጅቱ (ኦህዴድ) መሻለኪያውን አበጅቶ ነው የተነሳው። ይህች ጥበብ አንድ ልትባል ትችላለች። ሰዎቹ በጥበብ ተካኑሳ!!! ጎሽ ነው እንጂ ምን ይባላል! ሰው ጠቢብ ሲሆን ይደነቃል እንጂ እንደ ደናቁርት ማህበር ይወገዛል? ነውር ነው። ስልት ሁልጊዜ ደስ ታሰኛለች!!!


በመሆኑም የዚህ መግለጫ ዋና ነገሮች ወይም ምሰሶዎች ሦስት ናቸው ማለት ነው። የፖለቲካ፣ የኢኮኖሚያዊ እና የማህበራዊ ጉዳዮች። እንደ ድርጅቱ አገላለጽ ከሆነ እነዚህ ናቸው የአገሪቱ ዋነኛ ጊዚያዊ ችግሮች።


ለምሳሌ አስር ቀናት በፈጀው ውይይታችን የሕዝባችን ሰላም እና አብሮነት በምንም መልኩ አደጋ ውስጥ እንዳይገባ እንሰራለን ይላል መግለጫው። መግለጫው ከሕዝባችን ጋር ሆነን በመሪ ድርጅታችን በኩል ነው የምንሰራው የሚል ይመስላል። እዚህ ቦታ በዋናነት የተነሳው ማህበራዊ ጉዳይ ነው ። የክልሉ ሕዝብ አብሮነትን አደፍርሶ የሚያውቅ አይመስልም። ዝቅ ብሎ የኦሮሞ ሕዝብን ለትግል ሲጠራ አቃፊ በሆነው የገዳ ስርዓትህ ከዚህ ቀደም ሌሎችንም ሕዝቦች አቅፈህ እንደኖርከው ይላልና ነው። በርግጥ ስጋትና ግጭት አልፎ አልፎ መኖራቸው አይዘነጋም። የችግሩ ምክንያት ወይም አነሳሽ ማን መሆኑን ግን ገና አልተረጋገጠም። ያም ሆነ ይህ የኦህዴድ አባላት ወይም ድርጅቱ ለመለወጥ መፈለጉ ግን ይበል ያስብላል።


በዚህ መግለጫው ላይ ‹‹የሀገራችንን ሕልውና መታደግና የተጀመረው የለውጥ ጉዞ በስኬት እንዲጠናቀቅ›› ይላል። በመጀመሪያ የትኛውን ለውጥ ነው ያነሳው? ልማታዊነቱን ከሆነ ከዚህ በፊት ሲነገር የነበረውን ማንሳቱ ለፖለቲካ ፍጆታ ነው የተነሳው። በድርጅቱ ውስጥ የተጀመረው ግልፅነት፣ ከተላላኪነት ወደ ራስን ወደ መቻል ቁመና መምጣት ከሆነ በድጋሚ ይበል ያስብላል። ተቀናጅተን የአገራችንን ሕልውና እናስቀጥል የምትለዋ እጅግ ጥሩ የሆነች ሃረግ ናት። ከማን ጋር ነው ድርጅቱ የሚቀናጀው? ከሕዝባችን ጋር ሲል ጠቆም አድርጓል። በርግጥ ከእህት ደርጅቶች ጋር ጭምር መሆኑን በሌላ ምንባብ ውስጥ ተቀምጧል። ዋናው ግን ቅንጅት የሚያስፈልገው ከሕዝብ ጋር ነው። ሕዝብ ምን ፈለገ? የሚለውን ማድመጥ ሲፈለግ እና በሕዝቡ ጥያቄ ላይ የተመሰረተ እርምጃ ሲወሰድ ነው ቅንጅት አድርገናል የሚባለው።


ድርጅቱ ካወጣቸው መግለጫዎች ውስጥ የተለመደው ሸፍጥ አብሮ መሰንቀሩ አግባብ አልነበረም። በተለይ ‹‹ድርጅታችን ከሚታወቅባቸው መለያ ባሕርያቱ እያንዳንዱን ጉድለቶቹን ያለማመንታት መቀበልና ለማረም ጥረት ማድረግ መሆኑ ይታወቃል›› ይላል። እኛ ድርጅቱን በዚህ መልኩ አናውቀውም። ውሸት ነው። ማዳመጥ እንወዳለን ብላችሁ የለም? አድምጡ!!! ድርጅታችሁ ግትር ነበር። ተላላኪም ነበር። ልንለወጥ አስበናል ብትሉ እና የጀመራችሁት አካሄድ ላይ ብትንጠለጠሉ ጥሩ ነው። ከዚያ በተረፈ ድርጅታችን የሚታወቀው በዴሞክራሲያዊነት ነው ያላችሁበት መንፈስ ልክ አይደለም። ይሁን እንጂ ‹ከባቄላ አይጠፋም ዲቃላ› በሚለው አባባል ይህችን ደንቃራ አረፍተ ነገር ማስገባታችሁ መግለጫችሁን ዋጋ ቢስ አያደርገውም።


መግለጫው ችግሮችን የምንፈታው የዴሞክራሲያዊ ሥርዓት መንገዶችን ተጠቅመን ነው የሚል አንደምታ ያለው ይመስላል። “ይህ የዴሞክራሲያዊ ድርጅት ባህሪይ በመሆኑ ከሕዝብ የሚነሱ ቅሬታዎችን ማድመጥ፣ ሕዝቡን ከልብ ይቅርታ የመጠየቅና የእርምት እርምጃ መውሰድ አስፈላጊ መሆኑን በዝርዝር በመምከር አቅጣጫ አስቀምጧል›› ይላል። ጥሩ ጅምር ነው። ነገር ግን ገና አንድ ነገር ቀርታዋለች። ቅሬታዎችን ማድመጥ፣ ሕዝቡን ከልብ ይቅርታ የመጠየቅና የእርምት እርምጃ መውሰድ ብቻ መፍትሄ ሊሆን አይችልም። አጥፍቶ ይቅርታ መጠየቅ ሁልጊዜ ተገቢ ላይሆንም ይችላል። መግለጫዋ በአጽንዖት አጥፊ ባለስልጣንን ሁሉ ወደ ፍርድ ማቅረብ የምትል ያስፈልጋታል። ሥልጣን ማጋራት ሌላዋ የዲሞክራሲያዊ ድርጅት ምልክት ነው። እሷንም ብትጨምሩባት ጥሩ ነበር። ከዚያ ውጭ ግን የዲሞክራሲያዊ ሥርዓት መለያዎችን ወደ ዚህ ደረጃ ብቻ ማውረድ ተገቢ አይደለም። ይሁን እንጂ የ27 ዓመቱን ህፃን ድርጅት በራሱ ያለ ሞግዚትነት ወይም ጡት አባትነት ቆሞ ዳዴ ሲል አይተን መቀበል አይከብደንም። እንኳን ደስ ያላችሁ!


ድርጅቱ ግምገማው በርግጥ ጥልቅ መሆኑን እኔ በግሌ ለመቀበል አልከበደኝም። በግምገማው ላይ ችግሮቹን በሳይንሳዊ መንገድ እንለያለን ብለዋል። ‹‹የፌዴራል ስርዓቱን አደጋ ውስጥ ሊጥሉ የሚችሉ ፖለቲካዊና ኢኮኖሚያዊ ምክንያቶችን ሳይንሳዊ በሆነ መልኩ ለይቶ አፋጣኝ እርምጃዎችን በመውሰድ የሕዝቡን መሻት ማሳካት ለነገ የማይባል ጉዳይ መሆኑን በዝርዝር ተመልክቷል›› ይላል። ሳይንሳዊ መንገድ ምንድን ነው? ሲገባኝ በጥናት ላይ የተመሰረተ ማለት ነው። በሌላ አገላለጽ ስሜት እና ወገንተኝነት የሌለበት ጥናት ማለት ነው። የስሜት ትርጓሜ ወይም ስሜት የነዳው የውስጥ ሆነ የውጭ አለቃ ትዕዛዝ ወይም መግለጫ ሆነ ጭቆና ገደል ግባ እንደ ማለት ነው። የካድሬ ስሜታዊ ወይም ተራ ፖለቲካዊ ፕሮፖጋንዳ ዋጋ ቢሲ ሆነ ማለትም ሊሆን ነው። የፖለቲካ ልብ ወለድ ደራሲዎች መጽሐፍ መጻፍ እንጂ መጠርነፍ ማቆማቸው ነው ማለት ነው።


ሳይንሳዊ መንገድ የሕዝቡን ችግር ለማወቅና ችግሩን ለመፍታት በሳይንሳዊ መንገድ መረዳት ማለት ነው። ሳይንሳዊ መንገድን ተጠቅመን ችግሩን ስንፈታ በተጨባጭ በኢትዮጵያ የምናገኘውን ችግር ጠቅሶ መግለጫው እንደዚህ የሚለውን ሃሳብ ነው ያቀረበው። ‹‹ፍትሃዊ የኃብት ክፍፍል፣ አሳታፊ የፖለቲካ ስርዓት፣ ሰላምና ፍትህ እንዲሰፍን በጥብቅ ዲስፕሊን መስራት›› ይላል መግለጫው። ሳይንሳዊ መንገድ የመረጠው ይህ ድርጅት በዚሁ መንገድ የተገኙ ጭብጦችን አንስቷል። እነዚህም ፍትሃዊ የኃብት ክፍፍል እንደሌለ፣ አሳታፊ የፖለቲካ ስርዓት መክሰሙን፣ ሰላምና ፍትህ አለመስፈኑን። ፍትሃዊ የኃብት ክፍፍሉ ከሌለ ኃብቱ በማን እጅ ነው ያለው? የሚለው በሳይንሳዊ መንገድ ይጠና።


አሳታፊ ፖለቲካ አለመኖሩን ድርጅቱ በሳይንሳዊ መንገድ አጥንቶ ደርሶበታል። በርግጥ የኢትዮጵያ ሕዝብ አሳታፊ ፖለቲካ አለመኖሩን ከደረሰበት ቆይቷል። ድርጅቱ ፍትህ እና ሰላም ተረጋግጧል የሚለውንም በሳይንሳዊ መንገድ ተንትኖ እንደሌለ ያመነ ይመስላል። ተዳሳሽ ችግር ውስጥ መሆኗን ዓለም ሁሉ የሚያውቀውን ክደው ኢህአዴጎች ብቻ ናቸው የውሸት ዜናቸውን ሲያደምጡ የቆዩት። በጥብቅ ዲስፕሊን አለመስራት ሌላው ችግር ነው ሲል የድርጅቱ መግለጫ በተዘዋዋሪ አምኗል። በጥብቅ ዲስፕሊን አለመስራት ድርጅቱ ከስራ ገበታ መቅረትን ለመጠቆም አይመስለኝም። ወይም በስራ ላይ መለገም ልክ አለመሆኑን ለማሳየት አይደለም። ከዚያ ይልቅ ወደ ተላላኪነት ማዘንብል፣ አስመሳይነት፣ ለሌላው ቡድን መንበረከክ፣ ሙስና እና ዘራፊነት ላይ ማዘንበል የሚለውን ለማንሳት ነው ድርጅቱ ይህን ያለው። ይህን ከመግለጫው በትርጓሜ አግኝተነዋል።


ድርጅቱ ጥሩ በሆነ መንገድ ካለፉት የድርጅቱ ተላላኪዎች ጸባይ መላቀቁን አሳይቷል። ለምሳሌ ‹‹የኦሮሞ ሕዝብ ከመላው የኢትዮጵያ ሕዝቦች ጋር በመተባበር የሀገራችንን ቀጣይ ጉዞ የማቅናት ሚናውን ዛሬም እንደትላንቱ መጫወት እንደሚገባው ተወያይቷል›› ይላል። መግለጫው የኢህአዴግን ልዩ የሆነ የኦሮሞን ሕዝብ ከአገረ ኢትዮጵያ የማለያየት ሴራውን ውሃ የቸለሰበት መስሎ ይታየኛል። በኢትዮጵያ ምስረታ ሆነ መስፋፋት ከዚያም አልፎ መስተጋብር የኦሮሞን ሕዝብ ወሳኝ ሚና ለማሳነስ የተዘራውን የ27 ዓመት መርዝ ያስተፋ ነው መግለጫው። ‹ኦሮሞ ከኛ አሉ ጎንደሬዎች›። እውነታቸውን ነው በጎንደሯ ስመ ጥር ከተማ በደብረታቦር እነ ራስ አሊ ምን ይሰሩ ነበር? ገዥዎች ነበሩ። ኬኛ ነበሯ። ታዲያ ጎንደሬ ኬኛ ለማይለው ይገዛ ይመስላችኋል? በጭራሽ!!!


የዚህ ድርጅት መግለጫ አስገራሚ ነገር ፈንጥቋል። የድርጅቱን ከሌሎች ድርጅቶች ጋር ያለውን ግንኙነት አንስቷል። በዚህም ዲሞክራሲያዊ መሆን እንዳለበት አስምሮ አልፏል። የግንኙነቱ አግባብ ዲሞክራሲያዊ መንገድ ብቻ መሆኑን አስታውቋልም፣ አስጠንቅቋልም። የሎሌ እና የጌታ ግንኙነት ማክተሙን አውጇል። አንዱ አባት ሌላው ልጅ የሚሆንበት ዘመን ማክተሙን ያሳያል። አዛዥ ታዛዥ የለም ነው ምስጢሩ። በዴሞክራሲያዊ አግባብ ብቻ ነው ጉዞው መጀመር ያለበት ለማለት ነው። የጡት አባት ሚና ማለፉን ሲጠቁም ነው መግለጫው ይህን ሃሳብ ያነሳው። የዴሞክራሲው እጥረት ባይኖር ኖሮ መግለጫው አያስፈልግም ነበር። ቢያንስ በስነ ኑባሬ ህግጋት ያለ ነገር ‹አለሁ› ሲል አዋጅ አያወጣም። ኑባሬው ጥርጣሬ ላይ ካልወደቀ በስተቀር።


መግለጫው የፌዴራል ሥርዓታችን አደጋ ላይ ወድቋል ሲል ይነሳና አደጋ ላይ የጣለውን ነገር ዘርዝሯል። እነዚህም ሙስና፣ ብልሹ አሰራሮች፣ የመልካም አስተዳደር እጦቶች፣ የስልጣን ርስትነት፣ የግል ጥቅም፣ መሬት መመዝበር እና የመሳሰሉ ችግሮች ናቸው ይላል። ይህ ደግሞ ሕዝቡ በመሪ ድርጅቱ ላይ እንዲያምጽ አድርጎታል ይላል። ተመልከቱ! ከዚህ በፊት የሕዝብን መራራ ትግል ‹የጥቂቶች› ሲል የነበረ ድርጅት የትግሉን ስፋት አምኖ መፍትሄ መፈለጉ ተራማጅ መሆኑን አያሳይምን?


ሕጸጹ ‹መሪው ድርጅቱ ላይ እንዲያምጽ አድርጎታል› የሚለው ቃል ላይ ነው። የዴሞክራሲያዊ አሳታፊነት የሌለበት መንገድ ላይ ነን ከተባለ በምን ማስረጃ ነው ይህ ድርጅት መሪው የሚሆነው? መሪው መሆኑን በሳይንሳዊ መንገድ መፈተን አለበት። መንገዱም ‹እንከን አልባ ምርጫ› ነው። በሕዝብ ምርጫ ሕዝቡን መምራት።


መግለጫው የሰሞኑን ችግር አንስቶ ሲናገር ባለፉት ጥቂት አመታት በተከሰቱ ግጭቶች የበርካታ ዜጎች ሕይወት ጠፍቷል ይላል። ትክክል ነው። ስህተቱ ‹ጥቂት ዓመታት› መባሉ ነው። ጥቂት ዓመታት የተባለው የትኛውን ነው? ሃያ ሰባት ዓመታቱን ከሆነ ልክ ነው። በእነዚህ ሁለት ሶስት ዓመታት ከሆነ መግለጫው ስህተት አድርጓል። አሁንም ሕጸጽ አለ ማለት ነው። ላለፉት ዓመታት ግዙፍ መፈናቀል ነበር። ‹ሳይቃጠል በቅጠል› የሚለው አልተሰራበትም እንጂ አማሮችን ማፈናቀሉ የሁልጊዜ ሥራና ትዝታ ነበር። ሌላው ቢቀር በቅርብ ዓመታት ከደቡብ ክልል ‹ሞፈር ዘመት› አማሮች ተብለው ተፈናቅለው ነበር። ቢሆንም ግን ይህ ድርጅት ችግሩን ሲያነሳ ሃቀኛ በመሆኑ እናመሰግነው ዘንድ ይገባል። አምኖ መለወጥ የፈለገ ይመስላል። መንገዱን ጨርቅ ያድርግለት።


ይህ ድርጅት ጥርስ አውጥቶ ወይም ጎልምሶ የታየው የሰው ሕይወትን የሚቀጥፉ ግለሰቦች እና ቡድኖች መኖራቸውን በማመኑ ነው። ያየውን ነው ያመነው። የሰማውን አይደለም። ያየውን በእጆቹም የዳሰሰውን ወግ ነው ያወጋን። መግለጫውን ጥሩ መግለጫ የሚያደርገው ይሄው ነው። አንድ እርምጃ በመንቀርፈፍ ተራምዷል። ይበል ያስብላል። ከተቸነከሩት የተንቀረፈፉት ይሻላሉ እና።


በዚህ መግለጫ መሰረት የፌዴራል ስርዓቱን አደጋ ላይ ለመጣል የተነሱት የውጭ ተቃዋሚዎች አይደሉም። ይህንም ማመን ለውጥ ነው። ድርጅቱ ለብዙ ዓመታት በፕሮፖጋንዳ የችግሩ ምንጭ ውጫዊ ነው ብለው ለማሳመን የፈለጉትን የካድሬዎች ውትወታ ጥሎ ወደ እውነቱ ቀርቧል። ትንግርት ይሏል ይች ናት! የፌዴራል ስርዓቱን አደጋ ላይ የሚጥሉ ያላቸውን ሲያነሳ ‹‹የፌዴራል ስርዓቱን አደጋ ላይ በመጣል ግላዊና ቡድናዊ ጥቅሞችን ለማስጠበቅ በንጹሃን ዜጎች ሕይወት ላይ አደጋ ያደረሱ በታሪካችን ታይቶ የማይታወቅ ፀያፍ ድርጊቶችን የፈጸሙ ኃይሎች በሕግ እንዲጠየቁ›› ይላል። ‹በታሪካችን ታይቶ የማይታወቅ› ሲል ከባለፈው ዘመን ይልቅ ግድፈት የላቀ ጸያፍ ነገር በዚህ ዘመን ተፈጸመ ማለቱ ነው። ሃቀኝነት ነው እንዲህ የሚያናግረው። ተመልከቱ ድርጅቱ እየገዛ ባለበት ዘመን ነው ይህ የተፈጸመው። ታይቶ የማይታወቅ ጭፍጨፋ ነው ያሉት። ይህን ያደረጉት ደግሞ የውጭ ኃይሎች አይደሉም። የተደራጁ ጥቅመኛ የድርጅቱ አባላት ናቸው። ድርጅቱ ሳይፈራ እና ሳያወላውል ቡድናዊ ጥቅመኞች ወይም ግለሰቦች ናቸው ይህን ያደረጉት ብሏል።


በመሆኑም የአገሪቱን ሕልውና እየተፈታተኑት ያሉት የድርጅቱ አባላት እንጂ ሌሎች አይደሉም ማለት ነው። ሕዝቡን የሚያናጩ በስልጣን አላግባብ ለመክበር የሚሹ የድርጅቱ ቀንደኛ ጠበቃዎች ናቸው። ወይም የድርጅቱ ባለርስቶች። ወይም ድርጅቴ እያሉ በቴሌቪዥን መስኮት የሚያደነቁሩን ናቸው ማለት ነው።


መግለጫው ቀንደኛ ጠላታችን ድህነት ነው ሲል የወረበላዎችን አገዛዝ ዋነኛ ጠላትነት ወደ ሁለተኛ ደረጃ ጠላትነት ዝቅ ለማደረግ ይሞክራል ። ወዶ አይመስልም። ከዚህ በፊት ለተነገሩት ፍልስፍናዎች መለስተኛ ሙገሳ ለማሳየት ነው። ስልት ነው። ሕዝብ ከሕዝብ ጋር በድህነት ምክንያት አልተፋጨም። በምን እናውቃለን? መግለጫው በታሪካችን አይተነው የማናውቀው ችግር በኪራይ ሰብሳቢዎች ደርሷል ሲል ተናግሯላ። ድህነት ድሮም ነበር። ዳሩ ድህነት ህዝብ በህዝብ ላይ እንዲነሳ ባያደርገውም። በርግጥ ድህነት ጠላታችን ነው። ቀንደኛው ጠላታችን ግን አገዛዝ ነው። ደፍራችሁ ‹አዎን› ወይም ‹አሜን እሱ ነው› በሉ።


መግለጫው የኢኮኖሚ ተሃድሶውን ሲያነሳ አገሪቱ በማደግ ላይ ያለ ኢኮኖሚ ባለቤት መሆኗን አንስቷል። ጥሩ ነው። ምን ያህል አደግናል የሚለው ላይ ነው ሰው የማይግባባው። ማደጉ ወይም ለውጥ መምጣቱ ላይ ስምምነቱ አለ። ይህን በማደግ ላይ ያለውን የኢኮኖሚ ችግር ለመፍታት ያስፈልጋል ይላል መግለጫው። ችግሩም ሲተነተን እንዲህ ያስቀምጠዋል። ሙስና፣ ኮንትሮባንድ ፣ ህገ ወጥ የገንዘብ ዝውውር፣ የዘረፋ እና የጥቅመኝነት ሰንሰለት (የወሮበላው ቡድን) እና የመሳሰሉትን ያነሳል። ተመልከቱ!... እነዚህ ሁሉ ድርጊቶች የተሰሩት የድርጅቱ አባላት ወይም የድርጅቱ የአደባባይ ጠበቆች ናቸው። ሌሎች ሰዎች አይደሉም። በውጭ አገር የሚገኙ ተቃዋሚዎችም አይደሉም። የውስጥ ችግር ነው። ዙፋኑን በርስትነት መውሰድ መፈለግ ያመጣው ጠባይ ነው። በነገራችን ላይ ኢህአዴግ ወደ ርስታዊ ባላባትነት ከተቀየር ቆይቷል። ሳይንሳዊ በሆነ መንገድ ይህም ይጠና።


ሕገ መንግስቱን የመናድ ሙከራ ያደረጉትን የሚላቸውን የተለመደውን ሀሳዊ ክሱን ይተውና ችግሩን ወደ ራሱ ያመጣዋል። መግለጫው ሕገ መንግስቱን የናደው ድርጅቱ ማለትም ኢህአዴግ ነው ባይ ነው። በቀጥታ አይደለም ይህን ያለው። በትርጓሜ ነው ይህን ሃሳብ ያወሳው። ‹‹ሕገ መንግስታዊ ድንጋጌዎች ሳይሸራረፉ ተግባር ላይ እንዲውሉ የዜጎች ሰብዓዊና ዴሞክራሲያዊ መብቶች እንዲከበሩ ዜጎች ካለምንም ስጋት ከቦታ ቦታ ተዘዋውረው እንዲሰሩ በማስቻል በፍትህ ስርዓቱና በፖሊስ ስርዓታችን ላይ ተጨባጭ ለውጥ ሊያስገኙ የሚችሉ ሁለንተናዊ ሪፎርም ማከናወን እንደሚገባ ከስምምነት ላይ ተደርሷል›› ይላል። በዚህ ትንታኔ መሰረት የሕገ መንግስቱ ጠላት ራሱ ኢህአዴግ ነው።


‹‹ሕገ መንግስታዊ ድንጋጌዎች ሳይሸራረፉ ተግባር ላይ እንዲውሉ›› ሲል ምን ማለቱ ነው? ኢህአዴጎች ሸርፈው ሸርፈው ጥለውታል ማለት ነው። ዴሞክራሲያዊ መብቶች ሲል ምን ማለት ነው? ሰብዓዊ መብትስ? የዜጎች ነጻነትስ? መቼም በተጨባጭ አገሪቱን እያሰተዳደርኩ ነኝ የሚለው ይሄው ድርጅት ነው። ታዲያ እነዚህ መብቶች በማን ተናዱ? ግልጹን ስናስቀምጥ በራሱ ነው የተናዱት።


መግለጫው የሕዝብ ለሕዝብ ግንኙነትን አንስቶ ተስፋ ያለው መግለጫ ሰጥቷል። በነገራችን ላይ ሕዝብ ከሕዝብ ጋር ያለው ግንኙነት ኢህአዴጎች ሳይኖሩም ነበር፤ እያሉም አለ ሳይኖሩም ይቀጥላል። አዲስ የሆነው የኢህአዴግ ከፋፋይ ፖሊሲን በተቃረነ መልኩ በድርጅቱ ስለ አንድነት መሰበኩ ወይም መነሳቱ ነው። ለቀጣይ ገቢሩ ማዳመቂያ መቻቻል፣መደጋገፍ እና አብሮ መኖር የሚል ቃል በድርጅቱ መግለጫ ተሰጥቷል።


ድርጅቱ ይሄድበት የነበረውን ስሜታዊ አካሄድ እርግፍ አድርጎ ጥሎ ሳይንሳዊ መንገድ ጀምሯል። አብሮ መስራት። የሃሳብ ልዩነትን ማመን። በልዩነት አንድነት ወይም ለአንድነት መስራትን መቀበል የመሳሰሉ ሃሳቦችን ማሳየት። በኃይል ልዩነትን የማክሰም መንገድን መጸየፍ የመሳሰሉት እኩይ ሃሳቦች ማንሳቱ እና መኮነኑ። ከዚሁ ጋር የአለምን ተለዋዋጭ ሁኔታ አንስቶ መወያየቱ ጥሩ መንገድ ነው።


መግለጫው የኢትዮጵያ ችግር የመደብ መሆኑን ወደ ማመን የወረደ ይመስላል። ‹‹የመደብ ጭቆና ምን ያህል አስከፊ እንደሆነና አዎንታዊ ለውጥን እንደሚገታ ባለፈው ታሪክህ ካንተ በላይ የሚገነዘብ የለም” ይላል። ኢትዮጵያ ውስጥ የብሔር ጭቆና ነበር የሚለውን ያልፈለጉት ይመስላል። ይህ ደግሞ ለህወሓቶች የሚዋጥላቸው አልመሰለኝም። የብሔር ጭቆና የሚለው ማን ጨቋኝ፣ ማን ተጨቋኝ የሚለውን ያነሳላ። በዚያ ስሌት ከተሄደ ደግሞ በአሁኑ ጊዜ የአንድ ብሔር የበላይነት አለ የሚለው ሊነሳ ነዋ!


መግለጫው የአገሪቱን ችግሮች ለመፍታት ያነሳቸው አሳታፊ ሃሳቦች ይበል የሚያስብል ነው። ወጣቶቹን ሳንይዝ ለውጥ የለም ይላል። ልክ ነው። ጥያቄው የትኞችን ወጣቶች? አባላቱን ወይስ ሕዝባዊ ወጣቶቹን? ምሁራንም አብረው የለውጥ ሚና መጫወት እንደላባቸው ተነስቷል። ጥሩ ነው። አሁንም ጥያቄው የትኞቹን ? የሚለው ነው። መግለጫው አባላት የሆኑ ምሁራንን ማለቱ ነው? ወይስ እነሱን ለማሳተፍ የፓርቲው አባልነት እንደ መስፈርት ይቀርባል? ወይስ ለሆዳቸው ተላልፈው የተሰጡትን ልሂቃን ማለቱ ነው? ልሂቃን ስትሉ ማንን ማለታችሁ ነው? መግለጫው ከእህት ድርጅቶችና ሕዝቦች ጋር አብሮ መስራት ለሃገሪቱ ይጠቅማል ብሏል። አስፈላጊ ነው። ምን አይነት ግንኙነት ነው የፈለጋችሁት? የጌታና የሎሌውን ወይስ እኩል በሆነ መንገድ የምትሰሩበትን መንፈስ? በህዝብ መካከል ጠላትነትን እየዘሩ ከስልጣን ማማ ወደሌላ የስልጣን ማማ የሚሸጋገሩትን ባለስልጣኖችን ማስጠጋት ማለታችሁ ነው? ጥንቃቄው ያስፈልጋል።


ከተቃዋሚ ጋር ያሰባችሁት ወይይት በጣም ደስ የሚያሰኝ ነው። ጠላትነትን የመቀነስ መንገዱ ይኼው ነው። መደራደሩን ግፉበት። ነገር ግን ማዘናጊያ አድርጋችሁ አታስቡት። ‹ከፀሃይ በታች የማንደራደርበት ነገር የለም› ያሉትን የቀድሞ አለቃችሁን የማዘናጊያ ቃል ስልት ብላችሁት ከሆነ አትሞከሩት። የአሁኑ አውድ ከዚያኛው አውድ ይለያል። ዘንድሮ በግልጽ እና ዴሞክራሲያዊ በሆነ መንገድ ብቻ ችግሮች እንደሚፈቱ ሁኔታው አመላካች ነው። ከዚያ ውጭ ግን ከድጡ ወደ ማጡ፣ ከዚያም ወደ ረመጡ ነው መንገዱ።


‹‹ወጣቱ በሁሉም መስክ የሚያደርገውን ትግል ምክንያታዊና ሳይንሳዊ በሆኑ ሃሳቦች እየተመራ ዴሞክራሲያዊነት በጠበቀና ተደማሪ ለውጦችን በተንከባከበ መልኩ የሁሉም መብት ተከብሮ የሀገራችን ህልውና እና …..›› ይላል ስለ ወጣቱ ሚና ሲናገር። ለወጣቱ ጥያቄ ቦታ መስጠቱ ተገቢ እውቀት ነው። ‹‹የላም ችግሯ አንድ ወቅት ጥጃ እንደነበረች መርሳቷ ነው።›› ይባላል። ድርጅቱም ሆነ አባላቱ ገብቷቸዋል አንድ ወቅት ወጣቶች እንደነበሩ። ወጣቱ የሚያነሳው ጥያቄ ሳይንሳዊ መሰረት አይጎድለውም። ስሜታዊ በሆነ መንገድ ሊገልጸው ቢችልም። ‹ተደማሪ አስተዋጽኦ› ሲባል ምን ማለት ነው? የሚደመረው በኢህአዴግ ታሪክ ላይ ማለት ነው? ወይስ ከዚያ በፊት ባሉትም አባቶቹ ጭምር ማለት ነው? ቅብብሎሹን ማለት ከሆነ እናንተም ካለፈው ስርዓት የሚጠቅመውን አንስታችሁ ለመጠቀም መሞከር አስፈላጊ ነው።


ምሁራንን ሲያነሳ የልሂቃኑ ሚና ዋና ስራው ሃሳብ ማፍለቅ አድርጎ ማስቀመጡ ስህተት ነው። ሃሳብን ያፈልቃል፣ ሃገርንም ይመራል። ልሂቃኑን መጋበዛችሁ ተገቢ ነው። ያስደስታል። የዕውቀት አስፈላጊነት ማማው ላይ መውጣታችሁን ያሳያል። ለምን ልሂቃን ሸሹን የሚለውን እንደተወያያችሁበት ያስታውቃል። ሕጸጹ ዋነኛ ተግባራቸው ሃሳብ ማፍለቅ ነው ማለታችሁ ነው። ሃሳብን ማፍለቅ ዋነኛ ሚና ማለት ግን ልክ አይደለም። ምሁራን ስትሉም ሆነ ትንታኔውም በውይይታችሁ ላይ ይፈተሽ። ብቻ ከብዙ መልካም ነገሮች ጥቂቱን አውጥቶ መነታረክ እንዳይሆን ብዬ ይህን ሃሳብ በዓይን ላይ ምሰሶ አስቀምጦ በሰው ዓይን ያለን ጉድፍ እንደማጥራት እንዳይሆንብኝ እሰጋለሁ።


ድርጅቱ ትግልን ያየበት መንገድ አስገራሚ ነው። የትግል ስልቱ ከውስጥ ወደ ውጭ ነው። ይህ ትግል ደግሞ መከናወን ያለበት በተራዘመ የምንጠራና የማጣራት ትግል ነው ያሉ ነው የሚመስለው። ‹‹የሕግ የበላይነት ሰፍኖ እስኪሸነፍ ድረስ የጀመራችሁትን ትግል ሕዝብን በማሳተፍ በከፍተኛ ዲሲፕሊን ሕዝባዊ ኃላፊነታችሁን መወጣት ይገባችኋል›› ይላል›። የተቀናጀ ትግል አስፈለጊነትን አንስቷል።


የዚህም ሃሳብ ልዕልና የተቀመጠው እንዲህ በሚለው ሃሳብ ውስጥ ነው። ‹‹ዴሞክራሲ ለመገንባት የሀሳብ ልዩነቶችን የሚስተናገዱበት ማዕቀፍና አሰራር እንዲሁም ባህልና አስተሳሰብ እንዲዳብር የፖለቲካ ፓርቲዎች ወሳኝ ሚና እንዳላቸው ኦህዴድ በሚገባ ይገነዘባል።›› “የፖለቲካ ፓርቲዎች ወሳኝ ሚና እንዳላቸው ኦህዴድ በሚገባ ይገነዘባል” የምትለዋ ሀሳብ ጉድ ታሰኛለች። ተግባር ሲጨመርባት ደግሞ የጉድ ጉድ ነው የምትሆነው። “በሚገባ ያምናል” ሲል መግለጫው ለይስሙላ አይደለም ማለቱን የሚያሳይ ነው። ‹ሱታፌ› ወሳኝ መሆኑን የሰሞኑ ሁኔታ አሳይቷል። ትክክል መንገድ ነው። ከሁሉም ተቃዋሚዎች ጋር ለመደራደር ጥሪ ማቅረቡ ተገቢ ነው። የጨፌው ጉባዔ እያስደነቀን ነው። የጨፌው ፓርላማ የይስማዕከ ወርቁ ‹የአፈ ጉባኤው መዶሻ› የሚለው እርግማነ በረከት ደርሶባቸዋል መሰለኝ። እንዲህ የሚለው፡-


‹ይድረስ ለጎሊያድ ውላጅ ዳዊት መስለኸኝ ለመረጥኩህ (ያልመረጥኩህ ቅንፉ የኔ ነው)


መዝሙሬን ልትዘምርልኝ ዕንባዬን ልታነባልኝ
እኔነቴን ለወከልኩህ።


አዳሜ በአንተ ደነቀው ዕድሌ ባንተ ጨነቀው
እልፍ ሲንጨባረር እንቅልፍህን ስትሰልቀው።
……


ያ የነገር ማሳረጊያ
ያ የርዕዮት ዓለም ማፅደቂያ
የልዩ ሃሳብ መድቂያ
የሚኮንን የሚያፀድቀው
የአፈ ጉባኤው መዶሻ ነገር ቋጭቶ የሚያጠብቀው


ምናለ ‹ንቃ› ብሎ አናትክን ቢበጠርቀው› ያለው በጨፌው ላይ ደርሷል። መግለጫው እኮ አናቱን ተበጥርቆ የነቃ ወይም የሚያስብ ሰዎች ነው እኮ የሚመስለው። ታዲያማ በርቱማዎች ሆይ በርቱ!!!። ቦረኖችም እራሳችሁን ለመለወጥ ጨክኑ ወይም ወይኑ!!!

 

ክፍል ምልከታ

 

በሳምሶን ደሣለኝ

የኦሮሞ ሕዝብ ዴሞክራሲያዊ ድርጅት (ኦህዴድ) ማዕከላዊ ኮሚቴ ጥር 29 ቀን 2010 ዓ.ም ለ10 ቀናት ዝርዝር ግምገማ በማድረግ መግለጫ ማውጣቱ የሚታወስ ነው። እንደሚታወቀው ባለፉት ሶስት ዓመታት ወጣ ገባ የሚሉ ፖለቲካዊ ተቃውሞዎች በክልሉ ተስተናግደዋል። ከፍተኛ የአመራር ለውጦችም ተደርገዋል። ከእሕት ድርጅቶችም ጋር ጥልቅ ውይይት ተከናውኖ፣ አራቱም ፓርቲዎች ለሕዝብ የደረሱበትን ውጤት በእራሳቸው መንገድ አንጸባርቀዋል።


የኦህዴድ ማዕከላዊ ኮሚቴ ባወጣው መግለጫ እና ባስቀመጠው አቅጣጫ መሠረት ተግባራዊ ሥራዎች መግባት ቢጀምርም በኦሮሚያ ክልል የሚደረጉ ተቃውሞዎች እንደቀጠሉ ናቸው። በተለየ የመግለጫውን ይዘት ወደ መሬት ለማውረድ በተራ የሕዝብ ግንኙነት ሥራዎች ብቻ የሚሞከር አይደለም። ጠንካራ የፖለቲካ አመራር እና ቁርጠኛ አስፈፃሚ አካል ይሻል። ከሁሉም በላይ በቂ ጊዜ ያስፈልጋል፤ ለምን?


የማዕከላዊ ኮሚቴው መግለጫ የፌደራል ሥርዓቱን አደጋ ውስጥ የሚከት የተዛባ የፖለቲካ ኢኮኖሚ መኖሩ አስቀምጧል። በአንድ ሀገር ውስጥ ተዛብቷል የተባለውን ፖለቲካ ኢኮኖሚ ማስተካከል በአንድ ጀምበር የሚሆን ጉዳይ አይደለም። በአንድ ትውልድም ለመቀየር በጣም ከፍተኛ ሥራዎች ያስፈልጋሉ።


ማዕከላዊ ኮሚቴው ቅድሚያ በመስጠት እሰራዋለሁ ብሎ ካስቀመጣቸው መካከል፣ “የወጣቶችን የስራ አጥነትን በመቀነስ የኑሮ ሁኔታቸውን ማሻሻል” አንዱ ነው። በአሁን ሰዓት በኦሮሚያ ውስጥ ከ6 ሚሊዮን በላይ ወጣቶች ይገኛሉ። ለእነዚህ ሁሉ ወጣቶች የሥራ ዕድል ለመፍጠር እውቀት፣ የአመራር ጥበብ፣ ቁርጠኝነት እና ጊዜ ያስፈልጋል። በክልሉ ውስጥ የሚገኘውን እውቀት በማሰስና በማቀናጀት ወደ ተግባራዊ እንቅስቃሴ ለመግባት፣ አመራሩ በቂ ጊዜ ማግኘት አለበት። የሲቪልና የፖለቲካ አመራሮችን ለማብቃት፣ ጊዜ ያስፈልጋል። ለሕዝብ የተሰጠ እና አድርባዩን ለመለየት ጊዜ ያስፈልጋል። ምክንያቱም አዲሱ አመራር የሰዎች ስብስብ እንጂ የአስማተኞች ስብስብ ባለመሆኑ ነው።


ማዕከላዊ ኮሚቴውም እንዳስቀመጠው፣ “ቀንደኛ የሕልውናችን ጠላት ድህነት ከዚህ ጋር በተያያዙ መሆኑ ቢታወቅም፤ ይህንን ጠላት ለመዋጋት በመንግስት፣ ድርጅትና ሕዝብ ትስስር ሊሰራ እንደሚገባውና አዳዲስ ሃሳቦችን እያፈለቀ አመራር የመስጠት ጉዳይ ከድርጅታችን እንደሚጠበቅ ከስምምነት ላይ ተደርሷል።” ብሏል። ስለዚህም ጊዜ ቁልፍ ጉዳይ ነው።


ሌላው፤ የማዕከላዊ ኮሚቴው መግለጫ ካስቀመጣቸው ሥራዎችና ጥሪዎች መካከል አንዱ፣ “በሀገር ውስጥም ሆነ በውጭ ያላችሁ ተቃዋሚ የፖለቲካ ፓርቲዎች ልዩነታችን እንደተጠበቀ ሆኖ በሀገራችንና በሕዝባችን የጋራ ጥቅም ላይ ከድርጅታችን ኦህዴድ ጋር አብራችሁን እንድትሰሩ የኦህዴድ ማዕከላዊ ኮሚቴ ጥሪውን ያቀርባል።” ይህ ጥሪ የቀረበው ለተቀናቃኝ የፖለቲካ ኃይሎች ነው።


እንደሚታወቀው ኦሮሚያ ክልል ካለው የሕዝብ ብዛት እና ከተፈጠረው ጠያቂ ትውልድ ፍላጎት አንፃር በአንድ የፖለቲካ ፓርቲ ብቻ ሊሟላ አይችልም የሚል መሰረታዊ መነሻ ያለው ይመስላል። ወይም በኦሮሚያ ፖለቲካ ውስጥ ያገባኛል የሚል ሁሉ የድርሻውን እንዲወጣ የሚጋብዝ ጥሪ ተደርጎ የሚወሰድ ነው፤ ተገቢም ነው።


ሆኖም ግን በኢትዮጵያ ፖለቲካ ፓርቲዎች ታሪክ ውህደት አንድነት የሚባሉት ለበርካታ ጊዜ የተሞከሩና፤ ያልሰሩ መንገዶች ናቸው። የኦህዴድ ማዕከላዊ ኮሚቴ አብረን እንስራ የሚለውን ጥሪ፣ ተቀናቃኝ የኦሮሞ ፖለቲካ ኃይሎች እንዴት ይመለከቱታል? ለመቀበል ምን ያህል ዝግጁ ናቸው? መተማመን ላይ ለመድረስ ምን ቅድመ ሁኔታዎች ሊያስቀምጡ ይችላሉ? እና ሌሎች ጥያቄዎችም ይኖራሉ። ሁሉንም ለመፈተሽ በቂ ጊዜ ማግኘት ወሳኝ ነው።


ሌላው፤ “የፌዴራላዊ ስርዓታችንን አደጋ ላይ የጣሉ ሙስናና ብልሹ አሰራሮችን፣ ሕዝቡ በመሪ ድርጅቱ ላይ እንዲያምጽ ያስቻሉ የመልካም አስተዳደር እጦቶችን፤ ስልጣን ህዝብን ማገልገያ መሳሪያ መሆኑን በመዘንጋት በርስትነት ይዞ ለግል ምቾትና ጥቅም ቅድሚያ መስጠትን” አንዱ ነው ይላል፤ የማዕከላዊ ኮሚቴው መግለጫ።


“ሙስና እና ብልሹ አሰራሮች” ማስተካከል የአንድ ጊዜ ሥራዎች አይደሉም። እንደውም የሕይወት ዘመን ሥራዎች ናቸው። በሰለጠነው ዓለም ሙስናን መቀነስ እንጂ ማጥፋት አልተቻለም። ይህንንም ማድረግ የቻሉት ሙስናን የሚጠየፍ ማሕበረሰብ ገንብተው ነው። እንዲሁም የአሰራር እና የገንዘብ ቁጥጥራውን በዘመናዊ መሣሪያዎች በማገዝ ነው፣ ትርጉም ያለው ለውጥ ማምጣት የቻሉት። ሮም በአንድ ቀን አልተገነባችም እንደሚባለው፤ ኦሮሚያም በአንድ ቀን ልትገነባ አትችልም፤ በትውልዶች ቅብብል ሥረዎች እንጂ በአንድ ጀንበር ወይም በአንድ ዓመት የሚመጣ ነገር የለም። ስለዚህም፣ አመራሩ በቂ ጊዜ ሊሰጠው ይገባል።


ሌላው፣ “በነጻነት ተዘዋውሮ የመስራት መብት” ማረጋገጥ ማዕከላዊ ኮሚቴው ከያዛቸው ሥራዎቹ መካከል አንዱ ነው። መግለጫውም እንዳስቀመጠው በመቶ ሺዎች የሚቆጠሩ የኦሮሞ ተወላጆች ከቀያቸው ተሰደው ከሥራ ገበታቸው ተነስተው፣ የሁሉንም ኢትዮጵያዊ ቅስም በሰበረ መልኩ በተወሰኑ ቦታዎች ሰፍረው ይገኛሉ። የተፈናቀሉ ዜጎችን ወደ ቦታቸው እስካሁን መመለስ አለመቻላችን፣ በዘመናዊ የኢትዮጵያ ታሪክ በአሳፋሪነት ከሚጠቀሱ ትውልዶች መሆናችንን መቀበል አለብን። ሁሉም ነገር ዜጎቻችን ወደ ቀዬአያቸው ተመልሰው የሚታይ መሆን አለበት።
በርግጥ ማዕከላዊ ኮሚቴው፣ “ከኢትዮጵያ ሶማሌ ክልል ሕዝቦች ጋር የነበረንን መልካም ግንኙነት በመመለስ እንደ ወንድማማች ሕዝቦች የባይተዋርነት ስሜት እንዳይፈጠር በሚያስችል መልኩ በታላቅ የኃላፊነት ስሜት እንዲመራ ጊዜያዊ ችግሮችን ፈተን ለዘላቂ የጋራ ጥቅሞቻችን በወንድማማችነት መንፈስ እንድንረባረብ የሶማሌም ይሁን ሌሎች ብሔረ ብሄረሰቦች በኦሮሞ ባህልና የገዳ ስርዓተ ባስተማረን መልኩ በፍቅርና በአብሮነት እንዲኖሩ ለማስቻል ሕዝቡ የበኩሉን ሚና እንዲጫወት ማዕከላዊ ኮሚቴው ጥሪ አቅርቧል።” ይበል የሚያሰኝ ነው። መፈጸም ያለበት ግን፤ አሁን ነው።


ማዕከላዊ ኮሚቴው ከፍ ያላ ደረጃ ላይ መሆኑ ያሳየበትን ትንታኔውን ስንመለከተው ለወቅታዊ ጉዳዮች መሠረታዊ ምላሽ አስቀምጧል። ይኸውም፤ “ዛሬ አድገው የሀገራቸውን ህዝብ ኑሮ በከፍተኛ ደረጃ ያሻሻሉ ሀገራት ታሪክ ሲመረመር በአገራዊ ጉዟቸው ውስጥ ሕዝባዊ አመጽን ያስተናገዱ፣ የወጣቶች ቁጣ የደረሰባቸውና መሰል አጋጣሚዎችን በዴሞክራሲያዊ መንገድ መቀልበስ የቻሉት፤ የዘላቂ ልማት ባለቤት እንደሆኑ ታሪካቸው ያሳያል።” የዚህ ትንተና ቁልፍ ፍሬ ነገሩ፤ ዘላቂ ልማት ማምጣት የሁሉም ችግሮች መፍቻ ቁልፍ መሆኑን ያሳያል። ዘላቂ ልማት የሚመጣው በአምስት፣ በአስር፣ በአስራ አምስት፣ በሃያ ዓመታት የሚከናወኑ የልማት የዴሞክራሲ የማሕራዊ ፍትህ ስትራቴጂ ሰነዶች በመንደፍ ነው።


ዘላቂ ልማት ጊዜ የሚጠይቅ መሆኑን ግንዛቤ ውስጥ የከተተው የማዕከላዊ ኮሚቴው ማሳሰቢያ አብሮ አስቀምጧል። “በመሆኑም በወጣቶች ላይ የሚታየውን ፍትህ የመሻት ቁጣ ሀገርን በማያፈርስ መልኩ ከሃይል በፀዳ ሁኔታ ሰላማዊ የትግል ስልት እንዲከተሉ በማስተማር የዴሞክራሲ ባህልን ማዳበር አስፈላጊ መሆኑን ኮሚቴው ያምናል። ዋነኛ ሚናውም የተሻለች ሀገር ለቀጣዩ ትውልድ ማሸጋገር በመሆኑ የተሻለች ሀገር ብቻ ሳይሆን ብቁ ተረካቢ ወጣቶችን ማፍራት እንደሆነም ይገነዘባል።” ብሏል።


ማዕከላዊ ኮሚቴው “ሀገር በማያፈርስ መልኩ” የሚል ሀረግ ማስቀመጡ ትኩረት የሚወሰድ ነው። ምክንያቱም “ሥርዓት-መንግስት ማፍረስ” እና “ሀገር ማፍረስ” በጣም መሰረታዊ ልዩነት ስላላቸው ነው። ሀገር መገለጫው መንግስት “State” ሲሆን፣ ሥርዓት-መንግስት “Govrnment” ነው። ይህም ሲባል፣ የኢትዮጵያ መንግስት ከ3ሺ ዘመን በላይ በፈጀ ጊዜ የተመሰረተ ነው። አሁን ያለው ሥርዓተ-መንግስት ከተመሰረተ ደግሞ በሃያዎች እድሜ የሚቆጠር ነው። ስለዚህም ተቋውሞ ማሰማት የኢትዮጵያ መንግስትን ከማፍረስ መለስ መሆን አለበት። ሥርዓተ-መንግስቱንም ለመቀየር የፈለገ ኃይል፣ በቀጣይ ምርጫ ተደራጅቶ በሕግ አግባብ ቢያደርገው የሠለጠነ መንገድ ይሆናል።


በአጠቃላይ የኦህዴድ መግለጫ በጊዜ ሒደት የተሻለ ልማትና አሳታፊ ዴሞክራሲ በኦሮሚያ ክልል ሊያመጣ ይችላል። የኦሮሚያ ሕዝብ ለድርጅቱ የሰጠውት ጊዜ በቂ ነው ብሎ ባመነበት እና ምንም ለውጥ ማምጣት ካልቻለ፤ የመቀየር መብቱ የተጠበቀ ነው። ስለዚህም ጊዜ ፈቅዶ መመዘኑ ይመከራል።

 

ክፍል ፖለቲካ

 

- ክለቡ ለተጫዋቾቹ የገንዘብ ሽልማት ሰጥቷል

 

የወላይታ ዲቻ እግር ኳስ ክለብ ወደ ዛንዚባር በመጓዝ ለመጀመሪያ ጊዜ ያደረገውን የኢንተርናሽናል ጨዋታ በአቻ ውጤት ማጠናቀቁ ክለቡንና ደጋፊዎቹን አስደስቷል። ክለቡም ተጫዋቾቹ ላስመዘገቡት ውጤት ቃል የገባውን የገንዘብ ሽልማት አበርክቷል።

 

ያለፈው አመት የኢትዮጵያ ጥሎ ማለፍ ዋንጫን በማሸነፉ በዘንድሮው የካፍ ኮንፌዴሬሽንን ዋንጫ ላይ ተሳታፊ የሆነው ወላይታ ዲቻ፤ የመጀመሪያ ኢንተርናሽናል ጨዋታውን ከዛንዚባሩ ዚማማቶ ክለብ ጋር አድጓል። ቡድኑ በኮንፌዴሬሽን የቅድመ ማጣሪያ ከሜዳው ውጪ ያደረገውን ጨዋታ በአቻ ውጤት ነው ያጠናቀቀው። ክለቡ ከሜዳው ውጪ ግብ ማስቆጠሩ በሜዳው የሚያደርገውን የመልስ ጨዋታ ያለ ከፍተኛ ጫና እንዲጫወት ያደርገዋል።
ወላይታ ዲቻ በሀገር ውስጥ በውጤት መዋዠቅ ቢቆይም፤ በታሪኩ የመጀመሪያ በሆነው የኢንተርናሸናል ጨዋታው ከሜዳው ውጪ ግብ በማስቆጠር ነጥብ በመጋራት ቀጣይ ጉዞውን ተስፋ ሰጪ አድርጓል። የመልስ ጨዋታውን እንሚያሸንፍም ከፍተኛ ግምት ተሰጥቶታል።


የዚማማቶና ወላይታ ዲቻ ጨዋታ የመጀመሪያ አጋማሽ ያለ ግብ የተጠናቀቀ ሲሆን፤ ዲቻዎች የተሻለ የኳስ ቁጥጥር፤ ዚማማቶ ደግሞ በግብ ሙከራዎች የበላይነት እንደነበራቸው ዘገባዎች አመልክተዋል።


በሁለተኛው አጋማሽ ላይም የኢትዮጵያው ክለብ ኳስን በመቆጣጠር ተጋጣሚው ላይ የነበረውን ብልጫ መድገም ችሏል። ግብን በማስቆጠር ግን ባለሜዳው ክለብ ነበር የቀደመው። ሀኪም ካሚስ በተባለ ተጫዋች ከዲቻው ግብ ጠባቂ በቅርበት ተገናኝቶ ኳስን ከመረብ አሳርፏል።


ለዲቻ ጠቃሚ የሆነችውን ግብ ደግሞ የቶጎው አጥቂ ጃኮ አራፋት ነው ያስቆጠረው። አማካይ ተጫዋቹ ዳግም በቀለ ወደ ግብ የመታትን ኳስ ግብ ጠባቂው በመመለስ ቢያድናትም ግቡ አካባቢ የነበረው ጃኮ አራፋት ኳሷን ወደ ግብነት መቀየር ችሏል።


የሁለቱ ክለቦች የመልስ ጨዋታ ከሁለት ሳምንት በኋላ የሚያደርግ ሲሆን፤ ወላይታ ዲቻ የሐዋሳ ስታዲየምን መርጧል። በመልሱ ጨዋታም ከበርካታ ደጋፊዎቹ የድጋፍ ዜማ በመታጀብ ድል እንደሚያደርግ ተገምቷል።
ወላይታ ዲቻ በደርሶ መልሱ ጨዋታ ተጋጣሚውን ማሸነፍ ከቻለ በዋናው ማጣሪያ በመጀመሪያ ዙር ጨዋታ ከግብጹ ዛማሌክ ጋር የሚገናኝ ይሆናል። በካፍ ቻምፒየንስ ሊግና ኮንፌዴሬሽን ዋንጫ የአሸናፊነት ታሪክም ያለው ዛማሌክ፤ በዚህ ሳምንት በግብጽ ፕሪሚየር ሊግ አራተኛ ደረጃ ላይ ይገኛል።


በዘንድሮው የኢትየጵያ ፕሪሚየር ሊግ ወጥ አቋም ማሳየትና ውጤት ማስመዝገብ የተቸገረው ዲቻ የረጅም ጊዜ የቡድኑን አሰልጣኝ መሳይ ተፈሪንና ምክትሉን አሰናብቶ አሰልጣኝ ዘነበን በጊዜያዊነት መሾሙ ይታወሳል። በፕሪሚየር ሊጉ የደረጃ ሰንጠረዥም ቀሪ ጨዋታዎች እያሉት ባደረጋቸው 13 ጨዋታዎች 16 ነጥብ ይዞ 9ኛ ደረጃ ላይ ይገኛል።


ክለቡ ከዛንዚባሩ ክለብ ጋር አቻ ውጤት በማስመዝገቡ ለእያንዳንዱ ተጫዋች ቃል የገባውን የ10ሺ ብር ሽልማት መስጠቱ ታውቋል። ጨዋታውን በያሸንፉ ኖሮ 20ሺብር ሽልማት ይሰጣቸው ነበር።

ክፍል ስፖርት

 

በደደቢቱ ዋና አሰልጣኝ ንጉሴ ደስታ ላይ በኢትዮጵያ እግር ኳስ ፌዴሬሽን የተላለፈው ቅጣት በስፖርት ቡተሰቡ ዘንድ መነጋገሪያ ሆኗል። አሰልጣኙ ለሶስት ወር ቡድኑን ሜዳ ውስጥ እንዳይመራ የተላፈው ቅጣት በረጅምነቱ የመጀመሪያው ነው ተብሏል።


በኢትዮጵያ ፕሩሚየር ሊግ ደደቢት በጅማ ከነማ መሸነፉን ተከትሎ አሰልጣኝ ንጉሴ ደስታ የሰጡት አስተያየት አስገራሚና ያልተጠበቀ የተባለ ቅጣት እንዲተላለፍበት አድርጓል። አሰልጣኙ ቡድናቸው ሽንፈት ከደረሰበት በኋላ በሰጡት አስተያየት ያልተገባ የዳኝነት በደል እንደተፈጸመበት ተናግረዋል። ደደቢትን ለማጥፋት የተጠነሰሰ ሴራ መኖሩን በግልጽ የሚያሳይ ነው የሚል አስተያየትም ሰጥተው ነበር።
አሰልጣኙ የሰጡት አስተያየት በወቅቱ በብዙዎች ዘንድ ለትችት አጋልጧቸው ነበር። ክለቡ ግን አልደገፋቸውም። ይልቁንም በይፋ በሰጠው መግለጫ አሰልጣኝ ንጉሴ የተናገሩት አስተያየት የግል ስሜታቸው እንደሆነና ክለቡን እንደማይወክልም ነው ያረጋገጠው።


የኢትዮጵያ እግር ኳስ ፌዴሬሽንም አሰልጣኙ በመገናኛ ብዙሀን የሰጡት አስተያየት ጤናማ ያልሆነና የእር ኳስን የመቻቻል መርህ የጣሰ መሆኑን በመረዳት የጨዋታ እገዳና የገንዘብ ቅጣት አስተላልፎባቸዋል። አሰልጣኙ ለሶስት ወሮች ቡድናቸውን እየመሩ ሜዳ እንይገቡ የሚደርግና የ20.000 ብር (ሀያ ሺ ብር) የገንዘብ ቅጣት አስተላልፎባቸዋል።


በአሰልጣኙ ላይ የተጣለው የሶስት ወር ጨዋታ ያለመምራት እገዳ እጅግ የበዛና የገንዘብ ቅጣቱ ያነሰ መሆኑን የሚናገሩ አስተያየት ሰጪዎች ገንዘቡን ከፍ ቢል የተሻለ እንደሆነ ይናገራሉ። በአንጻሩ ደግሞ አሰልጣኙ የሰጡት አስተያየት አደገኛነትን በመግለጽ፤ ቅጣቱ ተገቢና ለሌሎችም አስተማሪ መሆኑን የሚናገሩም አሉ።


በቅጣቱ ዙሪያ የደደቢት እግር ኳስ ክለብ አሰልጣኙን ወግኖ በመቆም ይግባኝ ይጠይቃል ተብሎ ይጠበቅ ነበር። ይሁንና ክለቡ ባልፈጸመው ቅጣት ይግባኝ አይጠይቅም ሲል የፌዴሬሽኑን ውሳኔ በጸጋ መቀበሉን ነው ያታወቀው። በዚህም የተነሳ ደደቢት በቀጣይ አሰልጣኙ ጋር የሚኖረው ቆይታ አጠያያቂ ሆኗል።


በኢትዮጵያ ፕሪሚየር ሊግ አሰልጣኝ ንጉሴ ላይ የተላለፈው አይነት ቅጣት እስካሁን ተግባራዊ ሆኖ አለማወቁ ትኩረት ስቧል። በተለይም ደግሞ አሰልጣኞች በሚሰጡት አስተያየቶች ተመሳሳይ ቅጣት በቅርብ አመታት ታይቶ አያውቅም።


አሰልጣኞች በመገናኛ ብዙሀን አስተያየታቸውን የመስጠት ልማድን የጀመሩት በቅርብ አመታት በመሆኑና የሚያስቀጣና የማያስቀጣ አስተያየቶች ላይ በቂ እውቀት አላቸው ተብሎ አይታሰብም። አሰልጣኞቹ በዚህ ዙሪያ ራሳቸውን በእውቀትና በስነ ምግባር ማነጽ ይጠበቅባቸዋል።


የገንዘብ ቅጣቶችን በመጣል ተደጋጋሚ ውሳኔዎችን በማስተላለፍ ላይ የሚገኘው የኢትዮጵያ እግር ኳስ ፌዴሬሽንም አሰልጣኞች በመገናኛ ብዙሀን በሚሰጧቸው አስተያየቶች ዙሪያ በቂ ግንዛቤ እንዲኖራቸው መስራት እንደሚገባው ብዙዎች ይስማማሉ።


ደደቢት ከአሰልጣኙ እገዳ በኋላ ሰኞ እለት ከመከላከያ ጋር ያደረገውን ጨዋታ 4ለ0 በሆነ ውጤት አሸንፏል። ፕሪሚየር ሊጉንም በ13 ጨዋታዎች በ28 ነጥብ እየመራ ይገኛል።

ክፍል ስፖርት

 

“ገዥዎቻችን በተናገሩት ቃል ላይ እንደማይቆሙ
የተረጋገጠ ነው”


አቶ ሙሉጌታ አበበ የመኢአድ ም/ሊቀመንበር

በይርጋ አበበ

የመላው ኢትዮጵያ አንድነት ድርጅት (መኢአድ) ላለፉት አስር ዓመታት እና ከዚያ በላይ ተዘግቶ የቆየውን የሰሜን ሸዋ ዞን ጽ/ቤቱን ባሳለፍነው እሁድ ከፍቷል። በኢትዮጵያ ስለሚታየው ወቅታዊ ሁኔታ እና አመላካች መፍትሔዎች እንዲሁም የፓርቲውን አቋም በተመለከተ የፓርቲው ምክትል ፕሬዚዳንት አቶ ሙሉጌታ አበበ ከሰንደቅ ጋዜጣ ጋር ሰፋ ያለ ቆይታ አድርገዋል። አቶ ሙሉጌታ ለሰንደቅ ጋዜጣ የሰጡትን ቃለ ምልልስ እነሆ።


ሰንደቅ፡- ፓርቲያችሁ ሰሞኑን በደብረ ብርሃን ከተማ ጽ/ቤት ከፍቷል። ከዚህ በፊት የነበረውን ጽ/ቤት ነው የከፈታችሁት ወይስ አዲስ ቢሮ ነው?


አቶ ሙሉጌታ፡- የሰሜን ሸዋ ጽ/ቤት ሲከፈት የአሁኑ የመጀመሪያው ሳይሆን ገና በ1984 ዓ.ም ጀምሮ በአማራ ብሔር እና አማርኛ ተናጋሪ ዜጎቻችን ላይ በተለያዩ የኦሮሚያ አካባቢዎች ጅምላ ግድያ እና ሌሎች ጭቆናዎች በሚደርሱበት ጊዜ ፓርቲያችን መአሕድ ትግል ሲጀምር ጀምሮ የተከፈተ ጽ/ቤት ነው። ከዚያ በኋላም መአሕድ ከብሔር ወደ ህብረ ብሔር ፓርቲነት ሲሸጋገር በደብረ ብርሃን ከተማ ብቻ ሳይወሰን በተለያዩ የሰሜን ሸዋ ወረዳዎችም ቢሮዎችን ከፍተን ስንሰራ ቆይተናል።


ከ1997 ዓ.ም ምርጫ በኋላ ደግሞ በተለያዩ ምክንያቶች ቢሮዎች ቢዘጉም መኢአድ በዞኑ 22 ወረዳዎች መሰረቱን ጥሎ ተስፋፍቶ የሚሰራ ፓርቲ ነው። ከዚህ በተጨማሪም የአካባቢው ህዝብ ለነጻነቱና መብቱን ለማስከበር ወደኋላ የማይል እና በሰፊው እየታገለ የሚገኝ ህዝብ ሲሆን ምንም እንኳን በመሪዎች፣ በአባላትና በደጋፊዎቻችን ላይ ጫና እና እስር ቢበረታባቸውም በ22ቱም የዞኑ ወረዳዎች መኢአድ ሰፊ መሰረት ኖሮት ትግሉን እያካሄደ ይገኛል። ሰሞኑንም ጽ/ቤቱን እንደገና ስንከፍት ሁለት የሰማያዊ እና ሁለት የመኢአድ ፓርቲ አመራሮች ሆነን በመኢአድ ስም ጽ/ቤቱ እንዲከፈት አድርገናል። በቅርቡም በዚያው በዞኑ የተለያዩ ወረዳዎችና በደብረ ብርሃን ከተማ በሰማያዊ ፓርቲ ስም ተጨማሪ ጽ/ቤቶችን እንከፍታለን።


ሰንደቅ፡- ሰማያዊ እና መኢአድ የቅድመ ውህደት ጥናት እያካሄዳችሁ መሆናችሁን ገልጻችኋል። ሆኖም በአዲስ አበባም ሆነ በክልል ከተሞች ጽ/ቤቶችን በተናጠል ነው እየከፈታችሁ የምትገኙት። በተናጠል ቢሮ መክፈት ለምን አስፈለገ? የቅድመ ውህደት ድርድሩስ የት ደረሰ?


አቶ ሙሉጌታ፡- ቅርንጫፍ ጽ/ቤት በተናጠል መክፈቱ ጥፋት የለውም፤ እንዲያውም ወሳኝነት አለው። ምክንያቱም ህዝቡ ሃሳቡን የሚገልጽበትና ትግሉን የሚቀላቀልበት ቢሮ መክፈቱ ጠቀሜታው የጎላ ነው። ሁለቱ ፓርቲዎች ለውህደት የሚያደርጉት ድርድርና ዝግጅት ተጠናቆ ወደ ውህደት እስክንደርስ ድረስ ሁለታችንም በተናጠል በርካታ ቢሮዎችን እስከታችኛው መዋቅር ድረስ መክፈታችን ይቀጥላል። ምክንያቱም የሁለታችን ውህደት ሊሳካ የሚችለው በየደረጃው ያሉ አመራሮችና አባላት በሚያደርጓቸው እና በምናደርጋቸው የጋራ ውይይቶች መስማማት ላይ ሲደረስ ብቻ ነው። ለዚህ ደግሞ በሁለታችንም ስም ጽ/ቤቶችን መክፈቱ የውህደት ጉዞውን የተሳካ ያደርገዋል።


ሰንደቅ፡- ኢህአዴግ ከቅርብ ሳምንታት ወዲህ በእስር ላይ የሚገኙ ፖለቲከኞችን መፍታት ጀምሯል። የእስረኞችን አፈታት ተከትሎ የሚሰጡ አስተያየቶች አሉ። መንግስት በምህረት እለቃለሁ ብሎ ከተወሰነ ጊዜ በኋላ ግን የይቅርታ ፎርም ሞልተው እንዲወጡ እያደረገ ይገኛል። ይህም በቅድመ ሁኔታ የተቀመጠ ስለሆነ ውስንነት ይታይበታል ሲሉ የሚናገሩ አሉ። በአጠቃላይ የእስረኞቹን መፈታት በተመለከተ የመኢአድ አረዳድ እንዴት ነው?


አቶ ሙሉጌታ፡- ገዥዎቻችን በተናገሩት ቃል ላይ እንደማይቆሙ የተረጋገጠ ነው። በመጀመሪያ ደረጃ የተነገረው በምህረት እለቃለሁ የሚል ቢሆንም እየቆየ ግን በይቅርታ ተብሎ መቀየሩም ከእሱ ባህሪ አኳያ የሚጠበቅ ነበር። ‹‹እኔ ጥፋተኛ ነኝ፤ ለደረሰው ችግር ኃላፊነት መውሰድ ያለብኝም እኔ ነኝ›› ብሎ በአደባባይ በዓለም ህዝብ ፊት የተናገረ መንግስት ኃላፊነት የሚሰማው ቢሆን ኖሮ የፖለቲካ እስረኞችን ለመልቀቅ ምንም አይነት ቅድመ ሁኔታ ሊያስቀምጥ አይገባውም ነበር። ነገር ግን በዚህ አይነት ቅድመ ሁኔታ የተገደበ እርምጃ መውሰዳቸው ራሳቸውንም ሳይቀር እርዳታ እና ድጋፍ በሚያደርጉላቸው ወዳጆቻቸው ዘንድም ትዝብት ላይ ነው የጣላቸው። እኛም በፓርቲያችን የተመለከትነው ጥፋቱን አምኖ ከስህተቱ ለመማር እስረኛ እፈታለሁ ያለ መንግስት ቅድመ ሁኔታ ሊያስቀምጥ አይገባውም ነበር ብለን ነው። ከዚህ የባሰው ደግሞ እስረኛ እፈታለሁ ጥፋተኛ ነኝ ባለ ማግስት በየቦታው ሰዎችን እየገደለ እና እያሰረ ነው ያለው። በተለይ በወልድያ የሆነው እኮ ወጣቶችን በጅምላ ስታዲየም ወስዶ ነው ያጎራቸው። ይህን የሚያደርግ መንግስት ነው ያለን።


ሰንደቅ፡- መኢአድ በተደጋጋሚ ጊዜ አባሎቼ እና አመራሮቼ ታሰሩብኝ ሲል ቆይቷል። በዚህ ሰሞን በተደረገው እስረኞችን የመፍታት እርምጃ ስንት አባሎቹ ተፈቱለት?


አቶ ሙሉጌታ፡- እንደእውነቱ ከሆነ ከተፈቱት ይልቅ ሰሞኑን የታሰሩት ይበዛሉ። በእርግጥ በምስራቅ ጎጃም የመርጦ ለማሪያም አመራርና የፓርቲያችን ማዕከላዊ ኮሚቴ አባል የሆኑትን ጨምሮ ሶስት አባሎች የተፈቱ ሲሆን በወልድያው ግጭት ብቻ አምስት አመራሮች ታስረዋል።


ሰንደቅ፡- ኢትዮጵያ መስቀለኛ መንገድ ላይ ናት እያላችሁ ደጋግማችሁ ስትናገሩ ቆይታችኋል። ከቅርብ ጊዜያት ወዲህ ደግሞ መንግስት አገሪቱ ችግር ላይ መሆኗን የሚያመለክት መግለጫ ሰጥቷል። በእናንተ እይታ ለዚህ ችግር መፍትሔ ብላችሁ የያዛችሁት አቋም ኢህአዴግ በሩን ለድርድር ክፍት ያድርግ የሚል ነበር። ከኢህአዴግ አባል ፓርቲዎች አንዱ የሆነው ኦህዴድ ከተቃዋሚ ፓርቲዎች ጋር አብሮ ለመስራት ያቀረበውን ጥያቄ እንዴት ገመገማችሁት?


አቶ ሙሉጌታ፡- በመጀመሪያ ደረጃ መግለጫውን ስንመለከተው በጣም ጥሩ ጅማሮ ነው ብለናል። ፓርቲው (ኦህዴድ) መግለጫውን የሰጠው በአገር ውስጥም ሆነ ከአገር ውጭ ከሚገኙ ተቃዋሚ ፓርቲዎች ጋር አብሬ እሰራለሁ በማለት ነው። እኛም በመግለጫው መሰረት አንድ በሚያደርጉን ነጥቦች ላይ በተለይም በኢትዮጵያዊነት፣ በብሔራዊ መግባባትና ብሔራዊ እርቅ ላይ አብረን ለመስራት ፈቃደኞች ነን። እስካሁን ግን ከመግለጫ በዘለለ ጥሪ አላቀረቡልንም። ወደፊት ጥሪውን ያቀርቡልናል ብለን እንገምታለን። በሌላ በኩል ደግሞ የኢህአዴግ ባህሪ ተጋብቶባቸው መግለጫው የሚዲያ ፍጆታ ሆኖ ሊቀርም ይችል ይሆናል። ስጋቱ እንዳለ ሆኖ ግን አሁን ለተሰጠው መግለጫ አክብሮት አለን፤ ለመሪዎቹም ጭምር። በተለይ ለክልሉ ፕሬዝዳንት። ከዚህ በተጓዳኝ ደግሞ በክልል ደረጃ ሳይወሰን በአገር አቀፍ ደረጃ ጥሪው ቢደረግና ወደ መግባባት የሚወስደን ነጥብ ቢፈጠር ደግሞ የተሻለ ውጤት ሊገኝ ይችላል ብለን እናምናለን።


ሰንደቅ፡- መኢአድ የአማራ ድርጅት እየተባለ ነው በስፋት የሚነገረው። ኦህዴድ ጥሪ ያደርጋል መባሉን ተከትሎ ጥሪውን እየተጠባበቃችሁ ነው። ለመሆኑ መኢአድ በኦሮሚያ ክልል ያለው መሰረት ምን ያህል ነው?


አቶ ሙሉጌታ፡- የአማራ ፓርቲ ነው የሚባውን በሁለት መልኩ ነው የምናየው። አንደኛ በመግቢያችን ላይ እንደተነጋገርነው ፓርቲው ሲመሰረት በአማራው ወገኖቻችን ላይ የደረሰው ግፍ የሰሜን ሸዋ፣ ወሎ፣ ጎንደር እና ጎጃም ህዝብ ግፊት ተቋቁሞ እየቆየ ወደ ህብረ ብሔር ፓርቲ ያደገ መሆኑን በማንሳት የተሰጠው ስያሜ ነው። በሌላ መልኩ ደግሞ የኢህአዴግ ካድሬዎች ከአማራ ብሔር ውጭ ያሉ ኢትዮጵያዊያን ፓርቲውን እንዳይቀላቀሉ የአማራው ገዥ መደብን ለመመለስ የተነሳ ፓርቲ ነው እያሉ ደጋግመው ሲቀሰቅሱ ቆይተዋል፤ ባይሳካላቸውም ቅሉ። ይህን የሚያሳየው ደግሞ በዞንና በወረዳ ተደራጅተው የሚታገሉ አባላት በአፋር ክልል አሉት። ደቡብ ክልል ደግሞ ጭራሽ ከአማራ ክልል በበለጠና ስፋት ባለው መልኩ ይንቀሳቀሳል። ለምሳሌ ሲዳማ ዞን ላይ በ22 ወረዳዎች ነው የሚንቀሳቀሰው። በኦሮሚያ ክልል ደግሞ በሁለቱም ወለጋ ዞኖች፣ ምዕራብ ሸዋ አምቦ፣ ወሊሶ ቡራዩ፣ ፍቼ ናዝሬት፣ ደብረ ዘይትን ጨምሮ በበርካታ ዞኖች እና ወረዳዎች ፓርቲያችን እየተንቀሳቀሰ ነው።


ስለዚህ መኢአድ አገር አቀፍ ፓርቲ እና ድጋፍ ያለው ፓርቲ እንደመሆኑ ከኦህዴድ የሚቀርብለትን ጥያቄ ለመቀበል ዝግጁ ነው።


ሰንደቅ፡- በአገሪቱ የተለያዩ አካባቢዎች ተቃውሞ መነሳታቸውን ተከትሎ አገሪቱ ስጋት አንዣቦባታል የሚሉ ወገኖች አሉ። በመኢአድ ምልከታ ኢትዮጵያ ያለችበትን ሁኔታ እንዴት ትገልጹታላችሁ?


አቶ ሙሉጌታ፡- ይህች አገር አደጋ ላይ መሆኗን ከአስር ዓመት በፊት ጀምሮ ነው። በተለይ እኛ ከመጣንበት ጊዜ ጀምሮ (የአሁኑ የፓርቲ ስራ አስፈጻሚ አባላትን) ለጠቅላ ሚኒስትሩ እና ፕሬዝዳንቱ ደጋግመን ሃሳባችንን በጽሁፍ እስከማሳወቅ ደርሰናል። ነገር ግን ኢህአዴግ ሊሰማ አልቻለም ወይም አልፈለገምና ከእነ ችግሩ ቀጥሎ አገሪቱ ወደ ከፋ ችግር እንድትገባ አድርጓታል። ብዙ ሰዎች የአገሪቱ ቁልፍ በኢህአዴግ እጅ ላይ ነው ሲሉ እሰማለሁ። ነገር ግን ኢህአዴግ ቁልፉ በእጁ ላይ ይሁን እንጂ ቁልፉን ተሰርቋል ወይም ጥሎታል።


የአገር ቁልፍ ደግሞ እንደተከራየኸው ቤት በቀላሉ ሰብረህ የምትገባበት ሳይሆን ከሚመለከታቸው የቤቱ ባቤቶች ጋር የምትመክርበትና ቁልፉን ለማግኘት በሚደረገው ጥረት ተሳትፎ የሚያደርጉበት ዕድል ሊፈጠርላቸው ይገባል። አሁን የተነሳው ማንነትን ማዕከል ያደረገ ግጭት ከመከሰቱ በፊት ገና ከ1984 ዓ.ም ጀምሮ በአማራ ብሔር ተወላጆች ላይ አሰቃቂ ግድያ እና ማፈናቀል ሲደረግባቸው ጀምሮ ነው ማሳሰብ የጀመርነው። ማንም ሰው ፈልጎ እና ፈቅዶ ብሔሩን መርጦ አልተወለደም፤ ነፍስ ብሔር የላትም፤ ስለዚህ አሁን የተፈጠረው ማንነትን መሰረት ያደረጉ ግጭቶች በጊዜ እልባት እንዲበጅላቸው ነው ፓርቲያችን ደጋግሞ ሲገልጽ የቆየው፤ እየገለጸ ያለውም። ይህን የችግር መፍቻ ቁልፍ ደግሞ በኢህአዴግ ብቻ ተፈልጎ የሚገኝ አይደለም። ይህ የብሔር ግጭት ደግሞ ችግሩ የከፋ ከመሆኑ በፊት ሁላችንም የማንነትን ጉዳይ ትተን ስለአገራችን ብቻ በጋራ ልናስብ ይገባል። ይህንን አስከፊ ስርዓት በሰላማዊ መንገድና ሰላማዊ ትግል መቀየር የምንችለው ሁሉም በማንነቱ ላይ ተከባብሮ ሲኖር ብቻ ነው። ህዝቡም ይህንን ተገንዝቦ ወዳላስፈላጊ እልቂትና ደም መፋሰስ እንዳይገባ ፓርቲያችን አጥብቆ ያሳስባል።

ክፍል ፖለቲካ

 

በአፍሪካ ቻምፒየንስ ሊግ ቅድ ማጣሪያ የመጀመሪያ ዙር ከደቡብ ሲዳኑ ዋኡ አል ሳላም ክለብ ጋር የተደለደለው ቅዱስ ጊዮርጊስ በፎርፌ ወደ ቀጣዩ ዙር አልፏል። የደቡብ ሱዳኑ ክለብ በአዲስ አበባ ለመምጣት በቂ የገንዘብ ድጋፍ ባለማግኘቱ ውድድሩን መሰረዙን አስታውቋል።


የኢትዮጵያ ፕሪሚየር ሊግ አሸናፊው ቅዱስ ጊዮርጊስ እሁድ እለት በአዲስ አበባ ስታዲየም ከደቡብ ሲዳኑ ክለብ ጋር ሊያደርግ የነበረው ጨዋታ ተጋጣሚው ቡድን ባለመገኘቱ ሜዳ ገብቶ ወጥቷል። በዚህም የተነሳ በፎርፌ አሸንፎ ወደ ቀጣዩ ዙር ማጣሪያ ማለፉን አረጋግጧል።


የደቡብ ሱዳን ሊግ አሸናፊው ዋኡ አልሰላም ክለብ ከቅዱስ ጊዮርጊስ ጋር አዲስ አበባ ስታዲየም ለነበረው ጨዋታ እስከመጨረሻው ቀን ድረስ ተዘጋጅቶ እንደነበርና በገንዘብ ችግር የጉዞ ሁኔታ አለመሳካቱን ተጨዋቾቹ አስታውቀዋል።

ክፍል ስፖርት

 

ታላቁ ሩጫ በኢትዮጵያ በየአመቱ የሚያዘጋጀው ‹‹ቅድሚያ ለሴቶች›› የ5ኪ.ሜ. የጎዳና ላይ ሩጫ መጋቢት 2 ቀን ለ15ኛ ጊዜ ይካሔዳል። የሩጫው ምዝገባ መጀመሩንም አዘጋጆቹ አስታውቀዋል።
የዘንድሮው የቅድሚያ ለሴቶች ሩጫ ‹‹ከጥቃት ነጻ ህይወት መብቴ ነው›› በሚል መሪ ቃል የሚካሔድ ሲሆን፤ ወጣትና ስመ ጥር ሴት አትሌቶችን ጨምሮ ከ12ሺ በላይ ተሳታፊዎች ይካፈሉበታል። በተለያዩ ሙያዎች የተሰማሩና በተምሳሌትነት የሚጠቀሱ 30 ሴቶችም በሩጫ መድረኩ እንደሚሳተፉ ታውቋል።


ሩጫው ለ15ኛ ጊዜ መካሔዱን አስመልክቶም ባለፈው ሐመስ በአትሌት መሰረት ደፋር የቀድሞ ትምህርት ቤት በፊትአውራሪ ሀብተጊዮርጊስ የመጀመሪያ ደረጃ ትምህርት ቤት ልዩ መርሀግብር ተካሒዶ ነበር። በዝግጅቱም ላይ እንደ ሀይሌ ገብረስላሴ፣ ጌጤ ዋሚና መሰረት ደፋር ያሉ የአለምና የኦሊምፒክ አሸናፊ አትሌቶች ተገኝተዋል። ከሴት ልጆች ከጥቃት ነጻ ህይወት ጋር በተያያዘ አነቃቂ መልዕክቶችን አስተላልፈዋል። ከተማሪዎች ጋርም በመጫወት ሴቶች በነጻነት መማርና ችሎታቸውን መጠቀም እንደሚችሉ መልዕክቶን አስተላልፈዋል።


የቅድሚያ ለሴቶች አመታዊ የሩጫ መድረክን ታላቁ ሩጫ በኢትዮጵያ ከተባበሩት መንግስታትና ከሌሎች አጋሮች ጋር በመሆን የሚያዘጋጀው ሲሆን፤ የሴቶች ጥቃትን ለማስቆም የሚያስችሉ መልዕክቶች የሚተላለፍበት ነው። በሩጫው ላይ ለመሳተፍ

ክፍል ስፖርት

 

የኢትዮጵያ ፕሪሚየር ሊግ ተሳታፊ የሆነው የወልዲያ ከተማ እግር ኳስ ክለብ ከጸጥታ ጋር በተያያዘ በሚል ምክንያት የተበተነው ቡድኑ እንደገና መሰባሰቡ ተሰምቷል። በቀጣዩ አርብ እለትም ሶደ ላይ ከወላይታ ዲቻ ጋር ይጫወታል።


የወልዲያ ከነማ እግር ኳስ ክለብ ባለፉት ሶስት የፕሪሚየር ሊግ ጨዋታዎች ላይ ሳይሳተፍ ቀርቷል። ቡድኑን እንደገና ለማሰባሰብ የተደረገው ጥረት በከፊል ተሳክቶ ወደ ፕሪሚየር ሊጉ መመለሱ ታውቋል። ባለፈው እሁድ ከወላይታ ዲቻ ጋር ሊያደርግ የነበረውን ጨዋታም በተስተካካይ የጨዋታ መርሀ ግብር የፊታችን አርብ ያከናውናል።


የወልዲያ መመመለስ ለአካባቢው ወጣቶችና ለክለቡ ደጋፊዎች ደስታን የፈጠረ መልካም ዜና ሆኗል። ይሁንና በክለቡ የሚገኙ ስመጥርና ተስፈኛ ተጨዋቾች በቡድኑ ውስጥ የመቆየታቸው ነገር አጠራጣሪ ሆኗል። ተጫዋቾቹ በተረጋጋ መንፈስ ደህንነት ተሰምቷቸው መጫወት የማይችሉበት ሁኔታ የሚከሰት ከሆነና ክለቡም በችግር ጊዜ ቡድኑን ከመበተን ይልቅ የተሻሉ አማራጮችን መፍጠር የማይችል ከሆነ የመውጫ በሩን መመልከታቸው አይቀርም።
ወልዲያ ከነማ በፕሪሚየር ሊጉ የአርቡን ጨምሮ አራት ቀሪ ተስተካካይ ጨዋታዎች እያሉት በ11 ጨዋታዎች 11 ነጥቦችን አሉት። በሊጉ የደረጃ ሰንጠረዥ መጨረሻ ከሚገኘው ኢትዮ ኤሌትሪክ አንድ ደረጃ ከፍ ብሎ 15ኛ ደረጃን ይዟል። አርብ ከወላይታ ዲቻ ጋር ካደረ በኋላ ቀሪ የተስተካካይ ጨዋታዎቹ ከመከላከያ፣ ከኢትዮ ኤሌትሪክ እና ከደደቢት ጋር ያከናውናል።

ክፍል ስፖርት
Page 1 of 4

ድርጅትዎ ያስተዋውቁ!

  • Advvrrt4.jpg

እዚህ ያስተዋውቁ!

  • Aaddvrrt5.jpg
  • Addvvrtt1.jpg
  • Addvvrtt2.jpg
  • Advrtt1.jpg
  • Advverttt.jpg

 

Advvrrt4

 

 

 

 

Who's Online

We have 992 guests and no members online

Sendek Newspaper

Bole sub city behind Atlas hotel

Contact us