“ዓላማዬ ኢትዮጵያዊነትን ከአደጋ ማዳን ነው”

Wednesday, 17 May 2017 12:33

 

አርቲስት ቴዎድሮስ ካሳሁን

አርቲስት ቴዎድሮስ ካሳሁን (ቴዲ አፍሮ) ከኢትዮ ኒውስ ፍላሽ እና ኤፒ ሪፖርተር ኤልያስ መሠረት ጋር ሰሞኑን ያደረገው ቃለ መጠይቅ እንደሚከተለው ቀርቧል፡፡


ጥያቄ:- የአዲሱ 'ኢትዮጵያ' አልበምህ ዋና መሠረት እና ለመዳሰስ የሚሞክራቸው ዋና ዋና ጉዳዮች ምንድን ናቸው?


ቴዲ:- አርእስቱ 'ኢትዮጵያ' እንደመሆኑ መጠን ዋናው ዓላማ ኢትዮጵያዊነትን ከአደጋ ማዳን ነው። ይህ አልበም በዚህ አይነት ሀሳብ ላይ እንዲያተኩር የፈለግኩበት ምክንያት አንድነታችን አስፈላጊ ስለሆነ ነው። ብዙ ዓመት ተደክሞበታል። አሁን እንደሚታወቀው በኀሳብ ከመደራጀት ይልቅ በዘር መደራጀት ይታያል። ያ ደግሞ አዝማሚያው ወደ አደጋ ያመጣው ይመስላል። እና ከምንም በላይ ኢትዮጵያዊነትን ማዳን ዓላማ አድርጎ ነው የተሰራው።


ጥያቄ:- እንዳልከው አንዳንዶቹ ሥራዎችህ በኢትዮጵያዊነት እና በኢትዮጵያ ታሪክ ላይ ያጠነጥናሉ። እዚህ ላይ በጣም ትኩረት ለማድረግ የፈለክበት የተለየ ምክንያት ምንድን ነው?


ቴዲ:- አገር እንግዲህ ብዙ ግዜ የሚቆመው ለሀገር ባለውለታ በሆኑ ሰዎች እና ብዙ የህብረተሰቡ አካላት በሚሰሯቸው ተግባራት ነው። እንደሚታወቀው ኢትዮጵያዊነት በነፃነት የመኖር ምልክት ነው። ድል ለማግኘት ምኒሊክን የመሰለ ጥሩ መሪ ያስፈልጋል። እንደገና ደግሞ እንደ ሀይለስላሴ ያሉ ትላልቅ ነገስታት ከዓለም መንግስታት ጉባኤ ጀምሮ ያደረጓቸው አስተዋፆዎች እና የነበራቸው ተቀባይነት፣ ለሀገራቸው የሰሩት ተግባር ሳይደመር ኢትዮጵያ የምንላት ሀገር ልትኖር አትችልም። ይህ እንዳለ ሆኖ ምንግዜም ነገስታት የሚወክሉት ህዝብን እንደመሆኑ መጠን ከስሮቻቸው ደግሞ ያሉ ብዙ ባለውለታዎቻችንን አብሮ ለማየት የሚያስችል ትልቁ መስኮት ከፊት ያሉት ሰዎች ናቸው። በዚህ መሠረት ምልክቶች ካልተበረታቱ እና የሚገባቸውን ክብር ካላገኙ የሚቀጥለው ትውልድ ጥሩ ተግባር ለመፈፀም የሚያነቃቃ መሳርያ አያገኝም። ሁለተኛ ደግሞ ባለፉት ጥቂት ዓመታት ታሪክ የሚባለው ነገር እና ብሄራዊ ስሜት በብዙ ሁኔታ ፈተና ውስጥ ወድቋል።


ስለዚህን ይሄንን አጠናክሮ ያለውን ክፍተት ለመሙላት የትውልድ እንቅስቃሴ ያስፈልጋል። እኔ ደግሞ የዚህ ትውልድ አካል እንደመሆኔ መጠን ያንን ተግባር ለመፈፀም ነው የሞከርኩት። አፄ ቴዎድሮስ ደግሞ እንደሚታወቀው በአንድ ወቅት ዘመነ መሳፍንት በሚባለው እና ኢትዮጵያ በጎሳ መሪዎች እና በጎበዝ አለቆች ተከፋፍላ በነበረችበት ወቅት ኢትዮጵያን አንድ የማድረግ ህልም ይዞ ተነስቶ ከውጪ ብቻ ሳይሆን ከውስጥም በገጠመው ብዙ የመረዳት ችግር ባክኖ የወደቀ ትልቅ ጀግና ነው። ከምንግዜውም በላይ ደግሞ የእርሱ መንፈስ አሁን አስፈላጊ ነው ብዬ አምናለሁ፡፡ ምክንያቱም አስተሳሰባችን አገር ማከል አለበት።


ጥያቄ:- በርካታ ሰዎች አዲሱ አልበምህ ምናልባትም ኢትዮጵያ ውስጥ ከተሰሩ የሙዚቃ ሥራዎች በብዙ ረገድ የገዘፈ እና በሽያጭ ረገድም ሪከርድ የሰበረ ነው ይላሉ። ምን ያህል አልበም ታተመ እና ተሸጠ? አንተስ ይህንን ያህል ተቀባይነት አገኛለሁ ብለህ ገምተህ ነበር?


ቴዲ:- እውነት ለመናገር ከተለመደው ውጪ ይመስላል። ምን ያህል ኮፒ እንደተሸጠ ግን ለመግለፅ የሚችሉት አሳታሚዎቹ ናቸው። ወደ 600 ሺህ ኮፒ አካባቢ ታትሞ እንደነበር ግን አውቃለሁ። ይሁንና አሁን ያለውን ያህል ተቀባይነት ያገኛል ብዬ አልጠበቅኩም ነበር።


ጥያቄ:- ብዙ ሰዎች ደግሞ ቴዲ አፍሮ በቀደምትም ይሁን በአሁን ሥራዎቹ የፖለቲካ መልእክቶችን አስተላልፏል ይላሉ። በሥራዎችህ ላይ እነዚህን መልእክቶች አስተላልፈሀል? ከሆነስ እነዛ መልእክቶች ምንድን ናቸው?


ቴዲ:- በኔ እምነት ብቻም ሳይሆን አሁን ባለው ተጨባጭ ሁኔታ ማንም ሰው ከፖለቲካ ውጪ ሊሆን አይችልም። የፖለቲካዊ ጉዳይን ማንሳት ደግሞ እንደ ኩነኔ የሚታይ ነገር መሆን የለበትም። ሁላችንም ጉዞአችን አንድ እንደመሆኑ መጠን የኢኮኖሚያዊም ሆነ ፖለቲካዊ ጉዳይ እንደ ዜጋ ይመለከተናል። በእነዚህ ጉዳዮች ላይ ማተኮር መለመድ እና መበረታታት አለበት። የነገሮቹ ጥልቀት በአልበሙ ላይ በዝርዝር ተጠቅሷል።


ጥያቄ:- የአንተ በጣም ከፍተኛ አድናቂ እና ተከታታይ የሆነ ህዝብ የመኖሩን ያክል ሌሎች ደግሞ አንተን በብዙ መልኩ የሚወቅሱ ወገኖች አሉ። አንዳንዶቹ የተወሰነ የሀገሪቱ ህዝብ ላይ ብቻ ያተኮረ አርቲስት ሲሉህ ሌሎቹ ደግሞ የኢትዮጵያን ታሪክ በቅጡ ያልተረዳ ይሉሀል። ለዚህ ያንተ መልስ ምንድን ነው?


ቴዲ:- እንግዲህ የሁላችንም መገለጫ ኢትዮጵያዊነት ነው። ኢትዮጵያዊነት የሚሻክረው ክፍል ደግሞ ተፈጥሯል። ይህንን እውነት መቀበል ያስፈልጋል። እና ሁሉንም ለማስደሰት አይቻልም። ጠቃሚውና የሚያስፈልገው መንገድ የትኛው ነው ብሎ ባመኑበት ነገር ላይ ማተኮር ነው። በዚህም መሰረት የተለያዩ አቀባበሎች ይኖራሉ። እንዳየኸው ግን ሁሉም ሰው ኢትዮጵያዊነት ውስጡ ያለ፣ የነበረ ነው። ኢትዮጵያዊነት ሊጠፋ የሚችል ነገርም አይደለም። እንደ ሀይማኖት የጠለቀ ነው። ኢትዮጵያዊነት ረቂቅ ሚስጥር አለው። ኢትዮጵያዊነት ረጅም መሰረት ያለው ነው። ይህንን ካለመረዳት አብረን ባደረግናቸው ብዙ መልካም ነገሮች ላይ መስማማት ስንችል፤ አብረን ባጎደልናቸው ነገሮች ላይ ዝም ብለን ግዜ ማጥፋት ጠቃሚ አይደለም። እኔ ልጅ ወልጃለሁኝ፤ አሁን አራት አመት ሆኖታል። ይሄ ልጅ ከፍቅር እና ከጥላቻ የቱ እንደሚሻል ብጠይቀው የሚነግረኝ ስለ ፍቅር ነው። ያንተም ልጅ ሊነግርክ የሚችለው ስለ መከፋፈል ሳይሆን ስለ አንድነት ነው። ይሄንን ልጆች ሊመልሱት የሚችሉትን ጥያቄ በእድሜ በልፅገን እንኳን በማንግባባቸው ነገሮች ላይ በማተኮር ነው፤ የብዙ ወጣቶች ህይወት እንዲደናቀፍ የሆነው። የቀደሙት አባቶቻችን ግን ከዚህ የተሻለ ቅርፅ የነበራቸው ናቸው። ለዚህ ነው እነሱ ላይ ያተኮረ ስራ የምሰራው። ሁሉም የራሱን አመለካከት የመግለፅ ደግሞ ተፈጥሮአዊ መብቱ ነው። በማንኛውም ሁኔታ ግን ሁሉንም ማስደሰት ባይቻል በተቻለ መጠን ሁሉንም የሚያግባባ ቅርፅ ይዤ ለመቅረብ ነው የሞከርኩት።


ጥያቄ:- ወደፊት የኢትዮጵያ ፖለቲካ ውስጥ የመሳተፍ ሀሳብ አለ?


ቴዲ:- (ከረጅም ዝምታ በኋላ) እስቲ ባለሁበት ሥራ ልክረምና የወደፊቱን ደግሞ አብረን እናያለን።


ጥያቄ:- አልበምህን ከሰራህ በኋላ ሳንሱር (ቅድመ ምርመራ) ተደርጎበት ነበር የሚል ወሬ በቅርቡ ሰማሁ። ትክክለኛነቱን ታረጋግጥልኛለህ?


ቴዲ:- አላጋጠመኝም። እንደጨረስኩ ነው ያወጣሁት።


ጥያቄ:- ይህንን 'ኢትዮጵያ' አልበም ስትሰራ ትልቁ ተግዳሮት ምንድን ነበር?


ቴዲ:- በአጭር ግዜ ውስጥ አለቀም ባይባልም በሁለት ዓመት ነው የስቱድዮ ሥራው ያለቀው። ከዛ በፊት እቤት ውስጥ ዜማ እና ግጥም ማዘጋጀት ነበር። ግን በየቀኑ ነበር የምሰራው። እና ከባዱ እንቅልፍ ማጣት እና የአመጋገብ ችግር ገጥሞኛል። ከዛ በተረፈ በጥሩ ሁኔታ ደስ ብሎኝ ነው የጨረስኩት።


ጥያቄ:- አልበምህን ተከትሎ ሀገር ውስጥ እና ከሀገር ውጭ ኮንሰርት እያሰብክ ነው?


ቴዲ:- ወደፊት ይኖራል። አሁን ለግዜው ግን ከዛ ኀሳብ ትንሽ ገለል ብሎ እረፍት ያስፈልጋል። በሚመጣው ኮንሰርት ግን ከበፊቱ በተለየ እና ከፍ ባለ ብቃት ለማካሄድ አስበናል። ይሄ ደግሞ ጊዜ ይፈልጋል።


ጥያቄ:- ከዚህ በፊት የተወሰኑ ኮንሰርቶችህ በተለያዩ ምክንያቶች በመንግስት ኃላፊዎች ትእዛዝ እንዲሰረዙ ተደርገዋል። ይህ ነገር በድጋሚ ይከሰታል የሚል ሥጋት አለህ?


ቴዲ:- ብዙ ግዜ የዚህ አይነት ነገሮች ሲደጋገሙብህ የምትለማመደው የስሜት ማመጣጠን አለ። ከዛ በተረፈ እንደ ዜጋ ደግሞ መከልከሉ ተገቢ አይደለም። ወደፊትም ያለ በቂ ምክንያት መከልከል ተገቢ አይሆንም። ይሄንን የሚመለከተው ክፍል ሊያስብበት ይገባል። እንደማንኛውም ሙዚቀኛ ሙዚቃችንን ለማቅረብ ተገቢው ፈቃድ ሊሰጠን ይገባል። ለቀደመው ሁኔታም የተጠየቅነው ይቅርታ የለም። ብዙ ኪሳራዎች ነበሩ። ምናልባት ሞራል ጋር አልደረሱ ሊሆን ይችላል፡፡ ግን በብዙ መልኩ በማቴርያል ጎድቷል። ይህ ደግሞ ተገቢ አይደለም።


ጥያቄ:- በአሁን ሰዓት በኢትዮጵያ ያለውን የማህበራዊ፣ ኢኮኖሚያዊ እና ፖለቲካዊ ሁኔታ እንዴት ትመለከተዋለህ? በአንተ አስተያየት በእነዚህ መስኮች ኢትዮጵያ ውስጥ ምን እየሆነ ነው?


ቴዲ:- ሀገር የትውልድ ቅብብል ውጤት ነው። ብዙ ዋጋ ተከፍሎበታል። የኔ አባቶች የከፈሉት ዋጋ እንዲህ በቀላሉ የሚጠቀስ አይደለም። በጣም ጨዋ ሰዎች ነበሩ። ግንዛቤያቸው በጣም ሰፊ ነበር። የመረዳት አቅማቸው በጣም ከፍተኛ ነበር። በጣም የሰለጠኑት ሀገራት ላይ የነበሩትን ሰዎች የሚፈትሽ ስራ ሰርተዋል። በጦር ሜዳ ብቻ ድል ያደረጉ ሰዎች ሳይሆኑ የመንግስታቱን ማህበር ጭምር የፈተኑ፣ ለሀቅ የቆሙ እና በወረቀት ላይ የተፃፈን ነገር ለማስፈፀም የፀኑ ጨዋ ሰዎች ነበሩ። ፈትሸዋቸዋል! በርብረዋቸዋል! እንደዚህ አይነት አባቶች ክብር ሳይሰጣቸው የምንኖርበት ሀገር ላይ እንደነዚህ አባቶች ዓይነት ልጆች ሊፈጠሩ አይችሉም። የሰው እዳ እየበላን ሀገር ለማስቀጠል አይቻልም። ይህ ነው እንደ ሀገር የገጠመን ችግር ነው። ወጣቶች ወደየት እንደሚሄዱ የሚያሳይ ያለፈው ክፍል እነሱ ላይ የሚያተኩር አካሄድም የለውም። ስለዚህ በመጀመርያ ቅድሚያ የሚሰጠው ነገር ሀገር ማዳን ነው።


ጥያቄ:- በኢኮኖሚ መስኩስ ምን ይታይሀል?


ቴዲ:- ኢኮኖሚያዊ ለውጥ እንዲመጣ የሚያስፈልገውን ነገር ለማድረግ ህዝብ መተባበር አለበት። አድዋ ላይ በአንድ ላይ ያዘመትከውን ኃይል በዛ ኃይል ወደ ልማት ለማሳተፍ ይቻላል። መንገዱም ይሄ ነው። ግን የአካሄድ ጉድለት አለ። የሚያሳዝን ትውልድ ነው። የዛ ትውልድ አካል ስለሆንኩኝ ነው እንደዚህ አይነት ጉዳይ ላይ ለማተኮር ግድ ያለኝ።


ጥያቄ:- ለኢትዮጵያ ያለህ ምኞት ምንድን ነው? ወደፊትስ የት ደርሰን መታየት አለብን ትላለህ?


ቴዲ:- ኢትዮጵያ ልጆቿ የተባበሩባት ሀገር እና ለሀገር የለፉ ሰዎች የሚከበሩበት ሀገር እንድትሆን እመኛለሁ። የሚያሳዝነው ግን አፍሪካን አንድ ለማድረግ የሞከረ ህዝብ ለራሱ አንድ መሆን አቅቶት ስቃይ ውስጥ ነው ያለው። በሚያስገርም ሁኔታ ዩናይትድ ስቴትስ ኦፍ አሜሪካ የሚባል ሀገር ቁጭ ብለው የተባበሩ ህዝቦችን፣ ገና መብላት ያቃተን ህዝቦች ላይ እንደገና መከፋፈል የሚሰብኩ ብዙ ህዝቦች አሉ። መብታቸው ሊሆን ይችላል፤ አደገኛ መሆኑ ግን ሳይነገር አይታለፍም። እኛ ሠላም እንፈልጋለን።

ይምረጡ
(0 ሰዎች መርጠዋል)
349 ጊዜ ተነበዋል

ድርጅትዎ ያስተዋውቁ!

  • Advvrrt4.jpg

እዚህ ያስተዋውቁ!

  • Aaddvrrt5.jpg
  • adverts4.jpg
  • Advertt1.jpg
  • Advertt2.jpg
  • Advrrtt.jpg
  • Advverttt.jpg
  • Advvrt1.jpg
  • Advvrt2.jpg

 

Advvrrt4

 

 

 

 

Who's Online

We have 793 guests and no members online

Sendek Newspaper

Bole sub city behind Atlas hotel

Contact us