“ጳጉሜን ለጤና” የምርመራ አገልግሎት ዛሬ ይጀምራል

Wednesday, 06 September 2017 14:04

 

 

·        መስራቹ የዓመቱ የበጎ ሰው ተሸላሚ ሆኗል

“ጳጉሜን ለጤና” የተሰኘው ዓመታዊ ነፃ የምርመራ አገልግሎት እነሆ ዘንድሮ ለስምንተኛ ጊዜ ጳጉሜን ጠብቆ ከጳጉሜ 1 እስከ 5 ቀን 2009 ዓ.ም ሊካሄድ ነው። ውዳሴ ዲያግኖስቲክ ማዕከል እንደ አምና ካቻምናው ሁሉ ማህበራዊ ኃላፊነቱን ለመወጣት በመንቀሳቀስ ላይ ይገኛል። እንደውም ዘንድሮ ካለፉት ዓመታት በላቀ መልኩ የሲቲ ስካን፣ የኤም አር አይ እና የአልትራሳውንድ ምርመራን በነፃ ለማካሄድ ዝግጅቱን ማጠናቀቁን የማዕከሉ ባለቤትና ሥራ አስኪያጅ አቶ ዳዊት ኃይሉ ለመገናኛ ብዙሃን ተናግረዋል።

“ጳጉሜን ለጤና” የተሰኘው ዓመታዊ የነፃ ምርመራ በውዳሴ ዲያግኖስቲክ ማዕከል ከ2002 ዓ.ም ጀምሮ ይሰጥ እንደነበር ያስታወሱት አቶ ዳዊት፤ ማዕከሉ እስካሁን ከ7ሺህ በላይ ለሚደርሱ ህሙማን ነፃ የምርመራ አገልግሎት እንደሰጠም ባሳለፍነው ቅዳሜ (ነሐሴ 27 ቀን 2009 ዓ.ም) ከጤና ጥበቃ ሚኒስቴር ተወክለው ከመጡት ዶ/ር ይበልጣል መኮንን እና ከማዕከሉ ሲኒየር ራዲዮሎጂስት ዶ/ር አበበ መኮንን ጋር በጋራ ሲናገሩ ሰምተናል።

“በጤናው ዘርፍ ማህበራዊ ኃላፊነታችንን መወጣታችን ለእኛ ወጪ ሳይሆን ጥቅም ነው” ያሉት አቶ ዳዊት፤ በዚህ ዓመት “ጳጉሜ ለጤና” የምርመራ አገልግሎት ለማግኘት ከመንግስትና ከግል ሆስፒታሎች የሚመጡ ህሙማንን ለማስተናገድ መዘጋጀታቸውን ተናግረዋል። ለዚህም በመጀመሪያ ወደማዕከሉ የሚመጡ አገልግሎት ፈላጊዎች የሲቲ ስካን፣ የኤም አር አይ እና የአልትራሳውንድ ምርመራ እንዲያደርጉ የሀኪም ትዕዛዝ ያረፈበት ወረቀት ማምጣት የሚጠበቅባቸው ሲሆን፤ በተጨማሪም የምርመራውን ወጪ ለመሸፈን እንደማይችሉ ከሀኪም የተሰጠ የማረጋገጫ ወረቀት ካቀረቡ የምርመራ አገልግሎቱን በነጻ ማግኘት ይችላሉ ተብሏል።

በመግለጫው ላይ ጤና ጥበቃ ሚኒስቴርን ወክለው በመድረኩ ላይ የተገኙት ዶ/ር ይበልጣል በበኩላቸው፤ መሰል ተቋማት ማህበራዊ ኃላፊነትን በሚያስተዋውቁ ተግባራት ላይ ቢሰማሩ ማህበረሰባቸውን ከመጥቀምም ባለፈ ራሳቸውን በበጎ ያስተዋውቁበታል ብለዋል። አክለውም መንግስት በያዘው የትራንስፎርሜሽን ዕቅዱ ውስጥ ጥረትና ፍትሃዊ ተጠቃሚነት ለሁሉም ማህበረሰብ መስጠት አንዱ መሆኑን አስታውሰዋል። ሌሎች በጤናው ዘርፍ የተሰማሩ ተቋማት ይህንን መሰል ተግባራትን እንዲያከናውኑ ቢደረግ ጠቀሜታው የጎላ መሆኑን ጠቁመዋል።

በቅዳሜው መግለጫ ወቅት ከውዳሴ ዲያግኖስቲክ ማዕከል ነፃ የምርመራ አገልግሎት ያገኙ ህሙማን ስለማዕከሉ የሰጡትን ምስክርነት የሚያሳይ የአስራአምስት ደቂቃ ፊልም የተመለከትን ሲሆን፤ በአገልግሎቱ ያገኙትን ጠቀሜታና ምስጋናቸውን እንባ እየተናነቃቸው ጭምር ሲገልጹም ለመታዘብ ችለናል።

“ጳጉሜን ለጤና” ዘንድሮ ከጳጉሜ 1 እስከ 5 የሚካሄድ ሲሆን፤ ከውዳሴ በተጨማሪ ሌሎችም የጤና ተቋማት አብረው የሚሰሩበት ዕድል መኖሩን አቶ ዳዊት ተናግረዋል። አብዛኞቹ የምርመራ አገልግሎት ፈላጊዎች በመገናኛ ብዙሃን መረጃ ላይ ተመስርተው ወደማዕከላቸው እንደሚመጡ ያስታወሱት አቶ ዳዊት፤ ባለፈው ዓመት ብቻ “ጳጌሜን ለጤና” የምርመራ አገልግሎት ለማግኘት ከአንድ ሺህ በላይ ሰዎች መጥተዋልም ብለዋል። ይንንም የምርመራ አገልግሎት ለመስጠት የተመዘገቡትን አገልግሎት ፈላጊዎች እስከ ጥቅምት ወር ድረስ አገልግሎት ሲሰጡ እንደነበር አስታውሰዋል። አብዛኛዎቹ ከክልሎች የሚመጡ ህሙማን መሆናቸውን የጠቆሙት አቶ ዳዊት፤ አብዛኞቹ የመመርመሪያ ገንዘብ አጥተው ለስምንት ወራት የሀኪም ወረቀቶቻቸውን ይዘው በጭንቀት አንዳች መፍትሄ ይጠብቁ እንደነበር መናገራቸውን ያስታወሳሉ። በመጨረሻም “ውዳሴ ይህንን ማህበራዊ ኃላፊነት በመወጣቱ ሌሎች ተቋማትም እኔስ ምን ማድረግ እችላለሁ በሚል የድርሻቸውን እንዲወጡ ለማሳሰብ ጭምር በየዓመቱ የሚካሄድ የምርመራ ፕሮግራም መሆኑን በአጽንኦት ተናግረዋል። “ማህበራዊ ኃላፊነትን ለመወጣት የቅንጦት ወይም የትርፍ ጉዳይ አይደለም። ትልቅ ገንዘብ ሳይሆን ትልቅ ልብ የሚያስፈልገው ተግባር ነው” ሲሉም ተደምጠዋል።

የውዳሴ ዲያግኖስቲክ ማዕከል ሲኒየር ራዲዮሎጂስት የሆኑት ዶ/ር አበበ መኮንን በሰጡት ሙያዊ ማብራሪያ፤ በማዕከሉ ከሚሰጡት የምርመራ አገልግሎቶች ውስጥ ትንሹ “ኤክስ-ሬ” ነው በማለት ያስረዳሉ። በሌላም በኩል የሲቲ ስካን፣ የአልትራ ሳውንድ፣ የኤምአርአይ መሆናቸውን ዘርዝረው “ሲቲ ስካን እና “ኤስክ-ሬ” በተወሰነ መልኩ የጨረር ምርመራ የሚሰጥባቸው በመሆናቸው ሙሉ በሙሉ በሀኪም ሲታዘዝና ለህመምተኛውም አስፈላጊነታቸው ከፍ ሲል ብቻ የምንጠቀማቸው ይሆናሉ ብለዋል። በምርመራ ሂደት ውስጥ ማለፍ ያለባቸውንና የሌለባቸውን ህሙማን ከሃኪሞቻቸው ጋር በመነጋገር የመለየት ስራን እንደሚሰሩ የተናገሩት ዶ/ር አበበ፤ ለምሳሌም ሲጠቅሱ በኤም.አር.አይ እንዳይታዩ ከሚከለክሉት መካከል የልብ ባትሪ ያላቸው ህሙማን፣ አርቴፊሻል የጆሮ ማዳመጫ የሚጠቀሙ ወይም በአንዳች አደጋ ምክንያት በሰውነት ክፍላቸው ውስጥ ጥቃቅን የብረት መሳሪያዎች የተገጠመላቸው ሰዎች ይህን ህክምና አይመከሩም ብለዋል።

የውዳሴ ዲያግኖስቲክ ማዕከል ባለቤትና ስራ አስኪያጅ የሆኑት አቶ ዳዊት ኃይሉን፤ ማህበራዊ ኃላፊነትን ከመወጣት አንጻር ላለፉት ተከታታይ ዓመታት የሰሯቸውን መልካም ተግባራት ከግምት ውስጥ በማስገባት የዘንድሮው “የዓመቱ በጎ ሰው ሽልማት” ፕሮራም “በበጎ አድራጎት ዘርፍ” ዕጩ አድርጎ አቅርቧቸው ነበር። ይህም በመሆኑም በዘርፉ ለውድድር ከቀረቡት የተቀናጀ የቤተሰብ አገልግሎት ድርጅት መሥራችና መሪ ከሆኑት መቅደስ ዘለለው እና በደብረዘይት ከተማ ችግረኞችን በመርዳት ከሚታወቀው ውጣት ሰለሞን ይልማ ጋር ተፎካክረው ባሳለፍነው እሁድ (ነሐሴ 28 ቀን 2009 ዓ.ም) በኢንተርኮንትኔታል ሆቴል በተካሄደው ደማቅ የሽልማት ሥነ-ስርዓትም “በበጎ አድራጎት” ዘርፍ የ2009 ዓ.ም የበጎ ሰው ሽልማት አሸናፊ በመሆን ዋንጫና የምስክር ወረቀቱን አቶ ዳዊት ኃይሉ ተቀብለዋል። ይህ ተግባር የውዳሴ ዲያግኖስቲክ ማዕከልን ማህበራዊ እንቅስቃሴ በጉልህ ከማሳየቱም ባለፈ ሌሎች መሰል ተቋማትም ማህበራዊ ኃላፊነትን መወጣት የሚመለሰውን ብድራት ያሳየ ነው ማለት ይቻላል።

    

ይምረጡ
(0 ሰዎች መርጠዋል)
137 ጊዜ ተነበዋል

ድርጅትዎ ያስተዋውቁ!

  • Advvrrt4.jpg

እዚህ ያስተዋውቁ!

  • Aaddvrrt5.jpg
  • adverts4.jpg
  • Advertt1.jpg
  • Advertt2.jpg
  • Advrrtt.jpg
  • Advverttt.jpg
  • Advvrt1.jpg
  • Advvrt2.jpg

 

Advvrrt4

 

 

 

 

Who's Online

We have 954 guests and no members online

Sendek Newspaper

Bole sub city behind Atlas hotel

Contact us