ለኦሕዴድ መግለጫ የተሰጠ ትንታኔ ለበስ መግለጫ

Wednesday, 14 February 2018 12:32

በአንድነት ቶኩማ

‹‹ተበዳይ መናፍስት
ታፍነው የኖሩ
ወደ አርነት ዐውድ በድንገት ሲጠሩ
ያለጠባቂ ዘብ ተከፍቶ ሳለ በሩ
የገቡ አይመስላቸውም ቅጽሩን ካልሰበሩ››


(በእውቀቱ ስዩም ‹ምስጢረ አርነት›)


ሰሞኑን በሰንደቅ ጋዜጣም ሆነ በተለያዩ ሚዲያዎች ‹‹ከኦሮሞ ሕዝብ ዴሞክራሰያዊ ድርጅት ማዕከላዊ ኮሚቴ የተሰጠ ድርጅታዊ መግለጫ›› በሚል ሃሳባቸው ቀርቧል። መግለጫው ‹በአብዛኛው ተቀባይት ያለው ነው› ሲሉ ብዙዎች ይስማማሉ። መግለጫው የያዘውን ጭብጥ መተንተኑ ተገቢ የሚሆነው አብዛኛው ሕዝብ የተቀበለው ስለሚመስል ነው። ከዚሁ ጋር ይህ መግለጫ ማደናገሪያ ወይም የትግል ማኮላሺያ እንዳይሆን እና በተግባር በአስቸኳይ ተግባራዊ እንዲሆን ለማሳሰብም ነው።


መግለጫው ሲጀምር “የኦሮሞ ሕዝብ ዴሞክራሲያዊ ድርጅት ማዕከላዊ ኮሚቴ የተጀመረውን የለውጥ ጉዞና የወደፊት አቅጣጫ…ዝርዝር ግምገማ በማድረግ…ተጠናቋል” ይላል። አክሎም ስብሰባው በስኬት መጠናቀቁን ይነግረናል። ‹በስኬት መጠናቀቅ› ሲባል በስብሰባው ላይ የተነሱትን ግምገማዎች ፈትኖ ማሻሻያ ለሚያስፈልጋቸው እርምት ለማድረግ መውሰኑን ነው የሚጠቁመው። የተሳካው ምኑ ነው? መቼም ተግባሩ አይደለም! የተግባሩ መጀመሪያ ‹ሃሳቡን› ነው ስኬታማ ነበር ያሉት። ወይም አቅጣጫውን ነው። ከዚሁ ጋር በአንዳንድ አባላት ላይ የወሰደው ከድርጅቱ የማባረር እርምጃ የዚሁ አካል ነው።


መግለጫው ይቀጥልና ‹ድርጅታችን ኢህአዴግ የጀመረውን የለውጥ ንቅናቄ› ሲል ድርጅቱ የሚሰጠውን መግለጫ ትክክኛነት ወይም ቀጣይነት ለማሳየት ድርጅቱን ኢህአዴግን ዋስ ይጠራል። ቀይ ምንጣፍ ያስነጥፋል። ይቺ የመብረቅ መከላከያ ናት።


ከኢህአዴግ ግምገማ በመነሳት ‹‹ሀገራችን ኢትዮጵያ እና ክልላችን በፖለቲካ፣ ኢኮኖሚያዊና፣ እና በማህበራዊ መስኮች ያለችበትን ሁኔታ በዝርዝር በመገምገም ቀጣይ አቅጣጫ አስቀምጧል›› ሲል ይነሳል። በኢህአዴግ ግምገማ ላይ የተመረኮዘ ነው ሲል ድርጅቱ (ኦህዴድ) መሻለኪያውን አበጅቶ ነው የተነሳው። ይህች ጥበብ አንድ ልትባል ትችላለች። ሰዎቹ በጥበብ ተካኑሳ!!! ጎሽ ነው እንጂ ምን ይባላል! ሰው ጠቢብ ሲሆን ይደነቃል እንጂ እንደ ደናቁርት ማህበር ይወገዛል? ነውር ነው። ስልት ሁልጊዜ ደስ ታሰኛለች!!!


በመሆኑም የዚህ መግለጫ ዋና ነገሮች ወይም ምሰሶዎች ሦስት ናቸው ማለት ነው። የፖለቲካ፣ የኢኮኖሚያዊ እና የማህበራዊ ጉዳዮች። እንደ ድርጅቱ አገላለጽ ከሆነ እነዚህ ናቸው የአገሪቱ ዋነኛ ጊዚያዊ ችግሮች።


ለምሳሌ አስር ቀናት በፈጀው ውይይታችን የሕዝባችን ሰላም እና አብሮነት በምንም መልኩ አደጋ ውስጥ እንዳይገባ እንሰራለን ይላል መግለጫው። መግለጫው ከሕዝባችን ጋር ሆነን በመሪ ድርጅታችን በኩል ነው የምንሰራው የሚል ይመስላል። እዚህ ቦታ በዋናነት የተነሳው ማህበራዊ ጉዳይ ነው ። የክልሉ ሕዝብ አብሮነትን አደፍርሶ የሚያውቅ አይመስልም። ዝቅ ብሎ የኦሮሞ ሕዝብን ለትግል ሲጠራ አቃፊ በሆነው የገዳ ስርዓትህ ከዚህ ቀደም ሌሎችንም ሕዝቦች አቅፈህ እንደኖርከው ይላልና ነው። በርግጥ ስጋትና ግጭት አልፎ አልፎ መኖራቸው አይዘነጋም። የችግሩ ምክንያት ወይም አነሳሽ ማን መሆኑን ግን ገና አልተረጋገጠም። ያም ሆነ ይህ የኦህዴድ አባላት ወይም ድርጅቱ ለመለወጥ መፈለጉ ግን ይበል ያስብላል።


በዚህ መግለጫው ላይ ‹‹የሀገራችንን ሕልውና መታደግና የተጀመረው የለውጥ ጉዞ በስኬት እንዲጠናቀቅ›› ይላል። በመጀመሪያ የትኛውን ለውጥ ነው ያነሳው? ልማታዊነቱን ከሆነ ከዚህ በፊት ሲነገር የነበረውን ማንሳቱ ለፖለቲካ ፍጆታ ነው የተነሳው። በድርጅቱ ውስጥ የተጀመረው ግልፅነት፣ ከተላላኪነት ወደ ራስን ወደ መቻል ቁመና መምጣት ከሆነ በድጋሚ ይበል ያስብላል። ተቀናጅተን የአገራችንን ሕልውና እናስቀጥል የምትለዋ እጅግ ጥሩ የሆነች ሃረግ ናት። ከማን ጋር ነው ድርጅቱ የሚቀናጀው? ከሕዝባችን ጋር ሲል ጠቆም አድርጓል። በርግጥ ከእህት ደርጅቶች ጋር ጭምር መሆኑን በሌላ ምንባብ ውስጥ ተቀምጧል። ዋናው ግን ቅንጅት የሚያስፈልገው ከሕዝብ ጋር ነው። ሕዝብ ምን ፈለገ? የሚለውን ማድመጥ ሲፈለግ እና በሕዝቡ ጥያቄ ላይ የተመሰረተ እርምጃ ሲወሰድ ነው ቅንጅት አድርገናል የሚባለው።


ድርጅቱ ካወጣቸው መግለጫዎች ውስጥ የተለመደው ሸፍጥ አብሮ መሰንቀሩ አግባብ አልነበረም። በተለይ ‹‹ድርጅታችን ከሚታወቅባቸው መለያ ባሕርያቱ እያንዳንዱን ጉድለቶቹን ያለማመንታት መቀበልና ለማረም ጥረት ማድረግ መሆኑ ይታወቃል›› ይላል። እኛ ድርጅቱን በዚህ መልኩ አናውቀውም። ውሸት ነው። ማዳመጥ እንወዳለን ብላችሁ የለም? አድምጡ!!! ድርጅታችሁ ግትር ነበር። ተላላኪም ነበር። ልንለወጥ አስበናል ብትሉ እና የጀመራችሁት አካሄድ ላይ ብትንጠለጠሉ ጥሩ ነው። ከዚያ በተረፈ ድርጅታችን የሚታወቀው በዴሞክራሲያዊነት ነው ያላችሁበት መንፈስ ልክ አይደለም። ይሁን እንጂ ‹ከባቄላ አይጠፋም ዲቃላ› በሚለው አባባል ይህችን ደንቃራ አረፍተ ነገር ማስገባታችሁ መግለጫችሁን ዋጋ ቢስ አያደርገውም።


መግለጫው ችግሮችን የምንፈታው የዴሞክራሲያዊ ሥርዓት መንገዶችን ተጠቅመን ነው የሚል አንደምታ ያለው ይመስላል። “ይህ የዴሞክራሲያዊ ድርጅት ባህሪይ በመሆኑ ከሕዝብ የሚነሱ ቅሬታዎችን ማድመጥ፣ ሕዝቡን ከልብ ይቅርታ የመጠየቅና የእርምት እርምጃ መውሰድ አስፈላጊ መሆኑን በዝርዝር በመምከር አቅጣጫ አስቀምጧል›› ይላል። ጥሩ ጅምር ነው። ነገር ግን ገና አንድ ነገር ቀርታዋለች። ቅሬታዎችን ማድመጥ፣ ሕዝቡን ከልብ ይቅርታ የመጠየቅና የእርምት እርምጃ መውሰድ ብቻ መፍትሄ ሊሆን አይችልም። አጥፍቶ ይቅርታ መጠየቅ ሁልጊዜ ተገቢ ላይሆንም ይችላል። መግለጫዋ በአጽንዖት አጥፊ ባለስልጣንን ሁሉ ወደ ፍርድ ማቅረብ የምትል ያስፈልጋታል። ሥልጣን ማጋራት ሌላዋ የዲሞክራሲያዊ ድርጅት ምልክት ነው። እሷንም ብትጨምሩባት ጥሩ ነበር። ከዚያ ውጭ ግን የዲሞክራሲያዊ ሥርዓት መለያዎችን ወደ ዚህ ደረጃ ብቻ ማውረድ ተገቢ አይደለም። ይሁን እንጂ የ27 ዓመቱን ህፃን ድርጅት በራሱ ያለ ሞግዚትነት ወይም ጡት አባትነት ቆሞ ዳዴ ሲል አይተን መቀበል አይከብደንም። እንኳን ደስ ያላችሁ!


ድርጅቱ ግምገማው በርግጥ ጥልቅ መሆኑን እኔ በግሌ ለመቀበል አልከበደኝም። በግምገማው ላይ ችግሮቹን በሳይንሳዊ መንገድ እንለያለን ብለዋል። ‹‹የፌዴራል ስርዓቱን አደጋ ውስጥ ሊጥሉ የሚችሉ ፖለቲካዊና ኢኮኖሚያዊ ምክንያቶችን ሳይንሳዊ በሆነ መልኩ ለይቶ አፋጣኝ እርምጃዎችን በመውሰድ የሕዝቡን መሻት ማሳካት ለነገ የማይባል ጉዳይ መሆኑን በዝርዝር ተመልክቷል›› ይላል። ሳይንሳዊ መንገድ ምንድን ነው? ሲገባኝ በጥናት ላይ የተመሰረተ ማለት ነው። በሌላ አገላለጽ ስሜት እና ወገንተኝነት የሌለበት ጥናት ማለት ነው። የስሜት ትርጓሜ ወይም ስሜት የነዳው የውስጥ ሆነ የውጭ አለቃ ትዕዛዝ ወይም መግለጫ ሆነ ጭቆና ገደል ግባ እንደ ማለት ነው። የካድሬ ስሜታዊ ወይም ተራ ፖለቲካዊ ፕሮፖጋንዳ ዋጋ ቢሲ ሆነ ማለትም ሊሆን ነው። የፖለቲካ ልብ ወለድ ደራሲዎች መጽሐፍ መጻፍ እንጂ መጠርነፍ ማቆማቸው ነው ማለት ነው።


ሳይንሳዊ መንገድ የሕዝቡን ችግር ለማወቅና ችግሩን ለመፍታት በሳይንሳዊ መንገድ መረዳት ማለት ነው። ሳይንሳዊ መንገድን ተጠቅመን ችግሩን ስንፈታ በተጨባጭ በኢትዮጵያ የምናገኘውን ችግር ጠቅሶ መግለጫው እንደዚህ የሚለውን ሃሳብ ነው ያቀረበው። ‹‹ፍትሃዊ የኃብት ክፍፍል፣ አሳታፊ የፖለቲካ ስርዓት፣ ሰላምና ፍትህ እንዲሰፍን በጥብቅ ዲስፕሊን መስራት›› ይላል መግለጫው። ሳይንሳዊ መንገድ የመረጠው ይህ ድርጅት በዚሁ መንገድ የተገኙ ጭብጦችን አንስቷል። እነዚህም ፍትሃዊ የኃብት ክፍፍል እንደሌለ፣ አሳታፊ የፖለቲካ ስርዓት መክሰሙን፣ ሰላምና ፍትህ አለመስፈኑን። ፍትሃዊ የኃብት ክፍፍሉ ከሌለ ኃብቱ በማን እጅ ነው ያለው? የሚለው በሳይንሳዊ መንገድ ይጠና።


አሳታፊ ፖለቲካ አለመኖሩን ድርጅቱ በሳይንሳዊ መንገድ አጥንቶ ደርሶበታል። በርግጥ የኢትዮጵያ ሕዝብ አሳታፊ ፖለቲካ አለመኖሩን ከደረሰበት ቆይቷል። ድርጅቱ ፍትህ እና ሰላም ተረጋግጧል የሚለውንም በሳይንሳዊ መንገድ ተንትኖ እንደሌለ ያመነ ይመስላል። ተዳሳሽ ችግር ውስጥ መሆኗን ዓለም ሁሉ የሚያውቀውን ክደው ኢህአዴጎች ብቻ ናቸው የውሸት ዜናቸውን ሲያደምጡ የቆዩት። በጥብቅ ዲስፕሊን አለመስራት ሌላው ችግር ነው ሲል የድርጅቱ መግለጫ በተዘዋዋሪ አምኗል። በጥብቅ ዲስፕሊን አለመስራት ድርጅቱ ከስራ ገበታ መቅረትን ለመጠቆም አይመስለኝም። ወይም በስራ ላይ መለገም ልክ አለመሆኑን ለማሳየት አይደለም። ከዚያ ይልቅ ወደ ተላላኪነት ማዘንብል፣ አስመሳይነት፣ ለሌላው ቡድን መንበረከክ፣ ሙስና እና ዘራፊነት ላይ ማዘንበል የሚለውን ለማንሳት ነው ድርጅቱ ይህን ያለው። ይህን ከመግለጫው በትርጓሜ አግኝተነዋል።


ድርጅቱ ጥሩ በሆነ መንገድ ካለፉት የድርጅቱ ተላላኪዎች ጸባይ መላቀቁን አሳይቷል። ለምሳሌ ‹‹የኦሮሞ ሕዝብ ከመላው የኢትዮጵያ ሕዝቦች ጋር በመተባበር የሀገራችንን ቀጣይ ጉዞ የማቅናት ሚናውን ዛሬም እንደትላንቱ መጫወት እንደሚገባው ተወያይቷል›› ይላል። መግለጫው የኢህአዴግን ልዩ የሆነ የኦሮሞን ሕዝብ ከአገረ ኢትዮጵያ የማለያየት ሴራውን ውሃ የቸለሰበት መስሎ ይታየኛል። በኢትዮጵያ ምስረታ ሆነ መስፋፋት ከዚያም አልፎ መስተጋብር የኦሮሞን ሕዝብ ወሳኝ ሚና ለማሳነስ የተዘራውን የ27 ዓመት መርዝ ያስተፋ ነው መግለጫው። ‹ኦሮሞ ከኛ አሉ ጎንደሬዎች›። እውነታቸውን ነው በጎንደሯ ስመ ጥር ከተማ በደብረታቦር እነ ራስ አሊ ምን ይሰሩ ነበር? ገዥዎች ነበሩ። ኬኛ ነበሯ። ታዲያ ጎንደሬ ኬኛ ለማይለው ይገዛ ይመስላችኋል? በጭራሽ!!!


የዚህ ድርጅት መግለጫ አስገራሚ ነገር ፈንጥቋል። የድርጅቱን ከሌሎች ድርጅቶች ጋር ያለውን ግንኙነት አንስቷል። በዚህም ዲሞክራሲያዊ መሆን እንዳለበት አስምሮ አልፏል። የግንኙነቱ አግባብ ዲሞክራሲያዊ መንገድ ብቻ መሆኑን አስታውቋልም፣ አስጠንቅቋልም። የሎሌ እና የጌታ ግንኙነት ማክተሙን አውጇል። አንዱ አባት ሌላው ልጅ የሚሆንበት ዘመን ማክተሙን ያሳያል። አዛዥ ታዛዥ የለም ነው ምስጢሩ። በዴሞክራሲያዊ አግባብ ብቻ ነው ጉዞው መጀመር ያለበት ለማለት ነው። የጡት አባት ሚና ማለፉን ሲጠቁም ነው መግለጫው ይህን ሃሳብ ያነሳው። የዴሞክራሲው እጥረት ባይኖር ኖሮ መግለጫው አያስፈልግም ነበር። ቢያንስ በስነ ኑባሬ ህግጋት ያለ ነገር ‹አለሁ› ሲል አዋጅ አያወጣም። ኑባሬው ጥርጣሬ ላይ ካልወደቀ በስተቀር።


መግለጫው የፌዴራል ሥርዓታችን አደጋ ላይ ወድቋል ሲል ይነሳና አደጋ ላይ የጣለውን ነገር ዘርዝሯል። እነዚህም ሙስና፣ ብልሹ አሰራሮች፣ የመልካም አስተዳደር እጦቶች፣ የስልጣን ርስትነት፣ የግል ጥቅም፣ መሬት መመዝበር እና የመሳሰሉ ችግሮች ናቸው ይላል። ይህ ደግሞ ሕዝቡ በመሪ ድርጅቱ ላይ እንዲያምጽ አድርጎታል ይላል። ተመልከቱ! ከዚህ በፊት የሕዝብን መራራ ትግል ‹የጥቂቶች› ሲል የነበረ ድርጅት የትግሉን ስፋት አምኖ መፍትሄ መፈለጉ ተራማጅ መሆኑን አያሳይምን?


ሕጸጹ ‹መሪው ድርጅቱ ላይ እንዲያምጽ አድርጎታል› የሚለው ቃል ላይ ነው። የዴሞክራሲያዊ አሳታፊነት የሌለበት መንገድ ላይ ነን ከተባለ በምን ማስረጃ ነው ይህ ድርጅት መሪው የሚሆነው? መሪው መሆኑን በሳይንሳዊ መንገድ መፈተን አለበት። መንገዱም ‹እንከን አልባ ምርጫ› ነው። በሕዝብ ምርጫ ሕዝቡን መምራት።


መግለጫው የሰሞኑን ችግር አንስቶ ሲናገር ባለፉት ጥቂት አመታት በተከሰቱ ግጭቶች የበርካታ ዜጎች ሕይወት ጠፍቷል ይላል። ትክክል ነው። ስህተቱ ‹ጥቂት ዓመታት› መባሉ ነው። ጥቂት ዓመታት የተባለው የትኛውን ነው? ሃያ ሰባት ዓመታቱን ከሆነ ልክ ነው። በእነዚህ ሁለት ሶስት ዓመታት ከሆነ መግለጫው ስህተት አድርጓል። አሁንም ሕጸጽ አለ ማለት ነው። ላለፉት ዓመታት ግዙፍ መፈናቀል ነበር። ‹ሳይቃጠል በቅጠል› የሚለው አልተሰራበትም እንጂ አማሮችን ማፈናቀሉ የሁልጊዜ ሥራና ትዝታ ነበር። ሌላው ቢቀር በቅርብ ዓመታት ከደቡብ ክልል ‹ሞፈር ዘመት› አማሮች ተብለው ተፈናቅለው ነበር። ቢሆንም ግን ይህ ድርጅት ችግሩን ሲያነሳ ሃቀኛ በመሆኑ እናመሰግነው ዘንድ ይገባል። አምኖ መለወጥ የፈለገ ይመስላል። መንገዱን ጨርቅ ያድርግለት።


ይህ ድርጅት ጥርስ አውጥቶ ወይም ጎልምሶ የታየው የሰው ሕይወትን የሚቀጥፉ ግለሰቦች እና ቡድኖች መኖራቸውን በማመኑ ነው። ያየውን ነው ያመነው። የሰማውን አይደለም። ያየውን በእጆቹም የዳሰሰውን ወግ ነው ያወጋን። መግለጫውን ጥሩ መግለጫ የሚያደርገው ይሄው ነው። አንድ እርምጃ በመንቀርፈፍ ተራምዷል። ይበል ያስብላል። ከተቸነከሩት የተንቀረፈፉት ይሻላሉ እና።


በዚህ መግለጫ መሰረት የፌዴራል ስርዓቱን አደጋ ላይ ለመጣል የተነሱት የውጭ ተቃዋሚዎች አይደሉም። ይህንም ማመን ለውጥ ነው። ድርጅቱ ለብዙ ዓመታት በፕሮፖጋንዳ የችግሩ ምንጭ ውጫዊ ነው ብለው ለማሳመን የፈለጉትን የካድሬዎች ውትወታ ጥሎ ወደ እውነቱ ቀርቧል። ትንግርት ይሏል ይች ናት! የፌዴራል ስርዓቱን አደጋ ላይ የሚጥሉ ያላቸውን ሲያነሳ ‹‹የፌዴራል ስርዓቱን አደጋ ላይ በመጣል ግላዊና ቡድናዊ ጥቅሞችን ለማስጠበቅ በንጹሃን ዜጎች ሕይወት ላይ አደጋ ያደረሱ በታሪካችን ታይቶ የማይታወቅ ፀያፍ ድርጊቶችን የፈጸሙ ኃይሎች በሕግ እንዲጠየቁ›› ይላል። ‹በታሪካችን ታይቶ የማይታወቅ› ሲል ከባለፈው ዘመን ይልቅ ግድፈት የላቀ ጸያፍ ነገር በዚህ ዘመን ተፈጸመ ማለቱ ነው። ሃቀኝነት ነው እንዲህ የሚያናግረው። ተመልከቱ ድርጅቱ እየገዛ ባለበት ዘመን ነው ይህ የተፈጸመው። ታይቶ የማይታወቅ ጭፍጨፋ ነው ያሉት። ይህን ያደረጉት ደግሞ የውጭ ኃይሎች አይደሉም። የተደራጁ ጥቅመኛ የድርጅቱ አባላት ናቸው። ድርጅቱ ሳይፈራ እና ሳያወላውል ቡድናዊ ጥቅመኞች ወይም ግለሰቦች ናቸው ይህን ያደረጉት ብሏል።


በመሆኑም የአገሪቱን ሕልውና እየተፈታተኑት ያሉት የድርጅቱ አባላት እንጂ ሌሎች አይደሉም ማለት ነው። ሕዝቡን የሚያናጩ በስልጣን አላግባብ ለመክበር የሚሹ የድርጅቱ ቀንደኛ ጠበቃዎች ናቸው። ወይም የድርጅቱ ባለርስቶች። ወይም ድርጅቴ እያሉ በቴሌቪዥን መስኮት የሚያደነቁሩን ናቸው ማለት ነው።


መግለጫው ቀንደኛ ጠላታችን ድህነት ነው ሲል የወረበላዎችን አገዛዝ ዋነኛ ጠላትነት ወደ ሁለተኛ ደረጃ ጠላትነት ዝቅ ለማደረግ ይሞክራል ። ወዶ አይመስልም። ከዚህ በፊት ለተነገሩት ፍልስፍናዎች መለስተኛ ሙገሳ ለማሳየት ነው። ስልት ነው። ሕዝብ ከሕዝብ ጋር በድህነት ምክንያት አልተፋጨም። በምን እናውቃለን? መግለጫው በታሪካችን አይተነው የማናውቀው ችግር በኪራይ ሰብሳቢዎች ደርሷል ሲል ተናግሯላ። ድህነት ድሮም ነበር። ዳሩ ድህነት ህዝብ በህዝብ ላይ እንዲነሳ ባያደርገውም። በርግጥ ድህነት ጠላታችን ነው። ቀንደኛው ጠላታችን ግን አገዛዝ ነው። ደፍራችሁ ‹አዎን› ወይም ‹አሜን እሱ ነው› በሉ።


መግለጫው የኢኮኖሚ ተሃድሶውን ሲያነሳ አገሪቱ በማደግ ላይ ያለ ኢኮኖሚ ባለቤት መሆኗን አንስቷል። ጥሩ ነው። ምን ያህል አደግናል የሚለው ላይ ነው ሰው የማይግባባው። ማደጉ ወይም ለውጥ መምጣቱ ላይ ስምምነቱ አለ። ይህን በማደግ ላይ ያለውን የኢኮኖሚ ችግር ለመፍታት ያስፈልጋል ይላል መግለጫው። ችግሩም ሲተነተን እንዲህ ያስቀምጠዋል። ሙስና፣ ኮንትሮባንድ ፣ ህገ ወጥ የገንዘብ ዝውውር፣ የዘረፋ እና የጥቅመኝነት ሰንሰለት (የወሮበላው ቡድን) እና የመሳሰሉትን ያነሳል። ተመልከቱ!... እነዚህ ሁሉ ድርጊቶች የተሰሩት የድርጅቱ አባላት ወይም የድርጅቱ የአደባባይ ጠበቆች ናቸው። ሌሎች ሰዎች አይደሉም። በውጭ አገር የሚገኙ ተቃዋሚዎችም አይደሉም። የውስጥ ችግር ነው። ዙፋኑን በርስትነት መውሰድ መፈለግ ያመጣው ጠባይ ነው። በነገራችን ላይ ኢህአዴግ ወደ ርስታዊ ባላባትነት ከተቀየር ቆይቷል። ሳይንሳዊ በሆነ መንገድ ይህም ይጠና።


ሕገ መንግስቱን የመናድ ሙከራ ያደረጉትን የሚላቸውን የተለመደውን ሀሳዊ ክሱን ይተውና ችግሩን ወደ ራሱ ያመጣዋል። መግለጫው ሕገ መንግስቱን የናደው ድርጅቱ ማለትም ኢህአዴግ ነው ባይ ነው። በቀጥታ አይደለም ይህን ያለው። በትርጓሜ ነው ይህን ሃሳብ ያወሳው። ‹‹ሕገ መንግስታዊ ድንጋጌዎች ሳይሸራረፉ ተግባር ላይ እንዲውሉ የዜጎች ሰብዓዊና ዴሞክራሲያዊ መብቶች እንዲከበሩ ዜጎች ካለምንም ስጋት ከቦታ ቦታ ተዘዋውረው እንዲሰሩ በማስቻል በፍትህ ስርዓቱና በፖሊስ ስርዓታችን ላይ ተጨባጭ ለውጥ ሊያስገኙ የሚችሉ ሁለንተናዊ ሪፎርም ማከናወን እንደሚገባ ከስምምነት ላይ ተደርሷል›› ይላል። በዚህ ትንታኔ መሰረት የሕገ መንግስቱ ጠላት ራሱ ኢህአዴግ ነው።


‹‹ሕገ መንግስታዊ ድንጋጌዎች ሳይሸራረፉ ተግባር ላይ እንዲውሉ›› ሲል ምን ማለቱ ነው? ኢህአዴጎች ሸርፈው ሸርፈው ጥለውታል ማለት ነው። ዴሞክራሲያዊ መብቶች ሲል ምን ማለት ነው? ሰብዓዊ መብትስ? የዜጎች ነጻነትስ? መቼም በተጨባጭ አገሪቱን እያሰተዳደርኩ ነኝ የሚለው ይሄው ድርጅት ነው። ታዲያ እነዚህ መብቶች በማን ተናዱ? ግልጹን ስናስቀምጥ በራሱ ነው የተናዱት።


መግለጫው የሕዝብ ለሕዝብ ግንኙነትን አንስቶ ተስፋ ያለው መግለጫ ሰጥቷል። በነገራችን ላይ ሕዝብ ከሕዝብ ጋር ያለው ግንኙነት ኢህአዴጎች ሳይኖሩም ነበር፤ እያሉም አለ ሳይኖሩም ይቀጥላል። አዲስ የሆነው የኢህአዴግ ከፋፋይ ፖሊሲን በተቃረነ መልኩ በድርጅቱ ስለ አንድነት መሰበኩ ወይም መነሳቱ ነው። ለቀጣይ ገቢሩ ማዳመቂያ መቻቻል፣መደጋገፍ እና አብሮ መኖር የሚል ቃል በድርጅቱ መግለጫ ተሰጥቷል።


ድርጅቱ ይሄድበት የነበረውን ስሜታዊ አካሄድ እርግፍ አድርጎ ጥሎ ሳይንሳዊ መንገድ ጀምሯል። አብሮ መስራት። የሃሳብ ልዩነትን ማመን። በልዩነት አንድነት ወይም ለአንድነት መስራትን መቀበል የመሳሰሉ ሃሳቦችን ማሳየት። በኃይል ልዩነትን የማክሰም መንገድን መጸየፍ የመሳሰሉት እኩይ ሃሳቦች ማንሳቱ እና መኮነኑ። ከዚሁ ጋር የአለምን ተለዋዋጭ ሁኔታ አንስቶ መወያየቱ ጥሩ መንገድ ነው።


መግለጫው የኢትዮጵያ ችግር የመደብ መሆኑን ወደ ማመን የወረደ ይመስላል። ‹‹የመደብ ጭቆና ምን ያህል አስከፊ እንደሆነና አዎንታዊ ለውጥን እንደሚገታ ባለፈው ታሪክህ ካንተ በላይ የሚገነዘብ የለም” ይላል። ኢትዮጵያ ውስጥ የብሔር ጭቆና ነበር የሚለውን ያልፈለጉት ይመስላል። ይህ ደግሞ ለህወሓቶች የሚዋጥላቸው አልመሰለኝም። የብሔር ጭቆና የሚለው ማን ጨቋኝ፣ ማን ተጨቋኝ የሚለውን ያነሳላ። በዚያ ስሌት ከተሄደ ደግሞ በአሁኑ ጊዜ የአንድ ብሔር የበላይነት አለ የሚለው ሊነሳ ነዋ!


መግለጫው የአገሪቱን ችግሮች ለመፍታት ያነሳቸው አሳታፊ ሃሳቦች ይበል የሚያስብል ነው። ወጣቶቹን ሳንይዝ ለውጥ የለም ይላል። ልክ ነው። ጥያቄው የትኞችን ወጣቶች? አባላቱን ወይስ ሕዝባዊ ወጣቶቹን? ምሁራንም አብረው የለውጥ ሚና መጫወት እንደላባቸው ተነስቷል። ጥሩ ነው። አሁንም ጥያቄው የትኞቹን ? የሚለው ነው። መግለጫው አባላት የሆኑ ምሁራንን ማለቱ ነው? ወይስ እነሱን ለማሳተፍ የፓርቲው አባልነት እንደ መስፈርት ይቀርባል? ወይስ ለሆዳቸው ተላልፈው የተሰጡትን ልሂቃን ማለቱ ነው? ልሂቃን ስትሉ ማንን ማለታችሁ ነው? መግለጫው ከእህት ድርጅቶችና ሕዝቦች ጋር አብሮ መስራት ለሃገሪቱ ይጠቅማል ብሏል። አስፈላጊ ነው። ምን አይነት ግንኙነት ነው የፈለጋችሁት? የጌታና የሎሌውን ወይስ እኩል በሆነ መንገድ የምትሰሩበትን መንፈስ? በህዝብ መካከል ጠላትነትን እየዘሩ ከስልጣን ማማ ወደሌላ የስልጣን ማማ የሚሸጋገሩትን ባለስልጣኖችን ማስጠጋት ማለታችሁ ነው? ጥንቃቄው ያስፈልጋል።


ከተቃዋሚ ጋር ያሰባችሁት ወይይት በጣም ደስ የሚያሰኝ ነው። ጠላትነትን የመቀነስ መንገዱ ይኼው ነው። መደራደሩን ግፉበት። ነገር ግን ማዘናጊያ አድርጋችሁ አታስቡት። ‹ከፀሃይ በታች የማንደራደርበት ነገር የለም› ያሉትን የቀድሞ አለቃችሁን የማዘናጊያ ቃል ስልት ብላችሁት ከሆነ አትሞከሩት። የአሁኑ አውድ ከዚያኛው አውድ ይለያል። ዘንድሮ በግልጽ እና ዴሞክራሲያዊ በሆነ መንገድ ብቻ ችግሮች እንደሚፈቱ ሁኔታው አመላካች ነው። ከዚያ ውጭ ግን ከድጡ ወደ ማጡ፣ ከዚያም ወደ ረመጡ ነው መንገዱ።


‹‹ወጣቱ በሁሉም መስክ የሚያደርገውን ትግል ምክንያታዊና ሳይንሳዊ በሆኑ ሃሳቦች እየተመራ ዴሞክራሲያዊነት በጠበቀና ተደማሪ ለውጦችን በተንከባከበ መልኩ የሁሉም መብት ተከብሮ የሀገራችን ህልውና እና …..›› ይላል ስለ ወጣቱ ሚና ሲናገር። ለወጣቱ ጥያቄ ቦታ መስጠቱ ተገቢ እውቀት ነው። ‹‹የላም ችግሯ አንድ ወቅት ጥጃ እንደነበረች መርሳቷ ነው።›› ይባላል። ድርጅቱም ሆነ አባላቱ ገብቷቸዋል አንድ ወቅት ወጣቶች እንደነበሩ። ወጣቱ የሚያነሳው ጥያቄ ሳይንሳዊ መሰረት አይጎድለውም። ስሜታዊ በሆነ መንገድ ሊገልጸው ቢችልም። ‹ተደማሪ አስተዋጽኦ› ሲባል ምን ማለት ነው? የሚደመረው በኢህአዴግ ታሪክ ላይ ማለት ነው? ወይስ ከዚያ በፊት ባሉትም አባቶቹ ጭምር ማለት ነው? ቅብብሎሹን ማለት ከሆነ እናንተም ካለፈው ስርዓት የሚጠቅመውን አንስታችሁ ለመጠቀም መሞከር አስፈላጊ ነው።


ምሁራንን ሲያነሳ የልሂቃኑ ሚና ዋና ስራው ሃሳብ ማፍለቅ አድርጎ ማስቀመጡ ስህተት ነው። ሃሳብን ያፈልቃል፣ ሃገርንም ይመራል። ልሂቃኑን መጋበዛችሁ ተገቢ ነው። ያስደስታል። የዕውቀት አስፈላጊነት ማማው ላይ መውጣታችሁን ያሳያል። ለምን ልሂቃን ሸሹን የሚለውን እንደተወያያችሁበት ያስታውቃል። ሕጸጹ ዋነኛ ተግባራቸው ሃሳብ ማፍለቅ ነው ማለታችሁ ነው። ሃሳብን ማፍለቅ ዋነኛ ሚና ማለት ግን ልክ አይደለም። ምሁራን ስትሉም ሆነ ትንታኔውም በውይይታችሁ ላይ ይፈተሽ። ብቻ ከብዙ መልካም ነገሮች ጥቂቱን አውጥቶ መነታረክ እንዳይሆን ብዬ ይህን ሃሳብ በዓይን ላይ ምሰሶ አስቀምጦ በሰው ዓይን ያለን ጉድፍ እንደማጥራት እንዳይሆንብኝ እሰጋለሁ።


ድርጅቱ ትግልን ያየበት መንገድ አስገራሚ ነው። የትግል ስልቱ ከውስጥ ወደ ውጭ ነው። ይህ ትግል ደግሞ መከናወን ያለበት በተራዘመ የምንጠራና የማጣራት ትግል ነው ያሉ ነው የሚመስለው። ‹‹የሕግ የበላይነት ሰፍኖ እስኪሸነፍ ድረስ የጀመራችሁትን ትግል ሕዝብን በማሳተፍ በከፍተኛ ዲሲፕሊን ሕዝባዊ ኃላፊነታችሁን መወጣት ይገባችኋል›› ይላል›። የተቀናጀ ትግል አስፈለጊነትን አንስቷል።


የዚህም ሃሳብ ልዕልና የተቀመጠው እንዲህ በሚለው ሃሳብ ውስጥ ነው። ‹‹ዴሞክራሲ ለመገንባት የሀሳብ ልዩነቶችን የሚስተናገዱበት ማዕቀፍና አሰራር እንዲሁም ባህልና አስተሳሰብ እንዲዳብር የፖለቲካ ፓርቲዎች ወሳኝ ሚና እንዳላቸው ኦህዴድ በሚገባ ይገነዘባል።›› “የፖለቲካ ፓርቲዎች ወሳኝ ሚና እንዳላቸው ኦህዴድ በሚገባ ይገነዘባል” የምትለዋ ሀሳብ ጉድ ታሰኛለች። ተግባር ሲጨመርባት ደግሞ የጉድ ጉድ ነው የምትሆነው። “በሚገባ ያምናል” ሲል መግለጫው ለይስሙላ አይደለም ማለቱን የሚያሳይ ነው። ‹ሱታፌ› ወሳኝ መሆኑን የሰሞኑ ሁኔታ አሳይቷል። ትክክል መንገድ ነው። ከሁሉም ተቃዋሚዎች ጋር ለመደራደር ጥሪ ማቅረቡ ተገቢ ነው። የጨፌው ጉባዔ እያስደነቀን ነው። የጨፌው ፓርላማ የይስማዕከ ወርቁ ‹የአፈ ጉባኤው መዶሻ› የሚለው እርግማነ በረከት ደርሶባቸዋል መሰለኝ። እንዲህ የሚለው፡-


‹ይድረስ ለጎሊያድ ውላጅ ዳዊት መስለኸኝ ለመረጥኩህ (ያልመረጥኩህ ቅንፉ የኔ ነው)


መዝሙሬን ልትዘምርልኝ ዕንባዬን ልታነባልኝ
እኔነቴን ለወከልኩህ።


አዳሜ በአንተ ደነቀው ዕድሌ ባንተ ጨነቀው
እልፍ ሲንጨባረር እንቅልፍህን ስትሰልቀው።
……


ያ የነገር ማሳረጊያ
ያ የርዕዮት ዓለም ማፅደቂያ
የልዩ ሃሳብ መድቂያ
የሚኮንን የሚያፀድቀው
የአፈ ጉባኤው መዶሻ ነገር ቋጭቶ የሚያጠብቀው


ምናለ ‹ንቃ› ብሎ አናትክን ቢበጠርቀው› ያለው በጨፌው ላይ ደርሷል። መግለጫው እኮ አናቱን ተበጥርቆ የነቃ ወይም የሚያስብ ሰዎች ነው እኮ የሚመስለው። ታዲያማ በርቱማዎች ሆይ በርቱ!!!። ቦረኖችም እራሳችሁን ለመለወጥ ጨክኑ ወይም ወይኑ!!!

 

ይምረጡ
(0 ሰዎች መርጠዋል)
117 ጊዜ ተነበዋል

Sendek Newspaper

Bole sub city behind Atlas hotel

Contact us