You are here:መነሻ ገፅ»milkta»news admin - Sendek NewsPaper
news admin

news admin

 

በይርጋ አበበ

 

 

ገዥው ፓርቲ ኢህአዴግ በ2007 ዓ.ም የተካሄደውን ምርጫ ካሸነፈ በኋላ በአገሪቱ ላይ ለሁለተኛ ጊዜ የአስቸኳ ጊዜ አዋጅ አውጇል። ከመስከረም 28 ቀን እስከ ሐማሌ 28 ቀን 2009 ዓ.ም ለአስር ወራት በአገሪቱ ላይ ተጥሎ የቆየው አስቸኳይ ጊዜ አዋጅ በተነሳ በወራት ልዩነት አገሪቱ እንደገና በአስቸኳይ ጊዜ አዋጅ ስር እንድትመራ የሚያስችለውን ውሳኔ መንግስት ያሳለፈው ባሳለፍነው ቅዳሜ ረፋዱ ላይ የመከላከያ ሚኒስትሩ ሲራጅ ፈጌሳ በሰጡት ጋዜጣዊ መግለጫ ነው።


እንደ አቶ ሲራጅ ፈጌሳ መግለጫም የሚኒስትሮች ምክር ቤት ያሳለፈው የአስቸኳይ ጊዜ አዋጅ ውሳኔ በቀጣዮቹ ስድስት ወራት በሁሉም የአገሪቱ ክፍል ተፈጻሚ ይሆናል። በስድስት ወራት ውስጥ የሚፈለገው ለውጥ ካልተገኘ ደግሞ እንደገና ለተጨማሪ አራት ወራት እንዲራዘም ይደረጋል።


“በአገሪቱ ያለው የጸጥታ ሁኔታ በተለመደው የህግ አሰራር መምራት የማይቻልበት ደረጃ ላይ ስለተደረሰ” መንግስት እዚህ ውሳኔ ላይ ለመድረስ መገደዱን አቶ ሲራጅ ፈጌሳ ተናግረዋል። ሚኒስትሩ አያይዘውም ውሳኔው አሁን ተግባራዊ እንዲሆን ተደረገ እንጂ ኢሕአዴግ ለ17 ቀናት ባካሄደው የስራ አስፈጻሚ ስብሰባው ወቅት የተፈጠረው ችግር በ15 ቀናት ውስጥ እልባት ካላገኘ አስቸኳይ ጊዜ አዋጁን ለማወጅ ውሳኔ ላይ ደርሶ እንደነበር ገልጸዋል። አሁን በአገሪቱ ላይ የተጣለው አስቸኳይ ጊዜ አዋጅ እንዳለፈው ዓመት ዝርዝር መመሪያ የወጣለት ባይሆንም አስቸኳይ ጊዜ አዋጁን ለማስፈጸም የተቋቋመው ኮማንድ ፖስት ሊከለክል የሚችላቸውና ሊወስዳቸው የሚገቡ እርምጃዎችን በዝርዝር አስቀምጠዋል።


ከዚህ በተጓዳኝ ደግሞ የአሜሪካ መንግስት የኢትዮጵያ መንግስት በወሰደውን ውሳኔ “አልስማማም” አዲስ አበባ በሚገኘው ኤምባሲው በኩል አቋሙን ገልጿል። ምሁራን እና የፖለቲካ ፓርቲዎችም በዚህኛው ሃሳብ የሚስማሙ መሆናቸውን ተናግረዋል። ምሁራን፣ የፖለቲካ ፓርቲዎች እና የኢትዮጵያ መንግስት በአስቸኳይ ጊዜ አዋጅ ላይ የሰጧቸውን መግለጫዎች ለአንባቢያን በሚመች መልኩ አጣምረን ከዚህ በታች አቅርበነዋል።

የአስቸኳይ ጊዜ አዋጅ አስፈላጊነት


በ1987 ዓ.ም የጸደቀው የአገሪቱ ህገ መንግስት በአንቀጽ 93 ቁጥር 1(ሀ) ‹‹የውጭ ወረራ ሲያጋጥም ወይም ህገ መንግስታዊ ስርዓቱን አደጋ ላይ የሚጥል ሁኔታ ሲከሰትና በተለመደው የህግ ማስከበር ሥርዓት ለመቋቋም የማይቻል ሲሆን፣ ማናቸውም የተፈጥሮ አደጋ ሲያጋጥም ወይም የህዝቡን ጤንነት አደጋ ላይ የሚጥል በሽታ ሲከሰት፤ የፌዴራሉ መንግስት የሚኒስትሮች ምክር ቤት የአስቸኳይ ጊዜ አዋጅ የመደንገግ ስልጣን አለው›› ሲል ለአስቸኳይ ጊዜ አዋጅ መታወጅ የሚዳርጉ ቅድመ ሁኔታዎችን ያስቀምጣል።


በአሁኑ ወቅት የታወጀውንም ሆነ ቀደም ሰል በአገሪቱ ላይ ለአስር ወራት ታውጆ የቆየውን የአስቸኳይ ጊዜ አዋጅ ለማወጅ ምክንያት ሆኖ የቀረበው ‹‹ህገ መንግስታዊ ስርዓቱን አደጋ ላይ የሚጥል ሁኔታ ሲከሰትና በተለመደው የህግ ማስከበር ሥርዓት ለመቋቋም የማይቻል ሲሆን›› የሚለው ምክንያት መሆኑን የመከላከያ ሚኒስትሩ ሲራጅ ፈጌሳ ለመገናኛ ብዙሃን ተናግረዋል።


የብሔራዊ ደህንነት ምክር ቤት በሰጠው የፕሬስ መግለጫ (ፕሬስ ሪሊዝ) ላይ ደግሞ ‹‹ከ2008 ዓ.ም ጀምሮ በአገራችን የተከሰተው አለመረጋጋት በህዝቦቻችን ደህንነትና በአገራችን ኢኮኖሚ ላይ ከፍተኛ ጉዳት በማድረስ ላይ ይገኛል። ችግሩን ለመከላከልና ለመቀልበስም በተለመደው አሰራር እና አካሄድ ለመፍታት ጥረት ተደርጎ ባለመሳካቱ አስቸኳይ ጊዜ አዋጅ ታውጆ ሁኔታዎች የመሻሻል አዝማሚያ አሳይተው የነበረ መሆኑ ይታወሳል። ነገር ግን በአሁኑ ወቅት በተለያዩ የአገራችን አካባቢዎች ስርዓት አልበኝነት ተፈጥሮ የዜጎች ህይወት በአሳዛኝ ሁኔታ እየጠፋ እና ዜጎች ለዘመናት ያፈሩት ሀብት እና ንብረት በቀላሉ እየወደመ ይገኛል። ይህ አጠቃላይ ሁኔታ ህዝባችንና መንግስት ከሚሸከሙት እና ከሚታገሱት በላይ እየሆነ መጥቷል›› ሲል የካቲት 9 ቀን 2010 ዓ.ም የሚኒስትሮች ምክር ቤት ባካሄደው ስብሰባ የአስቸኳይ ጊዜ አዋጅ የጣለበትን ምክንያት ያስታውቃል።


የአስቸኳይ ጊዜ አዋጁ በዚህ ምክንያት ከሆነ የታወጀው አገሪቱ ውስጥ ያለው የጸጥታ እና የዜጎች ህይወት ምን ይመስላል? የሚለውን ጥያቄ ለምሁራን አቅርበን ነበር። በአምቦ ዩኒቨርስቲ የማኔጅመንት መምህር የሆነው አቶ ስዩም ተሾመ ‹‹በህገ መንግስቱ አንቀጽ 93 በተቀመጠው መሰረት ካየነው በዚህ ወቅት አስቸኳይ ጊዜ አዋጅ ለማወጅ የሚያስችል ምንም ምክንያት የለም›› ሲል ተናግሯል። በአብዛኞቹ የአገራችን ክፍሎች የተነሱ ግጭቶችና ብጥብጦችም ቢሆኑ ፖለቲካዊ መፍትሔ እንጂ አስቸኳይ ጊዜ አዋጅ የሚያስፈልጋቸው አይደለም ይላል። ‹‹በአገራችን የተከሰተው ችግርም ከ1997 ዓ.ም ምርጫ በኋላ ኢህአዴግ የወሰዳቸው እርምጃዎች ድምር ውጤት ነው›› ያለው መምህር ስዩም፤ በ2007 ዓ.ም የተካሄደው ምርጫ ደግሞ ለችግሩ የመጨረሻው ምክንያት መሆኑን ተናግሯል።


በቅርቡ ከእስር የተፈታው ጋዜጠኛ እስክንድር ነጋ በበኩሉ ‹‹የአስቸኳይ ጊዜ አዋጁ ለኢህአዴግ ጊዜያዊ እፎይታ ሊያስገኝለት ይችል ይሆናል እንጂ ዘላቂ መፍትሔ ግን ሊያመጣ አይችልም። ምክንያቱም ያለው ብጥብጥና ግጭት የጸጥታ ችግር ሳይሆን በኢህአዴግ ፊት ተጋርጦ ያለው የፖለቲካ ጥያቄ ነው። የፖለቲካ ችግር ደግሞ መፍትሔውም ፖለቲካዊ ነው›› በማለት ተናግሯል። ጋዜጠኛ እስክንድር ነጋ አያይዞም በኢትዮጵያ የታወጀውን አስቸኳይ ጊዜ አዋጅ የአሜሪካ መንግስት እንደማይደግፈው የገለጸበትን መግለጫ በተመለከተ ‹‹የአሜሪካ መንግስት ለኢትዮጵያ የሚጠቅማትን ትክክለኛና ወቅታዊ መግለጫ ስላወጣ በጣም ላመሰግናቸው እወዳለሁ›› ብሏል።


በዚህ ጉዳይ አስተያየታቸውን ለሰንደቅ ጋዜጣ የሰጡት ሌላው ምሁር ደግሞ ዶክተር ያዕቆብ ኃይለማሪያም ናቸው። የህግ ባለሙያው በጉዳዩ ዙሪያ ከሰንደቅ ጋዜጣ ለቀረበላቸው ጥያቄ ሲመልሱ ‹‹በእውነት ይህ ለችግሩ ዘላቂ የሆነ መፍትሔ ይሰጣል ብዬ አላምንም። ህዝቡ ችግሩን ከእነ መፍትሄው ነው የገለጸው። መንግስትም ይህን የህዝብ ጥያቄና ድምጽ ሰምቶ ወደ መፍትሔ መሄድ እንጂ በዚህ መልኩ ችግሩን እፈታለሁ ብሎ መነሳቱ አዋጭ ሊሆነው አይችልም›› ብለዋል። ዶክተር ያዕቆብ ሃሳባቸውን ሲያጠናክሩም ‹‹አስቸኳይ ጊዜ አዋጅ የሚታወጀው የውጭ ወረራ ሲያጋጥም ጦርነት ለመክፈት፤ እና ህዝቡን አደጋ ላይ የሚጥል የተፈጥሮ አደጋ (የመሬት መንቀጥቀጥ፣ ጎርፍ፣ ወረርሽኝ እና ቃጠሎን ጨምሮ የተለያዩ አደጋ አምጭ ምክንያቶች) ሲደርሱ ለመከላከል ሲባል የተወሰኑ ሰብአዊ መብቶች ሊጣሱ ይችላሉ። አሁን በእኛ አገር ባለው ሁኔታ ግን መፍትሔም አይሆንም አስፈላጊም አልነበረም። እንዲያውም በህዝብ እና በመንግስት የጸጥታ ሀይሉ መካከል ልዩነትን የሚያሰፋ ስለሆነ ለሰላም የበለጠ ጠንቀ ይሆናል›› በማለት ተናግረዋል።

 

በኮማንድ ፖስት የሚወሰዱ እርምጃዎችና የተሰጡ አስተያየቶች


አቶ ሲራጅ ፈጌሳ የአስቸኳይ ጊዜ አዋጅ አስፈጻሚ ኮማንድ ፖስት የሚወስዳቸውን እርምጃዎች በተመለከተ የሚከተለውን ተናግረዋል።
1. የአስቸኳይ ጊዜ ኮማንድ ፖስት ህገ መንግስቱንና ህገ መንግስታዊ ስርዓቱን ለማስከበር እና ከአደጋ ለመጠበቅ የህዝብና የዜጎችን ሰላም ጸጥታ ለማስጠበቅ አስፈላጊ ነው ብሎ ሲያምን፤ ማንኛውም ሁከት ብጥብጥና በህዝቦች መካከል መጠራጠርና መቃቃር የሚፈጥር ይፋዊ ሆነ የድብቅ ቀስቀሳ ማድረግን፣ ጽሁፍ ማዘጋጀትን፣ ማተምና መሰራጨትን፣ ትዕይንት ማሳየትን፣ በምልክት መግለጽን ወይም መልእክትን በማንኛውም ሌላ መንገድ ለህዝብ ይፋ ማድረግን ይከለክላል።
2. ማንኛውም የመገናኛ ዘዴ እንዲዘጋ ወይም ደግሞ እንዲቋረጥ ሊያደርግ ይችላል።
3. የህዝብና የዜጎች ሰላምና ጸጥታ ለማስጠበቅ ሲባል የአደባባይ ሰልፍ እና ሰልፍ ማድረግን፣ መደራጀት፣ በቡድን ሆኖ መንቀሳቀስ ይከለክላል (ዝርዝሩ በመመሪያ ይወጣል)
4. በህገ መንግስቱ እና ህገ መንግስታዊ ስርዓቱ ላይ የሚቃጡ ወንጄሎችን የጠነሰሰ፣ የመራ፣ ያስተባበረ፣ የጣሰ ወይም ደግሞ በማንኛውም መንገድ በወንጄል ድርጊቱ የተሳተፈ ወይም በወንጄል ድርጊቱ ተሳትፏል ተብሎ የሚጠረጠርን ማንኛውም ሰው ያለ ፍርድ ቤት ትዕዛዝ በቁጥጥር ስር ያደርጋል፤ ተገቢውን ማጣራት በማድረግ በመደበኛው ህግ ተጠያቂ እንዲሆን ያደርጋል።
5. ወንጄል የተፈጸመባቸው ወይም ሊፈጸምባቸው የሚችሉ እቃዎችን ለመያዝ ሲባል ማናቸውንም ቤት፣ ቦታ እና መጓጓዣ ለመበርበርና እንዲሁም ማናቸውንም ሰው በማስቆም ማንነቱን መጠየቅና መፈተሸ ይቻላል።
6. በብርበራ ወይም በፍተሻ የተያዙ እቃዎችን በማስረጃነት ለፍርድ ቤት መቅረባቸው እንደተጠበቀ ሆኖ ተጣርቶ ለባለመብቱ ይመለሳል።
7. የሰዓት እላፊ ተፈጻሚ የሚሆንበትን ሁኔታ ይወስናል።
8. ለተወሰነ ጊዜ አንድን መንገድ፣ አገልግሎት መስጫ ተቋማት፣ ለመዝጋት እንዲሁም ሰዎች ለጊዜው በተወሰነ ቦታ እንዲቆዩ ወደ ተወሰነ አካባቢ እንዳይቡ ወይም ደግሞ ከተወሰነ ቦታ እንዳይንቀሳቀሱ ይደረጋል።
9. የተቋማትን የመሰረተ ልማት ጥበቃ ሁኔታ ወስናል።
10. የህዝብ እና የዜጎችን ሰላምና ጸጥታ ለማስጠበቅ ሲባል የጦር መሳሪያ፣ ስለት ወይም እሳት የሚያስነሱ ነገሮችን ይዞ መንቀሳቀስ የማይቻልባቸውን ቦታዎች ለይቶ ይወስናል።
11. በሰላም መደፍረስ ምክንያት የፈረሱ የተለያዩ የአስተዳደር እርከኖችን ከክልል እና ከአካባቢው ህብረተሰብ ጋር በመተባበር መልሶ እንዲቋቋሙ ያደርጋል።
12. ብሔር ተኮር በሆኑ ወይም በሌሎች ግጭቶች ምክንያት የተፈናቀሉ ሰዎችን ከክልል መንግስታትና ከአካባቢው ህዝብ ጋር በመተባበር ወደ ቀድሞ መኖሪያ ሰፈራቸው ተመልሰው እንዲቋቋሙና ሰላማዊ ኑሯቸውን እንዲመሩ ድጋፍ ያደርጋል።
13. የሚገለገልባቸው አገልግሎት ተቋማት የንግድ ስራዎች ወይም የመንግስት ተቋማት ከሚሰጡት አገልግሎት እንዳይስተጓጎሉ ተገቢውን ጥበቃ ያደርጋል። ይህን ተላልፎ አገልግሎትን ያቋረጠ ማንኛውም ሰው በህግ ተጠያቂ ይሆናል።
14. የመሰረታዊ ሸቀጦችና አገልግሎቶችን አቅርቦት የዝውውርና የስርጭት ደህንነት ያረጋግጣል። የትራንስፖርትን ፍሰት ደህንነት ያረጋግጣል።
15. በትምህርት ተቋማት በመማርና ማስተማር ሂደትን ከሚያውኩ ተግባራት የጸዳ እንዲሆኑ እንዲሁም መደበኛ የሆኑ ስራን የሚያስተጓጉሉ እንከኖች እንዳይፈጠሩ ይሰራል።
16. ህገ መንግስቱንና ህገ መንግስታዊ ስተርዓቱን ለማስከበር፣ ከአደጋ ለመጠበቅ፣ የህዝብንና የዜጎችን ሰላምና ጸጥታ ለማስጠበቅ ሌሎች አስፈላጊ የሆኑ ሁሉንም እርምጃዎች ይወስዳል። እነዚህ እርምጃዎች ቀጣይ በሚወጡ በአፈጻጸም መመሪያዎች የሚዘረዘሩ እንደሚሆኑ አቶ ሲራጅ ተናግረዋል።


የአስቸኳይ ጊዜ አዋጅ አስፈጻሚ ኮማንድ ፖስት የሚወስዳቸውን እርምጃዎች ተከትሎ ተቃውሞን በማሰማት የአሜሪካን መንግስት የቀደመው አልተገኘም። አዲስ አበባ የሚገኘው የአሜሪካ ኤምባሲ አስቸኳይ ጊዜ አዋጁን ተከትሎ የመንግስታቸውን አቋም በሚገልፅ መግለጫ ላይ ‹‹የመናገርና ሃሳብን የመግለጽ ነጻነትን ይጋፋል፣ የሰዎችን መሰረታዊ መብቶች የሚጥስ ነው። በመሆኑንም አልስማማም›› ሲል አስታውቋል።

 

የተሻለ አገራዊ መፍትሔ


አገሪቱ ውስጥ መጠነ ሰፊ ግጭቶች መኖራቸውን የገለጸው የኢትዮጵያ መንግስት የተነሱ ግጭቶችን ለማብረድ አስቸኳይ ጊዜ አዋጅን እንደ መፍትሔ ወስዶታል። ለዚህም ከየካቲት 9 ቀን 2010 ዓ.ም ጀምሮ በሁለም የአገሪቱ ክፍሎች ለስድስት ወራት (እስከ ነሃሴ 9 ቀን 2010 ዓ.ም) ተፈጻሚ የሚሆን አስቸኳይ ጊዜ አዋጅ አውጇል። ይህ አዋጅ በስድስት ወራት ውስጥ የሚፈለገውን ውጤት ማምጣት ካልቻለም ለተጨማሪ አራት ወራት እንዲራዘም ይደረጋል ሲል አስታውቋል።


ለሰንደቅ ጋዜጣ አስተያየታቸውን የሰጡ ፖለቲከኞችና ምሁራን ደግሞ ከኢህአዴግ የተለየ አቋም እንዳላቸው ገልጸዋል። የኦሮሞ ህዝብ ዴሞክራሲያዊ ድርጅት (ኦህዴድ) ያካሄደውን የማዕከላዊ ምክር ቤት ስብሰባ እንደጨረሰ የወሰደውን አቋም እንደተመለከተው የገለጸው ጋዜጠኛ እስክንድር ነጋ ‹‹ኦህዴድ በአገር ውስጥም በውጭ አገር ከሚኖሩ የፖለቲካ ፓርቲዎች ጋር እንደራደራለሁ ማለቱን ስመለከት በኢህአዴግ ውስጥ መሻሻል እየታየ እንደሆነ አመላክቶኛል። አሁንም ዘላቂ መፍትሔ የሚሆነው ከሁሉም ሀይሎች ጋር ድርድር እና ውይይት ማካሄድ ነው›› ሲል ይበጃል ያለውን አገራዊ መፍትሔ ተናግሯል።


የአስቸኳይ ጊዜ አዋጁን ‹‹በሄዱበት መንገድ መመለስ ነው›› ያለው መምህር ስዩም ተሾመ በበኩሉ ‹‹አስቸኳይ ጊዜ አዋጁ ህዝባዊ ተቃውሞ ማካሄድ እና ሰላማዊ ሰልፍ ማካሄድን ይከለክላል። ከዚህ ቀደምም የብሔራዊ ደህንነት ምክር ቤት ባስቀመጠው መመሪያ ማንኛውንም አይነት የተቃውሞ ሰልፍ ማካሄድ ክልክል ነው ብሎ ነበር። ያ ክልከላ ባለበት ሁኔታ ነው አገሪቱ ውስጥ እንደዚህ አይነት ሰፋፊ የተቃውሞ ሰልፍ እያየን ያለነው። ይህ የሚያሳየው ደግሞ የተነሳውን ተቃውሞ ክልከላ እንደማያቆመው ነው። አሁን የታወጀው አስቸኳይ ጊዜ አዋጅም የተነሳውን የህዝብ ለውጥን የመሻት ጥያቄ ከማፈን ውጭ መፍትሔ ሊሆን አይችልም›› ብሏል። መፍትሔ ይሆናል ያለውን ሲያስቀምጥም ‹‹ለህዝብ ጥያቄ መልስ መስጠት የችግሩ ብቸኛ መፍትሔ ነው›› ሲል አስቀምጧል።


ዶክተር ያዕቆብ ኃይለማሪያም በበኩላቸው ‹‹ኢህአዴግን ጨምሮ ሁሉም የፖለቲካ ፓርቲ አባሎችና የሲቪክ ማህበራትን ያሳተፈ የሽግግር መንግስት ማቋቋም ዘላቂ መፍትሔ ይሆናል። ይህን ለማድረግ ግን ኳሱ በኢህአዴግ እጅ ላይ ነው ያለው። አገርን መውደድ እና ህዝብን ማክበር ይጠይቃል። ከዚህ በተረፈ ግን ሀይል መፍትሔ ሊሆን አይችልም። ምክንያቱም ችግሩን ያባብሰዋል›› በማለት አሳስበዋል።

 

 

 

በኦስማን መሐመድ
www.abyssinialaw.com

 

መግቢያ


ዓለም አቀፍ የሲቪልና የፖለቲካ መብቶች ቃል ኪዳን ስምምነት፣ ዓለም አቀፍ የሰብዓዊ መብት ሕግጋት እና በኢፌዲሪ ሕገ መንግሥት የተካተቱት ሥነ ሥርዓታዊ መብቶች መሠረታዊ ዓላማ መርማሪ አካላት ያለበቂ ምክንያትና ሕጋዊ ሥርዓት የአንድን ሰው የነጻነት መብት እንዳይጥሱ ዋስትና እና ጥበቃ መስጠት ነው። የብዙ አገሮች ሕገ መንግሥት የአንድ ሰው በሕይወት የመኖር፣ የአካል ደህንነትና የነፃነት መብት ከሰው ልጅ ተፈጥሯዊ ክቡርነት የመነጩ ሊደፈሩና ሊገሰሱ የማይችሉ መብቶች መሆናቸውን ያረጋገጣሉ። መሠረታዊ መብቶቹ ተግባር ላይ እንዲውሉ ጥረት የሚደረግ መሆኑ የሚታወቅ ነው። በሌላ በኩል የእነዚህን መብቶች አፈፃፀም የሚሸረሽሩ ወይም ዋጋ የሚያሳጡ የተለያዩ የወንጀል ድርጌቶች በዓለም ውስጥ በየደረጃው በስፋት ሲፈፀም ማየትና መስማት የተለመደ ሆኗል። ይህ የማይጣጣም ሁኔታ ከልዩ ልዩ የጥቅም ግጭቶች፣ ከአመለካከት ልዩነት፣ ካለመቻቻልና ከመሣሰሉት መንስዔዎች የሚመነጭ ሊሆን ይችላል።


በዓለም አቀፍ ሆነ በብሔራዊ ሕግጋት ዕውቅና ከተሰጣቸው መሠረታዊ መብቶች አንዱ በወንጀል የተከሰሰ ሰው ጉዳዩ ሥልጣን ባለው ፍርድ ቤት ታይቶ ጥፋተኛ መሆኑ እስካልተረጋገጠ ድረስ ከወንጀል ነፃ እንደሆነ የመቆጠር መብት ያለው መሆኑ ነው። ይህ መሠረታዊ መብት ዕውቅና ሊያገኝ የቻለው ንፁሀን ግለሰቦች በወንጀል በመጠርጠራቸው ወይም በመከሰሳቸው ብቻ ሊደርስባቸው የሚችለውን የተለያየ የመብት ጥሰት ለመግታት ነው።


ወንጀል ፈጽሟል ተብሎ የተያዘ ሰው በመሠረቱ የተጠረጠረበት ወንጀል በማስረጃ ከተረጋገጠበት ሊፈረድበት ማስረጃ ከሌለ ግን ሊፈታ ይገባል። ሆኖም መረማሪ ፖሊስ ወይም ዐቃቤ ሕግ ጉዳዩን እስኪያጣሩና ለፍርድ እስኪቀርብ ድረስ ታሣሪው በጥፋተኝነት የማይቀጣበት ወይም በፍጹም ነፃነት የማይለቀቅበት ሁኔታ አለ። ይህም በዋስ የመለቀቅ መብት ነው። መንግሥት የሕብረተሰብን ሰላምና ፀጥታ የማስከበር እንዲሁም የግለሰብን መብትና ነፃነት የማክበር ሃላፊነት አለበት። መንግሥት የወንጀል ተግባር ፈጽመዋል በማለት በሚይዛቸው ሰዎች ላይ ሕግ ለማስከበር የሚፈጽመው ተግባር ሁለት ተፋላሚ የሆኑ ጥቅሞችን የሚያስታርቅና የሚያቻችል መሆን አለበት። የሕዝብን ሰላምና ፀጥታ ለማስጠበቅ ሲባል በከባድ የወንጀል ተግባር የተጠረጠሩ ሰዎችን በፍርድ አደባባይ ተገቢውን ቅጣት እንዲያገኙ ለማድረግ ከፍርድ በፊት ማሰሩ ተገቢ ሲሆን በሌላ በኩል ተጠርጠረው የታሰሩ ሰዎች ንፁህ ሰዎች የሚሆኑበት እድል ሰፊ ስለሆነ ከፍርድ በፊት እንዳይታሰሩ ጥንቃቄ ማድረግ ይጠበቅበታል።

 

የዋስትና መብት ታሪካዊ ዳራ በትንሹ


የዋስትና መብት በወንጀል የተጠረጠረ ወይም የተከሰሰ ሰው የተጠረጠረበት የወንጀል ጉዳይ ምርመራ እስኪጠናቀቅ ወይም ክሱ በፍርድ ቤት ታይቶ ውሣኔ እስኪያገኝ በሚፈለግበት ጊዜና ቦታ ለመቀረብ ግዴታ ገብቶ ወይም ግዴታውን የሚወጣለት ዋስ ጠርቶ ከእስር የሚለቀቅበት ወይም ከመታሰር የሚድንበት ሥርዓት መሆኑን ከዋስትና ድንጋጌዎች አጠቃላይ ይዘት መረዳት ይቻላል። የዋስትና ሥርዓቱ ሌላው ገጽታ መብትን ማስጠበቅ ብቻ ሳይሆን በመብት ተጠቃሚው በኩል ግዴታ መግባትን የሚጠይቅ መሆኑን መረዳት ይቻላል።


የወንጀል ተግባር ፈፅሟል ተብሎ በጥርጣሪ የተያዘን ሰው ወደፍርድ አደባባይ አቅርቦ በወንጀል ሕግና ሥነ ሥርዓት መሠረት የመጨረሻ ውሣኔ እስኪያገኝ ድረስ በጊዜ ቀጠሮ በማረሚያ ቤት ከማቆየት ይልቅ የዋስ መብቱን ጠብቆ መልቀቅ ይሻላል የሚለው መሠረተ ሀሳብ በሁሉም አገሮች ተቀባይነት አግኝቶ ተግባር ላይ ከዋለ አያሌ ዘመን አልፏል። የተጠርጣሪዎችን የዋስ መብት በመፍቀድ መልቀቅ የተጀመረበትን ዘመን በግልጽ ለመናገር ባይቻልም አንዳንድ ጽሑፎች እንደሚጠቁሙት ለምሳሌ በእንግሊዝ አገር በጥንት ጊዜ የወንጀል ተግባር የፈፀሙ ሰዎችን አስረው የመጠበቅ ሥልጣን የነበራቸው ‟ሼሪፎች” ከዚህ ከፍተኛ ወጪ ከሚጠይቅ አስቸጋሪ የግል ሀላፊነት ለመዳን አቀደው የፈጠሩት ዘዴ ሳይሆን አይቀርም የሚል ግምት አለ።


በወቅቱ ዳኞች ከአንዱ አገር ወደሌላው አገር እየተዘዋወሩ ዳኝነት ይሰጡ ስለነበር ተጠርጣሪዎች ተራ ደርሷቸው ጉዳያቸው እስኪሰማ ድረስ ብዙ ጊዜ ሰለሚወስድና እስር ቤቶቹ ለጤና ምቹ ስላልነበሩ ብዙ እስረኞች ጉዳያቸው ውሣኔ ከማገኘቱ በፊት በእስር ላይ እንዳሉ ይሞቱ ነበር። ይህ ዓይነቱ አሳዛኝ ሁኔታ ሸሪፎች እስረኞችን በራሳቸዉ ዋስትና ወይም ፍርድ ቤት ሊያቀርባቸው በሚችል በሌላ ሰው ዋስትና ከአስር ይለቋቸው ነበር። ይህ እስረኞችን በዋስ የመልቀቀ ተግባር ይፈፀም የነበረው ለሸሪፎቹ በሕግና በመመሪያ በተሰጠ ሥልጣን ሳይሆን በራሳቸው ሀላፊነት ከእስረኞቹ ጋር በሚፈጽሙት ስምምነት ብቻ ነበር።


እስረኞችን በዋስ የመልቀቅ አሰራር ጠቃሚ መሆኑ ሰለታመነበት እስረኞች በምን ዓይነት ሁኔታ የዋስ መብታቸው ሊከበርላቸው እነደሚገባ የሚወስን ሕግ ወጣ በዚህ ሕግ መሠረት ዳኞች የእስረኞችን የዋስ መብት በመጠበቅ ለመልቀቅ የሚችሉበት ሁኔታ ተፈጠረ። እስረኛው በቀጠሮው ቀን ፍርድ ቤት እንዲቀርብ ሊያስገድደው የሚችል የገንዘብ ወይም የንብረት ወይም የሰው ዋስ እንዲጠራ ይደረጋል። የተያዘ ሰው በቀጠሮ ቀን ሳይቀርብ ቢቀር ለዋስትና ማስከበሪያ የተያዘው ገንዘብ ወይም ንብረት ለመንግሥት ገቢ ይሆናል። የዋሶቹ ገዴታ የተያዘው ሰው በቀጠሮ ቀን ሳይቀርብ ቢቀር ለመንግሥት የዋስትናውን ገንዘብ ገቢ ማድረግ በመሆኑ ዋስ መሆን ይችሉ የነበሩት ሀብት ያላቸው ሰዎች ነበሩ። በተለምዶ ባለርስቶች የበለጠ ተቀባይነት የነበራቸው ሲሆን ተከሳሹ እንዳይጠፋ ለማድረግም የማሰር ስልጣን ተሰጥቷቸዉ ነበር።


በጊዜ ሂደት ተጠርጣሪዎችን በዋስ የመልቀቅ እና ያለመልቀቅ ሥልጣን የፍርድ ቤቶች ብቻ ሆነ። ተከሣሹ በቀነ ቀጠሮ ከመቅረብ ይልቅ ይጠፋል የሚል ጥርጣሬ ዋሱ ካደረበት አስሮ እንዲያቆየው ሥልጣን ይሰጠው ነበር። ተከሳሹ በቀጠሮ ቀን ሳይቀርብ ከቀረ ዋሱ ፍልጐ የማቅረብ ግዴታ ነበረበት። በኃላ ግን ዋሱን በዚህ መልክ ከማስጨነጭ ይልቅ ተከሳሹ ቢጠፋ ዋሱ የዋስትናውን ገንዘብ ለመንግሥት እንዲከፍል ብቻ የማድረግ አሰራር ተተካ።


በዘመናዊ የሕግ አስተሳሰብ መሠረት በዋስ ለመልቀቅ ከሚያበቁ ምክንያቶች መካከል ጎልቶ የሚታየው ‟ማንኛውም በወንጀል የተከሰሰ ሰው በፍርድ ቤት ገና የጥፋተኝነት ውሳኔ ሳይሰጥበት ሊቀጣ አይገባውም” የሚለው ነው። አስተዋይነት በተሞላው በዚህ ዘመናዊ የሕግ አስተሳሰብ መሠረት “ወንጀል ሰርቷል” በመባል የተከሰሰ ሰው በሕግ የተቋቋመ ፍርድ ቤት በሕጋዊ መንገድ የተሰበሰቡ ማስረጃዎችን ሰምቶ የጥፋተኝነት ውሳኔ እስከሚሰጥበት ድረስ ንጹህ ሰው እንደሆነ ይቆጠራል። እንዲህ ያለውን ሰው ጥፋተኛ መሆኑ ገና ሣይረጋገጥ በእስር ቤት እንዲቆይ ማድረግ ንፁሁን ሰው ያለጥፋቱ እንደመቅጣት ስለሚቆጠር በዋስ መልቀቅ የተሻለ አሠራር ሆኖ ተገኝቷል።


ጉዳዩ ገና በመጣራት ወይም በቀጠሮ ላይ ያለ ተከሣሽ በዋስ ሊለቀቅ ይገባል የሚባለበት ሌላው ምክንያት ደግሞ ተከሣሹ የመከላከያ አቤቱታውን እንዲያዘጋጅ እና ማስረጃዎቹን እንዲያሰባስብ በቂ ጊዜና አመቺ ሁኔታ ስለሚያስፈልገው ነው። ለምሳሌ ምስክሮቹን ለይቶ የሚያውቃቸው ራሱ ተከሣሹ ብቻ ሊሆን ስለሚችል አድራሻቸውን ፈልጎ ለማገኝት እንዲችል ሌሎች ማስረጃዎቹን እንዲያጠናቅርና ከጠበቃው ጋር እንደልቡ እየተገናኘ ስለክርክሩ ስትራተጂ እንዲቀይስ ከእስር መለቀቅ ይኖርበታል። ምክንያቱም ፍትሕን ለመጠበቅ ሲባል አንድ ተከሣሽ መከላከያውን በደንብ እንዲያዘጋጅ በቂ ዕድል ሊሰጠው ይገባል።


እነዚህ ምክንያቶች አሳማኝ ቢሆኑም እንኳን ከባድ ወንጀል ሰርተዋል ተብለው ለሚከሰሱ ሰዎች በዋስ ቢለቀቁ ፍርድ ቤቱ ጉዳዩን ሰምቶ ሊወስንባቸው የሚችለውን ከባድ ቅጣት ከመቀበል ይልቅ መጥፋቱንና ሐብታቸውን ማጣቱን ይመርጣሉ ተብሎ ስለሚገመት የዋስ መብት ይነፈጋቸዋል። በአሜሪካን ሀገር በሞት ከሚያስቀጡ ወንጀሎች በስተቀር በሌሎች በማናቸውም ዓይነት ወንጀሎች የሚከሰስ ሰው በዋስ የመለቀቅ መብት አለው። ይሁን እንጂ በሞት በሚያስቀጡ ወንጀሎች የተከሰሱ ሰዎችንም ቢሆን ፍርድ ቤቱ አይጠፉም ብሎ ከገመተ በዋስ ሊለቃቸው ይችላል።

የዋስትና መብት በኢ.ፌ.ዴ.ሪ. ሕገ መንግሥት እና በዓለም አቀፍ ሕጎች

 

የኢፌዴሪ ሕገ መንግሥት ለተያዙ ሰዎች ከሚያረጋግጣቸው መብቶች ውስጥ የዋስትና መብት አንዱ ነው። የሕገ መንግሥቱ አንቀጽ 19 ንዑስ አንቀጽ 6፦
‟የተያዙ ሰዎች በዋስ የመፈታት መብት አላቸው። ሆኖም በሕግ በተደነገጉ ልዩ ሁኔታዎች ፍርድ ቤት ዋስትና ላለመቀበል ወይም በገደብ መፍታትን ጨምሮ በቂ ዋስትና ማረጋገጫ እንዲያቀርቡ ለማዘዝ ይችላል” በማለት ይደነግጋል። (ሠረዝ የተጨመረበት)


ይህ ድንጋጌ የሚገልፀው በዋስ የመፈታት መብት በመርህ ደረጃ የማንኛውም የተያዘ ሰው መብት ሲሆን በሕግ በተደነገጉ ልዩ ሁኔታዎች ግን ፍርድ ቤት በተያዙ ሰዎች የሚቀርብለትን በዋስትና የመለቀቅ ጥያቄ ሊነፍግ፣ ሊገድብ እንደሚችል ወይም በቂ የሆነ የዋስትና ማረጋገጫ አስቀርቦ የመፍቻ ትዕዛዝ ለመስጠት የሚችል መሆኑን ነው። በመሆኑም የዋስትና መብት መሠረታዊ የሰብዓዊ መብት ቢሆንም ፍጹም መብት ሳይሆን በሕግ አግባብ ሊነፈግ የሚችል መሆኑን ነው።


ኢትዮጵያ በዓለም ሕብረተሰብ አባልነቷ በየጊዜው የምታፀድቃቸው ዓለም አቀፍ ስምምነቶችና ሕጎች አሉ። እነዚህ ስምምነቶችና ሕጎች የኢትዮጵያን ብሔራዊ ጥቅም የሚያራምዱ ቢያንስ የማይጎዱ ቢሆንም ኢትዮጵያን ግዴታ ላይ የሚጥሉ ናቸው። ስለሰብአዊ መብቶች በየጊዜው እና በየደረጃው የፈረመቻቸው የቃል ኪዳን ውሎች በምሳሌነት የሚጠቀሱ ናቸው። በኢፌዲሪ ሕገ መንግሥት አንቀጽ 9(4) እንደ ተመለከተው ኢትዮጵያ ያፀደቀቻቸው ዓለም አቀፍ ሰምምነቶች ሁሉ ፓርላማ እንዳወጣቸው ተቆጥረው በአገር ውስጥ እንደ አገር ሕግ ተወስደው ተፈፃሚነት የኖራቸዋል። ኢትዮጵያ ከተቀበለቻቸው ዓለም አቀፍ የሰብአዊ መብት ስምምነቶች መካከል የሲቪል እና የፖለቲካ መብቶች ዓለም አቀፍ ቃል ኪዳን አንቀጽ 9(3) እና በማንኛውም ሁኔታ ታስረው ወይም ታግተው የሚገኙ ሰዎችን መብት ለመጠበቅ በተባበሩት መንግስታት ድርጅት የወጣ መመሪያ በመርህ /Principle/ 39 ላይ ዋስትና መንፈግና በእስር ማቆየት እንደመርህ መታየት እንደሌለበት የሚደነግጉ ናቸው።


‟Anyone arrested or detained on a criminal charge shall be brought promptly before a judge or other officer authorized by law to exercise judicial power and shall be entitled to trial with in a reasonable time or to release. It shall not be the general rule that persons awaiting trial shall be detained in custody, but release may be subject to guarantees to appear for trial, at any other stage of the judicial proceedings, and, should occasion arise, for execution of the judgement.” [Emphasis added]


‟Except in special cases provided by the law, a person detained on criminal charge shall be entitled, unless a judicial or other authority decides otherwise in the interest oF the administration of justice, to release pending trial subject to the conditions that may be imposed in accordance with the law. Such authority shall keep the necessity of detention under review.” [Emphasis added]


የተጠቀሱት ዓለም አቀፍ የሰብአዊ መብቶች ሕግጋትና መርሆዎች በግልፅ የሚያረጋግጡት የዋስትና መብትን እንደመርህ እንዲሁም በቅድመ ክስ መሰማት ወቅት የሚፈፀምን የማረፊያ ቤት እስራትን እንደ ልዩ ሁኔታ ወይም እንደ መጨረሻ አማራጭ የሚወሰድ መሆኑን ያስገነዝባሉ። የኢፌዲሬ ሕገ መንግሥት እና ዓለም አቀፍ የሰብአዊ መብቶች ሕግጋትና መርሆዎች በወንጀል የተጠረጠረ ወይም የተከሰሰ ሰው የተጠረጠረበት ወይም የተከሰሰበት ጉዳይ በፍርድ ቤት ከመሰማቱ በፊት መታሰር የሌለበት መሆኑን ይገልጻሉ። በፍርድ ቤት የወንጀሉ ክስ ከመሰማቱ በፊት የተከሣሹን ነጻነት ለመጠበቅ የተፈለገበት ምክንያት የጥፋተኛነት ውሣኔ በፍርድ ቤት ከመሰጠቱ በፊት በተከሣሹ ላይ ቅጣት ላለመጣልና ተከሣሹ ለቀረበበት ክስ ያለአንዳች መሰናክል መከላከያ እንዲያዘጋጅ ለማስቻል ነው።


የኢፌዴሪ ሕገ መንግሥት አንቀጽ 13(2) በምዕራፍ ሦስት የተዘረዘሩት መሠረታዊ የመበቶች እና የነፃነቶችድንጋጌዎች ኢትዮጵያ ከተቀበለቻቸው ዓለም አቀፍ የሰብአዊ መብቶች ሕግጋት፣ ዓለም አቀፍ የሰብአዊ መብቶች ስምምነቶች፣ ዓለም አቀፍ የሰብአዊ መብቶች ሰነዶች መርሆዎች ጋር በተጣጣመ መንገድ መተርጎም እንዳለባቸው ይደነግጋል። ከድንጋጌዎቹ መረዳት የሚቻለው ዋስትና የማይፈቀድባቸውን ልዩ ሁኔታዎች በመደነገግ ረገድ ለሕግ አውጪው ሥልጣን የተሰጠው መሆኑን ነው። ነገር ግን ሕግ አውጪው የዋስትና መብትን በመገደብ የሚያወጣው አዋጅ ከሕገ መንግሥቱና ከዓለም አቀፍ የሰብአዊ መብቶች ሕግጋት ጋር የተጣጣመ እና የዋስትና መብትን በውስን አድማስ ከመገደብ አልፎ ዋናውን መብት የሚያሳጣና የሚንድ መሆን የለበትም።


የዋስትና ክርክር በሚሰማበት ጊዜ አስፈላጊ ከሆኑ ሁኔታዎች አንዱ የተያዘው ሰው ፈጽሞታል ተብሎ የተጠረጠረበት የወንጀል ዓይነት ነው። በአደገኛ ቦዘኔ በሚገባ ተጠርጥሮ የተያዘ ሰው በዋስትና አይለቀቅም ወይም በሙስና ወንጀል የተያዘ ሰው በዋስ እንዲለቀቀቅ ለፍርድ ቤት ማመልከት ይችላል። ሆኖም የተከሰሰበት ወንጀል ከአስር ዓመት በላይ ሊያስቀጣ የሚችል ከሆነ በዋስትና መልቀቅ አይቻልም በተጨማሪም ማንኛውም የተያዘ ሰው የተከሰሰበት ወንጀል የሞት ቅጣትን ወይም አሰራ አምስት ዓመት ወይም በላይ የሆነ ጽኑ እስራት የሚያሰቀጣው ከሆነ በዋስትና ለመልቀቅ አይቻልም።


እነዚህ ሕጎች የዋስትና ክስ በሚሰማበት ጊዜ ተጠርጥረው ለተያዙ ሰዎች እጅግ አስፈላጌና ወሣኝ ሁኔታዎች ሲሆኑ ተመሳሳይ የሚያደርጋቸው አንድ ሰው ከእነዚህ ድንጋጌዎች በአንዱ ሥር በሚካተት ወንጀል በተከሰሰ ጊዜ ፍርድ ቤት ዋስትና የመፍቀድ ሥልጣን የለውም። እንደ ሕጎቹ ድንጋጌ ከሆነ የዋስትና መብትን ወዲያውኑ ይነፍጋሉ። ፍርድ ቤቶች የዋስትና መብትን እምቢ እንዲሉ ያስገድዷቸዋል። የእነዚህ ሕጎች ሕገ-መንግሥታዊነት የሕግ ባለሙያዎችን በሁለት የተለያዩ አቅጣጫ እያከራከረ ያለ ሲሆን ሁለቱም ለክርክራቸው ደጋፊና ዋቢ አድርገው የሚጠቅሱት የኢፌዲሪ ሕገ መንግሥት አንቀጽ 19(6) ላይ የተደነገገውን ነው።


ለልዩነቱና ለክርክሩ መነሻ ምክንያት የሆነው በሕግ በተደነገጉ ልዩ ሁኔታዎች (In Exceptional Circumstances Prescribed By Law) ከሚለው የድንጋጌው ይዘትና ኃይለ ቃል ውስጥ ‟ልዩ ሁኔታዎች” (Exceptional ‟Circumstances”) ለሚለው ሐረግ በሚሰጠው ትርጉም ላይ የሚመሠረተ ነው። አንደኛውን አስተሳሰብ በሚያራምዱ የሕግ ባለሙያዎች እምነት ሕገ መንግሥቱ በዋስትና መብት ገደብ እንደሚደረግበት ቢደነግግም ይህ ገደብ በሕግ በተደነገጉ ልዩ ሁኔታዎች ፍርድ ቤት ዋስትና ላለመቀበል ወይም በገደብ መፍታትን ጨምሮ በቂ ዋስትና ማረጋገጫ እንዲቀርብ ለማዘዝ ይችላል በሚል መልክ የተደነገገ በመሆኑ ገደቡ እንደጉዳዩ ዓይነት ፍርድ ቤት ውሣኔ የሚሰጥበት እንጅ ሕግ አውጪው አንድን የወንጀል ዓይነት ነጥሎ በማውጣት በዚህ ወንጀል የተጠረጠረ ወይም የተከሰሰ ዋስትና አይጠበቅለትም እንዲል ሥልጣን አይሰጠውም። ልዩ ሁኔታዎች ማለት ደግሞ ፍርድ ቤቶች እንደነገሩ ሁኔታ የእያንዳንዱን ተጠርጣሪ ወይም ተከሣሽ ግላዊ የአደገኝነት ሁኔታ፣ ያለፈ የሕይወት ታሪኩን፣ የወንጀሉን ከባድነትና ጊዜ ቀጠሮውን አክብሮ መቅረብ ወይም አለመቅረቡን ጉዳዩን ሲመረምሩ የሚያዩትና የሚደርሱበት እንጅ ቀድሞ በሕግ ሊወሰን የሚችል አይደለም።


በመሆኑም የተጠቀሱት የአዋጁ ድንጋጌዎች ከሕገ መንግሥቱ በተቃራኒ የተቀመጡ በመሆኑ ፍርድ ቤቶች ዋስትናን በሚመለከት ሁኔታዎችን እየመረመሩ ውሣኔ እንዳይሰጡ የሚከለክሉ ስለሆነ የሕገ መንግሥቱን አንቀጽ 19(6)፣ 20(3) እና 37(1) ይቃረናሉ። ስለሆነም ድንጋጌዎቹ በሕገ መንግሥቱ አንቀጽ 9(1) መሠረት ተፈጻሚ እንዳይሆኑ ሊደረግ ይገባል በማለት የመከራከሪያ ሀሳባቸውን ያቀርባሉ።


ሁለተኛውን አስተሳሰብ በሚያራምዱ የሕግ ባለሙያዎች እምነት የተጠረጠሩ ወይም የተከሰሱ ሰዎች ከመርህ አኳያ በዋስ የመውጣት መብት የተከበረላቸው ቢሆንም ይህ መብት ፍፁማዊ መብት አይደለም። የተጠረጠሩ ወይም የተከሰሱ ሰዎች በዋስ የመለቀቅ ወይም ያለመለቀቅ ሁኔታ በሕግ የተወስነ ነው። የሕገ መንግሥቱ አንቀጽ 19(6) ድንጋጌ ሕግ አውጪው የዋስትና መብትን የሚገድብ ሕግ ሲደነግግ አንድን የወንጀል ዓይነት ለይቶ በመደንገግ በዚህ ወንጀል የተጠረጠረን ወይም የተከሰሰን ሰው በዋስትና መልቀቅ አይቻልም እንዲል ሥልጣን ይሰጠዋል።


ሕግ አውጪው ልዩ ሁኔታዎችን በሁለት አማራጮች ሊያውጅ ይችላል። በአንድ በኩል ዋስትና የሚያስከለክሉ የወንጀል ዓይነቶችን ለይቶ በመደንገግ ሲሆን (ለምሳሌ ቅጣቱ ቀላልም ይሁን ከባድ ወይም ዋስትና የሚያስከለክል ሁኔታ መኖር አለመኖሩ ግምት ውስጥ ሳይገባ በአደገኛ ቦዘኔ ወይም በአሸባሪነት ወንጀል የተከሰሰ የዋስትና መብት የለውም)። በሌላ በኩል ደግሞ በማንኛውም ዓይነት ወንጀል ቢሆን ዋስትና ሊያስከለክሉ የሚችሉ ሁኔታዎችን በዝርዝርና በግልጽ ለመደንገግ መብት ይሰጠዋል የሚል ነው (ለምሳሌ የወ/መ/ሥ/ሥ/ሕ/ አንቀጽ 67 ከ(ሀ-ሐ))። እንደነዚህ የመከራከሪያ ነጥብ ከሆነ በተለዩ የወንጀል ዓይነቶች የተጠረጠሩ ወይም የተከሰሱ ሰዎችን የዋስትና መብት ወዲያውኑ የሚነፍጉት ድንጋጌዎች ሙሉ በሙሉ ከኢፌዲሪ ሕገ መንግሥት አንቀጽ 19/6/ ጋር የተጣጣሙ ናቸው በማለት ይከራከራሉ።


ከላይ ያየናቸው የዋስትና መብትን ወዲያውኑ የሚነፍጉት ሕጎች በሕገ መንግሥቱ የተረጋገጡ መብቶችን ይጥሳሉ የሚል አቤቱታ በተለያየ ጊዜ ለተለያዩ ፍርድ ቤቶች እና ለሕገ መንግሥት ጉዳዩች አጣሪ ጉባዔ ቀረበው የሕገ መንግሥት ትርጉም ጥያቄ አስነስተው ነበር።

 

ማሳያ-1 (Case-1)


በከሣሽ የፌዴራል ሥነ ምግባርና ፀረ ሙሰና ኮሚሽን እና በተከሣሽ እነ አሰፋ አብረሐ መካከል በፌዴራል ጠቅላይ ፍርድ ቤት በወንጀል መዝገብ ቁጥር 7366 ህዳር 5 ቀን 1993 ዓ/ም በተደረገ ክርክር ተጠርጣሪዎቹ የተከሰሱት በሙስና ወንጀል ሲሆን ሕጉ የተያዙ ሰዎች ፈጽመውታል ተብሎ የተጠረጠሩበት ወንጀል የሙስና ወንጀል ከሆነ በዋስትናቸው ላይ ፍጹማዊ ክልከላ ያደርጋል። የተጠርጣሪ ጠበቆች ዋስትናን በግልጽ የሚከለክለው የሕግ ድንጋጌ ከኢፌዲሪ ሕገ መንግሥት አንቀጽ 19/6/ ጋር የሚቃረን ነው በማለት ተከራከረዋል።


በኮሚሽኑ ዐቃቤ ሕግ በኩል የነበረው መከራከሪያ የተከሰሱትን ሰዎች በዋስ መልቀቅ ግልጽ የሆነ የሕግ ጥሰት ነው ያለ ሲሆን በተጨማሪም የተከሣሾቹ ጠበቆች ዋስትና የሚከለክለው ሕግ ሕገ መንግሥታዊ አይደለም በማለት ያቀረቡት መከራከሪያ ተቀባይነት የለውም። ምክንያቱም ሕገ መንግሥቱ የዋስትና ክልከላ በልዩ ሁኔታ ፈቅዷል በማለት ተከራክሯል። ክርክሩን ሲሰማ የነበረው ፍርድ ቤት በሙስና ወንጀሎች ጉዳይ ዋስትና የሚከለክለው ሕግ ግልጽ ስለሆነ ትርጉም አያስፈለገውም በማለት አስታውቋል። በመቀፀልም የኢፌዲሪ ሕገ መንግሥት አንቀጽ 19/6/ ሀሳብ ፍርድ ቤት በሕግ የተደነገጉትን ልዩ ሁኔታዎች መሠረት በማድረግ የዋስትና መብት መከልከል እንደሚችል ነው። ልዩ ሁኔታዎች የሚለው የሕገ መንግሥቱ እሳቤ በተለያዩ ሕጎች ውስጥ የሚገኙ ናቸው።


ለሙሰና ወንጀሎች ዋስትና የሚከለክል ልዩ ሕግ ወጥቷል። ስለሆነም በሙስና ወንጀል የተጠረጠሩ ሰዎች ዋስትና የሚከለክለው የልዩ ሕግ አዋጅ በኢፌዲሪ ሕገ መንግሥት የልዩ ሁኔታዎች እሳቤ መስፈርት የሚያሟላ ነው። ፍርድ ቤቱ ትንታኔውን ሲደመድም ሕጉ ግልጽ ስለሆነ ሕጉን ከመተግበር ውጭ አማራጭ የለም ያለ ሲሆን የተከሳሽ ጠበቆቹን የመከራከሪያ አቤቱታ መሰረተ ቢስ ነው በማለት ውድቅ አድርጐታል።

 

ማሳያ-2 (Case-2)


በሌላ ተመሳሳይ ጉዳይ በከሣሽ የፌዴራል ዐቃቤ ሕግና በተከሣሽ እነ ኢንጅነር ሐይሉ ሸዋል መካከል በወንጀል መዝገብ ቁጥር 34246 በፌዴራል ከፍተኛ ፍርድ ቤት ህዳር 4 ቀን 1997 ዓ/ም በተደረገ የዋስትና ክርክር ጉዳይ፣ ዋስትና ወዲያውኑ የሚከለክለው የሕግ ድንጋጌ ሕገ-መንግሥታዊ ጥየቄ አሰነስቶ ነበር። ዐቃቤ ሕግ በ1ኛ ክሰ የተከሰሱት ሰዎች የኢፌዲሪ ሕገ መንግሥትና ሕገ-መንግስታዊ ሥርዓቱን በሀይል ለማፍረስ ሞክረዋል በማለት በወንጀል ሕግ አንቀጽ 32/1/ሀ/ለ፣ 38፣ 34፣ 27/1/ እና አንቀጽ 258 መሠረት ክስ መስርቶባቸዋል። ተከሳሾቹ የተከሰሱበት ወንጀል በእድሜ ልክ ጽኑ እስራት ወይም በሞት ቅጣት ሊያስቀጣ እንደሚችል ግልጽ ነበር።


ተከሳሾቹ ምንም እንኳን የወ/መ/ሥ/ሥ/ ሕ/ ቁጥር 63 የዋስትና መበታቸውን ወዲያውኑ የሚከለክል ቢሆንም ፍርድ ቤቱ የዋስትና ጥያቄቸውን መርምሮ ለመወሰን ስልጣን እንዳለው የኢፌዲሪ ሕገ መንግሥትና ኢትዮጵያ ያጸደቀቻቸውን ዓለም አቀፍ የሰብዓዊ መብት ሰነዶች በመጥቀስ ተከራክረዋል። በተጨማሪም የኢፌዲሪ ሕገ መንግሥት የዋስትና መብት በሕግ እንዲከለከል አልፈቀደም ስለሆነም ዋስትና ወዲያውኑ የሚነፍገው የወ/መ/ሥ/ሥ/ሕ/ቁጥር 63 ድንጋጌን ውድቅ እንዲያደርገው ፍርድ ቤቱን ለማሳመን ጥረዋል። ዓቃቢ ሕግ በበኩሉ የኢፌዲሪ ሕገ መንግሥት አንቀጽ 19 /6/ መንፈስና ይዘት የዋሰትና መብት በሕግ መሠረት ሊከለከል አንደሚችል በመግለጽ እና የሕገ መንግሥት ጉዳዩች አጣሪ ጉባዔ በሕግ ዋሰትና መከለከል ሕገ-መንግሥታዊ ነው በማለት አስተያየት መስጠቱን ለፍርድ ቤቱ ገልጿል።


ፍርድ ቤቱ ዓለም አቀፍ የሲቪልና የፖለቲካ መብቶች ኮንፌሽን አንቀጽ 9/3/ እና የኢፌዲሪ ሕገ መንግሥት አንቀጽ 19/6/ ለጉዳዩ አግባብነት ያለው ለመሆኑ ገልጾል። ከእነዚህ ድንጋጌዎች አፈጻጸም የመንረዳው በዋስትና መለቀቅ መርህ ሲሆን ዋስትና መከልከል የጠቅላላው መርህ ልዩ ሁኔታ ነው በማለት ገልጾል። ፍርድ ቤቱ ዋስትናን በሕግ መከልከል አይቻልም የሚለውን መከራከሪያ ውድቅ በማድረግ መከራከሪያው ከኢፌዲሪ ሕገ መንግሥት አንቀጽ 19/6/ እይታ ውሃ የሚቋጥር አይደለም ምክንያቱም የሕገ መንግሥቱ ድንጋጌ ፍርድ ቤት በሕግ የተመለከቱ ሁኔታዎችን መሠረት በማድረግ ዋስትና እንዲከለክል በግልጽ ይፈቅድለታል በማለት ውሳኔ ሰጥቷል።

 

የውጭ ሀገር ልምድ /Foreign Experience/


በዚህ ረገድ የሌሎች ሐገሮችን የሥነ-ሥርዓት ሕግና ልምድ በምንቃኝበት ጊዜ አብዛኞቹ ሐገሮች ተከሣሽ የተከሰሰበትን የወንጀል ዓይነት ለዋሰትና ማስከልከል ብቸኛ ምክንያት ወይም መስፈርት አድርገው አይወስዱም።
በካናዳ በወንጀል የተጠረጠሩ ሰዎች ዋስትና የሚያስከለክል አሳማኝ ምክንያት በሌለበት ሁኔታ የዋስትና መብታቸውን ያለማጣት መብት አላቸው። ተከሳሽ የተጠቀሰበትን ወንጀል መሠረት በማድረግ ብቻ የዋስትና መብት አይከለከልም። ከዚህ ይልቅ ዐቃቤ ሕግ የተከሣሽ የዋስትና መብት ተነፍጎ በማረሚያ ቤት እንዲቆይ አሰፈላጊ የሆነበትን ምክንያት በቅድሚያ ማስረዳት አለበት። ይህም ማለት ተከሣሽ በየቀጠሮው ፍርድ ቤት እንዲቀርብ ለማድረግ እስርቱ አስፈላጊ መሆኑን ወይም የተከሣሽ በማረሚያ ቤት መቆየት ለሕዝብ ደህንነትና ጥበቃ አስፈላጊ መሆኑን ወይም ተከሣሽ በዋስ ቢለቀቅ ሌላ ወንጀል የሚፈጽም መሆኑን ዐቃቤ ሕጉ በተጨባጭ ማሳየትና ማስረዳት አለበት።
በእንግሊዝ በዋስትና መለቀቅ መርህ ነው። ነገር ግን ተጠረጣሪው በግድያ ወንጀል፣ በግድያ ሙከራ በአስገድዶ መድፈር፣ በአስገድዶ መድፈር ሙከራ ወይም በከባድ ግብረ ሥጋ ግንኙነት ወንጀሎች፣ በአንዱ ወንጀል ከተከሰሰ እና ቀደም ሲል በእንግሊዝ ውስጥ ከእነዚህ ወንጀሎች በአንዱ ጥፋተኛ ተብሎ የተፈረደበት ከሆነ፣ ተጠርጣሪው የዋስትና መብቱ ሊነፈግ እንደማይገባ ለፈርድ ቤቱ የማስረዳት ግዴታ አለበት። ተጠርጣሪው ያለበትን የማስረዳት ኃላፊነት በአግባቡ ከተወጣ ፍርድ ቤቱ በዋስትና ሊለቀው ይችላል። ይህ ነው ፍርድ ቤትን በዋስትና ጥያቄ ላይ የመጨረሻ ውሣኔ ሰጭ ነው የሚያሰኘው።


በፈረንሳይ የወንጀሉ ከባድነት ለዋስትና ክርክር አስፈላጊ አይደለም። ዋስትና ከፍትሕ አስተዳደሩ ሰላም ጋር በተዛመዱ ምክንያቶች ብቻ ሊከለከል ይቻላል። ዳኞች ክሱ በፍርድ ቤት ከመሰማቱ በፊት የተጠርጣሪው መታሰር ለፍትሕ አስተዳደሩ ሰላም አስፈላጊ ሆኖ ሲያገኙት ዋስትና ሊከለክሉ ይችላሉ።


ለጉዳዩ አግባብነት ያለው የደቡብ አፍሪካ ሕግ ዋስትና የሚከለክሉ ወንጀሎችን በዝርዝር አይደነግግም። በዋስትና ጥያቄ ላይ ውሣኔ ሲሰጥ ሕጉ ቅጣትን እንደ ብቸኛ መስፈርት አድርጎ አልደነገገም። በመርህ ደረጃ እያንዳንዱ ወንጀል የሚያስከትለው ቅጣት ግምት ውስጥ ሳይገባ ዋስትና ይፈቀዳል። ዋስትና ፍጹማዊ መብት ባለመሆኑ ምክንያት ዐቃቤ ሕግ የተጠርጣሪውን በዋስትና መለቀቅ ሊቃወም ይችላል። ተጠርጣሪው ለፍትሕ ጥቅም ሲባል በዋስትና እንዳይፈታ ዐቃቤ ሕግ ፍርድ ቤትን የማሳመን አላፊነት አለበት። ተጠርጣሪው ለፍትሕ ጥቅም ሲባል ዋስትና ሊከበርለት አይገባም የሚለው የዐቃቤ ሕግ መከራከሪያ ተጠርጣሪው በዋስትና ቢለቀቅ ይጠፋል፣ ምርመራውን ያደናቅፋል ወይም ምስክሮችን ያባብላል፣ ሌላ ወንጀል በመፈጸም ጉዳት ያደርሳል የሚለውን ነጥብ ያሲዛል። ተጠርጣሪው በተወሰኑ ወንጀሎች ለምሳሌ በግድያ፣ በአስገድዶ መድፈር፣ በከባድ ውንብድና የእርሱ መታሰር የፍትሕ ፍላጎት እንዳልሆነ የማስረዳት ሸክሙን ከተወጣ ፍርድ ቤቱ የዋስትና መብቱን ይጠበቅለታል።


በአሜሪካ የተያዙ ሰዎች በዋስ የመፈታት መብት አላቸው። ተጠርጣሪው የፈፀመውን ወንጀል ምክንያት በማድረግ ብቻ የተጠርጣሪውን ዋስትና ሊያሳጣ የሚችል ወንጀል የለም። የተከሣሽ በዋስ የመለቀቅ ወይም ያለመለቀቅ ውሣኔ መሠረት የሚያደርገው በሌላ ተጨማሪ ፍሬ ነገር ላይ ነው። ዳኞች ተከሣሽ ቀጠሮውን አክብሮ በችሎት ለመገኘቱ፣ ከውንጀል ምርመራ እንቅስቃሴ ጋር በተያይዞ መስናክል ላለመፍጠሩ እና ሌላ ወንጀል ላለመፈጸሙ ማረጋገጫ እንዲሰጥ በማድረግ በቅድመ ሁኔታ በዋስ ሊፈቱት ይችላሉ። ዳኞች ቅድመ ሁኔታዎቹ በተጠርጣሪው የማይከበሩ መሆኑን ባረጋገጡ ጊዜ ቀደም ሲል የፈቀዱትን ዋስትና በማንሳት በማረሚያ ቤት ሆኖ እንዲከራከር ሊያደርጉ ይችላሉ። በአጠቃላይ የአሜሪካ የወንጀል ሥነ-ሥርዓት ሕግ አንድ ሰው በነፍስ ግድያ ወንጀል ቢጠረጠርም የተጠረጠረበትን ወንጀል መነሻ በማድረግ ብቻ በዋስትና መለቀቁን የሚከለክል አይደለም። በተጨማሪ ‟The Federal Bail Reform Act of 1984” ተብሎ የሚጠራው ሕግ ተጠርጣሪው የተጠረጠረበትን ወንጀል መሠረት በማድረግ ብቻ ዋስትናውን እንዲያጣ አልደነገገም። ፍርድ ቤቱ የዋስትና ክርክር በሚሰማበት ወቅት ግምት ውስጥ ከሚያስገባቸው አያሌ መስፈርቶች አንዱ የወንጀሉ ዓይነት ነው።


በሙስና ወንጀል ዋስትናን የሚከለክለው ሕግ ሕገ መንግሥትዊ አይደለም በማለት የቀረበ አቤቱታን በሚመለከት የተሰጠ የሕገ መንግሥት ትርጉም አስተያየት።
የፌዴራሉ ሕገ መንግሥት ጉዳዩች አጣሪ ጉባዔ የፀረ ሙስና ልዩ የሥነ ሥርዓትና የማስረጃ ሕግ አዋጁን ለማሻሻል የወጣው አዋጅ ቁጥር 239/93 አንቀጽ 51(2) ሕገ መንግሥቱን የሚቃረን ስለሆነ ሕገ መንግሥቱን የሚቃረን መሆኑን በማረጋገጥ ወደ ፌደሬሸን ምክር ቤት አቅርቦ እንዲያስወስንልን በማለት የቀረበለትን አቤቱታ ተመልክቶ በሕገ መንግሥቱ አንቀጽ 84(2) በተሰጠው ሥልጣን መሠረት የሚከተለውን የሕገ መንግሥት ትርጉም ሃሣብ አቅርቧል።

አቤቱታ አቅራቢዎች፦


የዚህ አቤቱታ አቅራቢዎች በሙስና ወንጀል ተጠርጥረው በእስር የሚገኙ ሲሆኑ ሁሉም በፀረ ሙስና አዋጅ ዋስትና አይፈቀድላቸውም የተባሉ ናቸው።

የቀረበው አቤቱታ ይዘት፦


አቤቱታ አቅራቢዎቹ የሙስና ወንጀል ፈጽማችኃል በሚል ጥርጣሬ ተይዘው በእስር ላይ የሚገኙ መሆናቸውንና የተጠረጠሩበት ጉዳይ በፌዴራል ፖሊስ ወንጀል ምርመራ ክፍል እየተጣራ የሚገኝ ሲሆን፣ ጉዳዩ እስኪጣራ ድረስ በዋስ የመፈታት መብት ተነፍጎን በእስር ላይ እንገኛለን በማለት አመልክተዋል።


የአቤቱታ አቅራቢዎች አቤቱታ ይዘት ዝርዝር ሲታይ ቀጥሎ የተመለከቱትን ነጥቦች ያነሳል።


1. ምንም እንኳን የሙስና ወንጀል ፈጽማችኃል በሚል ክስ ቢቀርብብንም ጉዳያችንን በዋስ እንድንከታተል ልንከለከል የማይገባን ሆኖ ሳለ በፀረ-ሙስና ልዩ ሥነ-ሥርዓትና ማስረጃ ሕግ ማሻሻያ አዋጅ ቁጥር 239/1993 አንቀጽ 51(2) ድንጋጌ መሠረት የዋስትና መብት እንዳይፈቀድልን ተከልክሏል። ይሁን እንጂ ሕገ መንግሥቱ ዋስትናን በፍርድ ሊታይ የሚገባ ጉዳይ አድርጎ የደነገገው ከመሆኑም በላይ በዋስትና የመፈታት መብትን እንደ መርህ፣ አለመፈታትን እንደ ልዩ ሁኔታ አስቀምጦታል። ይህ ሆኖ ሳለ ግን የአዋጁ አንቀጽ 51(2) በሙስና ወንጀል ተጠርጥሮ የተያዘ ሰው የዋስትና መብት አይኖረውም በማለት ፍርድ ቤት የዋስትና መብት እንዳይፈቀድ መደንገጉ ሕገ መንግሥቱ ያረጋገጠውን በዋስ የመፈታት እና ከፍርድ በፊት እንደ ጥፋተኛ ያለመቆጠር መብትን የሚጥስ ነው። በመሆኑም የተጠቀሰው የአዋጁ ድንጋጌ የሕገ መንግሥቱን አንቀጽ 19(6) እና 20(3) ይቃረናል።


2. የሕገ መንግሥቱ አንቀጽ 19(6) ‟በሕግ በተደነገጉ ልዩ ሁኔታዎች ፍርድ ቤት ዋስትና ላለመቀበል...” የሚለው አባባል ሕግ አውጪው ዋስትና ሊከለከል የሚችልበትን ሁኔታ በሕግ ለይቶ እንዲያስቀምጥ እንጂ አንድን ወንጀል ነጥሎ በማውጣት በዚህ ወንጀል የተከሰሰ ዋስ ይከልከል በማለት ሕግ እንዲያወጣ ሕገ መንግሥቱ አይፈቀድም። ይሁን እንጂ የአዋጁ ድንጋጌ ከዚሁ በተቃራኒ የተቀመጠ በመሆኑ ፍርድ ቤቶች ዋስትናን በሚመለከት ሁኔታዎችን እየመረመሩ ውሣኔ እንዲሰጡ የሚከለክል ስለሆነ ይህ የአዋጁ ድንጋጌ የሕገ መንግሥቱን አንቀጽ 37(1) ይቃረናል።


3. የሕገ መንግሥቱ አንቀጽ 13 ንዑስ ቁጥር 1 እና 2 ማንኛውም ሕግ አውጪ፣ አስፈጻሚ እና የዳኝነት አካል በሕገ መንግሥቱ ምዕራፍ ሦስት ሥር የተዘረዘሩትን መሠረታዊ መብቶችና ነፃነጾች የማክበርና የማስከበር ኃላፊነትና ግዲታ ያለበት መሆኑን እና ኢትዮጵያ ከተቀበለቻቸው ዓለም አቀፍ የሰብአዊ መብት ስምምነቶች መካከል አንዱ የሆነው የሲቪል እና ፖለቲካ መብቶች ዓለም አቀፍ ቃል-ኪዳን አንቀጽ 9(3) በበኩሉ ዋስትና መንፈግና በእስር ማቆየት እንደመርህ መታየት እንደሌለበት የሚደነግግ ሲሆን የአዋጁ አንቀጽ 51(2) ግን ዋስትና መነፈግን እንደመርህ ተቀብሎ የተያዙ ሰዎች በዋስትና እንዳይፈቱ ያዛል። ይህ ደግሞ የሕገ መንግሥቱን አንቀጽ 13 ይቃረናል የሚል ነው።


አቤቱታ አቅራቢዎቹ አዋጅ ቁጥር 239/1993 አንቀጽ 51(2) ድንጋጌ ከፍ ሲል የተዘረዘሩትን የሕገ መንግሥቱን ድንጋጌዎች የሚጥስ በመሆኑ እና በአጠቃላይ የሕገ መንግሥቱን የበላይ ሕግነት የሚጋፋ ስለሆነ ሕገ መንግሥታዊ አይደለም ይባልልን በማለት ጠይቀዋል።

የሕገ መንግሥት ትርጉም አስተያየት፦


በዚህ ጉዳይ ላይ የቀረበውን የሕገ መንግሥት ትርጉም ጥያቄ ለመመልከት አግባብነት ያላቸው ሕጎች ድንጋጌዎች እና የአቤቱታ አቅራቢዎች አቤቱታ በዝርዝር ታይቷል። በዚህ ጉዳይ የሚነሳው መሠረታዊ ጭብጥ አዋጅ ቁጥር 239/1993 አንቀጽ 51(2) በሙስና ወንጀል ተጠርጥሮ የተያዘ ሰው የዋስትና መብት አይኖረውም በማለት የደነገገው ድንጋጌ ከኢፌዴሪ ሕገ መንግሥት ጋር የሚቃረን ነው ወይስ አይደለም? የሚለው ነው።


የኢፌዲሪ ሕገ መንግሥት ለተያዙ ሰዎች ከሚያረጋጋግጣቸው መብቶች ውስጥ የዋስትና መብት አንዱ ነው። የሕገ መንግሥቱ አንቀጽ 19 ንዑስ አንቀጽ (6) የተያዙ ሰዎች በዋስ የመፈታት መብት አላቸው። ሆኖም በሕግ በተደነገጉ ልዩ ሁኔታዎች ፍርድ ቤት ዋስትና ላለመቀበል ወይም በገደብ መፍታትን ጨምሮ በቂ የዋስትና ማረጋገጫ እንዲቀርብ ለማዘዝ ይችላል በማለት ይደነግጋል።


ይህ ድንጋጌ የሚገልፀው በዋስ የመፈታት መብት የማንኛውም የተያዘ ሰው መብት መሆኑን፣ በሕግ በተደነገጉ ልዩ ሁኔታዎች ግን ፍርድ ቤት በተያዙ ሰዎች የሚቀርብለትን በዋስትና የመለቀቅ ጥያቄ ላለመቀበል እንደሚችል ወይም ደግሞ የተያዘውን ሰው በቂ የዋስትና ማረጋገጫ አቅርቦ በገደብ እንዲፈታ ለማዘዝ የሚችል መሆኑን ነው።


ኢትዮጵያ በተቀበለችው የሲቪልና የፖለቲካ መብቶች ዓለም አቀፍ ኮንቬንሽንም ሆነ በሕገ መንግሥታችን የዋስትና መብት ከነፃነት መብት ጋር በቀጥታ የተቆራኘና የነፃነት መብትን በተለይ የወንጀል ክስ በፍርድ ቤት የተከሣሽ የግል ነፃነት (Pretrial Freedom) መከበር ያለበት መሆኑን የሚያመለክት ነው።


‟Every One has the right to liberty and security of person. No one shall be subjected to Aribitrary arrest or detention. No one shall be deprived of his liberty except on such grounds and in accordance with such procedures as established by Law.”


በዚህ መሠረት ኮንቬንሽኑ የሚያረጋግጠው ማንም ሰው የነፃነት እና የደህንነት መብት ያለው መሆኑን፣ ማንም ሰው በጭፍን እንዲያዝ ወይም ተይዞ እንዲቆይ መደረግ የሌለበት መሆኑን እና በሕግ በተመለከቱ ምክንያቶች እና ሥነ ሥርዓቶች ካልሆነ በቀር ማንም ሰው የግል ነፃነቱን ማጣት የሌለበት መሆኑን ነው።


ሕገ መንግሥታችንም በተመሳሳይ መልኩ በአንቀጽ 17 ‟በሕግ ከተደነገገው ሥርዓት ውጭ ማንኛውም ሰው ወንድም ሆነ ሴት ነፃነቱን አያጣም። ማንኛውም ሰው በሕግ ከተደነገገው ሥርዓት ውጭ ሊያዝ፣ ክስ ሳይቀርብበት ወይም ሳይፈረድበት ሊታሰር አይችልም” በማለት ይደነግጋል።


ይህ ድንጋጌ የአንድን ሰው የግል ነፃነት ለመገደብ በሕግ የተደነገገ ሥርዓት መኖር እንዳለበት፣ በሕግ ከተደነገገው ሥርዓት ውጭ አንድን ሰው መያዝ ወይም ክስ ሳይቀርብበት ወይም ሳይፈረድበት ማሰር እንደማይቻል ይገልጻል። የዚሁ ድንጋጌ የእንግሊዝኛ ቅጅ ግን የአንድን ሰው የግል ነፃነት መገደብ የሚቻለው በሕግ በተደነገገ ሥርዓት መሠረት ብቻ ሳይሆን በሕግ በተደነገጉ ምክንያቶች ጭምር መሆን እንዳለበት የሚገልጽ ከመሆኑም በላይ ማንንም ሰው በጭፍን መያዝ (Arbitrary Arrest) የተከለከለ መሆኑን ይገልጻል።


የሕገ መንግሥታችን አንቀጽ 13(2) በምዕራፍ ሦስት ሥር የተዘረዘሩ መብቶችና ነፃነቶች ኢትዮጵያ ከተቀበለቻቸው ዓለም አቀፍ የሰብአዊ መብቶች ሕግጋት፣ ስምምነቶችና መርሆዎች ጋር በተጣጣመ መንገድ መተርጎም የሚገባቸው መሆኑን ስለሚደነግግ ስለ ነፃነት መብት የሕገ መንግሥታችን የእንግሊዝኛውን ቅጅ የሚደነግገውን ድንጋጌ ኢትዮጵያ ከተቀበለቸው የሲቪልና የፖለቲካ መብቶች ኮንቬንሽን ስለነፃነት መብት ከተደነገገው ድንጋጌ ጋር ስለሚቀራረብ በዚህ ረገድ ልንወስደው ይገባል።


ከተጠቀሰው ኮንቬንሽንም ሆነ በሕገ መንግሥታችን የግል ነፃነት ለመገደብ ወይም ለማሳጣት የሚቻለው በሕግ በተደነገጉ ምክንያቶችና ሥነ-ሥርዓቶች ስለመሆኑ፣ የአንድን ሰው የግል ነፃነት ለመገደብ የመያዣ ምክንያቶችና የመያዣ ሥነ-ሥርዓቶች በሕግ በግልፅ ሊደነገጉ እንደሚገባ፣ በሕግ ከተመለከተው ምክንያቶችና ሥነ-ሥርዓት ውጭ አንድን ሰው መያዝ ወይም ማሰር የተከለከለ መሆኑን እና በጭፍንነት የግል ነፃነትን ማሳጣት የተከለከለ መሆኑን እንረዳለን። የሰብዓዊ መብቶች ኮሚቴ (Human Rights Committee) በተጠቀሰው ኮንቬንሽን ስለ ጭፍንነት (Arbitrariness) የሚገልፀውን ሐረግ በሚመለከት የሰጠው ትርጓሜ ‟ ‘Arbitrariness’ is not to be equated with ‘against the law’ but must Be Interpreted more broadly to include the elements of inappropriateness, injustice and lack of predictability such that remand in custody must not only be lawful but also reasonable in all circumstances.” የሚል ነው።


በመሆኑም “በጭፍን መያዝ የተከለከለ ነው” የሚለው ሐረግ የአንድን ሰው የግል ነፃነት ለመገደብ በሕግ በግልጽ የተደነገጉ የመያዣ ምክንያቶችና ሥነ ሥርዓቶች መኖራቸውን ብቻ ሳይሆን እነዚህ በሕግ የተደነገጉ ነጻነትን ሊገድቡ የሚችሉ ሕጎች የማያዳሉ ፍትሐዊና ሊተነበዩ የሚችሉ መሆን የሚገባቸው መሆኑን ያመላክታል። የነጻነት መብት በወንጀል የተከሰሰን ሰው የተከሰሰበት ጉዳይ በፍርድ ቤት ከመሰማቱ በፊት መታሰር (Pre-trial detention) የሌለበት መሆኑን ይገልጻል። በፍርድ ቤት የወንጀሉ ክስ ከመሰማቱ በፊት የተከሳሹን ነጻነት (Pre-trial freedom) ለመጠበቅ የተፈለገበት ምክንያት የጥፋተኝነት ውሣኔ በፍርድ ቤት ከመሰማቱ በፊት በተከሣሹ ላይ ቅጣት ላለመጣልና ተከሣሹ ለቀረበበት ክስ ያለአንዳች መሰናክል መከላከያ እንዲያዘጋጅ ለማስቻል ነው።


ምንም እንኳ በአንድ በኩል ክስ ከመሰማቱ በፊት የተከሣሽን የግል ነጻነት መጠበቅ የሚያስፈልግ ቢሆንም በሌላ በኩል ደግሞ ተከሣሹ ቢለቀቅ ክሱ በሚሰማበት ወቅት ፍርድ ቤት ላይቀርብ ስለሚችል መንግሥት ተከሣሹን ለፍርድ ለማቅረብ ካለው ፍላጎት ጋር የተከሣሹ መብት መጣጣም ይኖርበታል። የዋስትና መብት በመሠረቱ የሚያነጣጥረው እነዚህን ሁለት ጥቅሞች (Interests) በማጣጣም ላይ ሲሆን የተለመደው መሠረታዊ ዓላማው ተከሣሽን የቀረበበት ክስ በፍርድ ቤት ከመሰማቱ በፊት በእስር በማቆየት ለመቅጣት ሳይሆን ክሱ በሚሰማበት ወቅት ፍርድ ቤት እንዲቀርብ በቂ ተያዥ (Guarantee) አምጥቶ ከእስር እንዲለቀቅ ለማድረግና ፍርድ ቤት በሚወስነው ማናቸውም ጊዜ ተከሣሹን ፍርድ ቤት የሚቀርብ መሆኑን ለማረጋገጥ ነው።


በሲቪልና በፖለቲካ መብቶች ዓለም አቀፍ ኮንቬንሸንም ሆነ ሕገ-መንግሥታችን የነፃነት መብት በማናቸውም ሁኔታ የማይገደብ ለማናቸውም ለተያዙ ሰዎች ሁልግዜ መከበር ያለበት መብት አይደለም። እነዚህ ሕጎች ለተያዙ ሰዎች በዋስትና የመለቀቅ መብት ያላቸው መሆኑን የሚያረጋግጡ ቢሆኑም ውስን በሆኑ በሕግ በግልጽ በተደነገጉ ምክንያቶችና ሥነ ሥርዓቶች መሠረት ግን የተከሣሾችን የዋስትና መብት በመገደብ ተከሣሾቹ የተከሰሱበት የወንጀል ጉዳይ በፍርድ ቤት ከመሰማቱ በፊት በእስር እንዲቆዩ ለማድረግ ሕጎቹ ይፈቅዳሉ።


የሕገ መንግሥታችንን አንቀጽ 16(6) እና 17 በማያያዝ ስናነበው በሕግ በተደነገጉ ምክንያቶችና ሥርዓቶች ካልሆነ በቀር ማንም ሰው ነፃነቱን ማጣት የሌለበት መሆኑን ወይም ሳይፈረድበት መታሰረ የሌለበት መሆኑን፣ የዋስትና መብት ገደብየለሽ ሳይሆን በሕግ በተደነገጉ ልዩ ሁኔታዎች ሊገደብ እንደሚችል፣ ሕግ አውጪው ልዩ ሁኔታዎች ናቸው በማለት በግልጽ በሚያውጃቸው ድንጋጌዎች መሠረት በተወሰኑ ጉዳዩች የአንድን ተከሣሽ የዋስትና መብት ፍርድ ቤት ላለመቀበል እንደሚችል ያስረዱናል። ሆኖም የዋስትና መብትን የሚገድብ ሕግ የነፃነት መብትንም ስለሚገድብ ሕጉ የዋስትና መብት የሚነፈግባቸውን ምክንያቶችና ሥርዓቶች በግልጽ የሚደነግግና ገደቡም በጭፍን ወይም በሚያዳላ ወይም ኢፍትሐዊ ወይም በማይተነበይ አኳኋን ሊፈፀም የማይገባ መሆኑን የሚያረጋግጥ መሆን አለበት።


የዋስትና መብት ‟በሕግ በተደነገጉ ልዩ ሁኔታዎች” የሚገደበው በሁለት መንገድ ነው። አንዱ መንገድ በማናቸውም የወንጀል ክሶች ላይ የዋስትና መብት ጥያቄ ተቀባይነት እንዳያገኝ ፖሊስ ወይም ዐቃቤ ሕግ ተቃውሞ ሊያቀርብባቸው የሚችልባቸውን ምክንያቶች ወይም ፍርድ ቤቱ የዋስትና ጥያቄን ላለመቀበል የሚያስችሉትን የተወሰኑ ምክንያቶች በወንጀለኛ መቅጫ ሥነ-ሥርዓት ሕግ በግልጽ ዘርዝሮ መደንገግ ነው። ለምሳሌ በሐገራችን የወንጀለኛ መቅጫ ሥነ-ሥርዓት ሕግ ቁጥር 67 መሠረት በዋስትና ወረቀት የመልቀቅ ማመልከቻን መቀበል የማይቻለው፦


ሀ/ በዋስትናው ወረቀት የተመለከቱትን ግዴታዎች አመልካቹ የሚፈጽም የማይመስል የሆነ እንደሆነ፣


ለ/ አመልካቹ ቢለቀቅ ሌላ ወንጀል ይፈጽም ይሆናል ተብሎ የሚገመት ሲሆን፣


ሐ/ ምስክሮችን በመግዛት (በማባበል) ወይም ማሰረጃ የሚሆኑበትን ያጠፋ ይሆናል ተብሎ የሚገመት ሲሆን ነው በማለት ይደነግጋል።


ሌላው መንገድ ደግሞ የዋስትና መብት የማያሰጡ ወንጀሎችን (Non-Bailable Offences) በመዘርዘር ማስቀመጥ ነው። ለምሳሌ የወንጀለኛ መቅጫ ሥነ ሥርዓት ሕጋችን አንቀጽ 63(1) ‟ማንኛውም የተያዘ ሰው የተከሰሰበት ወንጀል የሞት ቅጣትን ወይም አሥራ አምስት ዓመት ወይም በላይ የሆነ ጽኑ እስራት የሚያስቀጣው ከሆነና ወንጀል የተፈፀመበት ሰው በደረሰበት ጉዳት የማይሞት የሆነ እንደሆነ ፍርድ ቤቱ የዋስትና ወረቀት አስፈርሞ ለመልቀቅ ይችላል።” በማለት የተደነገገው ድንጋጌ ሌላውን የዋስትና መብት የሚገደብበት መንገድ የሚያመለክት ነው።


በዚህ ረገድ የውጭ ሀገር ልምድን ለማየት የዩናይትድ ስቴትስን ልምድ ስንወስድ የሚከተለውን እንረዳለን። በአሜሪካ ሁሉም የክልል መንግሥታት በከባድ ወንጀል የተከሰሱ ሰዎች ‟When the proof is evident or the presumption is great that the accused committed an offence” የዋስትና መብት በፍርድ ቤት ሊገደብ እንደሚችል ይደነግጋሉ።


ሁሉም የአሜሪካ ክልሎች የግድያ ወንጀል የዋስትና መብትን የሚከለክል መሆኑን የሚደነግጉ ሲሆን፣ ከዚህም በተጨማሪ የተወሰኑ የክልል መንግሥታት የበታች ፍርድ ቤት ዳኞችን (magistrates) በከባድ ወንጀል ለተከሰሱ ሰዎች ወይም ከዚህ ቀደም በወንጀል ለተቀጡ ሰዎች የዋስትና መብት እንዲከለክሉ ያዛሉ። ሌሎች የተወሰኑ የአሜሪካ ክልል መንግሥታት ደግሞ የዋስትና መብት የማይከበርባቸውን የወንጀል ዓይነቶች በመዘርዘር ይደነግጋሉ። ከዚህ ባሻገር በአሜሪካ በፌዴራል ደረጃ የወጣው ‟the Federal Bail Reform Act Of 1984” ተብሎ የሚታወቀው ሕግ የማሕብረሰብን ደህንነት ለመጠበቅ ሲባል የወንጀል ክስ በፍርድ ቤት ከመሰማቱ በፊት /Pre-Trial detention/ በተወሰኑ ከባድ ወንጀሎች የተከሰሱ ሰዎች የዋስትና መብትን ይከለክላል። የዋስትና መብትንና የነፃነት መብትን በሚመለከት ከላይ ያቀረብነውን ማብራሪያ መሠረት በማድረግ አሁን በያዝነው ጉዳይ ላይ የተነሳውን አዋጅ ቁጥር 239/1993 አንቀጽ 51(2) ከኢ.ፌ.ዴ.ሪ. ሕገ መንግሥት ጋር ይቃረናል ወይ? የሚለውን መሠረታዊ ጭብጥ እንደሚከተለው መርምረነዋል።


የማመልከቻ አቅራቢዎች መነሻ ክርክር ሕገ መንግሥቱ በዋስትና መብት ገደብ እንደሚደረግበት ቢደነግግም ይህ ገደብ ‟በሕግ በተደነገጉ ልዩ ሁኔታዎች ፍርድ ቤት ዋስትና ላለመቀበል ወይም በገደብ መፍታትን ጨምሮ በቂ የሆነ የዋስትና ማረጋገጫ እንዲቀርብ ለማዘዝ ይችላል” በሚል መልክ የተቀመጠ በመሆኑ ገደቡ በየጉዳዩ ፍርድ ቤት ውሣኔ የሚሰጥበት እንጂ ሕግ አውጪው አንድን የወንጀል ዓይነት ለይቶ ዋስትና ያሳጣል እንዲል ሥልጣን አይሰጠውም የሚል ነው። ለዚሁ አስተያየት መሠረት ነው የተባለውም በአንቀጽ 19(6) በሕግ በተደነገጉ ልዩ ሁኔታዎች ከሚለው የድንጋጌው ይዘት ልዩ ሁኔታዎች ለሚለው ሐረግ በሚሰጠው ትርጉም የሚወሰን ነው። ልዩ ሁኔታዎች ማለት ደግሞ ፍርድ ቤቶች እንደነገሩ ሁኔታ እያንዳንዱን ጉዳይ ሲመረምሩ የሚያዩት እና የሚደርሱበት እንጂ ቀድሞ በሕግ ሊወሰን የሚችል አይደለም። የዋስትና መብት በፍርድ ቤት የሚታይ (Justiciable Matter) በመሆኑ ሕግ አውጪው በፀረ ሙስና አዋጅ ያስቀመጠውን ዓይነት ድንጋጌ በሕግ እንዲያወጣ ሕገ መንግሥቱ አይፈቅድም የሚል ነው።


የዋስትና መብት ሕገ መንግሥታዊ መብት መሆኑና በመርህ ደረጃ የተያዙ ሰዎች በዋስትና የመፈታት መብትም ሕገ-መንግስታዊ ደረጃ ያገኘ መሆኑ የሚያከራክር አይደለም። የዋስትና መብት እንደብዙዎቹ መብቶች ገደብ ሊደረግበት እንደሚችልም አከራካሪ አይደለም። ለቀረበው አቤቱታ መነሻ ምክንያት የሆነው የዋስትና መብት የሚገደበው በምን ዓይነት ሁኔታ ነው የሚለውን አስመልክቶ ነው። ሕገ መንግሥቱ በአንቀጽ 19(6) ‟በሕግ በተደነገጉ ልዩ ሁኔታዎች ፍርድ ቤት ዋስትና ላለመቀበል ወይም በገደብ መፍታትን ጨምሮ በቂ የዋስትና ማረጋገጫ እንዲያቀርብ ለማዘዝ ይችላል” በማለት ይደነግጋል።


ከዚህ ድንጋጌ ሁለት አበይት ነጥቦችን ማየት ይቻላል። የመጀመሪያው ነጥብ ፍርድ ቤት የዋስትና ጥያቄ ሲቀርብለት ሁለት አማራጮች እንዳሉት ይገልጻል። ፍርድ ቤት የዋስትና ጥያቄውን አልቀበልም ሊል ይችላል። ዋስትና የሚፈቀድ ሲሆን ደግሞ ዋስትና ጠያቂው በገደብ እንዲፈታ ካለሆነ ደግሞ በቂ የዋስትና ማረጋገጫ እንዲያቀርብ ሊጠይቀው ይችላል።


ሁለተኛው ነጥብ ፍርድ ቤቱ ከላይ የተመለከቱትን አማራጮች ሊወስድ የሚችለው በሕግ በተደነገጉ ልዩ ሁኔታዎች መሠረት መሆኑን የሚገልጽ ነው። በመሆኑም የዋስትና ገደብ በማስቀመጡ ረገድ ሕግ አውጪው እና ፍርድ ቤቶች የየራሳቸው የሥራ ድርሻ እንዳላቸው ግልጽ ነው። እዚህ ላይ መታየት ያለበት ዋናው ነጥብ ሕግ አውጪው ዋስትና የማይፈቀድባቸውን ልዩ ሁኔታዎች እንዲደነግግ መብት ይሰጠዋል። ዋስትና መከልከል የመሠረታዊ መብት ገደብ በመሆኑ ሕግ አውጪውም ሆኑ ፍርድ ቤቶች በጥንቃቄ ሊያዩት እንደሚገባ ይታመናል። ሕግ አውጪው የሚያወጣው አዋጅ በሕገ መንግሥት የሰፈረውን መብት በተወሰነ ደረጃ ከመገደብ አልፎ ዋናውን መብት ማጥፋትና መናድ ስለማይችል የአዋጁ ድንጋጌዎች አቀራረጽ እና ትርጉም ግልጽ ሆኖ እንዲቀመጥ ማድረግ ይጠበቅበታል። ‟ልዩ ሁኔታዎች” በውስን አድማስ የሚፈፀሙ መሆናቸውን የሚጠቁም በመሆኑ ማንኛውም የዋስትና መብት የሚገድብ ሕግ በአፈፃፀም ገደብ የለሽ እንዳይሆን እያንዳንዱ ድንጋጌ በጥንቃቄ መቀረጽ ይኖርበታል።


ከዚህ በመለስ ሕግ አውጪው የዋስትና መብትን የሚገድብ ሕግ ሲያወጣ አንድን ወንጀል ለይቶ ዋስትና አያሰጥም ከማለት ሊከለከል አይችልም። ሕግ አውጪው ልዩ ሁኔታዎችን በሁለት አመማራጮች ሊያስቀምጥ ይችላል። አንድም ዋስትና የማያሰጠውን የወንጀል ዓይነት ለይቶ ማስቀመጥ፣ አሊያም በየትኛውም ዓይነት ወንጀል ቢሆን ዋስትና ሊያስከለክሉ የሚችሉ ፍሬ ነገሮችን መዘርዘር ናቸው። በሕግ አውጪው ተለይቶ የተጠቀሰው ወንጀል የዋስትና መብት አያሰጥም መባሉ ዋስትናው በፍርድ ቤት የማይታይ (Non-Justiciable Matter) የሚያደርገው አይሆንም።


ዞሮ ዞሮ ዋስትና ያስከለክላል የሚባለው ወንጀል ዋስትና ለመከልከል በቂ ፍሬ ነገሮች ቀርበዋል አልቀረቡም የሚለውን ነጥብ መመርመር ያለበት ፍርድ ቤቱ ነው። የሙስና ወንጀል ዋስትና አያሰጥም የሚል ሕግ ቢኖርም አንድ ሰው በሙስና ወንጀል ለመያዝ በቂ ምክንያት አለ ወይንስ የለም የሚለው ነጥብ በአሳሪው ብቻ የሚወሰን ሳይሆን በፍርድ ቤት ሊታመንበት የሚገባ ነገርም መሆን አለበት። ሙስና ማለት ምን ማለት ነው? የሚለውን በመመለስም ፍርድ ቤቶች ኃላፊነታቸውን በአግባቡ እንደሚወጡ መገመት አግባብ ነው። ሕግ አውጪው በአዋጁ አፈፃፀም የሚገጥሙ ችግሮች ተመልክቶ መፍተሄ ማፈላለግ እንዳለበትም ይታመናል።


ከዚህ ውጪ የሙስና አዋጅ ዋስትና የሚከለክል በመሆኑ የሕገ መንግሥቱን አንቀጽ 19(6) የሚጥስ ነው ለማለት የሚቻል አይደለም። በመሆኑም ጉዳዩ ለሕገ መንግሥት ትርጉም ለፌዴሬሽን ምክር ቤት መላክ ያለበት አይደለም በማለት ወስነናል።

 

ማጠቃለያ


1. ከዚህ በላይ ለማሳየት እንደተሞከረው የዋስትና መብትን ወዲያውኑ የሚከለክሉት ሕጎች ሕገ መንግሥታዊ ናቸው ወይስ አይደሉም? የሚለውን መሠረታዊ ሀሳብ በተመለከተ በዳኞች እና በሌሎች የሕግ ባለሙያዎች መካከል አንድ ወጥ የሆነ አመለካከትና መግባባት አለ ብሎ ለመናገር አይቻልም።


2. የሕገ መንግሥቱን አንቀጽ 19(6) ድንጋጌ ኢትዮጵያ ተቀብላ ካፀደቀቸው የሲቪልና የፖለቲካ መብቶች ዓለም አቀፍ ኮንቬንሽን አንቀጽ 9(3) እና በዓለማቸን ከፍተኛ ተጽዕኖ ያላቸው የሕግ ሥርዓቶች ካዳበሩት አሰራር አንጻር በመነሳት የተለያዩ ሀሳቦች እና የአተረጓጎም ልዩነቶች በዳኞች፣ በሕግ ባለሙያዎች መካከል የተፈጠረ መሆኑን ለመገንዘብ ይቻላል።


3. የዋስትና መብትን ወዲያውኑ የሚከለክሉት ሕጎች የሕገ መንግሥቱን አንቀጽ 19(6) ድንጋጌ የሚጥሱ እና በአጠቃላይ የሕገ መንግሥቱን የበላይ ሕግነት የሚጋፉ ስለሆነ ሕገ-መንግሥታዊ አይደሉም ይባልልን በማለት ለሕገ መንግሥት ጉዳዩች አጣሪ ጉባዔ አቤቱታ ቀርቦ የነበረ ሲሆን ጉባዔውም ዋስትና የሚከለክሉት ሕጎችና ደንቦች ከሕገ መንግሥቱ አንቀጽ 19(6) ጋር የሚቃረኑ አይደሉም። በመሆኑም ጉዳዩ ለሕገ መንግሥት ትርጉም ለፌዴሬሽን ምክር ቤት መላክ ያለበት አይደለም በማለት ውሣኔ ሰጥቷል። ይህ የሕገ መንግሥት ጉዳዩች አጣሪ ጉባዔ ውሣኔ በይግባኝ ለፌዴሬሽን ምክር ቤት ቀርቦ ያልተሻረ በመሆኑ እንደመጨረሻ ውሣኔ ሆኖ ይቆጠራል።


4. በመሠረቱ የኢትዮጵያ ፌዴራላዊ ዲሞክራሲያዊ ሪፕብሊክ የፌዴሬሽን ምክር ቤት በኢፌዲሪ ሕገ መንግሥት አንቀጽ 62(1) መሠረት ሕገ መንግሥትን የመተርጎም ሥልጣን ያለው አካል ሲሆን የዚህን አካል ሥልጣን እና ተግባር ለመዘርዘር በወጣው አዋጅ ቁጥር 251/ 1993 አንቀጽ 3(1) ሥርም ሕገ መንግሥትን የመተርጎም ሥራ የምክር ቤቱ መሆኑ በግልጽ ሰፍሯል። በዚህ አዋጅ አንቀጽ 56(1) ሥር ደግሞ ምክር ቤቱ በቀረበለት ጉዳይ የሚሰጠው ውሣኔ የመጨረሻ ስለመሆኑ የተደነገገ ሲሆን በዚሁ ድንጋጌ ንዑስ-አንቀጽ 2 ድንጋጌ ሥርም ጉዳዩ የሚመለከታቸው ወገኖች ውሣኔውን የማክበር እና የመፈፀም ግዴታ ያለባቸው መሆኑ አስገዳጅነት ባለው መልኩ ተቀምጧል።


5. የፌዴሬሽን ምክር ቤት በሕገ መንግሥት ጉዳዩች አጣሪ ጉባዔ በመታገዝ የሕገ መንግሥት ትርጉም ጥያቄ በሚያስነሱ ጉዳዩች ላይ ውሣኔ ይሰጣል። የሕገ መንግሥት ጉዳዩች አጣሪ ጉባዔ የዋስትና መብትን ወዲያውኑ የሚከለክሉት ሕጎች ከሕገ መንግሥቱ ጋር አይቃረኑም በማለት የሰጠው ውሣኔ ለጉዳዩ የመጨረሻ ሲሆን በዳኞችና በሕግ ባለሙያዎች መከበርና መፈፀም ያለበት ስለመሆኑ ከድንጋጌዎቹ ይዘትና መንፈስ የመንገነዘበው ጉዳይ ነው። ይህ ማለት ግን ሁሉም የሕግ ባለሙያ በጉባዔው ውሣኔ ይስማማል ማለት አይደለም። ውሣኔው በመሠረታዊ ባህሪውም ሆነ በውጤት ደረጃ የተለያየ ትርጉም በመስጠት ወጥነት የሌለው የሕግ አተረጓጎምና አፈጻጸም እንዳይኖር ለመከላከልና በሐገር ደረጃ አንድ ወጥ የሆነ የሕግ አተረጓጎም ለማስፈን ረድቷል ማለት ይቻላል።

 

ልጅ አምበራ

 

ባንድ ወቅት የዱር እንስሳት በሆዳቸው ከሚሳቡት በእግሮቻችው ከሚራመዱት፣ በክንፎቻቸው ከሚበሩት ሳርና ቅጠል በሎች፣ ስጋ ተመጋቢዎች እንዲሁም ያገኙትን ከሚመገቡት መካከል ከየዘሮቻቸው የተወጣጡና ሐሳባችሁ ሐሳባችን ነው፣ ልሳናቸሁ ልሳናቸው ነው። ጉዳያቸሁ ጉዳያችን ነው ተብለው የተመረጡት ተወካዮች በተገኙበት በተዘጋጀው ውይይት ላይ ልዩነታቸውን አጥብበው የጋራ በሚያደርጓቸው ጉዳዮች ላይ እንዴት መተባበር እንዳለባቸው እንስሳቱ ሲመክሩ ዋሉ።


‹‹ምድረቱን እንድንገዛት ምን እናድርግ። በሠው ልጆች የተወሰደብንን ብልጫ እንዴት እንቀልብስ›› የሚል ከጀንዳ ተይዞ ውይይት ተካሔደ። በውይይቱ የተለያዩ ሐሳቦች ተሠነዘሩ።
‹‹በእኔ ግምት የሠው ልጆች አኗኗር ሳይሆን የፍትሃዊነትና የእኩልነት ጉዳይ ነው ችግራችን›› አለች ከጦጣዎች የተወከለችው እንስሳ።


‹‹የለም የለም በጫካው ሠላም እንዲነግስ ከተፈለገ አንዳችን የሌላችን ጠላት መሆናችን ያብቃ›› አለ ዝንጀሮ ለጥቆም ጅብ የተባለው እንስሳ ስጋ ተመጋቢ ወዳጆቻችን በሠው ልጆች ደባና ሸፍጥ የተነሳ ምግባቸውን እያሳጡብን ይገኛሉ። ደኖች ከጊዜ ወደ ጊዜ እየተጨፈጫፉ ነው። ይኸ ሁኔታ በተዘዋዋሪ እኛን የሚመለከት ሁኖ ሥላገኘነው የችግሩን አሳሳቢነት ከግምት ውስጥ በማስገባት ከመቸውም ጊዜ ይልቅ የጫካውን ደህንነት ለማስከበር ውሳኔ ላይ ደርሰናል።›› ሲል

አንበሳም በበኩሉ ‹‹እኔ በበኩሌ በአያ ጀቦ ሃሳብ እስማማለሁ የሠው ልጆች መስፋፋት በቀጥታም ሆነ በተዘዋዋሪ እኛንም የሚጐዳ በመሆኑ ድርጊቱን አጥብቄ እቀዋመዋለሁ›› አለ
‹‹በስጋ በል ወንድሞቻችን ጥቃት በአፋጣኝ እንዲያስቆምልንና በሕይወት የመኖር ነፃነታችን እንዲከበርልን ጉባኤውን እጠይቃለሁ›› አለች ሚዳቋ።


‹‹ሁላችንም በሕይወት የመኖር ዋስትናችን የሚወሰነው ባለን ጥንካሬ ልከነው። በዱር አለም የኔ የሚባል ግዛት የግል የሚባል ክልል የለም። ሁሉም ነገር የሁላችን ነው። ማናችንም ብንሆን እንኳን የራሳችን አይደለንም። ትጋትና ጥንካሬ ከሌለን በሕይወት የመኖር መብታችን እናጣለን›› አለ”ች ተኩላ።


‹‹ጉባኤው ከግራም ከቀኝም ሐሳቦች እየተንሸራሸሩበት በእንስሳቱ አለም የሥጋት ምንጭ የሚባሉት ተለይተው የመፍትሔ አቅጣጫ ተሠጥቶባቸው በአንዳንድ ሥጋ በልና ተሳቢ እንስሳት ላይ በተለየ ሁኔታ ምክክር ተደርጐባቸው ተመጣጣኝ የሚባል ቅጣት ተጣለባቸው። በነገሩ ግራ የተጋባችውና ስብሠባው ለሳር በልና ደካማ የዱር እንስሳት ዋስትና ለሕይወታቸው የሚሠጥ ሳይሆን ሌሎች ተጨማሪ ሥጋቶችን የፈጠረ መሆኑን የበላይ እምባ ጠባቂ ተደርገው የተሾሙት እንስሳት ራሳቸውን እንኳን ከአዳኞቻቸው ወጥመድ የሚያስጥል ጥንካሬ እንደ ሌላቸው ሚዳቋ ሐሳብ ሠጠች።


የመድረኩ መሪ የሆነው እንስሳ አያ አንበሴ በበከሉ የሳርበል እንስሳትን ነፃነት ለመጠበቅ ሥጋ በሎችን መሾም ፍትሃዊነት ታማኝነት እንደሌለው በመግለፅ ከዚህ ይልቅ የሜዳ አህዮች ቆርኪዎችን፣ ደኩላዎች ዝሆኖችና ቀጭኔዎች ሌሎችም ሳር በል የሚያመሰኩትና የማያመሳኩት ሾክና ያላቸውና የሌላቸው እንስሳት ራሳቸውን ከጠላት የመከላከል አቅማቸውን በማጐልበት በወዳጆቻቸው የተጣለባቸውን ሐላፊነት በታማኝነትና በቅንነት እንዲወጡ ጉባኤው መወሰኑ መልካም መሆኑን አስረዱ። ለጥቀውም በመፈራራት ላይ የተመሠረተ አንድነት አላማቸውን ከግብ ለማድረስ እንደማይረዳቸው አስረዱ።


በዚህ ጉባኤ በአመዛኙ ትኩረት የተሠጠበት ጉዳይ የሳር በሉ እንስሳት የሕልውና ጉዳይ በመሆኑ በቀነ ቀጠሮው የተያዘው አጀንዳ ተርስቶ ነበር ማለት ይቻላል። በመሆኑም በሐቅም ሆነ በብልሃት ራስን ከጠላት አደጋ ለመከላከል ሲባል የእምባ ጠባቂ ተቋም ይመሰረት የሚለው የበራሪ እንስሳት ሐሳብ ከቁብ በመቆጠሩ ምላሽ አገኘ። በዚህ ሁኔታ መላዎች ዘዴዎች ተሠናድተው ሕጐችና ደንቦች ረቀው በጉዳዩ ላይ ሐሳብ እንዲሠጥበት ሲደረግ አያጅቦ የተባለው እንስሳ ስብሠባው ሥጋ በሎችን ያገለለ ለሳርና ቅጠል በሉ ወገን ብቻ ያደላ እንጂ የሥጋ በሉ የወደፊት እጣፈንታ እንዳልታሠበበት፣ በሥጋ በሉ ላይ የተሰናዳ ሸፍጥና ደባ መሆኑን፣ ይኼም ሁኔታ ከዘር ማጥፋት ወንጀል እንዳማይተናነስ ‹‹አድናችሁ አትብሉ መባሉ›› ‹‹በራችሁን ዘግታችሁ ሙቱ›› እንደ ማለት እንደሚቆጠር እና ጉባኤውም ተሠሚነትንና ዝናን ለማትረፍ ሲባል ሕቡዕ ፍላጐትን ያዘለ እና የእንስሳቱን ዘር ከማቀራረብ ይልቅ በልዩነት ውስጥ ያለውን አንድነት የሚጐዳ መሆኑን አስረዳ።


ቀጭኔ የተባለችው ሳርና ቅጠል በል እንሳስ በበኩሏ በአያጅቦ ሐሳብ እንደምትሰማማ ገልፃ በሥጋ በሉ እንስሳት የደረሠውን በደል ሳር በል እንስሳቱ በጉባኤ እንዲያስረዱ መደረጉ አግባብነት እንደሌለውና ለሌሎች አዳኝ እንስሳት ልምድን የሠጠና በምን አይነት ብልሀት ታዳኝን ማጥመድ እንደሚቻል ተሞክሮ የሠጠ በመሆኑ በጉባኤው የተደረሠባቸው ሥምምንነቶች በቀጭኔው ማኀበር እንስሳ ዘንድ ተቀባይነት እንደማይኖረው አስረዳች።


ለጥቃም ሁኔታዎችን ከላይ ሆኖ ለመከታተል የሚያስችል ቁመና ባለቤት እንደሆነች ሁሉ የነገሮችን ሥር መሠረትም ከምንጩ ለመገንዘብ የሚያስችል አእምሮ እንዳላት ገልፃ ይኼ ጉባኤ የአደባባይን አደን የከለከለ ሥውር ወጥመድ መሆኑን ገለፀች።


ተኩላ የሚባለው ሥጋ በል እንስሶ በበኩሉ የአያጅቦን ሐሳብ እንደሚደግፍ ከገለፀ በኋላ በእንስሳቱ መካከል ያንጃበበውን ፍርሀት ለመናድ እና በእውነተኛ ወዳጅነት ላይ የተመሠረተ አንድነት ለመመስረት ብቸኛው መንገድ አንደኛው የእንስሳ ዘር በሌላኛው የመኖር ሕልውና ላይ የተመሠረተ እንደሆነ አምኖ መቀበል መሆኑን አስረዳ።


የሳርና ቅጠል በሉን እንስሳት ስጋቶች ምላሽ ለመስጠት ከሚደረግ ስብሰባ ይልቅ እነዚህን ተፈጥሮአዊ ልዩነቶች እውቅና ለመስጠት ጥረት ማድረግና በማህበረ እንስሳቱ ዘንድ ይህን የማይታበይ እውነታ ማስገንዘብ ያስፈልጋል አለ።
አያነብሮ በበኩሉ “ባልደረቦቼ በሠነዘሩት ሐሳብ እስማማለሁ። እንደዚህ አይነት የተከፋፈሉ ልዩነቶችን ይዘን ምድሪቷን ተቆጣጥረን፣ የሠው ልጆችን መግዛት የምንችልበትን አቅም አናገኝም። ዳሩ ግን በሕይወት ለመቆየት የሚሆን ብልሀት ተፈጥሮ አዘጋጀታልናለች። ሁላችንም ውስጥ ጅብነት አለ። ምክንያቱም ከወዴት አቅጣጫ እንዲሆኑ የማናውቃቸው ሥጋቶች አሉብን። ሁላችንም ሚዳቋዎችን ነን፤ ሕልውናችንን ለማስረዘም ያለመተካት መሮጥ አለብንና ነው። ሁላችንም ጐሾችን በሕይወት ለመቆየት እንዋጋለንና ነው።


አንዳችን ያላንዳችን እንዳንኖር ሁነን ተፈጥረናል። ጅብ ያለሚዳቋ መኖር አይችልም። ዛሬ የምንመክርባቸው የሠው ልጆች ምንም እንኳን ተፈጥሮ የሰጠቻቸውን ሠብዓዊ አንድነት ድንበር እየፈጠሩ ሚስጥር እየመሠጠሩ፣ በፈጠሩት ሐይማኖትና ቋንቋ እየተከፋፈሉ ቢንዱትም የሚጠሉትን ጅብ ለአንድ ነገር አጥብቀው ይፈልጉታል።


እርሡም የበሏቸውን እንስሳት ቅሪቶች እንዲወገዱላቸው ሲሉ ጅብን አጥብቀው ይፈልጉታል። ያለ ጅብ ያለ ውሻ ሠዎች ኑራቸው ከቆሻሻ ጋር ይሆን ነበር ማለት ይቻላል።
በኔ እምነት ሥጋ በሎች በሳርና ቅጠል በሎች መንደር ድርሻ አይበሉ የሚል ሐሳብ መሠንዘር ቅጥፈት ነው። ይህንን ሁኔታ ከሥልጣን ፈላጊነት ለይተን አናየውም። ባንድነት ጫካውን መግዛት ይኖርብናል፤ ገዥነትን ለአንበሳ ብቻ አንተውም። ሥጋ የመብላት ግብር በምርጫ የተቀበልነው እጣ ሳይሆን ተፈጥሮ የጣለችብን ግዴታ ነው። የትኛውም ሳር በል በዱር በገደሉ ተንከራትቶ ሆዱን ከመሙላት ራስን ለመከላከል ሲባል በሚደረግ ውጊያ ሕይወቱን ከማጣት ቅጠል በል መሆን ይሻለኛል ብሎ ቅጠል በል ልሁን ብሎ የሆነ የለም።


ይልቁንስ ለሥጋ በል ወገኖቼ የሚሆን ምክር በዚህ አጋጣሚ መስጠት እፈልጋለሁ። ሳር በልና ቅጠል በል እንስሳቱ በዛፍ ላይ የሚንጠለጠሉት፣ በእግሮቻቸው የሚራመዱት በሰማይ በአክናፎቻቸው የሚበሩት ወገኖቻቸን ሕይወቶቻችን ናቸው። ልንከባከባቸው ይገባል። ሥናድን ቆጥበን ልንመገብ ይገባል። የምግብ እጥረት እንዳይገጥማቸው ደኖችን ከሠው ልጆች ጥፋት ልንጠብቅ ይገባናል። እነርሱን መጠበቅ ራሳችን መንከባከብ ነው።”


ጉማሬ የተባለው የውሃ ውስጥ እንስሳ በበኩሉ አስታራቂ ሐሳብ እንደያዘ ተናግሮ “እዩኝ እኔ ውብነኝ። በሥራዬም የምደጎም ታታሪ ነኝ። በሕይወት ለመቆየት የማንንም ፍቃድ አልጠብቅም፣ ነገር ግን ከራሴ ጋር ታርቄ የምኖር በመሆኔ ውሃውን ያለፍርሃት መኖሪያ ሁነኝ ብዬ የብሡንም ማዕዴ ነህ ብየው በእምነት በፍፁም ደስታ እኖራለሁ። ነገር ግን ግዙፍ ነኝ፣ ደግሞም ውብነኝ፣ የትኛውም አይነት እንስሳት ከእነምግቡ የተፈጠረ ቢሆንም እንኳን ማዕዱን የማክበር ግዴታ አለበት።


ታዳኞችም ቢሆን እራሳቸውን እንደተጠቂና እንደ ተጐጂ ከመቁጠር ይልቅ ያለ እነሡ ሊኖሩ የማይችሉ ደካማ ፍጥረት እንዳሏቸው መቁጠር አለባቸው። በመስዋዕትነት ውስጥ ያለውን ደስታ ለማጣጣም መሞከር አለባቸው። እኔ የሕይወት እንጀራ ነኝ ማለትን መማር አለባቸው። የሕይወት እንጀራውን በንቀት የሚመለከት ማንም ቢኖር ግን የተረገመ ነው። በመካከላችን ያለው ሠፊ ልዩነት እንዲጠብ ከተፈለገ በፍርሀት እና በጥርጣሪ ከመተያየት ይልቅ ፍፁም በጠነከረ አንድነት በሠላምና በፍቅር ጫካውን ለመጋራት ካስፈለገ የአዳኝነት እና የታዳኝነት ሥሜት ጠፍቶ የምግብና የተመጋቢነት ግንኙነት በመካከላችን ሊኖር ይገባል።


ለሳር በልና ቅጠል በል ወገኖች የምለው ምክር አለኝ። እኛ በሌሎች እጣፈንታ ላይ ወሳኞች አይደለንም። ነገር ግን አንዳችን ለሌላችን አስፈላጊዎች ነን። የተገዥነት እና የገዥነት መደብ በመካከላችን እንዲኖር መፍቀድ የለብንም። የእምባ ጠባቂም ሆነ ደንብ አስከባሪ አያስፈልገንም “ሲል ጭብጨባና ፉጨት በመድረኩ አስተጋባ። አያ አንበሴ ሕቡዕ ሐሳቡ ስለተደረሠበት እና ባመዛኙ በእንስሳቱ መካከል የመቀበልና የመደማመጥ አዝማሚያ የበላይነቱን እንደይነጠቅ ሥጋት ገባው። ማኀበረ እንስሳ ዘም ነገዶ አናብስት ንጉሰ ነገስት ተብሎ በጫካው የእንስሳት ዘር በሁሉም ዘንድ በሐይሉና በክንዱ ብርታት ተከብሮና ታፍሮ የኖረባቸው ዘመናት እንዳያልቁ እጅግ ፈራ “አንድነት የማይፈረካክሠው አለት የለም፣ መለያየት ግን ጥንካሬን ያሳጣል” ነበር ያለው። አያ ዝንጀሮ ታዲያ በእንስሳቱ ዓለም በንጉሱ አያ አንበሴ አሠባሣቢነት የተደረገው ውይይት በብዙ መግባባቶች ሲጠናቀቅ የፈላጭ ቆራጭነቱን ድርሻ ለሚወስዱትና በገዥነት መደብ ለሚፈረጁት ሌላ ሥጋትን የወለደ መሆኑ አልቀረም።


በሁለተኛው ቀነ ቀጠሯቸው እንስሳቱ በሌሎች ሐሳቦች ዙሪያ ለመነጋገር ወስነው አጨብጭበው ሲለያዩ በቀጣይ ውይይታቸው የቤት እንስሳቱን ሁሉ ያካተተ ለማድረግ ቃል በመግባት ነበር።
ቀጣዩ ዘመን ብሩህ ነው። ያረጀና ያፈጀ የተባለው ወግና ልማድ ባዲሱ የአስተሳሰብ መርህ ይተካል። ምናልባት በክንዶቻቸው ብርታት ትምክህት ያደረጉ በተባበሩት መዳፎች ስር አንድ ቀን ይወድቁ ይሆናል። ጊዜ ለኩሉ።

እንዲህ ቁርጡን ንገሩን እንጂ

Wednesday, 21 February 2018 11:46


የአብዛኛው የአዲስ አበባ ነዋሪ ቤት የማግኘት ተስፋ ተንጠልጥሎ የነበረ ቢሆንም በመጨረሻም የከተማ ልማትና ቤቶች ሚኒስቴር ቁርጡን ነግሮናል። 2005 የተደረገው ምዝገባ ተገቢ እንዳልነበረ እና ተመዝጋቢዎችን ሙሉ ለሙሉ የቤት ባለቤት የማድረግ እቅድ እንደሌለው ሚኒስትሩ ቁርጣችንን ነግሮናል። እንዲህ አይነቱ መርዶ ከመንግስት አፍ መውጣቱ ሊያስገርመን ይችል ይሆናል እንጂ አብዛኞቻችን ግን በውስጣችን ሲሰማን የነበረ ነገር ነው። እንዲህ አይነቱ ቁርጥ ያለ ውሳኔ በአንድ ጊዜ የማይወሰን በመሆኑ መንግስት ለረጅም ጊዜ ያቀደው እና ያሰበበት ውሳኔ እንደሆነ ግልፅ ነው። ነገር ግን በተደጋጋሚ ሲወጡ የነበሩ መረጃዎች አካሄዱ ተስፋ ሰጪ እንደነበር የሚጠቁሙ ነበሩ። የወሬውን መቀዛቀዝ እያየ መረጃዎችን ብቅ በማድረግ በርካታ ሰዎች ተስፋቸው እንዲንሰራራ ካደረገ በኋላ እንዲህ አይነቱን ተስፋ አስቆራጭ መርዶ መናገሩ ምን ማለት ነው? የእቅዱን አካሄድ በመመልከት ዜጎች ሌሎች አማራጮችን ማፈላለግ እንዲችሉ ማድረግ ሲቻል ጉዳዩን ሲያስታምሙ እዚሁ ደረጃ ላይ ማድረሱ ለምን አስፈለገ? ይሄን ያህል ጊዜ ተስፋ ሲሰጡ እና ችግሩን ሲሸፋፍኑ መቆየት ከተቻለ እግረ መንገድንም ሌሎች አማራጮች ተጠቅሞ ችግሩን ለማቃለል ጥረት ቢደረግ መልካም ነበር።   

አንተነህ ተስፋዬ - ከአዋሬ

 

በአለማየሁ ገበየሁ /UK/

 

ታሪኩ የተገነባው ብዙዎቻችን በምናውቀው እውነት ላይ ነው ። ጠላትህ ጠላቴ ነው ተባብለው የተማማሉ ሁለት ብሄርተኛ ቡድኖች ለረጅም አመታት ታግለው እንደ ሀገር የሚያስበውን ቡድን አሸንፈው ስልጣን ያዙ ።
በስልጣን ማግስት ሀገር የፈለገውን ይበል ብለው መስመር ባለፈ ፍቅር ከነፉ። እንደ ደራሲ ከበደ ሚካኤል ግጥም ‹ሁለት አፍ ያለው ወፍ› ሆኑ ። በፍቅር ተጎራረሱ። ተቃቅፈው በረሩ፣ አለም ጠበባቸው ... ተጣብቀው ዘመሩ ‹አይበላንዶ ...› እያሉ ።ተያይዘው ፈከሩ ! ‹ነፍጠኛ ሰመጠ፣ ተራራ ተንቀጠቀጠ› በማለት ... አብረው ተዛበቱ ‹ትግል ያጣመረውን ህዝብ አይለየውም› በሚል ስልቂያ ... ኪስህ ኪሴ ነው፤ ሚስትህ ሚስቴ ናት፤ ግዛትህ ግዛቴ ... ምን ያልተባባሉት አለ? ከአይን ያውጣችሁ ያላቸው ግን አልነበረም።


እየቆየ አይንና ናጫ ሆኑ ... በአጎራረስህ እየተጎዳው ነው በሚል አንደኛው አፍ የጫካ ውንድሙን ካደ። የእህል ምርቱንም ሆነ የሚያጌጥበትን ማእድን ደበቀ። የብር ኖቶችን ቀየረ፣ የድንበር ንግድ ግብይት በዶላር እንዲሆን ድንገተኛ ህግ አረቀቀ። ይህ ተግባር ለሁለተኛው አፍ የማይታመን ክህደት ነበር። ባጎረስኩ እጄን ተነከስኩ አለ። ጠፍጥፎ በሰራው ልጅ ተናቀ ... ሹካ አያያዝ አስተምሬው? በኔ ደም ለወንበር በቅቶ እንዴት ክብሬን ያራክሳል በማለት ለጦርነት ተዘጋጀ።


‹አውሮራ› ይህን የምናውቀውን ታሪክ ይዞ ነው መዋቅሩን የገነባው። የኢትዮ ኤርትራ ጦርነት እንዴት ተጀምሮ እንደምን እንዳለቀ እናውቃለን፣ ምን እንዳስከተለም የብዙ ወገኖች መረጃ አለን። የመንግስት ሚዲያዎችን ጨምሮ የድርጅቶቹ ልሳኖች የአውደ ውጊያውን ታሪክና የታሪክ ሰሪ ሰዎችን ህይወት በመዳሰስ አታካች በሆነ መልኩ በተከታታይ አቅርበውልናል። ታዲያ አውሮራ ምን የተለየ ነገር ሊነግረን ታሪክ ቀመስ ልቦለድ ሆነ? ቢባል ትክክል ነው።
ደራሲው ሀብታሙ አለባቸው ግን ብልህ ነው፣ ገና በጠዋቱ፣ ሁለተኛው ምዕራፍ ላይ ያስተዋወቀንን የታሪክ በከራ እንዴት ሳይሰለች እያጠነጠነ እስከ ምዕራፍ 43 መዝለቅ እንዳለበት በሚገባ ተረድቷል። ስለተረዳም ሳቢና ተነባቢ አደረገው።


ይህን ለማከናወን ከረዳው ስልት አንደኛው የትረካውን ኳስ ለመለጋት በመረጠው የመቼት አንግል የተወሰነ ይመስለኛል። ደራሲው 80 ከመቶ የሚሆነውን ታሪክ የሚያቀብለን ከኤርትራ አንጻር ሆኖ ነው። በትረካው የአስመራን ውበት፣ የወታደራዊ ካምፖችን ሚስጢር፣ የደህንነት ተቋማት ፕሮፓጋንዳ፣ ሳዋ ስለተባለው የሰው ቄራ፣ የፕሬዝዳንቱን ጽ/ቤት ከነተግባርና ግዴታቸው እንመለከታለን። የህዝቡን አበሻዊ ጥላቻ፣ ፖለቲካዊ ሹክሹክታ እና ስነልቦና እንመረምራለን። የባለስልጣናቱን በተለይም የፕሬዝዳንቱን እምነት፣ አስተሳሰብ እና ፍላጎት እንታዘባለን። በአጠቃላይ ከአስመራ የምናገኘው አዲስ መረጃ ታሪኩ ሰቃይና አጓጊ እንዲሆን ትልቅ ሚና ተጫውቷል። የታሪኩ ልጊያ ከአስመራ እየተነሳ ወደ ኢትዮጽያ፣ ጅቡቲና ሌሎች አካባቢዎች ሲያመራ ደግሞ ተዝናኖት ብቻ ሳይሆን አማራጭ እሳቤ ይፈጥርልናል። በመሆኑም የኢትዮ ኤርትራ ጦርነት አዲስ ሆኖ እንዲሰማን አድርጓል።


ሌላም አለ። ታሪኩን የሚደግፉት የሴራ ቅንብሮች ባለሁለት አፍ ወፎቹ ይፋ በሆነ መልኩ በመድፍ እንዲቆራቆሱ ብቻ አይደለም የሚያደርገው - ወፎቹ በየሰፈራቸው በተዳፈነው ረመጥ እንዲለበለቡም ጭምር እንጂ።
የአስመራው ወፍ /ኢሳያስ/ ክብሩንና ጥቅሙን ለማስጠበቅ መጠነ ሰፊ፣ የተደራጀና ህቡዕ ተኮር እንቅስቃሴ ያደርጋል። ኢትዮጽያዊው ወፍ /መለስ/ አንድም አናት አናቱን ከሚጠቀጥቁት ወንድም ግንደ ቆርቁሮች በሌላ በኩል ከሩቅ አጎቱ የሚወረወርበትን ሞርታር ለመከላከል መከራውን ሲበላ እንመለከታለን።


በነገራችን ላይ ከአስመራ ወደ ኢትዮጽያ የሚጋልበው የታሪክ ጅረት ሁለት መቆጣጠሪያ ቤተመንግስቶች አሉት። የአቶ ኢሳያስ አፈወርቂ እና የአቶ ሃይላይ ሃለፎም። በፍትህ ሚ/ሩ አቶ ሃይላይ ቤት አራት የታሪኩ ቁልፍ ሰዎች ይገኛሉ። ቤተሰቦች ናቸው። ሳህል በረሃ የተወለደችው ፍልይቲ፣ ወንድሟ ሰለሞን እና ባለስልጣን እናታቸው አኅበረት። ሃይላይ በርግጥም ለሰላምና ፍትህ የቆመ ብቸኛ ሚኒስትር ነው። ከኢትዮጽያ ጋር የሚደረገው ጦርነት መሰረት የሌለው የዜሮ ድምር ፖለቲካ በመሆኑ መቆም አለበት በሚለው አቋሙ ከዋናው ቤተመንግስት ሰውዪ ጋር ይጋጫል።


በሌላ በኩል ኢሳያስ የሃይላን ልጅ ፍልይቲን እንደ ጆከር ሲጠቀምባት እናያለን። ኢትዮጵያ ውስጥ የሚከናወነውን የዶላር ዘረፋ፣ የስለላ ስራና ህቡዕ ግድያ ትመራለች። በጅቡቲ ወደብ ወደ ኢ/ያ የሚገባውን ስትራቴጂካዊ ንብረት ለማውደም ተመራጭዋ ሰው እሷ ናት። ባድመ በመዝመት ለሌሎች ያስቸገሩ የመረጃና የተመሰጠሩ መልእክቶችን የመፍታት ስራ ትሰራለች። ፍልይቲ የፕሬዝዳንቱ ቀኝ እጅ፣ ብሩህ አእምሮ ያላት፣ ደፋር፣ አፍቃሪ እና ጨካኝ ገጸባህሪ ናት።


ከኤርትራ ህዝብ አንጻር /አማራ ጠላት ነው የሚል ቆሻሻ ሀሳብ/ ግን አንድ ይቅር የማይባል ክህደት ትፈጽማለች። ክህደቱ ለኤርትራ የቴሌ እና ኤሌክትሮኒክስ ግንባታ ትልቅ ድርሻ ያከናወነውን ኢትዮጽያዊ ሰው በማፍቀሯ ነው። አስራደ ሙሉጌታ ይባላል። ሻእቢያ ጉልበቱንና እውቀቱን እንደ ሽንኮራ ከመጠጠው በኋላ ሊያስወግደው ቀነ ቀጠሮ ይዞለታል። ለአስመራ ፖለቲካ ትልቅ አይን የሆነችው ፍልይቲ ከመንግስታዊው ተልዕኮ ጎን ለጎን ፍቅረኛዋን ለማዳን ህቡዕ ትግል ስታከናውን እንመለከታለን። የሃይላይ ወንድ ልጅ ሰለሞን ‹ናጽነት› በሚለው ነጠላ ዜማው በከተማው የታወቀ ዘፋኝ ሆኗል። ሙዚቃው ማዝናኛ ብቻ ሳይሆን የዘመቻ መቀስቀሻም ነው። ናጽነት ብሎ የዘፈነው ግን በኢሳያስና በአባቱ ለተመራው ትግል ማስታወሻ ለመስራት ብቻ አይደለም ። እንደውም በዋናነት የዘፈነው ነጻነት የተባለች ቆንጆ ወጣት በማፍቀሩ ነው። ነጻነት ለኤርትራ ወጣት የእግር እሳት ወደሆነበት ሳዋ ስትገባ እሱም እንዳላጣት ብሎ ፈለግዋን ይከተላል። እሷን ፍለጋ ላይ ታች ሲል ነጻነት በሁለት የባደመ ጦር ጄነራሎች አይን ውስጥ ትወድቃለች። ልክ እንደ ባድመ መሬት ሊቆጣጠሯት ሌት ተቀን ስትራቴጂክ ይነድፋሉ።


እናም የአንደኛው ቤተመንግስት ሰውዪ ከኢ/ያ ድል ለማግኘት ሲራራጥ፣ የሁለተኛው ቤተመንግስት አባላት ደግሞ ከራሱ ከኢሳያስ ጭቆና ለመላቀቅ እንዲሁም ፍቅረኛዎቻቸውን ለመታደግ ላይ ታች ሲሉ በታሪኩ ተወጥረን እንያዛለን።


መጽሐፉ ጥቃቅን ቴክኒካል ችግሮች የሉበትም ማለት አይቻልም፣ ለአቅመ ግነት የሚበቁ ስላልመሰለኝ ዘልያቸዋለሁ። ይልቁንስ ደራሲው የራሱ እምነት የሚመስል ጉዳይ መጀመሪያ ምዕራፍ ላይ ቆስቁሶ እንዲረሳ ወይም እንዲጨነግፍ ማድረጉ የሚቆጭ ይመስለኛል። ያነሳቸው ጥያቄዎች የአንባቢም መሰረታዊ ጥያቄዎች ሊሆኑ የሚችሉ ናቸው። የባርካ ማተሚያ ቤት ባለቤት የሆኑ ግለሰብ አቶ ሃይላይ ሊጽፉ ባሰቡት መጽሐፍ ውስጥ አራት መሰረታዊ ጥያቄዎችን አዳብረው እንዲሰሩ ሀሳብ ያቀርባሉ። ከቀረቡት ሃሳብ ውስጥ ሁለቱ የሚከተሉት ናቸው፣


1. የኤርትራ ነጻነት ትግል ለምን በ1885 ምጽዋ በኢጣሊያ መያዝን በመቃወም አልተጀመረም?
2. ከኤርትራ ልዩ ማንነት የተፀነሰ ትግል ከሆነ ለምን 30 አመታት ፈጀ?


ደራሲው ስራውን ከሰሩት 285 ሺህ ናቅፋ እንደሚያገኙም ውል ታስሮ ነበር። ሆኖም የማተሚያ ቤቱ ባለቤት ሲያዙ፣ አቶ ሃይላይም ሲገደሉ ሃሳቡ ይመክናል። እንደ ስነጽሁፍ ሃያሲ የሁለቱ ሰዋች መጥፋትን በአስመራ ወስጥ የመጻፍ፣ የመናገር፣ የማሰብ እና የዴሞክራሲ መሞትን ለመተርጎም ያስረዳን ይሆናል። ከዚህ በላይ ግን ታሪኩ ባይጨነግፍ የበለጠ ጠቃሚ ያደርገን ነበር ብሎ መከራከር ያስኬዳል። አቶ ሃይላይ ለእውነት የቆሙ ገጸባህሪ በመሆናቸው እየመረራቸውም ቢሆን ከኤርትራ ጀርባ የተደበቁ ጉዳዮችን ያነሱ ነበር። ይሄን አንስተው ቢሞቱ ደግሞ ሞታቸውንም ይመጥን ነበር። የበለጠ ጀግና መስዎዕት እናደርጋቸው ነበር።


‹አውሮራ› ጦርነት ላይ መሰረት አድርገው እንደተሰሩት ልቦለዶቻችን ማለትም ኦሮማይ እና ጣምራጦር የተሳካ ስራ ነው። ድንበር ያቆራርጣል፤ እዚህና አዚያ እንደ ቴኒስ ኳስ ሲያንቀረቅበን ጨዋታው ሰለቸኝ ብለን ከሜዳው ዞር ማለት አንችልም። ፈጣን ነው፤ በድርጊት የተሞላና በመረጃ የደነደነ። መንቶ ነው፤ ፍቅርና ጦርነትን በእኩል ጥፍጥና ከሽኖ ማቅረብ የቻለ። ሰባኪ ነው - ፍቅር ያሸንፋል የሚል አይነት፤ ተዛምዶ ተጋብቶ ተዋልዶ የተካደ ትውልደን የሚያባብል። የሆነውን ብቻ ሳይሆን የሚሆነውን ቁልጭ አድርጎ የሚናገር። በተለይም የአንድነት አሳቢዎችን ገድለን ቀብረናል ብለው ለሚመጻደቁ ጠባቦች «ውሸት ነው!» ብሎ ጥበባዊ ምስክርነት የሚሰጥ።


በታሪኩ ውስጥ ማንነቱን ደብቆ ስሙን አቦይ ግርማ አስብሎ ቀን ከለሊት በባድመ የልመና ተግባር የሚያከናውነው እንኮዶ /የደርግ ኮማንዶ የነበረ/ አንድ እጁ ስለተቆረጠና አይኑ ስለተጎዳ ማንም ግምት ውስጥ ያሰገባው አልነበረም። ሆኖም መጀመሪያ የባድመን መሬት ፈልፍለው የገቡ የሻእቢያ ወታደሮችን፣ በመጨረሻም እጁን በመጋዝ ቆርጦ የጣለውን ጄኔራል ግዜ እየጠበቀ መበቀል ችሏል «ለገንጣይና ጡት ነካሽ ዋጋው ይሄ ነው» እያለ። ይህ ትርክት በስነጽሁፍ ቋንቋ ፎርሻዶው ወይም ንግር የሚባለው ቴክኒክ ነው - ነገ እንዲህ መሆኑ አይቀርም ለማለት።


በይርጋ አበበ

 

የአዲስ አበባ ዩኒቨርስቲ አርት ስኩል አስተማሪ የሆነው ሰዓሊ ሮቤል ተመስገን ከነገ የካቲት 15 ጀምሮ ለአንድ ወር የሚቆይ የስዕል አውደ ርዕይ በፈንድቃ የባህል ማዕከል ያቀርባል።


ሰዓሊ ሮቤል “ተንሳፋፊ ጀበናዎች” ሲል ርዕስ የሰጠውን አውደ ርዕይ ነገ ከአመሻሹ 12 ሰዓት ጀምሮ ለእይታ የሚያቀርብ ሲሆን ወሩን ሙሉ ለጎብኝዎች ክፍት ሆኖ ይቆያል ተብሏል። ካዛንቺስ አካባቢ በሚገኘው የፈንድቃ ባህል ማዕከል ስራዎቹን ለእይታ የሚያቀርበው ሰዓሊ ሮቤል ተመስገን ከአዲስ አበባ ዩኒቨርስቲ የመጀመሪያ ድግሪውን ሲቀበል ሁለተኛ ድግሪውን ደግሞ ኖርዌይ አገር በመማር ሙያውን አዳብሯል። ከዚህ በፊትም ከ50 በላይ አውደ ርዕዮችን በዓለም ዙሪያ ማሳየቱ ተልጿል።


አውደ ርዕዩን መታደም የሚፈልጉ የሙያው አፍቃሪያን በነጻ መታደም የሚችሉ መሆኑን አዘጋጆቹ ለሰንደቅ ጋዜጣ ተናግረዋል።

ቁጥሮች

Wednesday, 21 February 2018 11:44

2 ነጥብ 91 ቢሊዮን ዶላር           ባለፈው ዓመት ከወጪ ንግድ የተገኘው ገቢ፤

 

               4 ነጥብ 5 ቢሊዮን ዶላር              በተያዘው ዓመት ከግብርና ለማግኘት የታቀደው ገቢ መጠን፤

 

               17 ሚሊዮን                             የግብርና ኤክስቴንሽን ተሳታፊ አርሶ አደሮች ቁጥር፤

 

               22 ሚሊዮን                              ከድህነት ወለል በታች ያለው ህዝብ ብዛት፤

 

    ምንጭ- የእርሻናተፈጥሮሀብትሚኒስቴር  


የህዝባዊ ወያነ ሓርነት ትግራይ (ህወሓት) የተመሠረተበት 43 ኛ ዓመት በዓል በተለያዩ ከተሞች በመከበር ላይ ይገኛል።


በዓሉ ሰሞኑን በመቐለ ከተማ ሲከበር የህወሓት ሊቀመንበርና የትግራይ ክልል ምክትል ርዕሰ መስተዳድር ዶክተር ደብረፅዮን ገብረሚካኤልን ጨምሮ የክልሉ ከፍተኛ መንግስት ስራ ሃላፊዎች እና የሰማዕታት ቤተሰቦች ተገኝተዋል።


ዶክተር ደብረፅዮን በዚሁ ወቅት ባስተላለፉት መልእክት፥ የካቲት 11 በኢትዮጵያ ህዝቦች ጫንቃ ላይ የነበረውን ጭቆና ያላቀቀና እና የህዝቡን እኩልነት ያስከበረ ነው ብለዋል።


አዎ! ህወሓት ለዚህች አገር ሠላም፣ ዴሞክራሲ፣ እኩልነት፣ ነጻነት መሰዋዕትነት ከፍሏል። ጭቆናና አድሎአዊ አገዛዝን ታግሏል። በዚህ ረገድ በኢትዮጵያዊን ልቦና ደማቅ ታሪክን ጽፎ ማኖሩ የሚካድ አይደለም።


ህወሓት ከድል መልስ አገርን የማስተዳደር ከፍተኛ ኃላፊነት ጫንቃው ላይ ሲወድቅ ከኢህአዴግ አባል ድርጅቶች ጋር በመሆን ብዙ ለፍቷል። በዚህም የማይናቁ የልማት ድሎችን አስመዝግቧል።


በአንጻሩ ሰብዓዊ ልማት ላይ እጅግ ወደኃላ ቀርቷል። የተዋደቀለት ሠላም፣ ዴሞክራሲ፣ እኩልነት፣ ነጻነትን… መብቶችን የሚሸረሽሩ የመልካም አስተዳደር ችግሮች፣ የሙስናና ብልሹ አሠራር ችግሮች ታግሎ በማታገል ረገድ አቅም አንሶት ታይቷል። በዚህም ምክንያት ጥቂት ብልጣብልጦች የመንግስት ሥልጣን ርስት በማድረግ አለአግባብ እንዲበለጽጉ ምቹ ጫካን ፈጥሯል። በማወቅም ባለማወቅም ከአጥፊዎች ጋር ተባብሯል፣ ጥላ ከለላ ሆኖ ኖሯል።


አዎ! ህወሓት በደም አሻራው የጻፈው ደማቅ ታሪክ እንደደመቀ መጓዝ ተስኖታል። ሕዝብ የሰጠውን አመኔታ ዘንግቷል። እናም ህወሓት እንደአንጋፋነቱ አገር የማዳን ታሪካዊ ኃላፊነት ጫንቃው ላይ ወድቋል። ህወሓት በዚህ ወቅት ላይ ሆኖ 43ኛ ዓመቱን ማክበሩ በዓሉን የተለየ ገጽታ ያላብሰዋል። እንደጦር ሜዳው ትግል ሁሉ አገር ከገባችበት አጣብቂኝ አሸንፋ እንድትወጣ፣ ህወሓትም የተሸረሸረውን ሕዝባዊ አመኔታ መልሶ ለማግኘት እጅግ ከባድና መራር ትግል እንደሚጠብቀው ለአፍታም ሊዘነጋ አይገባም። 

 

በይርጋ አበበ

 

የወልቃይት ህዝብ የማንነት ጥያቄ አስተባባሪ ኮሚቴ ሰብሳቢ ኮሎኔል ደመቀ ዘውዱ እና ወይዘሪት ንግስት ይርጋ የተመሰረተባቸው ክስ ተቋርጦ ከእሥር ተፈቱ።


የጸረ ሽብር አዋጅ ቁጥር 652/2001 አንቀጽ ሶስትን በመተላለፍ ተቃውሞዎችን በመምራትና ማደራጀት በሚል ክስ ተመስርቶባት የነበረችው ወጣት ንግስት ይርጋ ትናንት ክሷ መቋረጡ ተገልጿል። በ2008 ዓ.ም በጎንደር ከተማ የተነሳውን ተቃውሞ ተከትሎ በቁጥጥር ስር ውላ በፌዴራሉ ከፍተኛ ፍርድ ቤት ልደታ ምድብ አራተኛ ወንጀል ችሎት ጉዳይዋ ሲታይ የቆየችው ተጠርጣሪዋ፤ የቀረበባትን ክስ እንድትከላከል ቀነ ቀጠሮ ተሰጥቷት የነበረ ቢሆንም ከቀጠሮው በፊት ክሷ ተቋርጦ ትናንት አመሻሽ ከእስር ወጥታለች።


ከዚህ ጋር በተያያዘ በአማራ ክልል ጠቅላይ ፍርድ ቤት ጉዳያቸው ሲታይ የቆዩት የወልቃይት ህዝብ የማንነት ጥያቄ ኮሚቴ አስተባባሪ ኮሎኔል ደመቀ ዘውዱ ክሳቸው ተቋርጦ ከእስር ቤት የተፈቱት ባሳለፍነው ሰኞ አመሻሽ ሲሆን፤ ከእስር ከወጡ በኋላም በርካታ ቁጥር ያለው የጎንደር ከተማ ህዝብ አቀባበል አድርጎላቸዋል። ኮሎኔል ደመቀ ዘውዱ ከአማራ ቴሌቪዥን ጋር ባደረጉት ቃለ ምልልስ ‹‹የጎንደር ህዝብ እና የአማራ ክልል መንግሥት ከጎኔ ሆነው ለዚህ ስላደረሱኝና ከእሥር እንድፈታ ስለረዱኝም አመሰግናለሁ›› ብለዋል። ኮሎኔል ደመቀ ዘውዱ እጃቸው ከተያዘበት ሃምሌ 2008 ዓ.ም ጀምሮ እስካላፈው ሰኞ የካቲት 12 ቀን 2010 ዓ.ም ድረስ በእስር ላይ ቆይተዋል።


በሌላ ዜና በእነ ተሻገር ወልደሚካኤል መዝገብ በሽብርተኝነት ክስ ተስርቶባቸው ጉዳያቸውን በፌዴራሉ ከፍተኛ ፍርድ ቤት ልደታ ምድብ አራተኛ ወንጄል ችሎት ሲከታተሉ የነበሩ 32 ተጠርጣሪዎች ክሳቸው ተቋርጦ ከእስር ተፈተዋል። እስከ ትናንት ማክሰኞ ምሽት ድረስ በእነ ተሻገር ወልደሚካኤል መዝገብ ክስ ከተመሰረተባቸው 35 ተጠርጣሪዎች መካከል ሁለተኛ ተከሳሽና ሁለቱ የዋልድባ ገዳም መነኮሳት ክሳቸው አልተቋረጠም ነበር። ሁለቱን መነኮሳት ጨምሮ በዚህ መዝገብ ጉዳያቸው ሲታይ የቆዩት ተጠርጣሪዎች ክስ የተመሰረተባቸው ባሳለፍነው ሰኔ 2009 ዓ.ም ነበር። 

በይርጋ አበበ

 

የመጋቢ ሐዲስ እሸቴ አለማየሁ በነገረ ድህነት ላይ ትኩረቱን ያደረገው መንፈሳዊ መጽሃፍ ባሳለፍነው እሁድ በመንበረ ጸባኦት ቅድስት ሥላሴ ቤተ ክርስቲያን አዳራሽ ተመርቋል።
በመጽሃፉ ምረቃ ላይ ዲያቆን ዳንኤል ክብረት እና ተባባሪ ፕሮፌሰር ነብዩ ባየን ጨምሮ ጥሪ የተደረገላቸው እንግዶችና ምሁራን ታድመዋል። በመጽሃፉ ላይም ጥልቅ ዳሰሳ የተካሄደበት ሲሆን ተባባሪ ፕሮፌሰር ነብዩ ባዬ ‹‹የጨዋታ ደብዳቤ›› ሲሉ የሰየሙትን የመጽሃፍ ዳሰሳ አቅርበዋል።


160 ገጾች ያሉትን መጽሃፍ በ70 ብር ዋጋ መሸመት እንደሚቻል ከመጽሃፉ ጀርባ የተለጠፈው የዋጋ ተመን ሲያመለክት “ርጢን” ማለት ከሙጫ ተቀምሞ የሚዘጋጅ ፈዋሽ እጣን ማለት ነው። የመጽሃፉ አዘጋጅ መጋቢ ሀዲስ እሸቴ አለማየሁ በበርካታ መድረኮች እየተገኙ አነቃቂ እና ኢትዮጵያዊንትን የሚያጎሉ ትምህርቶችን በማስተማር ይታወቃሉ።

Page 1 of 202

Sendek Newspaper

Bole sub city behind Atlas hotel

Contact us