You are here:መነሻ ገፅ»ዜና

አዲሱ ክስተት ኢህአዴግን ለጊዜያዊ

የድርጅት ማንነት ቀውስ ውስጥ ሊከተው ይችላል

ፕሮፌሰር መድሃኔ ታደሰ

 

 

-          በመለስ ውርስና በኢሕአዴግ የሃሳብ አንድነት ላይ ልዩነት አለ

-          ኦሕዴድ ሥልጣኑን ያገኘው በትግሉ ነው፡፡

-          የዶ/ር አብይ አሰያየም የግራ ዘመምና ኮሚኒስታዊ አመዳደብ አይነት አይደለም

-          ኢሕአዴግ ውስጥ ቅቡልነት ያላቸው ኃይሎች እየተፈጠሩ ነው

-          ለሠላም ድርድር የኤርትራ ፖለቲካ ኢኮኖሚ ፍኖተ ካርታ መስተካከል አለበት

-          የአሜሪካውያን መግለጫ የኢሕአዴግ መሰንጠቅ ምልክትነው

ሙሉ ጽሁፉን በፖለቲካ ዓምድ ያገኙታል

በሞያሌ ቦምብ ጥቃት በዜጎች ላይ የሞትና የመቁሰል አደጋ ደረሰ፡፡ በትላንትናው ዕለት በደረሰው የእጅ ቦምብ ጥቃት 3 ንፁኃን ዜጎች ህይወታቸው ያለፈ መሆኑን መረጃዎች አመልክተዋል፡፡ አንዳንድ ዘገባዎች ከእጅ ቦንቡ መወርወር በሶማሌ እና በኦሮሞ ተወላጆች መካከል ቀደም ብሎ ግጭቶች የተከሰቱበት ሁኔታዎች እንደነበሩ ያመለክታሉ፡፡ ከተገደሉት 3 ሰዎች በተጨማሪ 63 የሚሆኑ ዜጎች የመቁሰል አደጋ የደረሰባቸው መሆኑ ታውቋል፡፡

በቅርቡ በሞያሌ ከተማ በፀጥታ ኃይሎች በስህተት ተፈፀመ በተባለ ግድያ በርካታ ሰዎች መሞታቸው የሚታወስ ሲሆን በሺዎች የሚቆጠሩ ዜጎችም ደንበር አቋርጠው ወደ ሞያሌ የተሰደዱበት ሁኔታ ነበር፡፡ ከመንግስት በኩል ይወጡ የነበሩ መረጃዎች ከግድያው በኋላ በከተማዋ የታየውን አንፃራዊ መረጋጋት ተከትሎ በርካቶች ወደ ከተሰደዱበት ወደ መኖሪያ ቀያቸው እየተመለሱ ያሉበት ሁኔታ ነበር፡፡ የአሁኑ የቦምብ ጥቃት በአካባቢው በድጋሜ አለመረጋቱ እንዳያገረሽ ሥጋትን አሳድሯል፡፡

  • - የገዳሙ አስተዳደርና በእስራኤል የኢትዮጵያ ኤምባሲ ክትትላቸውን እንዲያጠናክሩ አሳሰቡ

 

የዘንድሮን የትንሣኤን በዓል ለማክበር ከመላው ዓለም በኢየሩሳሌም የተሰባሰቡ ኢትዮጵያውያን፣ በአወዛጋቢው የዴር ሡልጣን ገዳም ባለቤትነትና እድሳት ጉዳይ ሰላማዊ ሰልፍ አካሔዱ።

 

በእስራኤል የኢትዮጵያ ኮሚኒቲ እና የዴር ሡልጣን ገዳም ባስተባበሩት በዚሁ ሰልፍ፣ በመቶዎች የሚቆጠሩ ኢትዮጵያውያን ተጓዦች፤ በዕለተ እሑድ፣ ሚያዝያ 7 ቀን 2010 ዓ.ም. ከጸሎተ ቅዳሴ በኋላ (ከጠዋቱ 4፡30)፣ ወደ ጠቅላይ ሚኒስትር ቤኒያሚን ኔታንያሁ ቢሮ በማምራት አቤቱታቸውን አቅርበዋል።

 

ሰልፈኞቹ በአቤቱታቸው፤ የኢትዮጵያ ኦርቶዶክስ ተዋሕዶ ቤተ ክርስቲያን የታሪክ እና የቅድስና ይዞታ በሆነው የዴር ሡልጣን ገዳም ላይ፣ የግብጽ ኦርቶዶክስ ቤተ ክርስቲያን ይገባኛል በማለት እየፈጠረችው የምትገኘው ችግር እንዲገታ ጠይቀዋል፤ ከዚሁም ጋር በተያያዘ ጣሪያው በመሸንቆሩ ላለፉት ስምንት ወራት ተዘግቶ የቆየው የቅዱስ ሚካኤል ቤተ መቅደስ በአስቸኳይ ታድሶ አገልግሎቱ እንዲቀጥል እንዲደረግ፤ በማኅበረ መነኮሳቱም ላይ የሚደርሰው ተፅዕኖና አድልዎ እንዲቆምላቸው አመልክተዋል። ይህንኑ የሚገልጹና በዕብራይስጥ፤ በእንግሊዝኛ እና በአማርኛ ቋንቋዎች የተጻፉ መፈክሮችንም በጋለ ስሜትና በከፍተኛ ድምፅ አስተጋብተዋል።

 

የጠቅላይ ሚኒስትሩ ተወካይ በሰልፈኞቹ የተመረጡ ሦስት ልዑካንን ካነጋገሩ በኋላ በጽሑፍ የተዘጋጀውን አቤቱታ ተቀብለዋል፤ ምላሹንም በቅርቡ እንደሚያሳውቁ ለተወካዮቹ ቃል ገብተዋል። የገዳሙ አስተዳደርና በእስራኤል የኢትዮጵያ ኤምባሲ፣ በጉዳዩ ላይ ያላቸውን ክትትል እንዲያጠናክሩ ለሰንደቅ አስተያየታቸውን የሰጡ የሰልፉ ተሳታፊዎች ተናግረዋል።

 

በዘንድሮው ክብረ በዓል ከአሜሪካ፣ ካናዳ፣ አውሮፓ እና በዋናነትም ከኢትዮጵያ በአጠቃላይ ከ11ሺሕ ያላነሱ ተሳላሚ ምእመናን በተለያዩ አስጎብኚ ድርጅቶች አማካይነት ወደ ኢየሩሳሌም የተጓዙ ሲኾን፤ በሰልፉም ከተጓዦቹና በእስራኤል ነዋሪ ከኾኑ ኢትዮጵያውያን መሳተፋቸው ተገልጿል፤ በቁጥር 350 ያህል ሰልፈኞች እንደኾኑ የዐይን እማኞች አረጋግጠዋል።

 

በኢየሩሳሌም የኢትዮጵያ ይዞታ ከሆነው የዴር ሱልጣን ገዳም ባለቤትነት ጋር በተያያዘ ግብፅ የይገባኛል ጥያቄ በተደጋጋሚ በማንሳት፣ የእድሳት ሒደቱንም በማደናቀፍ እየተከሰቱ ባሉ አለመግባባቶች ሳቢያ፣ የሁለቱ ሀገሮች እኅት አብያተ ክርስቲያናት ታሪካዊ ግንኙነት እየሻገረ እንደሚገኝ ፓትርያርክ አቡነ ማትያስ፣ በቅርቡ ለቤተ ክርስቲያኒቱ ቴሌቭዥን የተናገሩትን ጠቅሰን መዘገባችን የሚታወስ ነው።                                                                

-    ዩኒቨርሲቲውን የሚያስመርቀው የዞኑ ህዝብ ነው

 

በሰሜን ጎንደር ዞን ዋና ከተማ በሆነችውና ከአዲስ አበባ 830 ኪሎ ሜትር ርቀት ላይ በምትገኘው ደባርቅ ከተማ የተከፈተው አዲሱ የደባርቅ ዩኒቨርሲቲ የፊታችን ቅዳሜና እሁድ በተለያዩ ዝግጅቶች ይመረቃል። ዩኒቨርሲቲው በሀገራችን ብዙም ባልተለመደ ሁኔታ የዞኑ ህዝብ የሚያስመርቀው መሆኑን ለጉዳዩ ቅርበት ያላቸው ምንጮች አረጋግጠዋል።

በዞኑ ሁሉም ወረዳዎች የሚኖረው ህዝብ በነፍስ ወከፍ የተሳተፈበት ይህ የደባርቅ ዩኒቨርሲቲ የምረቃ በዓል በተለያዩ ዝግጅቶች የሚታጀብ ሲሆን የአካባቢው ተወላጅ የሆኑትን ታላቁን የስፖርት ሰው የኢንስትራክተር እንዳልክ ቀለመወርቅ መታሰቢያ የሆነው ከሊማሊሞ አናት የሚነሳ የጎዳና ላይ ሩጫ የዝግጅቱ አንድ አካል ነው።

በደባርቅ የአንድ ቀን የቱሪዝምና ኢንቨስትመንት ፎረም የተዘጋጀ ሲሆን አካባቢውን የሚያስተዋውቅ አውደ ርዕይም ዩኒቨርሲቲውን ለማስመረቅ ከተዘጋጁ ኩነቶች አንዱ ነው።

የደባርቅ ዩኒቨርሲቲ የካቲት 8 ቀን 2007 ዓ.ም በቀድሞው ጠቅላይ ሚኒስትር በአቶ ኃይለማርያም ደሳለኝ የመሰረተ ድንጋዩ ተቀምጦ ከ452 ሚሊዮን ብር በላይ ለመነሻ ግንባታው በተፈቀደው በጀት ግንቦት 15 ቀን 2008 ዓ.ም ግንባታው ተጀምሮ ታህሳስ 30 ቀን 2010 ዓ.ም. የመጀመሪያው የግንባታ ምዕራፍ ተጠናቋል። በአሁኑ ወቅት ደባርቅ ዩኒቨርሲቲ 1ሺህ 175 ተማሪዎችን ተቀብሎ በተለያዩ የትምህርት መስኮች እያስተማረ ይገኛል።¾

 

በይርጋ አበበ

 

የፓርኪንሰን ህመም በዓለም ላይ ስለ በሽታው እውቅና የተሰጠው ከ200 ዓመታት በላይ ቢያስቆጥርም በኢትዮጵያ ግን ስለ ህመሙ እና ስለ ህሙማኑ በቂ መረጃ ባለመኖሩ ታማሚዎቹ ለከፋ ችግር ተዳርገው ቆይተዋል።

በዚህ የተነሳም በአገር ቤት የመድሃኒት አቅርቦት እና ስርጭት እንዲሁም የዋጋው ከፍተኛ መሆን ታካሚዎችን እንደጎዳቸው ይናገራሉ። ይህን መሰል ውስብስብ ችግር ያለበት ህመም ታማሚዎቹ መድሃኒቱን በቀላሉ አግኝተው ህመማቸውን እንዳይከታተሉ በመንግስት በኩል የተሰራ ስራ አለመኖሩ ችግሩን የከፋ አድርጎት ቆይቷል። ከመንግስት በተጨማሪም በህብረተሰቡ ዘንድ ስለ በሽታው በቂ ግንዛቤ ስለሌለ ታማሚዎቹ ችግራቸውን የሚረዳላቸው የለም።

ባሳለፍነው ቅዳሜ ረፋዱ ላይ መነሻውን ቴዎድሮስ አደባባይ አድርጎ መድረሻውን ኢትዮኩባ አደባባይ ያደረገ የእግር ጉዞ የተካሄደውም ስለ በሽታው በቂ ግንዛቤ ለማዳበር ታስቦ ነው። በዕለቱም በርካታ የህመሙ ተጠቂዎች እና የተለያዩ የህብረተሰብ ክፍሎች ተገኝተዋል።

በዕለቱም ከፓርኪንሰን ህሙማን ሰፖርት ኦርጋናይዜሽን ጋር አብረው ለሰሩ ድርጅቶች የምስጋና እና የምስክር ወረቀት የተበረከተላቸው ሲሆን ህመሙን በተመለከተም በጤና ባለሙያዎች፣ በማህበሩ አምባሳደር ተዋናይ ደሳለኝ ክብረት እና በታማሚዎች ሰፊ ገለጻ ተደርጓል። ፓርኪንሰን በሁሉም የዕድሜ ክልል የጾታ ልዩነት ሳያደርግ ሁሉንም ሰው የሚያጠቃ በሽታ ሲሆን የእጅ እና የእግር እንቅስቃሴ እንዲሁም የአንደበትን ተግባር የሚገታ ከባድ በሽታ መሆኑን ተናግረዋል። በኢትዮጵያ ምን ያህል ሰዎች በዚህ በሽታ እንደተጠቁ የተደረገ ጥናት የለም።

ፓርኪንሰን ህመም የታማሚን ሁለንተናዊ እንቅስቃሴ የሚገታ ሲሆን፤ ከዚህ ቀደም በዚህ ህመም ከተጠቁት ታዋቂ ሰዎች መካከል አሜሪካዊው ቦክሰኛ መሀመድ አሊ እና በአዲስ አበባ ዩኒቨርስቲ የታሪክ ምሁር የነበሩት ፕሮፌሰር ሪቻርድ ፓንክረስት ይገኙባል።


በይርጋ አበበ

የኢትዮጵያ መንግስት የሚከተለው ፌዴራላዊ የመንግስት ስርዓት በኢትዮጵያዊነት አንድነት ላይ አሉታዊ ሚና መጫወቱ ተገለጸ።

በፌዴራሊዝም ስርዓት ሁለንተናዊ ይዘት ላይ ትናንት በአዲስ አበባ ሒልተን ሆቴል በተካሄደ የውይይት መድረክ እንደተገለጸው በዚህ ወቅት ከኢትዮጵያዊነት ይልቅ ብሔርተኝነት ጎልቶ ተገኝቷል። ይህ የሆነው ደግሞ ፌዴራሊዝሙን መንግስት የተገበረበት መንገድ ስህተት በመሆኑ ለውይይቱ የመነሻ ሃሳብ ጥናት ያቀረቡት በአዲስ አበባ ዩኒቨርስቲ የፌዴራሊዝም ትምህርት አስተማሪው ዶክተር አሰፋ ፍሰሃ ተናግረዋል። ፌዴራሊዝሙ ከኢትዮጵያዊነት እና ከማዕከላዊ መንግስቱ ይልቅ ለክልሎች የሰጠው ስልጣን ከፍተኛ መሆኑን ምሁሩ ጨምረው ተናግረዋል።

በዚህ ወቅት አካባቢያዊነት መንገሱ ከተሳታፊዎች የተነሳ ሲሆን፤ በቅርቡ በኦሮሚያ እና ሶማሌ ክልል የተፈጠረው ግጭትም አንዱ የአካባቢያዊነት ስሜት ጎልቶ መውጣት ምሳሌ መሆኑን ዶክተር አሰፋ ተናግረዋል። ኢትዮጵያዊነት እንዲጎለብት ተቋማት አልተጠናከሩም እንዲሁም አገራዊ እሴት የለም ሲሉ ተሳታፊዎች ገልጸዋል። የውይይት መድረኩን ያዘጋጀው የአማራ ክልል መገናኛ ብዙሃን ድርጅት ነው።

ኢትዮጵያ ከአሃዳዊ የመንግስት ስርዓት ወደ ፌዴራላዊ የመንግስት ስርዓት የተሸጋገረቸው በ1983 ዓ.ም ከተካሄደው የስርዓት ለውጥ በኋላ ነው።

የመደመር ፖለቲካ፤ በጅግጅጋ

 

 

ሙሉ ጽሁፉን ፖለቲካ ዓምድ ላይ ያገኙታል

 

የኢትዮጵያ ራዕይ ፓርቲ መስራችና ሊቀመንበር የሆኑት አቶ ተሻለ ሰብሮ ለፖሊስ ከሰጡት ቃል ጋር በተያያዘ የስም ማጥፋት ክስ ተመስርቶባቸው በደቡብ ክልል ሆሳዕና ከተማ ትናንት ለሕትመት እስከገባንበት ድረስ ታስረው እንደሚገኙ ተሰማ።

አቶ ተሻለ ከትላንት በስቲያ ሰኞ ዕለት ጠዋት ጀምሮ የታሰሩት ቀደም ሲል ከቤተሰብ ጉዳይ ጋር ተያይዞ ቀርቦባቸው ለነበረ ክስ ለፖሊስ በሰጡት ቃል ስማችን ጠፍቷል ያሉ ወገኖች በመሰረቱባቸው ክስ መሆኑን ለሰንደቅ ጋዜጣ ትላንት በስልክ።

“በደረሰኝ መጥሪያ መሠረት ወደሆሳዕና ሌሞ ወረዳ ፖሊስ ሄጄ ቀርቤያለሁ፣ ነገርግን ፖሊስ ፍ/ቤት ዳኞች እስኪሰየሙ ጠብቅ ተብዬ በእስር ላይ እገኛለሁ” ብለዋል።

የታሰሩበትን ምክንያት ሲያስረዱም “ቀደም ሲል በተከሰስኩበት ወቅት ለፖሊስ ቃል ስሰጥ የግለሰቦችን ስም ጠቅሻለሁኝ፤ እነዚያ ግሰለቦች ከፖሊስ ጋር በመመሳጠር በስም ማጥፋት ክስ እንዳቀረቡብኝ ተረድቻለሁ» ሲሉ ተናግረዋል።

አቶ ተሻለ አያይዘውም መቼ ፍ/ቤት እንደሚቀርቡ አለማወቃቸውንም ጠቁመዋል።

አንድ ስማቸው እንዲጠቀስ ያልፈለጉ የሕግ ባለሙያ ስለክሱ ጭብጥ ተጠይቀው በሰጡት አስተያየት አንድ ተከሳሽ እንደፖሊስ ላሉ የፍትህ አካላት በሚሰጠው ቃል የስም ማጥፋት ክስ ሊቀርብበት አይችልም። መብቶች ተነጻጻሪ ናቸው ያሉት ባለሙያው አንድ ተከሳሽ ለመከላከል ያስችለኛል የሚለውን ቃል በነጻነት እንደሚሰጥ፣ ፖሊስም ለፍ/ቤት ካልሆነ በስተቀር ሚስጢሩን አሳልፎ መስጠት ከስነምግባር ውጪ መሆኑን ጠቅሰው ክሱ ተገቢ አለመሆኑን ተናግረዋል።

በአቶ ተሻለ ሰብሮ የሚመራው የኢትዮጵያ ራዕይ ፓርቲ፤ ከኢህአዴግ ጋር መስርቶት ከነበረው የፖለቲካ ፓርቲዎች የጋራ ምክክር መድረክ አጀንዳዎች ባለመስማማት ራሱን ማግለሉ የሚታወስ ነው።¾

በተለያዩ የፍጆታ ዕቃዎች ላይ ያልተገባ የዋጋ ጭማሪ በማድረግ ሸማቹ ህብረተሰብ ላይ ጫና ለመፍጠር የሚሞክሩ ነጋዴዎች ላይ ቁጥጥር እየተደረገ መሆኑን የኢፌዲሪ ንግድ ሚኒስቴር አስታወቀ።

 

በተለይም አብዛኛው ነጋዴ ለሸማቹ የሚያስብ፣ ለሀገር ለውጥ የሚተጋ፣ ማትረፍ በሚገባው ልክ የሚያተርፍ እና የነፃ ገበያ መርህን ተከትሎ የሚሰራ ነው። ሆኖም አንዳንድ ነጋዴዎች የምርቶችን ጥራት በማጓደል እና ከባእድ ነገር በመቀላቀል ለሸማቹ ህብረተሰብ በማቅረብ ያልተገባ ጥቅም ለማግኘትና ምርቶችን በመሰወር ያለአግባብ ዋጋ በመጨመር ለመጠቀም የሚፈልጉ እንዳሉ የኢፌዲሪ ንግድ ሚኒስቴር የህዝብ ግንኙነትና ኮሙኒኬሽን ጉዳዮች ጽ/ቤት ኃላፊ አቶ ወንድሙ ፍላቴ ጠቁመዋል።


በመሆኑም በሚኒስቴር መስሪያ ቤቱ እንደ ሀገር የወጪ ምንዛሬ ተመን ማሻሻያ ከተደረገበት ከጥቅምት 2010 ዓ.ም ጀምሮ ገበያውን ለማረጋጋት ከፌዴራል እስከ ከተማ አስተዳደር፣ ክልል፣ ክፍለ ከተማና ወረዳ ድረስ በተዘረጋው መዋቅር አማካኝነት ክትትል ያደርጋል።


ከአላግባብ ዋጋ ጭማሪ ጋር በተያያዘ ከንግዱ ማህበረሰብ አካላት ጋር በመመካከር፣ በማስተማር፣ በመገሰፅ ከሚገባው በላይ ዋጋ መጨመርና ተገቢ ያልሆነ ትርፍ ማግኘት ሸማቹን የሚጎዳ መሆኑን በማስገንዘብና በውይይት መተማመን ላይ በመድረስ እየተፈታ ነው።


በዚህ ሂደት በተደጋጋሚ የገበያ ህጉን የሚጥሱ፣ የውድድር ስርዓቱን የሚያዛቡና የሸማቹን ጥቅም የሚጎዱ ብሎም በሀገር ኢኮኖሚ ላይ አሉታዊ ተጽእኖ ለማሳደር ተገቢ ያልሆነ ዋጋ ጨምረው በተገኙ ነጋዴዎች ላይ አስተዳደራዊ እርምጃ እየተወሰደ ነው።


ክትትል ከሚደረግባቸው ምርቶች መካከል አንዱ የምግብ እህሎች ሲሆን የውጪ ምንዛሬ ለውጥ ሳይደረግ በፊት የነበረው ዋጋ መነሻ አድርገን አሁን ላይ ያለውን ዋጋ ስናይ ያለው ጭማሪ አነስተኛ ነው። በአንዳድ እህሎች ላይ የቀነሰበት ሁኔታ አለ ይህም በ2009 እና 2010 የመህር ወቅት ምርቱ ከፍተኛ መሆን ዋጋው ባለበት እንዲሄድ አድርጎል።


ሁለተኛው ከአትክልትና ፍራፍሬ መካከል የተወሰነ ለውጥ ያለው በብርቱካን ዋጋ ላይ ሲሆን ሌላው ባለበት ነው ያለው። ይህም ባሳለፍነው ወር አቅርቦቱን ስናይ በጣም ጥሩ የነበር ሲሆን አቅርቦት በደንብ ካለ ገበያውና ሸማቹ እራሱ ዋጋውን እንደሚቆጣጠሩ አቶ ወንድሙ ፍላቴ አስረድተዋል።


ሶስተኛ የአግሮ ኢንዱስትሪ ምርቶች ያለው ዋጋ ሁኔታ ጥሩ ሲሆን አራተኛው የብረታ ብረት ማለትም የግንባታ እቃዎችና የአርማታ ብረታ ብረት በሀገር ውስጥ ፋብሪካዎች የምርቶቹን ፍላጎት መሸፈን ስለማይቻል ከውጭ ሀገር በማስገባት እየተሰራጨ ነው።


እንደ ሀገር የወጪ ምንዛሬ ተመን ማሻሻያ ከተደረገበት ጊዜ ጀምሮ እነዚህ ምርቶች ከፍተኛ የዋጋ ጭማሪ አሳይተዋል። ይህም በሀገር ደረጃ በሁሉም ቦታዎች ግንባታዎች እየሰፉ መምጣትና የኮንስራትራክሽን ኢንዱስትሪው እያደገ በመምጣቱ የምርቶቹ ፍላጎት አድጓል። በተጨማሪም በዘርፉ ያሉ ነጋዴዎች የውጪ ምንዛሬውን ተመን መሻሻል ምክንያት አድርገው የምርቶቹን ዋጋ በጋራ በመወሰን እና በመጨመር ሰው ሰራሽ የሆነ የዋጋ አለመረጋጋት ፈጥረው ነበር።


በመሆኑም በአንድ በኩል ከእነዚህ አካላት ጋር በተከታታይ መድረክ በመፍጠር ዋጋ የማረጋጋት በሌላ በኩል ደግሞ አቅርቦት እንዲሻሻል የማድረግ ስራዎች እየተሰሩ ይገኛል።


በዓልን ምክንያት በማድረግ ያለተገባ ዋጋ ጭማሪ የሚያደርጉ አካላት ሲያጋጥሙ ህብረተሰቡ በየደረጃው ለሚገኙ ንግድ ቢሮዎችና ለንግድ ውድድርና ሸማቾች ጥበቃ ባለስልጣን ጥቆማ እንዲያደርግ ኃላፊው ጥሪያቸውን አቅርበዋል።

በላይ አብ ፉድስ እና ፕሮዳክሽን ኃላ.የተ.የግ.ማኅበር በአዲስ አበባ በሁለት ቦታዎች የፒዛ ሃት ሬስቶራንቶችን ከፈተ።

 

የአሜሪካ የሬስቶራንት ሰንሰለት የሆነው ፒዛ ሃት በኢትዮጵያ ትልቅ የምግብ ፍራንቻይዝ በመክፈት የመጀመሪያው አለም አቀፍ ድርጅት ሆኗል። ሬስቶራንቶቹ በትናንትናው ዕለት ተመርቀው ሲከፈቱ በኢትዮጵያ የአሜሪካን አምባሳደር የሆኑት ማይክሌ ሬይነር፤ የYum! Brands Inc. ተወካዮች፤ ከፍተኛ የመንግስት ባለስልጣናት እንዲሁም ጥሪ የተደረገላቸው እንግዶች ተገኝተዋል።


የኢትዮጵያ ፍራንቻይዝ ባለቤት የሆነው በላይ አብ ፉድስ እና ፕሮዳክሽን ኃ.የተ.የግ ማህበር ይህንን ትልቅ ሬስቶራንት የአፍሪካ መዲና በሆነችው አዲስ አበባ በማስመጣት በሁለት ቦታዎች ማለትም በሲኤምሲ እና ከፍተኛ እንቅስቃሴ በሚደረግበት በቦሌ መድሃኒዓለም አካባቢ ለመክፈት በቅቷል።


‹‹ይህንን የመሰለ ታሪካዊ ቀን ላይ በመገኘታችን በጣም ደስተኞች ነን›› ይላሉ የበላይ አብ ፉድስ ሼር ሆልደር እና ሲኢኦ አቶ ሚካኤሌ ገብሩ። ቀጥለውም ‹‹ኢትዮጵያ ውስጥ የተወሰኑ አህጉራዊ ፋራንቻይዝ ሬስቶራንቶች ቢገኙም፤ ፒዛ ሃት ግን ወደ ኢትዮጵያ ገበያ የገባ የመጀመሪያው አለም አቀፍ መልቲናሽናል የሬስቶራንት ፍራንቻይዝ ነው›› ብለዋል። አክለው ሲናገሩም፤ ‹‹በአሜሪካ ሀገር የሚገኙ የሬስቶራንቱ ፍራንቻይዞች ከ3 ነጥብ 8 ሚሊዮን በላይ የሚሆኑ ግለሰቦች የስራ እድል የሚፈጥሩ ሲሆን ከነዚህም ውስጥ 85 በመቶ ከ25 አመት በታች ናቸው። በላይ አብ ፉድስ ይህንን ባህል በመከተል ወጣቶች ትምህርታቸውን እናዳጠናቀቁ በመቅጠርና የተለያዩ ሀገራት ወስዶ ስልጠና በመስጠት ከፒዛ ሃት ብራንድ ጋር እንዲዋሀዱ አድርጓል›› ብለዋል።


ፒዛ ሃትን ያቀፈው Yum! Brands Inc. በተጨማሪም እና KFC እና Tacobell የመሳሰሉ ብራንዶችን የያዘ ሲሆን በአፍሪካ አህጉር የበለጠ በመስፋፋት ላይ ይገኛል።

Page 1 of 105

Sendek Newspaper

Bole sub city behind Atlas hotel

Contact us