You are here:መነሻ ገፅ»ዜና

የጠ/ሚ አብይ አሕመድ፤

አዲስ መንገድ እና የኢሕአዴግ ፖለቲካዊ ዳራ

~ በዘር ተጨፋጭፈን ብንባላ ለልጅ ልጅ የምናተርፈው ከባድ ውርደትና ክህደት ነው!

- የዚህን ጽሁፍ ሙሉ ዝርዝር ፖለቲካ ዓምድ ላይ ያገኙታል

 

-    የፌደራል ፖሊስ ኮሚሽን አዲስ ኮሚሽነር አገኘ

 

ሕገመንግስታዊ ሥርዓቱ ተከትለው ወደ ስልጣን በመጡት የኢትዮጵያ ጠቅላይ ሚኒስትር አስተዳደር ላይ አሲረዋል ተብለው የተጠረጠሩ ሶስት አምባሳደሮች ሊጠሩ መሆኑን ምንጮቻችን ገለፁ፡፡

በሴራ የተጠረጠሩት አምባሳደር ዶክተር ተቀዳ አለሙ በተባበሩት መንግስታት የኢትዮጵያ ቋሚ መልክተኛ፣ በካናዳ የኢትዮጵያ አምባሳደር ወ/ሮ አስቴር ማሞ እና በአሜሪካ የኢትዮጵያ አምባሳደር አቶ ካሳ ተክለብርሃን ሲሆኑ፣ ግለሰቦቹ የሀገሪቷን ጥቅም በሚፃረር ሁኔታዎች ውስጥ ሴራ አድርገዋል ተብለው መጠርጠራቸውን ምንጮች አስታውቀዋል፡፡

በሕገመንግስታዊ ሥርዓቱን ተከትለው ወደ ሥልጣን የመጡትን ጠቅላይ ሚኒስትር ዐብይ አሕመድን ከስልጣን ለማስወገድ ተንቀሳቅሰዋል ተብለው ከተጠርጠሩት መካከል፤ ወ/ሮ አስቴር ማሞ ኪራይ አንዳንድ የኦሕዴድ አባሎችን በማንቀሳቀስ፤ አቶ ካሳ ተክለብርሃን ጠቅላይ ሚኒስትሩ ከጠላቶቻችን ጋር አብሮ እየሰሩ ነው በማለት በአደባባይ በመክሰስ እና ዶክተር ተቀዳ ዓለሙ ለውጡን በመቃወም ሕገወጥ እንቅስቃሴ በማድረጋቸው ተጠርጥረው ወደ ሀገር ቤት እንደሚጠሩ ምንጮቹ ገልጸዋል፡፡

በተያያዘ ዜናም፤ በቅርቡ የፌደራል ፖሊስ ኮሚሽን ኮሚሽነር ሆነው የተሾሙት አቶ ያሬድ ዘሪሁን ባጋጠማቸው የጤና ችግር ምክንያት ለኢፌዲሪ ጠቅላይ ሚኒስትር በግል ያቀረቡት የሥራ መልቀቂያ ጥያቄ ተቀባይነት በማግኘቱ በምትካቸው አቶ ዘይኑ ጀማል የፌደራል ፖሊስ ኮሚሽን ኮሚሽነር ጀነራል ሆነው ተሹመዋል፡፡

በማረሚያ ቤቶች በታራሚዎች ላይ የአካልና የሞራል ጉዳት ባደረሱ አካላት ላይ ምርመራ ሊካሄድ መሆኑን መረጃዎች አመልክተዋል።

 

እንደ ጠቅላይ አቃቤ ህግ መረጃ ከሆነ በማረሚያ ቤቶች ውስጥ በታራሚዎች ላይ የሰብአዊ መብት ጥሰት ተፈፅሟል የሚሉ ተደጋጋሚ አቤቱታዎች እየተሰሙ መምጣታቸውን ተከትሎ በምን ሁኔታ በታራሚዎች ላይ ጉዳት እንደደረሰ የሚያጣራ ኮሚቴ ተዋቅሮ የሚያጣራበት ሂደት እንደሚኖር ጠቅላይ አቃቤ ህጉ አቶ ብርሃኑ ፀጋዬ አመልክተዋል።

 

በርካታ ተጠርጣሪዎች ከዚህ ቀደም ከተያዙ በኋላ የማስረጃ ስብሰባና የማጣራት ሥራ ሲካሄድባቸው ከመቆየቱ ጋር በተያያዘ በርካቶች ከፍርድ በፊት ረዥም የእስር ጊዜን ለማሳለፍ የተገደዱ ሲሆን እንደ አቶ ብርሃኑ ገለፃ ከዚህ በኋላ ተጠርጣሪዎችን አጣርቶ መያዝ እንጂ ይዞ የማጣራት ሥራ አይከናወንም።

 

ጠቅላይ ሚኒስትር ዶክተር አብይ አህመድ ባለፈው ሰኞ በህዝብ ተወካዮች ምክር ቤት በነበራቸው የጥያቄና መልስ ማብራሪያ ወቅት “ህገ መንግስቱ ጨለማ ቤት አስቀምጣችሁ ግረፉ፣ አሰቃዩ አይልም፤ አሸባሪ እኛ ነን በማለት ከተጠርጣሪዎችና ከታራሚዎች አያያዝ ጋር ያለውን ችግር ለማሳየት ሞክረዋል። የሰብአዊ መብት ጥሰቱም እስከ ወረዳ ድረስ የሚዘልቅ መሆኑን ጠቅላይ ሚኒስትሩ መግለፃቸው ይታወሳል። በተለይ በሽብር ወንጀል ተጠርጥረው ማረሚያ ቤት የገቡ ዜጎች በምርመራ ወቅት ተደብድበናል፣ ጥፍራችን ተነቅሏል፣ ሞራል የሚነካ ስድብ ተሰድበናል፣ ፆታዊ ክብራችን ተገፏል የሚሉትንና የመሳሰሉትን የሰብዓዊ መብት ጥሰቶች ከእስር ከተለቀቁ በኋላ ሲናገሩ ተሰምተዋል። አንዳንዶቹም መፅሐፍ በማሳተም ደረሰብን ያሉትን ግፍ ገልጸዋል። ጉዳዩ በተደጋጋሚ የሚነሳ ቢሆንም እስከ ዛሬም ድረስ እንዲጣራ የተደረገበት ሁኔታ አልነበረም።

የብሄራዊ መረጃ እና ደህንነት አገልግሎት ከፖለቲካ ወገንተኝነት በፀዳ መልኩ እንደሚንቀሳቀስ አስታወቀ።

አዲስ የተሾሙት ዳይሬክተር ጄኔራል አደም መሀመድ እንደገለጹት፣ “ህገ መንግስታዊ ስርአቱን ከአደጋ ለመጠበቅ በሚደረገዉ ጥረት ተቋሙ ተልኮዉን ሲፈጽም ከፖለቲካዊ ወገንተኝነት በፀዳ መልኩ ሊሆን ይገባዋል” ብለዋል።

ዳይሬክተር ጄነራል አደም መሀመድ አይዘው እንተናገሩት፣ ተቋሙ የግዳጁን አፈጻጸም ዉጤታማነት ከፍ ለማድረግ መንግስት በሰጠዉ አቅጣጫ መሰረት በተቋሙ ውስጥ የሪፎርም ስራ እንደሚሰራ አረጋግጠዋል።

ጄኔራል ዳይሬክተሩ ለህዝብ የሚተጋ፣ የሚሰራ እንዲሁም የሀገር እና ህዝብ ጥቅም የሚያስከብርና የሚያስቀጥል ተቋሙ እንደሚሆንና መንግስት በጀመረው የለውጥ ጉዞ ህገ መንግስቱንና ህገ መንግስታዊ ስርዓቱን ከማገልገል አኳያና የተጣለበትን ተልዕኮ ለመወጣት ብቃት ያለው ተቋም እንደሚደረግ ያላቸውን ተስፋ ገልፀዋል።

ትላንትና ዳይሬክተር ጄኔራሉን ጨምሮ አዲሱ የተቋሙ አዲስ አመራር ከሰራተኞች እና ባለሙያዎች ጋር ትውውቅ ማድረጋቸው ታውቋል።¾

* የሕዝቡ ጥያቄም እንዲመለስ አሳስቧል

 

የወለኔ ሕዝብ ዴሞክራሲያዊ ፓርቲ (ወ.ህ.ዴ.ፓ) የወለኔን የማንነት ጥያቄ በማቅረባቸው ብቻ ለእስር የተዳረጉ አባሎቹ መንግሥት በገባው ቃል መሠረት በይቅርታ ሰሞኑን መለቀቃቸው እንዳስደሰተው ገለጸ። ፓርቲው አያይዞም አባሎቹ ሕገመንግሥታዊ መብታቸውን በመጠየቃቸው ለእስር የተዳረጉበት፣ የተጎዱበት ጥያቄ አፋጣኝ መልስ እንዲሠጠው ጠይቋል።

የፓርቲው ሊቀመንበር አቶ አብዲ ተማም ለሰንደቅ ጋዜጣ እንደተናገሩት በደቡብ ብሔር ብሔረሰቦችና ሕዝቦች ክልል በጉራጌ ዞን በገደባኖ ጉታዘር ወለኔ ወረዳ በ2004 ዓ.ም የወለኔ የማንነት ጥያቄ መነሻነት ግጭት ተቀስቅሶ የተወሰኑ የፓርቲው ከፍተኛ አመራርና አርሶአደር አባሎቻቸው የመንግስት መዋቅር አፍርሰዋል፣ ሕዝቡን አሳምጸዋል፣ ያልተፈቀደ ስብሰባ አድርገዋልና የመሳሰሉ ምክንያቶችን በመጥቀስ ከ60 በላይ የፓርቲው አባሎች ታስረው እንደነበር አስታውሰዋል። ሆኖም የፓርቲው ከፍተኛ አመራር በፍርድ ቤት በነበረው ክርክር በነጻ እንዲሰናበቱ መወሰኑን ተከትሎ የታሳሪዎች ቁጥር ቀንሷል ብለዋል።

የተቀሩ ታሳሪዎች ከ3 እስከ 15 ዓመት እስር ተፈርዶባቸው የእስር ጊዜያቸውን ጨርሰው ከወጡት ሌላ የ65 ዓመት አዛውንት ጨምሮ 11 ያህል የፓርቲው አባላት እስከያዝነው ወር የመጀመሪያ ሳምንት ድረስ በእስር ላይ ቆይተው ኢህአዴግ በወሰነው መሠረት በይቅርታ ሰኔ 9 ቀን 2010 ዓ.ም ታሳሪዎቹ መለቀቃቸውን አረጋግጧል። ገዥው ፓርቲ ኢህአዴግና መንግሥት እስረኞችን በመልቀቅ ረገድ የወሰዱት እርምጃ በገንቢነቱ እንደሚመለከተው የፓርቲው ሊቀመንበር ጠቁመው ነገርግን የወለኔ ሕዝብ በሕገመንግሥቱ መሠረት ያቀረበው የራስን በራስ የማስተዳደርና በራስ ቋንቋ የመማርና የመዳኘት ጥያቄ በአፋጣኝ ምላሽ ማግኘት እንዳለበት አሳስበዋል። ሊቀመንበሩ እንዳሉት ስለሁኔታው የክልሉ የብሄረሰቦች ምክርቤት ተገቢውን ጥናትና መረጃ መሰብሰቡን አስታውሰው ነገርግን ውሳኔው ከዛሬ ነገ ይሰጣል እየተባለ አለአግባብ መጓተቱን በማስታወስ ሒደቱ እንዲፋጠንና የህዝቡ ጥያቄ ምላሽ እንዲያገኝ ጠይቀዋል።

የወለኔ ሕዝብ ባለፉት ዓመታት መብትና ጥቅሞቹን ለማስከበር እልህ አስጨራሽ ሠላማዊ ትግል ማድረጉን በማስታወስ በቀጣይ ከክቡር ጠ/ሚኒስትር ዶ/ር አብይ አሕመድ ጋር ለመወያየት ዕድል እንዲመቻችለት ፓርቲው ጥረት እያደረገ መሆኑን ሊቀመንበሩ ጠቁመዋል።

ሰሞኑን ከወልቂጤ እና ከወሊሶ ማረሚያ ቤቶች በደቡብ እና በኦሮሚያ ክልሎች አማካይነት በይቅርታ ከተለቀቁት መካከል አቶ ታግለን አወል፣ አቶ ናስር ሰይድ፣ አቶ ምላዙ ቲጃን፣ አቶ ደንበል መሐመድ፣ አቶ በድሩ ኡመር፣ አቶ ሚራጅ ሼህ ተማም፣ አቶ ዙመር ሁሴን፣ አቶ ጀማል ገረመው፣ አቶ አረብ ቆርቻ፣ አቶ ሙሀዲን አስፈር፣ አቶ ዝይን ቦንሳ ናቸው ሲሉ የፓርቲው ሊቀመንበር አረጋግጠዋል።

የወለኔ ሕዝብ የራሱ ባህል፣ ቋንቋ፣ ታሪክ፣ ወግ ያለው ማህበረሰብ ከመሆኑ ጋር ተያይዞ በሕገመንግሥቱ ለሌሎች ብሄር ብሄረሰቦች የተፈቀደው ራስን በራስ የማስተዳደር መብት እንዲረጋገጥለት አሁንም ሠላማዊ ትግሉን መቀጠሉን አቶ አብዲ ጠቁመዋል።¾

የከፍተኛ ትምህርት አግባብነትና ጥራት ኤጀንሲ በዲግሪ ደረጃ የእውቅና ፈቃድ እና የእውቅና ፈቃድ እድሳት የተሰጣቸው 133 የግል ከፍተኛ ትምህርት ተቋማት ይፋ አደረገ። ኤጀንሲው በይፋዊ ድረገጹ እንዳስታወቀው የትምህርት ተቋማቱ የእውቅና ፈቃድ ያገኙባቸውን ካምፓሶችን እንዲሁም በየካምፓሱ በምን ዓይነት የትምህርት መስኮች እንደተፈቀደላቸው ለማወቅ ዝርዝር መረጃውን ሰኔ 08 ቀን 2010 ዓ.ም. የወጣውን አዲስ ዘመን ጋዜጣ ወይንም በራሱ ድረገፅ መመልከት እንደሚቻል ጠቅሶ ትምህርት ፈላጊ ህብረተሰብ ሳያጣራ ከመመዝገብ እንዲቆጠብ አሳስቧል። ዕውቅና ያላቸው ተቋማት የሚከተሉት ናቸው።

 

1) አቢሲኒያ ኮሌጅ

2) አዳማ ጀነራል ሆስፒታልና ሜዲካል ኮሌጅ

3) አዲስ አበባ ሜዲካል እና ቢዝነስ ኮሌጅ

4) አዲስ ኮሌጅ

5) አዲስ ኮንቲኔንታል የጤና አጠባበቅ ኢንስቲትዩት

6) አፍሪካ ቤዛ ኮሌጅ

7) አፍሪካ የጤና ኮሌጅ

8) አድማስ ዩኒቨርሲቲ

9) አፍራን ቀሎ ኮሌጅ

10) አንድነት ኢንተርናሽናል ኮሌጅ

11) አትላስ ቢዘነስ እና ቴክኖሎጂ ኮሌጅ

12) አትላስ የጤና ሳይንስ ኮሌጅ

13) አየር ጤና የጤና ሳይንስ ኮሌጅ

14) አልካን የጤና ሳይንስ፣ ቢዝነስ ቴክኖሎጂ ኮሌጅ

15) አልፋ ዩኒቨርሲቲ ኮሌጅ

16) ቤን መስከረም ፕራይም ኮሌጅ

17) ቤተል ሜዲካል ኮሌጅ

18) ቤታሎጎ ኮሌጅ

19) ብራና ኮሌጅ

20) በለስ ፓራዳይዝ ኮሌጅ

21) ብሉ ናይል ኮሌጅ

22) ቢ.ኤስ.ቲ.ኤል ኮሌጅ

23) ቢ.ኤስ.ቲ ኮሌጅ

24) ጭላሎ የጤናሳይንስ እና ቴክኖሎጂ ኮሌጅ

25) ሲፒዩ ቢዝነስ እና ኢንፎርሜሽን ቴክኖሎጂ ኮሌጅ

26) ዳዲሞስ ቴክኖሎጂ እና ቢዝነስ ኮሌጅ

27) ዳንዲቦሩ ኮሌጅ

28) ዳንግላ አንድነት የጤና ሳይንስ ኮሌጅ

29) ዲማ ኮሌጅ

30) ዱርማን ኮሌጅ

31) ኢስት አፍሪካ ኮሌጅ

32) ኢኩስታ ከፍተኛ ትምህርት

33) ኢንስቲትዩት

34) ኢንኮድ ኮሌጅ

35) ኢሊያስ ኮሌጅ

36) ኢትዮጵያ አድቬንቲስት ኮሌጅ

37) ኢትዮጲስ የርቀት ትምህርት ኮሌጅ

38) ፈቃደ እግዚእ ኮሌጅ

39) ኢትዮ ሌንስ ኮሌጅ

40) ፋሆባ ኮሌጅ

41) ፋርማ ኮሌጅ

42) ፉራ ኮሌጅ

43) ጌጅ ኮሌጅ

44) ጋብስት ኮሌጅ

45) ጋምቢ የህክምና እና ቢዝነስ ኮሌጅ

46) ግሪን የምርምርና የልማት ተቋም

47) ጂኒየስ ላንድ ኮሌጅ

48) ጀንትል ኮሌጅ

49) ጎቶኒያል ኮሌጅ

50) ጎፋ ዩንቨርሳል ኮሌጅ

51) ጂቲ ኮሌጅ

52) ሂልኮ የኮምፒዩተር ሳይንስ ቴክኖሎጂ ኮሌጅ

53) ሐይሉ አለሙ ኮሌጅ

54) ሀምሊን ኮሌጅኦፍ ሚድዋይፈሪ

55) ሐይላንድ ኮሌጅ

56) ሐራምቤ ኮሌጅ

57) ሀረር አግሮ ቴክኒካል እና ቴክኖሎጂ ኮሌጅ

58) ሀረር የጤና ሳይንስ ኮሌጅ

59) ሀርበር ቢዝነስ እና ሊደር ሺኘ ኮሌጅ

60) ሃያት ሜዲካል ኮሌጅ

61) ሆርን ኢንተርናሽናል ኮሌጅ

62) ሆፕ ቢዝነስ እና ቴክኖሎጂ ኮሌጅ

63) አይ.ቤክስ ሆቴል እና ቱሪዝም ኮሌጅ

64) ኢንፎኔት ኮሌጅ

65) ኢንተርናሽናል ሊደርሺፕ ኢንስቲትዩት

66) ኢንፎሊንክ ኮሌጅ

67) ጅግዳን ኮሌጅ

68) ኪያ ሜድ ሜዲካል ኮሌጅ

69) ሊድስታር ኮሌጅ ኦፍ ቢዝነስ እና ሊደርሺፕ

70) ላየን ኢትዮጵያ ቱሪዝም እና ሆቴልኮሌጅ

71) ሉሲ ኮሌጅ

72) ሊባኖስ ኢንፎርሜሽን ቴክኖሎጂ ኮሌጅ

73) ኤም ኤ ኮሌጅ

74) ማንኩል ኮሌጅ

75) መካነ እየሱስ ማኔጅመንትና ሊደር ሺኘ ኢንስቲትዩት

76) ሜድኮ ባዮ ሜዲካል ኮሌጅ

77) ማይክሮ ቢዝነስ ኮሌጅ

78) ማይክሮ ሊንክ ኢንፎርሜሽን ቴክኖሎጂ ኮሌጅ

79) ሚዩንግ ሳንግ ሜዲካል ኮሌጅ

80) ኤምቲዋይ አቢሲንያ ኮሌጅ

81) ናሽናል ኮሌጅ

82) ናሽናል አቬይሽን ኮሌጅ

83) ነገሌ አርሲ ጀነራል ሆስፒታልና ሜዲካል ኮሌጅ

84) ኔትወርክ ኮሌጅ

85) ኒው አቢሲኒያ ኮሌጅ

86) ኒው ላይፍ ኮሌጅ

87) ኑር ኢንተርናሽናል ኮሌጅ

88) ኒው ግሎባል ቪዥን ኮሌጅ

89) ኒው ሚሊኒየም ኮሌጅ

90) ኒውጄኔሬሽን ዩኒቨርስቲ ኮሌጅ

90) ኦክስፎ ቴክኖሎጂና ቢዝነስ ኮሌጅ

91) ፓራዳይዝ ቫሊ ኮሌጅ

92) ፓራሚድ ኮሌጅ

93) ፔስክ ኢንፎርሜሽን ሲስተም

94) ፖሊ ኢንስቲትዩት ኦፍ ቴክኖሎጂ

95) ፕሪቶር ቢዝነስ ኮሌጅ

96) ፕሪንስፓል ቢዝነስ እና የጤና ኮሌጅ

97) ኩዊንስ ኮሌጅ

98) ራዳ ኮሌጅ

99) ርሆቦት ሜዲካል ኮሌጅ

100) ሪፍት ቫሊ ዩኒቨርስቲ

101) ሮያል ኮሌጅ

102) ሰሌክት ቢዝነስ እና ቴክኖሎጂ ኮሌጅ

103) ሳታ ቴክኖሎጂ ኮሌጅ

104) ሳንቴ ሜዲካል ኮሌጅ

105) ሰሊሆም የጤና ሳይንስና ቢዝነስ ኮሌጅ

106) ሲምለስ የርቀት ትምህርት ኮሌጅ

107) ስሪ ሳይ ኮሌጅ

108) ሼባ ዩንቨርስቲ ኮሌጅ

109) ቅድስተ ማርያም ዩኒቨርስቲ

110) ቅድስት ልደታ የጤና ሳይንስ ኮሌጅ

111) ሰሚት ኮሌጅ

112) ሶዶ ክርስቲያን ሆስፒታል

113) ሰንዳዕሮ ኢንፎርሜሽን ቴክኖሎጂ ኮሌጅ

114) ሶሎዳ የጤናና ቴክኖሎጂ ኮሌጅ

115) ጣና ሃይቅ ኮሌጅ

116) ቴክኖ ሊንክ ኮሌጅ

117) ቴክ ዞን ኢንጅነሪንግና ቢዝነስ ኮሌጅ

118) ትሮፒካል ኮሌጅ ኦፍ ሜዲስን

119) ዩኒቨርሳል ሜዲካል ኮሌጅ

120) ዩኒቨርሳል ቴክኖሎጂ ኮሌጅ

121) ዩኒቲ ዩኒቨርሲቲ

122) ዩኒየን ኮሌጅ

123) ዩኤስ ኮሌጅ

124) ቪክትሪ ኮሌጅ

125) ዋሸራ ቦርድ ቪው ኮሌጅ

126) ዌስተርን ዩኒቨርስቲ ኮሌጅ

127) የምስራቅ ጎህ ኮሌጅ

128) ያኔት ኮሌጅ

129) ያርድስቲክ ኢንተርናሽናል የርቀት ትምህርት ኮሌጅ

130) ዮም ኢንስቲትዩት ኦፍ ኢኮኖሚ ደቨሎፕመንት

131) ዛክቦን ኮሌጅ

132) ዛየን ቴክኖሎጂ ኤንድ ቢዝነስ ኮሌጅ

133) ኦፕን 20 -20 ኮሌጅ¾

-    አጠቃላይ ዕዳው 26 ቢሊየን የአሜሪካ ዶላር ተሻግሯል

 

የኢትዮጵያ የብድር ዕዳ ጫና ከፍተኛ ወደሚባል ደረጃ መሄዱና ሀገር ውስጥ ለሚገቡ ምርቶች የውጭ ምንዛሪ እጥረት በመከሰቱ የመንግስትን የልማት ድርጅቶችን በአክስዮን ለመሸጥ ውሳኔ ላይ መደረሱን የብሄራዊ የፕላን ኮሚሽን ይፋ አደረገ።

የአለም አቀፉ የገንዘብ ተቋም (አይ ኤም ኤፍ) በበኩሉ የኢትዮጵያ የብድር ጫና ከመካከለኛ ወደ ከፍተኛ የብድር ጫና እንደገባና የብድር ምጣኔዋም የአጠቃላይ አመታዊ ምርቷን 59 በመቶ መያዙን አስታውቀዋል።

የብሄራዊ የፕላን ኮሚሽን ኮሚሽነር ዶክተር ይናገር ደሴ እንዳሉት፣ የሃገሪቱ ኢኮኖሚ በወጭ ንግድ መዳከምና በውጭ ምንዛሪ እጥረት ሳቢያ አደጋ ውስጥ መግባቱን አምነዋል። አያይዘውም፣ ባለፉት ጥቂት አመታት ወደ ውጭ ከተላኩ ምርቶች የሚገኘው ገቢ በአማካይ 3 ቢሊየን የአሜሪካ ዶላር ላይ ሲሆን፣ ከውጭ ምርቶችን ለማስገባት የሚወጣው የውጭ ምንዛሪ ደግሞ 16 እና 17 ቢሊየን ዶላር ደርሷል ብለዋል።

ዶክተር ይናገር ደሴ አያይዘውም፤ ከውጭ ለሚገቡ ምርቶች ሙሉ ለሙሉ የሚገኘው የውጭ ምንዛሪ ከተላኩት ምርቶች የማይገኝ መሆኑም ኢኮኖሚውን ጤነኛ አላደረገውም፤ ይህ ደግሞ ሀገሪቱን የእዳ ጫና ውስጥ እንደጨመራት አስረድተዋል።

የብሄራዊ የፕላን ኮሚሽነሩ ዶክተር ይናገር ስጋታቸውን ሲያስቀምጡ፤ “ሀገሪቱ አሁን ላይ ወደ ከፍተኛ የብድር ጫና ውስጥ እየገባች ነው። በዚህ ምክንያትና ኢኮኖሚውን ማንቀሳቀሻ ተጨማሪ የውጭ ምንዛሪ ስለሚያስፈልግም መንግስት ውሳኔ አሳልፏል። ለአሁኑ የውሳኔ አስፈላጊነት ጥቂት ቁጥሮችን በማሳያነት አስረድተዋል፤ የሀገሪቱ አጠቃላይ እዳ 26 ቢሊየን የአሜሪካ ዶላር ተሻግሯል። ይህ ሁኔታ ከሀገሪቱ አጠቃላይ ምርት ጋር ሲታይ አንድም የውጭ ባለሀብቶችን እንዳይመጡ ያደርጋል። በሌላ በኩል የባለሀብቶች መተማመንን ያጠፋል” ብለዋል።

ዶክተሩ አክለውምየውጭ ምንዛሪ እጥረትና በሌላ በኩል ሀገሪቱ ለቀጣይ ሁለት አመታት ብድር ለመክፈል ስድስት ቢሊየን እንዲሁም፥ የመንግስት ፕሮጀክቶችን ለሁለት አመታት ለማከናወን ደግሞ ሰባት ቢሊየን የአሜሪካ ዶላር ያስፈልጋታል። ይህ በመንግስት በኩል የሚፈለግ ሲሆን እንደ ነዳጅና ሌሎች የፍጆታ ሸቀጦችን ማስገቢያና የሁሉም ዘርፍ ሲታይ ደግሞ የሚያስፈልገውን የውጭ ምንዛሪ ፍላጎት እጅጉን ከፍ ያደርገዋል” ሲሉ ተናግረዋል።

`ሆኖም የኢትዮጵያ መንግስት ሀገሪቱ የብድር ደረጃዋ ከከፍተኛዎቹ ይመደባል የሚለውን ሳይቀበል ቆይቷል። እንደ ስኳር ላሉ ፕሮጀክቶች የተወሰደው ብድር ደግሞ ወደ ምርት ሳይገባ እዳ መክፈያው ጊዜ ደርሷል፤ ኢትዮጵያ የውጭ ምንዛሪ ክምችቷን በሚፈለገው ደረጃ ለማስቀጠል ጥረት አድርጋ ቢሳካላትም አሁን ላይ ግን መንገዳገድ ውስጥ በመገባቱ እርምጃው አስፈልጓል። እነዚህ ምክንያቶች ተደማምረው የፈጠሩት ችግር ለመንግስት ውሳኔ ምክንያት መሆኑን” ዶክተር ይናገር ገልጸዋል።

ሀገሪቱ እዚህ እጥረት ውስጥ የገባችው በግብርና እና ኢንዱስትሪው ዘርፍ ላይ የታሰበው ባለመሳካቱ መሆኑን ያነሱት ኮሚሽነሩ፥ እነዚህን ለማስተካከል የረጅም ጊዜ አቅጣጫ ተቀምጠዋል። የአሁኑ እርምጃም የአጭር ጊዜ ነው። ኢኮኖሚው በቀጣይ አመታት በወጭ ንግድ አፈጻጸም ታግዞ እንዲቀጥል በተለይም ግብርናውን እና አምራች ኢንዱስትሪውን ለመደገፍና ለውጥ እንዲመጣ አቅጣጫ ተቀምጧል። ላለፉት አመታት በጥሩ ሁኔታ የመጣውን የሀገሪቱን ኢኮኖሚ በውጭ ምንዛሪ እጥረት ምክንያት ውድቀት ውስጥ እንዳይገባም የአሁኑ ፕራይቬታይዜሽን እንደ መፍትሄ መቀመጡን ኮሚሽነሩ አስታውቀዋል።

ሳምንት የኢህአዴግ ስራ አስፈጻሚ ኮሚቴ ባለፈው ሣምንት ባደረገው ስብሰባ በሀገሪቱ ባልተለመደ ሁኔታ የኢኮኖሚ ፖሊሲ ለውጦችን የሚያመጡ ውሳኔዎች አስተላልፏል። ይኸውም፣ በመንግስት እጅ ያሉ ሆቴሎች፣ የባቡር፣ የስኳር ልማት፣ የኢንዱስትሪ ፓርክ እና የተለያዩ የማምረቻ ኢንዱስትሪዎች፥ በከፊል ወይም ሙሉ በሙሉ በአክስዮን ሽያጭ ወደ ግል ዘርፍ እንዲተላለፉ ውሳኔ አሳልፏል።

እንዲሁም፣ ኢትዮ ቴሌኮም፣ የኢትዮጵያ አየር መንገድ፣ የኤሌክትሪክ ኃይል ማመንጫዎች እና የባህር ትራንስፖርትና ሎጂስቲክስ ድርጅት ትልቁን ድርሻ መንግስት ይዞ ቀሪው አክስዮን ለሀገር ውስጥና ለውጭ ባለሀብቶች እንዲተላለፍም መወሰኑ ይታወሳል።¾

ከ74 ሺህ በላይ የአዲስ አበባ ከተማ የጋራ መኖሪያ ቤት ተመዝጋቢዎች ከአስራሶስት ዓመታት ጥበቃ በኋላም ቤት አላገኙም። የአዲስ አበባ ከተማ አስተዳደር በ1997 ዓ.ም የከተማዋን ነዋሪዎች የጋራ መኖሪያ ተጠቃሚ ለማድረግ ምዝገባ ባካሄደበት ወቅት ከ350 ሺህ በላይ ነዋሪዎች መመዝገቡ የሚታወስ ሲሆን እንደ አዲስ አበባ ቤቶች ልማትና አስተዳደር ቢሮ መረጃ ከሆነ የከተማ አስተዳደሩ ባለፉት አስራሶስት ዓመታት በ11 ዙሮች ቤቶችን ገንብቶ ማስረከብ የቻለው ለ176 ነዋሪዎች ብቻ ነው።

በ2005 ዓ.ም በተካሄደው በዳግም ምዝገባው ወቅት የፍላጎት ለውጥ ያሳዩ ነባር ተመዝጋቢዎች በአዲስ መልኩ ከአዲስ ተመዝጋቢዎች ጋር እንዲካተቱ የተደረገ ሲሆን ከዚሁ ጋር በተያያዘ ቀደም ሲል እጣ የወጣላቸውን ጨምሮ የፍላጎት ለውጥ ያሳዩ ተመዝጋቢዎች ሲለዩ በጊዜው በነባርነት የተመዘገቡት ነባር ተመዝጋቢዎች 137 ሺህ አካባቢ ነበሩ። በጊዜው ምዝገባው ሲካሄድ 20/80 እና 40/60 የቤት ፕሮግራሞችን ጨምሮ የተመዘገበው የከተማዋ ነዋሪ አንድ ሚሊዮን የሚጠጋ ነበር። በጊዜው በተገባውም ቃል መሰረት ነባር ተመዝጋቢዎችን በሁለት ዓመታት ውስጥ ሙሉ በሙሉ የቤት ተጠቃሚ በማድረግ መንግስት ፊቱን ሙሉ በሙሉ ወደ አዲስ ተመዝጋቢዎች ያዞራል ቢባልም፤ ሁለተኛው ምዝገባ ከተካሄደ ከአምስት ዓመታት በኋላም ከ75 ሺህ ያላነሱ ነባር የጋራ መኖሪያ ቤት ተመዝጋቢዎች ገና የቤት ባለቤት መሆን አለመቻላቸውን መረጃዎች አመልክተዋል።

የአዲስ አበባ ከተማ ቤቶች አስተዳደር ኤጀንሲ ከሰሞኑ ከነባር ሳይቶች በተሰበሰቡ 2 ሺህ ስድስት መቶ ቤቶች ላይ እጣ ያወጣ ሲሆን አንዳንዶቹ ሳይቶች ቤቶቹ እጣ ከወጣባቸውና ነዋሪዎች መኖር ከጀመሩ በርካታ ዓመታትን ያስቆጠሩ መሆናቸው ግርምትን የሚያጭሩ ሆነዋል። እጣዎቹ በጎተራ ኮንሚኒየም፣ በልደታ፣ እና ጀሞ ኮንደሚኒየም ሳይቶች ሳይቀር መውጣታቸው ቤቶቹ ለምን ያህል ዓመታት ይዘጉ ወይንም ሌላ ሰው ሲጠቀምባቸው ይቆይ ግልፅ አይደለም። አስተዳድሩ አሁንም በሚቀጥለው 2011ዓ.ም ነባር ተመዝጋቢዎችን ሙሉ በሙሉ የቤት ባለቤት ለማድረግ እየሰራሁ ነው ብሏል።

``የኢህአዴግን ውሳኔ ብቻ ሳይሆን የአልጀርሱን ሥምምነትም አረና አይቀበለውም”

አቶ አብርሃ ደስታ

በይርጋ አበበ

የኢህአዴግ ሥራ አስፈፃሚ ኮሚቴ ከ18 ዓመት በፊት በአልጀርስ የተፈረመውን የኢትዮ-ኤርትራ የድንበር ኮሚሽንና ስምምነት ያለቅድመ ሁኔታ ተግባራዊ ለማድረግ መወሰኑን በመቃወም አረና ትግራይ ለዴሞክራሲና ለሉአላዊነት (አረና) የፊታችን ቅዳሜ በመቀሌ ከተማ ሰላማዊ ሰልፍ ጠራ።

የፓርቲው ሊቀመንበር አቶ አብርሃ ደስታ ከሰንደቅ ጋዜጣ ጋር ትላንት ማምሻውን በስልክ ባደረጉት ቃለ ምልልስ ኢህአዴግ ያስተላለፈውን ውሳኔ ብቻ ሳይሆን የአልጀርሱን ስምምነትም አንቀበለውም” ሲሉ ተናግረዋል። የአረናው ሊቀመንበር አያይዘውም በዚህ የተነሳም የፊታችን ቅዳሜ ሰኔ 9 2010 ዓ.ም በመቀሌ ሰላማዊ ሰልፍ ለመጥራት መገደዳቸውን ተናግረዋል።

የኢህአዴግ ሥራ አስፈፃሚ ኮሚቴ ያስተላለፈውን ውሳኔ ተከትሎ በኢሮብ፣ ባድመ፣ ዛላንበሳ እና ሌሎች የትግራይ ክልል ከተሞችም የተቃውሞ ሰላማዊ ሰልፎች መካሄዳቸውን የጠቆሙት አቶ አብርሃ ሰልፎቹ የሚካሄዱት በተለይ በድንበር አካባቢ ባሉ ከተሞች የህወሓት አመራሮችም የሚያስተባብሩት እንደሆነ ተናግረዋል።

ሰልፎቹን እንዲካሄዱ ፓርቲያችሁ ምን አስተዋፅኦ አድርጓል ተብለው የተጠየቁት አቶ አብርሃ “እኛ ውሳኔውን ህዝቡ ለተቃውሞ እንዲወጣ ከማወጅ በዘለለ እስካሁን የመራነው ሰልፍ የለም። የቅዳሜውን ግን እኛ የጠራነው ሲሆን ለሚመለከተው አካልም አሳውቀናል” ብለዋል።

“በህወሓት አገዛዝ ሰላማዊ ሰልፍ መውጣት ተከልክሎ ቆይቷል” የሚሉት አቶ አብርሃ ደስታ፤ “በቅዳሜው ሰልፍ ግን በርካታ ቁጥር ያለው ህዝብ እንደሚታደም እንጠብቃለን፣ ምክንያቱም ይህ አገራዊ ጉዳይ ነውና” ሲሉ ተናግረዋል።

አቶ አብርሃ በመጨረሻም “ኢህአዴግ አሁን ያለበት ሁኔታ አገር ለመምራት የሚያስችለው ብቃት ላይ አይደለም። ሁሉም ነገር ከቁጥጥሩ ውጭ ሆኖበታል። ስለዚህ ሁሉን አሳታፊ የሆነ የአንድነት መንግሥት እንዲመሰረት እንጠይቃለን” በማለት የፓርቲያቸው አረናም እና የመድረክ አቋም አንፀባርቀዋል።

በይርጋ አበበ

አምስት የፌዴሬሽን አባላትን ይዞ የተመሰረተውና ግንቦት 16 ቀን 2010 ዓ.ም የመሥራች ጉባኤውን ያካሄደው አዲሱ የአሰሪዎች ኮንፌዴሬሽን በሠራተኛና ማህበራዊ ጉዳይ ሚኒስቴር የእውቅና ደብዳቤ ሰጥቶታል።

የሚኒስትሩ መስሪያ ቤቱ በደብዳቤ እንደገለፀው “በአዲስ የተደራጀው ኮንፌዴሬሽን ግንቦት 16/2010 ዓ.ም ባካሔደው መስራች ጉባኤ መተዳደሪያ ደንቡን በማጽደቅና አመራሩን በመምረጥ በሚኒስቴር መስሪያ ቤቱ እንዲመዘገብ እና የእውቅና ሰርተፍኬት እንዲሰጣችሁ ኢአኮአም /0436/10 በ16/09/2010 ዓ.ም በተፃፈ ደብዳቤ መጠየቁ ይታወሳል።

ስለዚህ የኢትዮጵያ ፌዴራላዊ ዲሞክራሲያዊ ሪፐብሊክ የአስፈፃሚ አካላትን ሥልጣንና ተግባር ለመወሰን በወጣው አዋጅ ቁጥር 916/2008 አንቀጽ 34 እና በአሠሪና ሠራተኛ ጉዳይ አዋጅ 377/96 መሠረት ኮንፌዴሬሽኑ ህጋዊ ሆኖ ተመዝግቧል” በማለት በኢትዮጵያ እውቅና የተሰጠው የአሰሪዎች ኮንፌዴሬሽን መሆኑን አስታውቋል።

የአሰሪዎች ኮንፌዴሬሽን መሥራች ጉባኤ ግንቦት 16 ቀን በኢንተርኮንቲኔንታል ሆቴል ባካሄደው ጠቅላላ ጉባኤ 11 አባላት ያሉት ሥራ አስፈፃሚ ኮሚቴ የመረጠ ሲሆን እነዚህን ሥራ አስፈፃሚዎችም ሰራተኛና ማህበራዊ ጉዳይ ሚኒስቴር ተቀብሎ እውቅና ሰጥቷቸዋል።

ለአራት ዓመታት በሚቆየው የሥራ አስፈፃሚ ኮሚቴዎች የሥራ ዘመን ኮንፌዴሬሽኑን ኢንጂነር ጌታሁን ሁሴን በሊቀመንበርነት የሚመሩት ሲሆን አቶ ፍትህ ወልደሰንበት ደግሞ ተቀዳሚ ምክትል ፕሬዝዳንት ናቸው።

Page 1 of 109

Sendek Newspaper

Bole sub city behind Atlas hotel

Contact us