You are here:መነሻ ገፅ»ዜና

የዐቃቤ ሕግ ምስክሩን የገደሉት እስከ ዕድሜ ልክ ተፈረደባቸው

Wednesday, 13 January 2016 14:23

በግል ፀብና በቀል ተነሳስቶ እሳት በማቀጣጠል በንብረት ላይ ከፍተኛ ጉዳት አድርሷል ሲል የፌዴራል ዐቃቤ ሕግ ክስ በመሠረተበት ብዙነህ ደምሴ ላይ የምስክርነት ቃሉን ሰጥቶ ከፍርድ ቤት ሲመለስ በደረሰበት የድብደባ ጉዳት ህይወቱ እንዲያልፍ አድርገዋል በሚል ክስ የተመሠረተባቸው ሶስት ግለሰቦች ከ18 ዓመት እስከ ዕድሜ ልክ በሚደርስ እስራት እንዲቀጡ ተፈረደባቸው።

የፌዴራሉ ዐቃቤ ሕግ በክስ ዝርዝሩ እንዳስረዳው፤ ተከሳሾች በዋና ወንጀል አድራጊነት ተካፋይ በመሆን ሰውን ለመግደል አስቀድመው በማሰብ ሐምሌ 4 ቀን 2004 ዓ.ም ከቀኑ በግምት 7፡30 ሰዓት ሲሆን፤ በየካ ክፍለ ከተማ ቀበሌ 20/21 ልዩ ቦታው ገብርኤል ፀበል ወይም ደማሚት ሰፈር ተብሎ በሚጠራው አካባቢ ላይ ወንድማቸው ብዙነህ ደምሴ በተከሰሰበት የእሳት ቃጠሎ ማድረስ ወንጀል ጉዳይ ላይ ለዐቃቤ ሕግ የምስክርነት ቃሉን ሰጥቶ በመመለስ ላይ የነበረውን የግል ተበዳይን “በወንድማችን ላይ መስክረህ አስፈረድክበት” በማለት አንደኛ እና ሁለተኛ ተከሳሾች ከተደበቁበት በመውጣት የግራና የቀኝ ጭኖቹን በያዙት ጩቤ ወግተውታል ይላል። አክሎም 3ኛ ተከሳሽ ግራ ጀርባውን በጩቤ ሲወጋው፤ 2 ተከሳሽ በድጋሚ በጩቤ መሀል አናቱን የወጋውና የግል ተበዳይን ደምሴ ፈንታን ለሞት የዳረጉት በመሆኑ በፈፀሙት ከባድ የሰው መግደል ወንጀል ተከሰዋል ሲል በ1ኛ ክስ ስር ያትታል።

ዐቃቤ ሕግ በሁለተኛ ክሱም ተከሳሾቹ የፈፀሙትን ወንጀል ሲያትት፤ በአንደኛው ክስ ስር በተጠቀሰው ጊዜና ቦታ ሌላኛውን የግል ተበዳይ ማንደፍሮ በለው 2ኛ እና 3ኛ ተከሳሾች በመያዝ አንገቱን አንቀው 2ኛ ተከሳሽ ግራ ትከሻውን በመውጋት የ2 ሴንቲ ሜትር ጥልቀት ያለው ቁስል በመፍጠር ቀላል የአካል ማጉደል ወንጀል ፈፅመዋል በሚል ተከሰዋል።

የፌዴራል ከፍተኛ ፍርድ ቤት 3ኛ ወንጀል ችሎትም የዐቃቤ ሕግን ክስ፤ የሰውና የሰነድ ማስረጃ መርምሮ ሲያበቃ የተከሳሾችን መከላከያ አድምጧል። በሂደቱም ሶስቱ ተከሳሾች ማለትም 1ኛ ተከሳሽ አስራት ደምሴ፣ 2ኛ ተከሳሽ መብራቱ ደምሴ እና 3ኛ ተከሳሽ መላኩ አድነው የቀረበባቸውን ክስ በሚገባ መከላከል ባለመቻላቸው ጥፋተኛ መሆናቸውን ታህሳስ 25 ቀን 2008 ዓ.ም በተሰጠው ፍርድ ችሎቱ አረጋግጧል።

በቀጣዩ ዕለት ማለትም ታህሳስ 26 ቀን 2008 ዓ.ም በተሰጠው ቅጣትም፤ 2ኛ እና 3ኛ ተከሳሾች በሁለቱም ክሶች ስር ጥፋተኛ ሆነው በመገኘታቸው እያንዳንዳቸው በእድሜ ልክ እስራት እንዲቀጡ የተወሰነ ሲሆን፤ 1ኛው ተከሳሽ ደግሞ በ18 ዓመት እስራት እንዲቀጣ ሲል ችሎቱ ፍርዱን አሰምቷል።

ከፍርድ ቤቱ መዝገብ ለመረዳት እንደተቻለውም ለግድያ ወንጀሉ ሰበብ የሆነው ወንድማቸው በፈፀመው የእሳት ማቃጠል ወንጀል ተከሶ በሐምሌ 05 ቀን 2004 ዓ.ም የ2 ዓመት ፅኑ እስራት የተፈረደበት ስለመሆኑም ታውቋል።

ይምረጡ
(2 ሰዎች መርጠዋል)
561 ጊዜ ተነበዋል

Sendek Newspaper

Bole sub city behind Atlas hotel

Contact us