You are here:መነሻ ገፅ»ዜና

ጠ/ሚኒስትሩ ለፍትህና የሕግ ሥርዓት ምርምር ኢንስቲትዩት ዋና ዳይሬክተር ሾሙ

Wednesday, 13 January 2016 14:22

ጠቅላይ ሚኒስትር አቶ ኃ/ማሪያም ደሳለኝ ለፍትህና የሕግ ሥርዓት ምርምር ኢንስቲትዩት ዋና ዳይሬክተር መሾማቸውን ከጠ/ሚ ጽ/ቤት ያገኘነው ዜና ጠቆመ።

በጠ/ሚኒስትሩ ለፍትህና የህግ ሥርዓት ምርምር ኢንስቲትዩት ዋና ዳሬክተር ሆነው የተሾሙት፣ በታላቁ ህዳሴ ግድብ ግንባታ ሕዝባዊ ተሳትፎ ብሔራዊ ምክር ቤት ጽ/ቤት በም/ዋና ዳይሬክተርነት ሲያገለግሉ የነበሩት አቶ ዛድግ አብርሃ ናቸው።

አቶ ዛድግ አብርሃ በሕዝብ ዘንድ በስፋት የሚታወቁት፣ ገዢውን ፓርቲ በመወከል በተለያዩ መድረኮች በሚደረጉት ፖለቲካዊ ክርክሮች እና ከመገናኛ ብዙሃን ጋር በተያያዘ በሚሰጡ ስልጠናዎች ላይ ጥናታዊ ጽሁፎች በማቅረብ እንዲሁም ስልጠናዎች በመስጠት ነው።

መቀሌ ላይ በተደረገው 12ኛው የህዝባዊ ወያኔ ሓርነት ትግራይ (ህወሓት) ማዕከላዊ ስብሰባ በነባር ታጋይ ስብሃት ነጋ አቅራቢነት አቶ ዛድግ አብርሃ ለማዕከላዊ ኮሚቴ አባልነት በእጩነት መቅረባቸው ይታወቃል። ሆኖም ግን በማዕከላዊ ኮሚቴ አመራረጥ ስነስርዓት መሰረት አንድ አባል ሁለት እጩዎችን መጠቆም ስለማይችል ለውድድር ሳይቀርቡ ቀርተዋል። በአሁን ሰዓት የኮሚኒኬሽን ጽ/ቤት ሚኒስትር ሆነው እየሰሩ የሚገኙት አቶ ጌታቸው ረዳ በታጋይ ስብሃት ነጋ አቅራቢነት ለማዕከላዊ ኮሚቴ ቀርበው መመረጣቸው የሚታወስ ነው።

አቶ ዛድግ አብርሃ የሕግ ባለሙያ ሲሆኑ የህዝባዊ ወያኔ ሓርነት ትግራይ (ህወሓት) ካበቃቸው ወጣት የፖለቲካ አመራሮች መካከልም በስራ ዲሲፕሊናቸው ተጠቃሽ ከሆኑት መካከል አንዱ መሆናቸውን የስራ ባልደረቦቻቸው ለዝግጅት ክፍላችን ገልጸዋል።

አቶ ዛድግ በአዲሱ ሹመታቸው ቀደም ሲል የፍትህና የህግ ሥርዓት ምርምር ኢንስቲትዩትን በዋና ዳይሬክተርነት ሲያገለግሉ የነበሩትን ዶክተር መንበረፀሃይ ታደሰን ይተካሉ።¾

ይምረጡ
(0 ሰዎች መርጠዋል)
626 ጊዜ ተነበዋል

Sendek Newspaper

Bole sub city behind Atlas hotel

Contact us