You are here:መነሻ ገፅ»ዜና

ሰማያዊ ፓርቲ ለዘጠኝ ወራት ዕቅድ ማስፈጸሚያ ከሦስት ሚሊዮን ብር በላይ አጸደቀ

Wednesday, 21 December 2016 14:08

በይርጋ አበበ

መስከረም 28 ቀን 2009 ዓ.ም አስቸኳይ ድንገተኛ ጠቅላላ ጉባኤ ያካሄደውና አዲስ ሊቀመንበር የመረጠው ሰማያዊ ፓርቲ ለቀጣዮቹ ሶስት ሩብ ዓመታት (ዘጠኝ ወራት) የስራ ማስፈጸሚያ የሚሆን ሶስት ነጥብ አንድ ሚሊዮን ብር አጸደቀ። በአገሪቱ የተጣለው አስቸኳይ ጊዜ አዋጅ በፓርቲው አባላት ላይ ወከባ፣ እስር እና እንግልት ማሳደሩንም ገልጿል።

ፓርቲው ትናንት ማክሰኞ በጽ/ቤቱ በሰጠው ጋዜጣዊ መግለጫ እንዳስታወቀው “በፓርቲያችን መተዳደሪያ ደንብ አንቀጽ 10/5 መሰረት የፓርቲው ሊቀመንበር የስራ አስፈጻሚ አባላትን ለብሔራዊ ምክር ቤት አቅርቦ ያጸድቃል። በዚህም መሰረት አዲሱ ሊቀመንበር አቶ የሽዋስ አሰፋ ያዋቀሩት ስራ አስፈጻሚ ኮሚቴ እቅዱንና በጀቱን ለብሔራዊ ምክር ቤት ካቀረበ በኋላም ብሔራዊ ምክር ቤቱ የቀረበውን እቅድና በጀት መርምሮ አጽድቆታል” ሲል ነው የገለጸው።

የሰማያዊ ፓርቲ አመራር ታህሳስ 9 ቀን 2009 ዓ.ም ለብሔራዊ ምክር ቤቱ ባቀረበው የእቅድና የበጀት ሪፖርት ላይ ምርመራ ያካሄደው የፓርቲው ብሔራዊ ምክር ቤት በጀት ከማጽደቁም በላይ በአራት መሰረታዊ ነጥቦች ላይ መመሪያ አስተላልፏል። ብሔራዊ ምክር ቤቱ መመሪያ ያስተላለፈው በአደረጃጀት ጉዳይ፣ የህዝብ ግንኙነትና የውጭ ግንኙነትን በተመለከተ፣ የምርጫ ጉዳይና የጥናትና ምርምር ስትራቴጂክ ጉዳይ እና የህግ ጉዳይና የፋይናንስ ጉዳይን በተመለከተ አቅጣጫ አስቀምጧል።

ፓርቲው በመግለጫው እንዳስታወቀው በቀጣዩ ዓመት በአገሪቱ በሚካሄደው የማሟያ ምርጫ እና በአዲስ አበባና በድሬዳዋ በሚካሄዱ ምርጫዎች ላይ ጥሩ ተፎካካሪ እንዲሆን የምርጫ ጉዳይና የጥናትና ስትራቴጂክ ጉዳይ ክፍል ትኩረት ሰጥቶ እንዲሰራ ያሳሰበ ሲሆን የፓርቲውን ገጽታ በመገንባት ለማስተዋወቅ በኩል የህዝብ ግንኙነትና የውጭ ግንኙነት ክፍል የቤት ስራ ተሰጥቶታል።

ከመስከረም 28 ቀን 2009 ዓ.ም ጀምሮ ተግባራዊ የሆነውና በአገሪቱ የታወጀው የአስቸኳይ ጊዜ አዋጅ በፓርቲው አባላት እና አመራሮች ላይ እስር፣ ወከባ እና አፈና እንዳሳደረበትም በመግለጫው አስታውቋል።¾

ይምረጡ
(0 ሰዎች መርጠዋል)
85 ጊዜ ተነበዋል

Sendek Newspaper

Bole sub city behind Atlas hotel

Contact us