You are here:መነሻ ገፅ»ዜና

በኢትዮጵያ የመጀመሪያው ጠቅላይ ዐቃቤ ሕግ አረፉ በዛሬው ዕለት ስርዓተ ቀብራቸው ይፈፀማል

Wednesday, 21 December 2016 14:18

ኢትዮጵያ በተለያዩ የኃላፊነት ደረጃዎች በማገልገልና ለአፍሪካ አንድነት መመስረት የሕግ ቻርተር ከማርቀቅ አንፃር ድጋፍ በማድረግ የታወቁት አንጋፋው የሕግ ባለሙያ አቶ ተሾመ ገ/ማርያም በ86 ዓመታቸው አረፉ፡፡ ስርዓተ ቀብራቸውም ዛሬ በቅድስት ስላሴ ቤ/ክ ይፈፀማል፡፡ በተለይም በአፄ ኃ/ስላሴ መንግሥት ውስጥ በሥራ ሚኒስቴር፣ በልማት ባንክ፣ በኢትዮጵያ አየር መንገድ እና በጠቅላይ ዐቃቤ ሕግ መስሪያ ቤቶች ውስጥ በኃላፊነት የሰሩት እኚህ አንጋፋ ባለሙያ በአፄ ኃይለስላሴ ዘመነ መንግሥት የማዕድን ሚኒስቴር ሚኒስትር ዴኤታ ሆነው ከመስራት ባለፈ በተለያዩ ተቋማት በኃላፊነት አገልግለዋል፡፡

 

በበርካቶች ዘንድ የመጀመሪያው ጠቅላይ ዐቃቤ ሕግ መሆናቸው የሚነገርላቸው አቶ ተሾመ ገ/ማርያም፤ በዘመናቸው ከነጮቹ ያልተናነሰ በመስራት በሕግ ስራ ውስጥ ስኬታማነታቸውን ያሳዩ ሰው ናቸው፡፡ ከሰሯቸው ስራዎችም መካከል የኢትዮጵያ የማዕድን ሕግ እንዲቀረፅ ከማድረግ አንስቶ፤ የአፍሪካ አንድነት ድርጅት እንዲቋቋም፣ የድርጅቱን ቻርተር በማርቀቅ ከአጥኚው ቡድን ጋር በአባልነት ሰርተዋል፡፡ በዚህም ባለፈ በአለም አቀፍ ደረጃ የህግ አገልግሎትና የማማከር ስራን ሰርተዋል፡፡

 

የመጀመሪያ ጠቅላይ ዐቃቤ ሕግ በመሆን የሚታወቁት አቶ ተሾመ፤ አዳማ ተወልደው ሲዳሞ እንዳደጉ የሚነገርላቸው ሲሆን፤ በ1977 ዓ.ም ቀዳማዊ ኃ/ስላሴ በሲዳሞ ባደረጉት ጉብኝት ትጋታቸውን ተመልክተው ወደ አዲስ አበባ ይዘዋቸው በመምጣት ተፈሪ መኮንን ት/ቤት እንዳስገቧቸው በቅርብ የሚያውቋቸው ይናገራሉ፡፡ በትምህርታቸውም ብርቱ እንደነበሩ የሚነገርላቸው አቶ ተሾመ፤ በዩኒቨርስቲ ኮሌጅ ቆይታቸውም በህዝብ አስተዳደር (Public Administration) በማዕረግ መመረቃቸው ታውቋል፡፡ ቀጥሎም ካናዳ ሀገር በመሄድ በሕግ ትምህርት የማስተርስ ዲግሪያቸውን መስራታቸውን በቅርብ ከሚያውቋቸው ሰዎች መካከል በሕግ ባለሙያነታቸው የሚታወቁት አቶ ታምሩ ወንድምአገኝ ይናገራሉ፡፡ ከንጉሱ ጋር በነበራቸው ጥብቅ ግንኙነትም በደርግ መንግስት ለዘጠኝ ዓመታት በእስር ቆይተዋል፡፡ አቶ ተሾመ ገ/ማርያም በበርካታ ሀገራት እየተዘዋወሩ በሕግ አማካሪነት ከመስራታቸውም ባለፈ እንግሊዝኛ፣ ፈረንሳይኛና ጣሊያንኛን ቋንቋዎችን ጨምሮ ከስድስት ያላነሱ የኢትዮጵያ ቋንቋዎችን ይናገሩም እንደነበር ተወስቷል፡፡

 

ባለትዳርና የአንድ ልጅ አባት የሆኑት አቶ ተሾመ ገ/ማርያም፤ በመኖሪያ ቤታቸው ያላቸው የመፅሀፍት ክምችት ከአንድ ትልቅ ቤተ-መፅሀፍት የሚተናነስ አለመሆኑንም ሲነገር ሰምተናል፡፡ ለስራ ጉዳይ ወደደቡብዊ አፍሪካዊቷ አገር ዛምቢያ ሄደው በድንገት ዜና እረፍታቸው የተሰማ ሲሆን፤ ከዚህ ቀደም የልብ ህክምና ተደርጎላቸው እንደነበርም ምንጮች ጠቁመዋል፡፡

 

በ86 ዓመታቸው ከዚህ ዓለም በሞት የተለዩት የአቶ ተሾመ ገ/ማርያም ትናንት ማምሻውን አስክሬናቸው ወደ አዲስ አበባ የገባ ሲሆን፤ ሥርዓተ ቀብራቸው ዛሬ (ታህሳስ 12 ቀን 2009 ዓ.ም) በቅድስት ስላሴ ቤተ ክርስቲያን ወዳጅ ዘመዶቻቸውና የሥራ ባልደረቦቻቸው በተገኙበት ከቀኑ በ9፡00 ሰዓት ይፈፅማል ተብሎ እንደሚጠበቅ ያገኘነው መረጃ ይጠቁማል፡፡  

ይምረጡ
(0 ሰዎች መርጠዋል)
403 ጊዜ ተነበዋል

Sendek Newspaper

Bole sub city behind Atlas hotel

Contact us