You are here:መነሻ ገፅ»ዜና

ሳዑዲ አረቢያ ለህዳሴው ግድብ እገዛ ልታደርግ ትችላለች መባሉን አስተባበለች

Wednesday, 21 December 2016 14:21

በሳዑዲ አረቢያ የንጉሱ ልዩ ችሎት አማካሪና የልማት ፈንድ ሚኒስትር አህመድ አልሀቲብ የተመራው የልዑካን ቡድን በኢትዮጵያ ባደረገው የስራ ጉብኝት የህዳሴውን ግድብ የጎበኘ ሲሆን ከዚሁ ጋር በተያያዘ ሳዑዲ አረቢያ ለግድቡ ግንባታ የፋይናስ ድጋፍ ለማድረግ አቅዳለች የሚለውን የተለያዩ ሚዲያዎች ዘገባን አስተባበለች፡፡ በዚሁ ዙሪያ ከሰሞኑ ማብራሪያ የሰጡት የመካከለኛው ምስራቅ የስትራቴጂክና የህግ ጉዳዮች ጥናት ኃላፊ አንዋር ኤሽኪ በተለያዩ ሚዲያዎች የቀረበውን ዘገባ ትክክል አለመሆኑን ገልፀዋል፡፡

 

 ኃላፊው ለምስር አል አረቢያ የዜና ቻናል በሰጡት ማብራሪያ በአልካቲብ የተመራው የሳዑዲ ልዑካን ቡድን በኢትዮጵያ ጉብኝት ያደረገው በሁለቱ ሀገራት መካከል ስላለው የሁለትዮሽ ግንኙነትና ኢኮኖሚያዊ ፕሮጀክቶች ዙሪያ ለመወያየት መሆኑን ገልፀው የህዳሴውን ግድብ በገንዘብ ለማገዝ ነው የሚለው ጉዳይ ትክክል አለመሆኑን ገልፀዋል፡፡ ሳዑዲ አረቢያ በሶሪያ የበሽር አላሳድ መንግስት እንዲወድቅ እየሰራች ሲሆን፤ በቅርቡ “የግብፅ መንግስት ለአላሳድ መንግስት ድጋፍ እየደረገ ነው” በሚል ሳዑዲዎች ቅሬታ ያደረባቸው መሆኑን ሲገለፅ ቆይቷል፡፡ ከዚሁ ጋር በተያያዘም ሳዑዲዎች የህዳሴውን ግድብ በገንዘብ ለመርዳት ያሰቡ መሆኑን በመግለፅ ሚዲያዎቹ የተለያዩ ዘገባዎቹን ሲያሰራጩ የቆዩ መሆኑን የሚድል ኢስት ሞኒተር ዘገባ አመልክቷል፡፡

 

ኢትዮጵያ በራሷ የፋይናንስ አቅም ግድቡን ገንብታ የምታጠናቅቅ መሆኗ መሰረት ድንጋዩ ከተጣለበት ወቅት ጀምሮ ሲገለፅ ቆይቷል፡፡ እስከ አሁንም ድረስ ግድቡ እየተገነባ ያለው በኢትዮጵያ መንግስትና ህዝብ መሆኑን በተለያዩ ጊዜያት በመንግስት በኩል የሚሰጡት መረጃዎች ያመለክታሉ፡፡በርካታ የግብፅ የኤሌክትሮኒክስና የህትመት ሚዲያዎች የሳዑዲ ልዑካን ቡድንን ጉብኝት በማብጠልጠል ከሰሞኑ ሰፊ ሽፋን ሲሰጡት ተስተውሏል፡፡ ግብፅ ሳዑዲ አረቢያ ሱዳንን በማባበል በሱዳን ምድር አባይን ለመስኖ እርሻ ለመጠቀም እንቅስቃሴ ጀምራለች በሚል በጥርጣሬ ስትመለከታት ቆይታለች፡፡ በ1959ኙ የግብፅ ሱዳን የአባይ ውሃ የሁለትዮሽ ስምምነት መሰረት ግብፅ ኮታዋን በሚገባ እየተጠቀመች ሲሆን ሱዳን ግን ካለባት አቅም ውስንነት ጋር በተያያዘ የተሰጣትን የውሃ ኮታ በበቂ ሁኔታ አለመጠቀሟ ይነገራል፡፡

 

ሳዑዲ እህል ከውጪ ኤክስፖርት ከማድረግ ይልቅ በሱዳን ምድር የአባይን ውሃ ተጠቅማ የማምረት እቅድ ይዛ በመስራት ላይ ናት፡፡ ከፍተኛ የገንዘብ አቅም ያላት ሳዑዲ አረቢያ ከግብፅ አንፃር የራስጌ ተፋሰስ ሀገር በሆነችው ሱዳን የአባይን ውሃ ለመጠቀም መነሳቷ ግብፅን ስጋት ውስጥ ከቷል፡፡ ሳዑዲ እና ኳታር ከሙባረክ መውደቅ በኋላና የሙርሲን መንግስት መወገድ ተከትሎ በቢሊዮን የሚቆጠር ዶላር ለአልሲሲ መንግስት ሲያቀርቡ ቆይተዋል፡፡ በአይነትም ቢሆን የነዳጅ ድጎማ ሳይቀር  ሲያደርጉ ቆይተዋል፡፡

 

ሱዳንን ከኢራን አጋርነት በማላቀቅ ከአልበሽር መንግስት ጋር ጠንካራ ትብብር ውስጥ የገቡት የሳዑዲ ንጉሳዊያን ቤተሰቦች ከአባይ ጋር በተያያዘ ስጋት የሆኑ ሲሆን በኢትዮጵያም በኩል ሳዑዲ ኢትዮጵያ ግድቡን ለመገንባት እያካሄደች ባለው ስራ እገዛ ልታደርግ ትችላለች የሚል ስጋት ያላቸው መሆኑን የሰሞኑ የሚዲያ ዘገባዎች ያመለክታሉ፡፡ በዚህ በኩል በኢትዮጵያም ሆነ በግብፅ መንግስታት በኩል በይፋ የተባለ ነገር የለም፡፡   

ይምረጡ
(0 ሰዎች መርጠዋል)
385 ጊዜ ተነበዋል

Sendek Newspaper

Bole sub city behind Atlas hotel

Contact us