You are here:መነሻ ገፅ»ዜና

በቴሌኮም ማጭበርበር የተከሰሰው በእስርና በገንዘብ ተቀጣ

Wednesday, 28 December 2016 13:47

በኢንተርኔት አገልግሎት መስጠት ሽፋን ስር ሆኖ፤ የውጪ ሀገር የስልክ ጥሪዎችን በሀገር ውስጥ መስመር በቅናሽ የሚያስተላልፉ 32 መሣሪያዎችን በሕገወጥ መንገድ በመጠቀም ኢትዮ-ቴሌኮም ማግኘት የሚገባውን 5 ሚሊዮን 43 ሺህ 108 ብር አሳጥቷል የተባለው ተከሳሽ ጥፋተኛ ሆኖ በመገኘቱ በ9 ዓመት ጽኑ እስራትና በ75 ሺህ ብር ገንዘብ ተቀጣ።

የፌዴራሉ ዐቃቤ ሕግ በክስ መዝገቡ በዝርዝር እንዳስረዳው ተከሳሽ አብደላ አብዱራህማን የሱፍ ነዋሪነቱን በአዳማ ከተማ ቀበሌ 08 በተለምዶ መሐመድ ኑር ህንፃ ተብሎ በሚጠራው ስፍራ ነው ይላል። ዐቃቤ ሕግ በፌዴራሉ ከፍተኛ ፍርድ ቤት አራዳ ምድብ 4ኛ ወንጀል ችሎት ባቀረበው ክስ፤ ተከሳሹ የቴሌኮም አገልግሎት ለመስጠትና ለመጠቀም የሚያስችል ሕጋዊ ፈቃድ ሳይኖረው፤ ለኢንተርኔት አገልግሎት መስጫነት በከፈተው የኢንተርኔት ካፌ ውስጥ የቴሌኮም ማጭበርበር ወንጀል ፈፅሟል ሲል ይከሳል።

ከመገናኛና ኢንፎርሜሽን ቴክኖሎጂ ሚኒስቴር በሚሰጥ ፈቃድ ብቻ ወደ ሀገር ውስጥ ለማስገባት፣ ለመያዝና ለመጠቀም የሚያስችሉ ናቸው የተባሉትን የቴሌኮም መሳሪያዎች (ዲን ስታር ጌት ዌይ) በአንድ ጊዜ 32 የስልክ ጥሪዎችን በቅናሽ የሚያስተላልፉ፣ ያልተፈቀዱ የስልክ ጥሪ ትራፊኮችን ወደ ሀገር ውስጥ መስመር በመቀየር የራሱን ኔትዎርክ በመፍጠር ወደብዙ ኔትዎርክ በመቀየር ሲሰራ መገኘቱንም ያትታል።

በዚህም የወንጀል ድርጊቱ ከውጪ ሀገር ወደ ኢትዮጵያ የሚደረጉ የስልክ ጥሪዎችን በኢትዮ-ቴሌኮም በኩል ሳይሆን ለወንጀሉ መጠቀሚያነት ባሰናዳቸው መሳሪያዎች በኩል እንደሆነም ዐቃቤ ሕግ ያስረዳል። ዐቃቤ ሕግ ባቀረበው ማስረጃ መሰረትም በቁጥጥር ስር እስከዋለበት ጊዜ ድረስ ማለት ከጥር 3 ቀን 2006 ዓ.ም እስከ ጥቅምት 15 ቀን 2007 ዓ.ም ድረስ ያስተላለፋቸው ጥሪዎች 1 ሚሊዮን 307 ሺህ 23 ደቂቃዎችን የሚፈጁ ሲሆን፤ በዚህም ስሌት መሰረት ኢትዮ-ቴሌኮም ማግኘት የነበረበትን የ5 ሚሊየን 43 ሺህ 108 ብር ገቢ እንዲያጣ አድርጐታል ሲል ያትታል። በዚህም መሠረት ለቴሌኮም አገልግሎት የተዘረጋውን መሠረተ-ልማት ወደጐን በመተው ዓለም አቀፍ የቴሌኮም አገልግሎት በመስጠት፤ የቴሌኮም ማጭበርበር ወንጀል ክስ መስርቶበታል።

ተከሳሹ የተመሠረተበትን ክስ አልፈፀምኩም በማለት ክዶ የተከራከረ ቢሆንም፤ የዐቃቤ ሕግን የሰውና የሠነድ ማስረጃዎች በሚገባ ሊከላከል ባለመቻሉ ጥፋተኛ ተብሏል። በዚህም መሠረት የፌዴራሉ ከፍተኛ ፍርድ ቤት አራዳ ምድብ 4ኛ ወንጀል ችሎት በትናንትናው ዕለት (ማክሰኞ ታህሳስ 18 ቀን 2009 ዓ.ም) በዘጠኝ ዓመት ፅኑ እስራትና በ75 ሺህ ብር የገንዘብ መቀጮ እንዲቀጣ ሲል የቀጣት ውሳኔውን አስተላልፎበታል።¾

ይምረጡ
(0 ሰዎች መርጠዋል)
195 ጊዜ ተነበዋል

Sendek Newspaper

Bole sub city behind Atlas hotel

Contact us