You are here:መነሻ ገፅ»ዜና

ኤርትራ አሰብን ለተባበሩት አረብ ኤሜሬት አላከራየሁም አለች

Wednesday, 04 January 2017 14:19

ኤርትራ የአሰብ ወደብን ለተባበሩት አረብ ኤሜሬት አላካራየሁም በማለት አስተባበለች። ኤርትራ አሰብን ለተባበሩት አረብ ኤሜሬት የጦር ቤዝ ሆኖ እንዲያገለግል በሊዝ ሰጥታለች የሚሉ ዘገባዎች ሲሰራጩ የቆዩ ሲሆን ይህ ዘገባ ከሰሞኑም ተጠናክሮ ቀጥሏል። በቤይሩት መሰረቱን ያደረገው አልማያዲን የተባለ የአረብኛ ቴሌቭዥን ጣቢያ የተባበሩት አረብ ኤሜሬት አሰብን ለ30 ዓመታት ለወታደራዊ ቤዝነት ለመጠቀም የሊዝ ስምምነት ያደረገች መሆኗን በአዲስ መልኩ ዘግቧል። እስከዛሬ በነበሩት ዘገባዎች በኤርትራም ሆነ በተባበሩት አረብ ኤሜሬት በኩል ይህ ነው የሚባል የአዎንታና የማስተባበያ ድምፅ ያልተሰማ ሲሆን ከሰሞኑ ግን ኤርትራ መረጃው የተሳሳተ ነው በማለት ጠበቅ ያለ ማስተባበያ ሰጥታለች። በዚህ የተሌቭዥን ዘገባ ዙሪያ ጠበቅ ያለ ማስተባበያ የሰጠው የኤርትራ ማስታወቂያ ሚኒስቴር መረጃው የሀገሪቱን ገፅታ ለማጉደፍ ታስቦ መሰረት በሌለው መረጃ የተሰራጨ ነው ብሏል። ከቴሌቭዥን ጣቢያው ጋር የቃላት እሰጣ ገባ ውስጥ የገባው የኤርትራ ማስታወቂያ ሚኒስቴር ጣቢያው ከዚህ ቀደምም በተመሳሳይ መልኩ እስራኤል በቀይ ባህር ሰርጥ ባቤል ኤል ሜንዴብ ያለውን እንቅስቃሴ ለመቆጣጠር  እምባሶይራ በተባለ የኤርትራ ግዛት ግዙፍ ወታደራዊ ቤዝ እየገነባች ነው በማለት የሀሰት መረጃ አሰራጭቷል ስትል  ኤርትራ ከሳለች። የኤርትራም ባለስልጣናት ቴሌቭዥን ጣቢያው የመረጃ ምንጩን እንዲገልፅ ጥያቄ ያቀረቡ መሆኑ ታውቋል።

 

የኤርትራ መንግስት ተቃዋሚዎች በበኩላቸው የተባበሩት አረብ ኤሜሬት ለአስርተ ዓመታት የሚያገለግላትን ወታደራዊ ቤዝ በአሰብ መገንባቷን በተደጋጋሚ የሚናገሩ መሆኑን የሱዳን ትሪብዩን ዘገባ ያመለክታል። የተባበሩት መንግስታት የኤርትራ ጉዳይ ክትትል አካል ከዚህ ቀደም በለቀቀው ሪፖርት ሳዑዲ አረቢያና የተባበሩት አረብ ኤሜሬት በየመን ያሉትን የሁቲ አማፂያንን ለማጥቃት አሰብን በቤዝነት የተጠቀሙ መሆኑን አመልክቷል። ሆኖም በተደጋጋሚ ኤርትራ ለተባበሩት አረብ ኤሜሬት ወታደራዊ ቤዝን በሊዝ ሰጥታለች የሚለውን ጉዳይ ግን አላረጋገጠም። ሳዑዲ አረቢያም ሆነች የተባበሩት አረብ ኤሜሬት ከአሰብ ወታደራዊ ቤዝ ጋር በተያያዘ ከኤርትራ የሚያደርጉት እንቅስቃሴ በተመለከተ ዋጋ የሚያስከፍላቸው መሆኑን በመግለፅ ከዚህ ቀደም ኢትዮጵያ ለሁለቱ ሀገራት ጥብቅ የማስጠንቀቂያ ያስተላለፈች መሆኗን ሱዳን ትሪብዩን አመልክቷል።

ይምረጡ
(0 ሰዎች መርጠዋል)
428 ጊዜ ተነበዋል

Sendek Newspaper

Bole sub city behind Atlas hotel

Contact us