You are here:መነሻ ገፅ»ዜና

ንግድ ባንክ በ26 ነጥብ 5 ቢሊየን ብር የመንግሥት ቦንድ ካፒታሉን ሊያሳድግ ነው

Wednesday, 11 January 2017 14:00

በኢትዮጵያ የባንክ ታሪክ ከፍተኛውን የገበያ ድርሻ የያዘው የኢትዮጵያ ንግድ ባንክ ጤናማ ሆኖ እንዲቀጥልና ከውጪ ሀገር ባንኮች ጋር ያለው ግንኙነት የሰመረ እንዲሆን ካፒታሉን ለማሳደግ ወለድ የማይታሰብበት የመንግሥት ዕዳ ሰነድ (ቦንድ) እንዲያገኝ የሚያስችለው አዋጅ ለፓርላማ ቀረበ፡፡ በረቂቅ አዋጁ መሠረት አሁን ባለው ወቅታዊ የካፒታል መጠን እና በማሻሻያው ደንብ ረቂቅ በተመለከተው 40 ቢሊየን ካፒታል መካከል ያለውን የ26 ነጥብ 5 ቢሊየን ብር ልዩነት ወለድ በማይታሰብበት የመንግሥት ዕዳ ሰነድ (ቦንድ) አማካኝነት እንዲከፈለው ይደረጋል፡፡  የዕዳ ሰነዱም ከ5 ዓመት የችሮታ ጊዜ በኋላ በእኩል ዓመታዊ ክፍያ መጠን በአስር አመት ጊዜ ውስጥ ተከፍሎ እንደሚጠናቀቅ ረቂቅ አዋጁ ያስረዳል፡፡

ትላንት ለሕዝብ ተወካዮች ም/ቤት ቀርቦ ጉዳዩ ለሚመለከተው ቋሚ ኮምቴ የተመራው ረቂቅ አዋጅ እንደሚያስረዳው ንግድ ባንክ ከፍተኛ የሆነ ተቀማጭ ገንዘብ እና የውጪ ምንዛሪ በማሰባሰብ ለሀገሪቱ ኢኮኖሚ ዕድገት ከፍተኛ ፋይዳ ላላቸው ቅድሚያ የሚሰጣቸው ፕሮጀክቶች ፋይናንስ በማቅረብ ለባንኩ ዕድገት አስተዋጽኦ ማድረጉን ያብራራል፡፡ ይህም ሆኖ ግን የባንኩ የተከፈለ ካፒታል፣ ከባንኩ አጠቃላይ የንብረት ዕድገት ጋር በተመጣጣኝ መልኩ አለማደጉ እንደጉድለት ያነሳል፡፡

ለባንኩ ተጨማሪ ካፒታል ያስፈለገበት ዋና ምክንያቶች መካከል የባንኩ ንብረት ማደግ፣ የኢትዮጵያ ብር ከአሜሪካን ዶላር ጋር ሲነጻጸር አቅሙ በተከታታይ መቀነሱ፣ በብሔራዊ ባንክ የተቀመጠው የውጪ ምንዛሪ እዳ እና ንብረት ክፍተት ገደብ (Foreign currency open position limit) መጠበቅ አለመቻልና ከጊዜ ወደጊዜ እየተለወጠ የመጣው የባንኩ አሠራር አደጋ ተጋላጭነት መገለጫ ናቸው ተብሏል፡፡

የረቂቅ አዋጁ ማብራሪያ ሰነዱ አጠቃላይ የኢትዮጵያ የብር ዋጋ ሪፖርት የሚደረገው ትክክለኛ ዋጋውን በማያሳይ ምጣኔ ሲሆን ይህም ምጣኔ አንድ አሀድ የውጭ ገንዘብ ከሌላው ጋር በምን ያህል መጠን ሊለወጥ እንደሚችል የሚያሳይ ነው፡፡ በዚህ ረገድ የአሜሪካን ዶላር ባለው አለአቀፋዊ ተቀባይነት የተነሳ የኢትዮጵያ ብር ከአሜሪካን ዶላር ጋር በመቆራኘት ይገለጻል፡፡ ግምገማው በተካሄደባቸው አመታት የኢትዮጵያ ብር ከዶላር ጋር ሲነጻጸር የዋጋ መቀነስ አሳይቷል፡፡ እ.ኤ.አ በ2009 አንድ የአሜሪካን ዶላር በ11 ነጥብ 40 ይመነዘር የነበረ ሲሆን እ.ኤአ. በ2015 የምንዛሪ መጠኑ ወደ 20 ነጥብ 7 ማሻቀቡን ሰነዱ አስፍሯል፡፡

ይምረጡ
(0 ሰዎች መርጠዋል)
38 ጊዜ ተነበዋል

Sendek Newspaper

Bole sub city behind Atlas hotel

Contact us