You are here:መነሻ ገፅ»ዜና

አቶ ድንቁ ደያሳ ወደ አዲስ አበባ በቅርቡ እንደሚመጡ ተገለጸ

Wednesday, 11 January 2017 14:10

     በግል ከፍተኛ የትምህርት ተቋማት ምስረታ ግንባር ቀደም ተጠቃሽ ከሆኑ ኢትዮጵያዊያን መካከል የሆኑት አቶ ድንቁ ደያሳ ለህክምና ወደ አሜሪካን አገር መሄዳቸውን ተከትሎ በማህበራዊ ሚዲያዎች የሚናፈሰው ወሬ ነጭ ውሸት መሆኑን አቶ ድንቁ ደያሳ ወደ አዲስ አበባ በቅርቡ እንደሚመጡ የተቋሙ ዋና ስራ ሥራአስፈፃሚ አቶ ረታ በቀለ ለሰንደቅ ጋዜጣ ገልጸዋል።

አቶ ረታ በቀለ እንዳስረዱት፣ “የአቶ ድንቁን አሜሪካ መሄድ ተከትሎ ሰሞኑን በማህበራዊ ሚዲያ ከሶሩማ ፋን ቢዝነስ ግሩፕ አካል ከሆኑት ሪፍት ቫሊ ዩኒቨርስቲ እና ሶደሬ ሪዞርት ሆቴል በመንግስት ትዕዛዝ ተዘግተዋል ተብሎ የተሰራጨው ዘገባ ፈጽሞ ከእውነት የራቀ ነው። ከመንግስት ጋር ባለን መልካም የኢንቨስትመንት ግንኙነት የተነሳ መንግስት አስፈላጊውን ድጋፍና ክትትል እያደረገልን ነው። ከቀረጥ ነጻ እቃዎችን በማስገባት ጭምር መንግስት ድጋፍ እያደረገልን ነው” ብለዋል።

እንዲሁም ስድስት ተቋማትን በስሩ የያዘው የ“ሶሩማ ፋን ቢዝነስ ግሩፕ” አንዱ አካል የሆነውና በ42 ካምፓሶች የከፍተኛ ትምህርት ስልጠናዎች የሚሰጠው ሪፍት ቫሊ ዩኒቨርስቲ የሶስተኛ ድግሪ (ፒ ኤች ዲ) መርሃ ግብር ስልጠናዎችን ለመስጠት እየተዘጋጀ መሆኑን ጨምረው ገልጸዋል። አቶ ረታ አያይዘውም፣ በማህበራዊ መገናኛ ብዙሃን “ሪፍት ቫሊ ዩኒቨርስቲው ተዘግቷል” የሚል ዘገባ መሰራጨቱ እንዳሳዘናቸው በመግለጽ በዚህ ኃላፊነት በጎደለው ተግባር የተሰማሩ ኃይሎችን ተከታትለው በሕግ እንዲጠየቁ እንደሚያደርጉ ገልጸዋል።

“አቶ ድንቁ ግን ህክምናቸውን ተከታትለው በቅርቡ ወደ አገራቸው የሚመለሱ ሲሆን እግረ መንገዳቸውንም ዩኒቨርስቲያችን (ሪፍት ቫሊ ዩኒቨርስቲ) ስለሚጀምረው የሶስተኛ ድግሪ መርሃ ግብር ስልጠና አሜሪካን አገር ካሉ አቻ ዩኒቨርሰቲዎች ጋር በጋራ ስለሚሰሩበት ጉዳይ እየተወያዩ መሆናቸውን” አቶ ረታ ተናግረዋል።

የሶሩማ ፋን ቢዝነስ ግሩፕ ባለቤት አቶ ድንቁ ወርቁ ደያስ ባሳለፍነው ነሃሴ ወር የኦሮሞ አባገዳዎች ባደረጉት ስብሰባ የአባገዳው “አባዱላ” አድርገው መምረጣቸው የሚታወስ ነው።

አቶ ድንቁ ደያሳ ለኦሮሚያ ፖሊስ፣ ፀጥታ እና የፍርድ ቤት ሠራተኞች ነፃ የትምህርት እድል በመስጠት በኦሮሚያ ውስጥ የፍትህና የፀጥታ ሁኔታ በዕውቀት እንዲታገዝ ከፍተኛ እገዛ ያደረጉ ባለሃብት ናቸው።

በቅርቡም በሀገራችን በተከሰተው ድርቅ ለተጎዱ ወገኖቻችን ከፍተኛ መጠን ያለው እህል ገዝተው አቅርበዋል። 

ሪፍት ቫሊ ዩኒቨርስቲን በማቋቋም በ42 ካምፓሶች (32 ካምፓሶች የራሱ ህንጻዎች ናቸው) ለዜጎች ትምህርት ከማቅረባቸው በተጨማሪ  ለ10 ሺህ ዜጎች የስራ እድል መፍጠር የቻሉ ሀገር በቀል ኢንቨስተር ናቸው።

ሶሩማ ፋን ቢዝነስ ግሩፕ ሪፍት ቫሊ ዩኒቨርስቲን እና ከመንግስት ይዞታ በቅርቡ ወደ ግል የተዘዋወረውን ሶደሬ ሪዞርት ሆቴልን ጨምሮ ኦሮሚያ ብሮድካስት ሰርቪስ (OBS Television)፣ ናፍያድ ዩኒቨርስቲ፣ ሪፍት ቫሊ ሆስፒታል እና ቀረሽ ማይክሮ ፋይናንስ የተባሉ ድርጅቶችን በስሩ ያቀፈ የቢዝነስ ተቋም ነው።¾

ይምረጡ
(2 ሰዎች መርጠዋል)
876 ጊዜ ተነበዋል

Sendek Newspaper

Bole sub city behind Atlas hotel

Contact us