You are here:መነሻ ገፅ»ዜና

ጤፍን በእስራኤል የማምረት እንቅስቃሴ ተጀመረ

Wednesday, 15 February 2017 13:11

በእስራኤል የሚኖሩ ቤተ-እስራኤላዊያን ጤፍና ሌሎች የኢትዮጵያ ተክሎችን ለማምረት የሚያስችላቸው መሬት እንዲሰጣቸው እንቅስቃሴ መጀመራቸው ተነገረ።

ዘ ጄሩሳሌም ፖስት እንደዘገበው በሁለት ወንድማማቾች አማካይነት “አዲስ ዓለም” የሚል የግብርና ማኅበር የተቋቋመ ሲሆን፣ ማኅበሩም ለእስራኤል ግብርና ሚኒስቴር እና ኢኮኖሚ ሚኒስቴር የመሬት ጥያቄ አቅርቧል። ኢትዮጵያዊያኑ ስደተኞች መሬት እንዲሰጣቸው የጠየቁትም በቀላሉ ሊያገኟቸው የማይችሏቸውን ጤፍ፣ የመድሐኒት ቅጠሎች እንዲሁም ቅመማ ቅመም ለማምረት ነው ተብሏል። ስደተኛ ኢትዮጵያውያኑ በአብዛኛው ኢትዮጵያ ውስጥ እያሉ በግብርና ስራ ላይ ተሰማርተው የነበሩ አሁን ግን ከስራ ውጪ የሆኑ በመሆናቸው የስራ መስክ ይፈጥርላቸዋል የሚል ተስፋ ተጥሎበታል።

ቤተ-እስራኤላዊያን ወደ እስራኤል ሲገቡ የመጀመሪያው ችግራቸው ከጤፍ የተሰሩ ምግቦችን ማግኘት አለመቻላቸው እንደሆነ የተገለፀ ሲሆን፤ አዲሱ እቅድ ከተሳካ ይህን ችግር ይቀርፈዋል ተብሏል። ጤፍ በእስራኤል በአንዳንድ መደብሮች ለሽያጭ ቢቀርብም ከዋጋው ውድነት የተነሳ ከቤተ-እስራኤላዊያኑ የመግዛት አቅም በላይ ነው ተብሏል። በዚህም ሳቢያ ስደተኞቹ ምግባቸውን የስንዴ ዱቄት በማድረግ ለሆድ ህመም እየተዳረጉ መሆናቸውን ተቃውሞ እንደሚያሰሙ ተገልጿል። ጤፍና ሌሎች ተክሎችን በእስራኤል የማምረት ስራውን ለመጀመር በግብርና ዘርፍ እውቀት የነበራቸው ከ30 በላይ ስደተኞች ስለ መሬት አጠቃቀም፣ ስለ ብድር እንዲሁም ዋስትና ስልጠና ይሰጣቸዋል። የሀገሪቱ ባለስልጣናትም ስልጠናው እና ቅድመ ዝግጅቶቹ ከተጠናቀቁ በኋላ መሬት ሊሰጣቸው እንደሚችል ተስፋ እንደሰጧቸው የተናገሩት የማኅበሩ መስራቾች፣ ሀሳባቸው ከተሳካ በግብርናው ኢንደስትሪ ላይ የራሳቸውን አሻራ ሊያሳርፉ እንደሚችሉ ገልፀዋል።¾

ይምረጡ
(1 ሰው መርጠዋል)
253 ጊዜ ተነበዋል

ተጨማሪ ጽህፎች ከ መስከረም አያሌው

Sendek Newspaper

Bole sub city behind Atlas hotel

Contact us