You are here:መነሻ ገፅ»ዜና

የኢየሩሳሌም መታሰቢያ ድርጅት የተወረሱበት ህንፃዎች እንዲመለሱለት ጠየቀ

Wednesday, 15 February 2017 13:16

በኢየሩሳሌም የሚገኙ ገዳማትና የሃይማኖት አባቶችን በመደገፍ የሚታወቀው የኢየሩሳሌም መታሰቢያ ድርጅት የተወሰዱበት ህንፃዎች ቢመለሱላት የበለጠ ለወገን ድጋፍ እንደሚያደርግ ተናገረ። በቅርቡም 1 ሚሊዮን 950 ሺህ ብር ወጪ በማድረግ 100 ለሚደርሱና ጧሪ ለሌላቸው አረጋውያን መስጠቱን አስታውቋል። ይህ የተገለፀው ባሳለፍነው እሁድ የካቲት 5 ቀን 2009 ዓ.ም የተመሰረተበትን 53ኛ ዓመት ከአባላቱ ጋር ባከበረበት ወቅት ነው። በበዓሉ ላይ የአፋር አገር ስብከት ጳጳስ፤ ብፁዕ አቡነ ዮናስ የቀድሞ የኢፌድሪ ፕሬዝዳንት ግርም ወ/ጊዮርጊስና ከድርጅቱ መስራቾች አንዱ የሆኑት ልዑል ራስመንገሻ ስዩምን ጨምሮ በርካታ እንግዶች ተገኝተዋል።

 

ኢትዮጵያ በኢየሩሳሌም ምድር የሰባት አድባራት የይዞታ ባለቤት የሆነች ብቸኛ አፍሪካዊ አገር መሆኗን ያስታወሱት የድርጅቱ የቦርድ ሰብሳቢ ሌተናል ኮሎኔል ይልማ መንግስቱ፤ በኢየሩሳሌም ለሚገኙት ገዳማትና መነኮሳትም ሆነ በሀገር ውስጥ ድጋፍ ለሚያስፈልጋቸው አቅመ ደካሞች ገቢውን የሚያሰባስበው ከሚያሰናዳው ዓመታዊ ጉዞ፣ ከህንፃ ኪራይ እና ከአባላቶቹ መዋጮ መሆኑንም ሲነገር ሰምተናል። የቦርድ ሰብሳቢው አክለውም፤ ድርጅቱ በ1956 ዓ.ም ህጋዊ ዕውቅና አግኝቶ ሲቋቋም ዋና ዓላማው በቅድስት ሀገር ኢየሩሳሌም የሚገኙ ገዳማትና መንፈሳዊ ቅርሶችን በመንከባከብና በመጠበቅ ረገድ ተገቢውን ድጋፍ ለመስት፣ በስፍራው የሚገኙ መነኮሳትንም በሚቻል ሁሉ ለመርዳት እንደነበር አስታውሰዋል።

 

ከዓመታት ህጋዊ ሂደት በኋላ በቅርቡ ከበጎ አድራጎት ድርጅትነት ወደሃይማኖታዊ ድርጅትነት እንዲመለስ በመንግስት የተፈቀደለት የኢየሩሳሌም መታሰቢያ ድርጅት፤ በአሁኑ ወቅት በቋሚነት ዓመታዊ መንፈሳዊ ጉዞን ወደኢየሩሳሌም በማድረግ ከሚያገኘው ገቢ በኢየሩሳሌም ለሚገኙ የሃይማኖት አባቶች ድጋፍ እያደረገ እንደሚገኝም አባላቱ ተናግረዋል። በቀጣይም የበለጠ ተጠናክሮ ድጋፍ ለመስጠት እንዲያመቸው የተወረሱበት ህንፃዎች እንዲመለሱለት መንግስትን እየጠየቀ እንደሚገኝም ሰምተናል።

 

ከዛሬ 53 ዓመት በፊት (በ1956 ዓ.ም) ሰላሳ ኢትዮጵያውያን ወደኢየሩሳሌም ተጉዘው፤ ሰባቱን ገዳማት በማየትና ያለውንም ችግር በመረዳዳት በትብብር መንፈስ በአቶ መኮንን ዘውዴ አነሳሽነት የመሰረተ እንደሆነ የሚነገርላት “የኢየሩሳሌም መታሰቢያ ድርጅት” በአሁኑ ወቅት ከ450 በላይ ንቁ ተሳታፊና 2000 የመዝገብ አባላት እንዳሉትም ተነግሯል።

 

መታሰቢያ ድርጅቱ ከ1977 ዓ.ም ድርቅ ጊዜ ጀምሮ የእርዳታ እጆቹን በመዘርጋት እንደሚታወቅ የተገለፀ ሲሆን፤ አሁንም በተመሳሳይ 2008 ዓ.ም በአየር ንብረት ለውጥ ምክንያት ለተከሰተው ድርቅ ድጋፍ ለሚያስፈልጋቸው ወገኖች ግማሽ ሚሊዮን ብር ወጪ በማድረግ በቀይ መስቀል በኩል እጁን መዘርጋቱን አስታውሷል። ከዚህም ባሻገር በህዳሴው ግድብ የቦንድ ግዢም በከፍተኛ ደረጃ የተሳተፈ እንደሆነ ያስታወቁት የቦርድ ሰብሳቢው፤ ቀደም ባለው ጊዜ የተወረሱባቸው ህንፃዎች በመንግስት ፈቃድ እንዲመለሱላቸው እየጠየቁ መሆኑን አስታውቀው፤ ይህም ጥያቄ አፋጣኝ ምላሽ ቢያገኝ በኢየሩሳሌም የሚገኙትን ገዳማትና የሃይማኖት አባቶችን ከመደገፍ ባለፈ በሀገር ውስጥም ለወገን ደራሽ መሆናቸውን አጠናክረው መቀጠል እንደሚፈልጉ ተናግረዋል።

ይምረጡ
(1 ሰው መርጠዋል)
38 ጊዜ ተነበዋል

Sendek Newspaper

Bole sub city behind Atlas hotel

Contact us