You are here:መነሻ ገፅ»ዜና

በሙስና ወንጀል የተከሰሱ የጋምቤላ ክልል ኃላፊዎች በእስራትና በገንዘብ ተቀጡ

Wednesday, 15 February 2017 13:22

የተሰጣቸውን መንግስታዊ ኃላፊነት ለግል ጥቅማቸው በማዋል መንግስትን ከ400 ሺህ ብር በላይ ያሳጡ የጋምቤላ ክልል ሁለት ኃላፊዎች ጥፋተኛ ሆነው በተገኙበት የሙስና ወንጀል በእስራትና በገንዘብ ተቀጡ። የጋምቤላ ክልል መስተዳድር ምክር ቤት ካቢኔ ጉዳይ ጽ/ቤት ኃላፊ የነበሩት አቶ ኦቦንግ ታታ እና የክልሉ መስተዳድር የግዢና ፋይናንስ ቢሮ አስተባባሪ የሆኑት አቶ ዳዊት ዱግማ በፈፀሙት የሙስና ወንጀል ጥፋተኛ ሆነው በመገኘታቸው የጋምቤላ ክልል ከፍተኛ ፍርድቤት እያንዳንዳቸውን በ7 ዓመት ፅኑ እስራትና በ70ሺህ ብር እንዲቀጡ ወስኖባቸዋል።

 

የክልሉ ሥነምግባርና ፀረ ሙስና ዐቃቤ ህግ በክሱ እንዳስረዳው፤ ተከሳሾቹ የማይገባቸውን ጥቅም ለማግኘት አስበው በ2008 በጀት ዓመት የክልሉን የግዢና ንብረት አስተዳደር መመሪያ በሚተላለፍ መልኩ፤ ከዕቅድ ውጪ ዝቅተኛ ዋጋ ያቀረቡ ድርጅቶችን ባለመቀበልና ከፍተኛ ዋጋ ያቀረቡትን ደግሞ ተቀብለው ማስተናገዳቸውን ያትታል። አክሎም ይህን መመሪያ የተላለፈ ተግባር በመፈፀማቸው ዋጋቸው ከ1 ሚሊዮን ብር በላይ የሚገመቱ የቢሮ ግብዓቶችን ያለአግባብ በመግዛታቸው መንግስትን ከ400 ሚሊዮን ብር በላይ አሳጥተዋል ሲል ይዘረዝራል። በዚህም ተከሳሾቹ በፈፀሙት የመንግስትን ስራ በማያመች አኳኋን የምስራት የሙስና ወንጀል ክስ መስርቶባቸዋል።

 

የቀረበባቸውን ክስ ክደው የተከራከሩት ሁለቱ የክልሉ መስተዳደር የስራ ኃላፊዎች ዐቃቤ ህግ ያቀረበባቸውን የሰውና የሰነድ ማስረጃ በሚገባ መከላከል ባለመቻላቸው፤ የክልሉ ከፍተኛ ፍርድ ቤት ጥፋተኛ ብሏቸዋል። በዚህም የግራ ቀኙን ክርክር ያደመጠው ችሎቱ፤ ተከሳሾቹ በፈፀሙት የሙስና ወንጀል ጥፋተኛ ሆነው በመገኘታቸው እያንዳንዳቸው በ7 ዓመት ፅኑ እስራትና በ70 ሺህ ብር የገንዘብ መቀጮ እንዲቀጡ ተፈርዶባቸዋል።  

ይምረጡ
(0 ሰዎች መርጠዋል)
253 ጊዜ ተነበዋል

Sendek Newspaper

Bole sub city behind Atlas hotel

Contact us