You are here:መነሻ ገፅ»ዜና

ከአንድ ዓመት በፊት የተመዘኑት ሆቴሎች እስከዛሬም ድረስ የኮከብ አርማ አልተሰጣቸውም

Wednesday, 15 February 2017 13:24

-    የብቃት ማረጋገጫ ሠርተፊኬትም አላገኙም

 

ባህልና ቱሪዝም ሚኒስቴር ከተባበሩት መንግስታት የዓለም ቱሪዝም ድርጅት ጋር በመተባበር በኢትዮጵያ የሚገኙ ሆቴሎችን መዝኖ የኮከብ ደረጃ ቢሰጥም እስከዛሬም ድረስ የሆቴሎቹን ደረጃ የሚያሳይ የኮከብ አርማና ሰርተፍኬት ያልተሰጣቸው መሆኑ ታውቋል። ሆቴሎቹ በብቃት ምዘና ተፈትሸው በመጀመሪያ በአዲስ አበባ ደረጃ የኮከብ ደረጃን እንዲያገኙ የተደረገው ነሀሴ 2007 ዓ.ም ነበር።

 የኮከብ ደረጃን ያገኙ ሆቴሎች በተሰጣቸው ደረጃ መሰረት ያገኙትን ኮከብ ለተገልጋዩ በሚታይ ቦታ ማስቀመጥ ያለባቸው መሆኑን ደረጃው ይፋ በሆነበት ወቅት መመልከቱ የሚታወስ ነው። ይህም የኮከብ አርማ በራሱ በባህልና ቱሪዝም ሚኒስቴር አማካኝነት በምዘና ውስጥ አልፈው የተለያየ የኮከብነት ደረጃ ላገኙት ሆቴሎች እንደየደረጃቸው የሚሰጥ ቢሆንም እስከዛሬም ድረስ አንድንም ሆቴል የኮከብ አርማውን ያላገኙ መሆኑ ታውቋል።

ሆቴሎቹ በተቀመጠው የመመዘኛ መስፈርት መሰረት የኮከብ ደረጃ መሰረት ደረጃቸው ይፋ የሆነው በነሀሴ 2007 ዓ.ም ሲሆን ሆቴሎቹ ኮከባቸውን የሚገልፅ አርማንና ሰርተፍኬታቸውን ሳያገኙ አንድ ዓመት ከሰባት ወራ አልፈዋል። ሆቴሎች አንድ ጊዜ የኮከብ ደረጃ ከተሰጣቸው በኋላ በድጋሜ ተመዝነው የኮከብ ደረጃቸው የሚፈተሸው በየሶስት ዓመቱ ሲሆን የመጀመሪያውን ደረጃቸውን የሚገልፅ የኮከብ አርማና ሰርተፍኬት ሳያገኙ ሁለተኛው የምዘና ጊዜ ሊደርስ ከሁለት ዓመት ያነሰ ጊዜ ቀርቶታል።

በዚሁ ዙሪያ ለሰንደቅ ማብራሪያ የሰጡት አንድ የባህልና ቱሪዝም ሚኒስቴር ባለሙያ የኮከብ ደረጃን የሚያሳየው አርማና ሰርተፍኬት ለተመዘኑት ሆቴሎች ሳይሰጥ የዘገየ መሆኑን ገልፀው፤ ይህም ሊሆን የቻለው አርማው በውጭ ሀገር ከመሰራቱ ጋር በተያያዘ በመዘግየቱ ነው ብለዋል። አንድ ተገልጋይ የሚገለገልበት ሆቴል ደረጃ ለማወቅ ይችል ዘንድ የተመዘኑ ሆቴሎች የኮከብ ደረጃቸውን የሚገልፅ አርማ በግልፅ በሚታይ ቦታ መስቀመጥ ያለበት መሆኑን ያመለከቱት ሀላፊው፤ ይሁንና በመንግስት በኩል በተፈጠረው መዘግየት አርማውን የማስቀመጡ ስራ እስከዛሬም ድረስ ሊተገበር አለመቻሉን ገልፀዋል። በወቅተ በሀገር አቀፍ ደረጃ ኮከብ ያገኙ ሆቴሎች ወደ 370 አካባቢ ሲሆኑ ከዚያ በኋላ ወደ ሥራ የገቡ ሆቴሎች ግን የብቃት ደረጃቸው ተመዝኖ የኮከብ ደረጃ አልተሰጣቸውም።

 በጊዜው በአዲስ አበባ ከተመዘኑት 136 ሆቴሎች መካከል ከአንድ እስከ አምስት የኮከብ ደረጃ ማግኘት የቻሉት ከ40 የበለጡ አልነበሩም። ከእነዚህም ውስጥ የባለ አምስት ኮከብ ደረጃን ያገኙት አምስት ሆቴሎች ናቸው። የውጭ ባለሙያዎችና ድርጅት ሳይቀር በተሳተፉበት በከፍተኛ ወጪ የተከናወነው ይሄው የሆቴሎች የብቃት ምዘና የመጨረሻ ውጤቱ ተገልጋዮች የሆቴሎችን ደረጃ በግልፅ በማየት እንዲገለገሉ ቢሆንም፤ ይህ ግን እስከዛሬም ድረስ ሊተገበር አልቻለም። እንደ ሀለፊው ገለፃ የኮከብ አርማዎቹ በትክክል መቼ እንደሚደርሱም የሚታወቅ ቁርጥ ያለ ጊዜ የለም። አንድ ተገልጋይ የሆቴሎቹን ደረጃ ማወቅ ከፈለገ ሆቴሎቹ ለደንበኞቻቸው እንዲያሳዩ የደብዳቤ ማስረጃ መኖሩን ሀላፊው ገልፀዋል።¾  

 

ይምረጡ
(1 ሰው መርጠዋል)
461 ጊዜ ተነበዋል

Sendek Newspaper

Bole sub city behind Atlas hotel

Contact us