You are here:መነሻ ገፅ»ዜና

በኢህአዴግ ተነሳሽነት ተፎካካሪ ፓርቲዎች ዛሬ ከኢህአዴግ ጋር ይወያያሉ

Wednesday, 15 February 2017 13:28

በይርጋ አበበ

ገዥው ፓርቲ ኢህአዴግ ለ22 አገር አቀፍ ፓርቲዎች የጠራው ውይይት የመጀመሪያ ክፍል ዛሬ በፌዴሬሽን ምክር ቤት ይካሄዳል። በውይይቱ ከሚሳተፉ ፓርቲዎች መካከል ሰማያዊ ፓርቲ እና ኢዴፓ አመራሮች ሰለ ውይይቱ ከሰንደቅ ጋዜጣ ለቀረበላቸው ሲመልሱ ለድርድሩ መዘጋጀታቸውን ተናግረዋል።

የሰማያዊ ፓርቲ የህዝብ ግንኙነት ኃላፊ አቶ ሰለሞን ተሰማ “ድርድሩ ያለምንም ቅድመ ሁኔታ እንዲካሄድ በኢህአዴግ በኩል የታየው ጅምር በጎ እንደሆነ እንገነዘባለን። ይህ በጎ ጅምር ብዙ ርቀት ተጉዞ ውጤት በማምጣት ለታሪክ የሚጠቀስ እንደሚሆንም ተስፋ እናደርጋለን። በሌላ በኩል ደግሞ ድርድሩ የተጠራው የኢትዮጵያ ህዝብ በከፈለው መስዋእትነት ለእኛ የተሰጠን እድል እንደሆነ ስለምናስብ የህዝብን ጥያቄ ወክለን ለድርድር እየሄደን እንደሆነ እንገነዘባለን” ሲሉ የድርድሩን አስፈላጊነት ገልጸዋል።

የኢዴፓ ሊቀመንበር ዶክተር ጫኔ ከበደ በበኩላቸው “የሚዲያውን አዘጋገብ በተመለከተ ዝግ መሆኑን ወይም ክፍት መሆኑን የካቲት 8 ቀን 2009 ዓ.ም በሚካሄደው ውይይታችን አንድ ወጥ የሆነ አሰራር ይዘን እስከምንወጣ ድረስ የምናውቀው ነገር የለም” ሲሉ በዛሬው ውይይት መገናኛ ብዙሃን በውይይቱ የሚኖራቸውን ሚና እንደማያውቁ ተናግረዋል።

ተፎካካሪ ፓርቲዎች ከኢህአዴግ ጋር በሚደርጉት ድርድር (ውይይት) የሚኖራቸውን የመደራደር አቅም በተመለከተ ከሰንደቅ ጋዜጣ ለቀረበላቸው ጥያቄ ሲመልሱ “ይህ የብዙ ሰው ጥያቄ መሆኑ ግልጽ ነው። በእኛ በኩል እስከመጨረሻው ድረስ ወቅቱ በፈቀደው ደረጃ የምናደርገው ነገር ይኖረናል። ከዚያ በኋላ የምናካሂደው ሂደቱ እየታየ አቅማችንን ህዝቡ ግንዛቤ እየጨበጠ ቢሄድ ደስ ይለናል እንጂ እከሌ ደካማ ነው እከሌ ደግሞ ጠንካራ ነው የሚል ፍረጃ የሚደረስበት ጊዜ አይደለም። ይህ የራስ ግምትን ከማስቀመጥ ባሻገር ጉዳዩን ከመጀመራችን በፊት ለአሉታዊ ውጤት የሚዳርግ ነገር ነው ብዬ አየዋለሁ” በማለት ዶክተር ጫኔ ከበደ መልስ ሰጥተዋል።

የሰማያዊ ፓርቲ የህዝብ ግንኙነት ኃላፊው በበኩላቸው “የኢትዮጵያ ጉዳይ ያገባናል የሚሉ ሁሉም ወገኖች በድርድሩ ቢጠሩ መልካም ነበር። ከዚህ በተረፈ ደግሞ ይህ የድርድር እድል የተፈጠረው የኢትዮጵያ ህዝብ በከፈለው መስዋእት በመሆኑ ፓርቲዎች ኃላፊነት በሚሰማው መልኩ እንዲወያዩ” ጥሪ አቅርበዋል።

የኢራፓ ሊቀመንበር አቶ ተሻለ ሰብሮ በበኩላቸው የዛሬው ስብሰባ ቀደም ስል በተደረሰበት ውሣኔ መሠረት ፓርቲዎች በጋራ እና በተናጠል ባቀረቡት የስብሰባ ሥነሥርዓትና አካሄድ ላይ የሚያተኩር እንደሚሆን ገልፀዋል፡፡ ኢህአዴግ በደብዳቤ ባደረገው ጥሪ “ምክክር” ለማድረግ መሆኑን መጥቀሱን ያስታወሱት አቶ ተሻለ በፓርቲያቸውና በአገር አቀፍ ፓርቲዎች ዘንድ ያለው ፍላጎት ድርድር ለማካሄድ ነው ብለዋል፡፡ በሥነሥርዓቱ ጉዳይ ላይ መግባባት ከተደረሰ በኋላ የምንወያይባቸው አጀንዳዎች በጋራ ይቀረፃሉ ብለው ተስፋ እንደሚያደርጉ ተናግረዋል፡፡   

 የጉዳዩ ባለቤት የሆነው የኢትዮጵያ ህዝብም የፖለቲካ ፓርቲዎችን ውይይትና ድርድር በንቃት እንዲከታተል እና ሊነሱለት የሚገባቸውን ነጥቦችም ለፓርቲዎቹ በተለያየ መንገድ እንዲያቀርብ ጥሪ አቅርበዋል።¾

ይምረጡ
(1 ሰው መርጠዋል)
346 ጊዜ ተነበዋል

Sendek Newspaper

Bole sub city behind Atlas hotel

Contact us