You are here:መነሻ ገፅ»ዜና

ነዋሪዎች ካሳና ምትክ ቦታ ሳይሰጣቸው በመልሶ ማልማት እንዲነሱ ጫና እየተደረገብን ነው አሉ

Wednesday, 12 April 2017 12:04

 

በአዲስ አበባ ቂርቆስ ክፍለ ከተማ በአፍሪካ ህብረት አካባቢ የሚገኙ የልማት ተነሺዎች ምትክ ቦታ ሳይዘጋጅላቸው እንደዚሁም የካሳቸው ጉዳይ ሳይጠናቀቅ መኖሪያ ቤታቸውን ለቀው እንዲወጡ ተፅዕኖ እየተደረገባቸው መሆኑን ገለፁ። “ፈለገ ዮርዳኖስ መልሶ ማልማት” በሚል በከተማው መስተዳደር የተያዘው ይህ የመልሶ ማልማት ሥራ እንቅስቃሴ ከተጀመረ በርከት ያሉ ዓመታት የተቆጠረ ሲሆን ከገነት ሆቴል በታች ያሉና ቡልጋሪያ አካባቢ የሚገኙ እነዚሁ የአካባቢው ነዋሪዎች እንዲነሱ ትዕዛዝ የተሰጣቸው ግን በሶሰት ቀን ገደብ ውስጥ ነው።

 ነዋሪዎቹ ከአካባቢው በመነሳታቸው ቅሬታ ባይሰማቸውም፤ ይሁንና በጥቂት ቀናት ውስጥ አካባቢያቸውን ለቀው እንዲሄዱ መደረጋቸው ግን አግባብ አለመሆኑን ገልፀውልናል። በርካታ የአካባቢው ነዋሪዎች ምትክ ቦታ እንደዚሁም የጋራ መኖሪያ ቤት በእጣ እንዲያገኙ ተደርጎ አካባቢውን እንዲለቁ የተደረገ ሲሆን ይሁንና የተወሰኑ ነዋሪዎች ምትክ ቦታ እንደዚሁም የተወሰነላቸውን ካሳ ያላገኙ በመሆናቸው በፍርስራሽ መሃል ለመቆየት የተገደዱ መሆናቸውን ገልፀውልናል።

ነዋሪዎቹ በህጉ አግባብ መሰረት ማግኘት የሚገባቸውን ምትክ ቦታና ካሳ ባላገኙበት ሁኔታ ወረዳው አካባቢውን እንዲለቁ ጫና እያሳደረባቸው መሆኑን አመልክተው፤ በአሁኑ ሰዓትም በአካባቢው የውሃና መብራት አገልግሎት በመቋረጡ ችግር ውስጥ መውደቃቸውን ገልፀዋል። ነዋሪዎቹ ከዚህም በተጨማሪ አካባቢው ከመፈራረሱ ጋር በተያያዘ በየእለቱ ከዘራፊዎች ጋር ትንቅንቅ ውስጥ ለመግባት መገደዳቸውን አመልክተዋል። የካሳውና የምትክ ቦታቸው ጉዳይ በአፋጣኝ የሚጠናቀቅላቸው ከሆነ ሳይውሉ ሳያድሩ አካባቢውን ለመልቀቅ ዝግጁ መሆናቸውን ያመለከቱት ነዋሪዎቹ፤ ይህንንም ጉዳይ የሚመለከተው አካል በአፋጣኝ ተመልክቶ ምላሽ እንዲሰጣቸው ጥሪያቸውን አቅርበዋል።

 በዚሁ ጉዳይ ምላሽ እንዲሰጡን በቂርቆስ ክፍለ ከተማ የመሬት ልማትና ከተማ ማደስ ፅህፈት ቤት ሀላፊ የሆኑትን አቶ ሃብቶም ብርሃነን አግኝተን ለማነጋገር ያደረግነው ሙከራ አልተሳካም። አቶ ሃብቶምን በስልክ ያገኘናቸው ሲሆን ከቢሮ ውጪ መሆናቸውን ገልፀውልን፤ ቢሮ ሲገቡ ምላሽ የሚሰጡ መሆናቸውን ገልፀውልን ነበር። ማክሰኞ ዕለት ወደ ፅህፈት ቤቱ ብንሄድም፤ ቢሯቸው ዝግ በመሆኑ ልናገኛቸው አልቻልንም። በአፍሪካ ህብረት አካባቢ ፈለገ ዮርዳኖስ መልሶ ማልማት በሚል ስያሜ የሚታወቀው 17 ሄክታር የሚጠጋ መሬት ነው።

ይምረጡ
(1 ሰው መርጠዋል)
304 ጊዜ ተነበዋል

Sendek Newspaper

Bole sub city behind Atlas hotel

Contact us