You are here:መነሻ ገፅ»ዜና

የዋጋ ተመሳሳይነት በሚታይባቸው ሸቀጦች ላይ ጥናት መካሄድ ጀመረ

Wednesday, 19 April 2017 12:37

 

·        የሚወሰደው እርምጃም በጥናቱ ውጤት ላይ ይመረኮዛል  ተብሏል

 

 በሥራ ላይ ያለው የንግድ ውድድርና የሸማቾች ጥበቃ አዋጅ ቁጥር 813/2006 በንግድ ሂደት ውስጥ በቀጥታ ወይንም በተዘዋዋሪ መንገድ ፍትሃዊ ያልሆነ የመሸጫ ወይንም የመግዣ ዋጋን መወሰንን የሚከለክል ሲሆን በዚህ ዙሪያ ህጉን የተላለፉ በሚመስሉ የተወሰኑ የንግድ ሸቀጦች ላይ ጥናት እየተካሄደ መሆኑ ታውቋል።

 ጥናቶችን በአንድ መልኩ በራሱ በባለስልጣን መስሪያ ቤቱ የጥናትና ምርምር ዳይሬክቶሬት በኩል እንደዚሁም በአለም አቀፍ አጋር ድርጅቶች በኩል እየተካሄደ መሆኑን በባለስልጣን መስሪያ ቤቱ የኮርፖሬት ዘርፍ ምክትል ዋና ዳይሬክተር  አቶ ግርማ አለማር ለሰንደቅ ገልፀዋል። በጥናቱ በመሳተፍ ላይ ያሉትም የተባበሩት መንግስታት ንግድና ልማት ኮንፍረንስ ተቋም እንደዚሁም የአውሮፓ ህብረት መሆናቸውን ኃላፊው ጨምረው አመልክተዋል። ጥናቱ እየተደረገ ያለውም የንግድ ውድድርን በሚገድብ መልኩ በሀገር አቀፍ ደረጃ የዋጋ ተመሳሳይነት ችግር ይታይባቸዋል ተብለው በተመረጡ የተወሰኑ ሸቀጦች ላይ መሆኑን አቶ ግርማ  አመልክተዋል።

 በቀጣይ የሚወሰደውንም እርምጃ በተመለከተም በጥናቱ ውጤት የሚወሰን ይሆናል ተብሏል። ጥናት የሚደረግባቸውና የዋጋ ተመሳሳይነት የሚታይባቸውን ሸቀጦች በተመለከተ ውጤቱ ይፋ እስከሚሆን በሚሰጥር የተያዙ መሆናቸውን በመግለፅ ዘርዝራቸውን ከመግለፅ አቶ ግርማ ተቆጥበዋል።

የኢትዮጵያ የንግድ ውድድርና የሸማቾች ጥበቃ አዋጅ ተስማምቶ ዋጋ መወሰንን እንደዚሁም በበላይነት የተያዘ ገበያን ያለአግባብ መጠቀምን በጥብቅ የሚከለክል ሲሆን በዚሁ ተግባር የተሰማሩ አካላት ላይም ጥብቅ የወንጀልና የፍትሃ ብሄር እርምጃ የሚወሰድ መሆኑን ያመለክታል።

ይምረጡ
(0 ሰዎች መርጠዋል)
163 ጊዜ ተነበዋል

Sendek Newspaper

Bole sub city behind Atlas hotel

Contact us