You are here:መነሻ ገፅ»ዜና

በዕጣ ከተላለፉት የአርባ ሥልሳ ቤቶች ውስጥ ግንባታቸው ያልተጠናቀቁ አሉ

Wednesday, 26 July 2017 12:47

 

የአዲስ አበባ ቁጠባ ቤቶች ኢንተርፕራይዝ በቅርቡ እጣ ካወጣባቸው 972 ቤቶች መካከል በተወሰኑ ህንፃዎች ውስጥ የሚገኙ 96 ክፍሎች ግንባታቸው ያልተጠናቀቀ መሆኑ ለሬዲዮ ፋና ገለፀ።  እንደ ምክትል ሥራ አስኪያጁ ገለፃ ቤቶቹ መጠናቀቅ ያልቻሉት ከተቋራጭ አቅም ጋር በተያያዘ ነው። በዚሁ ግንባታ መጓተት ዙሪያ ማስተካከያን ለማድረግ ግብረ ሀይል ተቋቁሞ እየተሰራ መሆኑን ኃላፊው ጨምረው ገልፀዋል።

 ኢንተርፕራይዙ በአርባ ስልሳ የቤቶች ፕሮግራም ከቤት ፈላጊ ተመዝጋቢዎች ጋር ከገባው ውል ውጪ ባለአራት መኝታ ክፍል ቤቶች ከመገንባት ባሻገር ባለአንድ ክፍል ተመዝጋቢ ቤት ፈላጊዎችን በዚህ እጣ ውድድር ውጪ ማድረጉ ሲያነጋግር ቆይቷል። አርባ ስልሳ የቤቶች ፕሮግራም ከመነሻው መንግስት ምንም አይነት ድጎማ የማያደርግ መሆኑ ሲገለፅ የቆየ ቢሆንም በዲዛይን ስህተት ተፈጠረ በተባለ ችግር የከተማው አስተዳደር እስከ ከ7 መቶ ሚሊዮን ብር በላይ ድጎማ ለማድረግ ተገዷል። ቤቶቹ እጣ እንዲወጣባቸው የተደረገው የኢትዮጵያ ንግድ ባንክ የእያንዳንዱ ቤት የግንባታ መጠናቀቅ አንድ በአንድ ተቆጣጥሮ ከአዲስ አበባ ቁጠባ ቤቶች ኢንተርፕራይዝ በመረከብ መሆኑ ሲገለፅ የቆየ ቢሆንም በስተመጨረሻ ግንባታቸው ሙሉ በሙሉ ያልተጠናቀቁ ቤቶች እጣ እንዲወጣባቸው ተደርጓል የሚለው ጉዳይ አነጋጋሪና ግራ አጋቢ ሆኗል።

 በዚህ ዙሪያ ማብራሪያ እንዲሰጡን የአዲስ አበባ ቤቶች ኢንተርፕራይዝ የኮሙኒኬሽን ክፍል ኃላፊ አቶ ዮሃንስ አባይነህ የጠየቅን ሲሆን እሳቸውም ቤቶቹ ሳይጠናቀቁ እጣ ወጥቶባቸዋል በሚባለው ጉዳይ ላይ መረጃ የሌላቸው መሆኑን አመልክተው ጉዳዩ የንግድ ባንክ ኃላፊዎችን በቀጥታ የሚመለከት መሆኑን ገልፀውልናል። በጉዳዩ ዙሪያ ከኢትዮጵያ ንግድ ባንክ ተጨማሪ መረጃ ለማግኘት ያደረግነው ሙከራ አልተሳካም።

ይምረጡ
(0 ሰዎች መርጠዋል)
231 ጊዜ ተነበዋል

Sendek Newspaper

Bole sub city behind Atlas hotel

Contact us