You are here:መነሻ ገፅ»ዜና

የሰማያዊ ፓርቲ ብሔራዊ ምክር ቤት ኢንጂነር ጌታነህ ባልቻን ምክትል ሊቀመንበር አድርጎ ሾመ

Wednesday, 09 August 2017 12:38

የሰማያዊ ብሔራዊ ምክር ቤት ሰኔ 11 ቀን 2009 ዓ.ም. ባደረገው 5ኛ መደበኛ ስብሰባ ኢንጂነር ጌታነህ ባልቻን ምክትል ሊቀመንበር እና የምርጫ ጉዳይ ኃላፊ አድርጎ መምረጡን ለሰንደቅ ጋዜጣ አስታወቀ።

ሰማያው ፓርቲ በዚሁ ስብሰባው ሀገራዊና የፓርቲ ጉዳዮችን አንስቶ በስፋት መምከሩን ገልፆ፤ ተጨማሪ የኃላፊነት ውሳኔዎችን ማስተላለፉን አስታውቋል። በዚሁ መሰረት አቶ ተስፋዬ ፋንታውን የህግ ጉዳይ ኃላፊ አድርጐ ሰይሟል። እንዲሁም የውጭ ጉዳይ ኃላፊ የሆኑትን መምህር አበበ አካሉን ወደ ሕዝብ ግንኙነት ኃላፊ ያዘዋወረ ሲሆን፣ የሕዝብ ግንኙነት ኃላፊ የሆኑትን መምህር ሰሎሞን ተሰማን ደግሞ ወደ ውጭ ግንኙነት ኃላፊነት  አዘዋውሯል።

ፓርቲው አያይዞም፣ “ሀገራችን አሁን ያለችበትን ወቅታዊና አጣዳፊ ሁኔታ ከግንዛቤ በማስገባት የብሔራዊ እርቅና መግባባት ቋሚ ኮሚቴ በሥራ አስፈፃሚ ውስጥ እንዲካተት” መወሰኑን ይፋ አድርጓል።

እንዲሁም፣ “በፓርቲው መተዳደሪያ ደንብ እና በብሔራዊ ምክር ቤቱ መመሪያ መሠረት በልዩ ልዩ ምክንያት የተጓደሉ የብሔራዊ ምክር ቤት አባላትን በማሟላት የክፍለ ሀገርና የአዲስ አበባ የምክር ቤት አባላት ቁጥር እንዲመጣጠን” አድጊያለሁ ብሏል።

የመኢአድና ሰማያዊ ፓርቲ የውህደት አመቻች ኮሚቴን ሪፖርት ካደመጠ በኋላ፣ ኮሚቴው በተቻለ ፍጥነት እንዲሠራና ይህንንም ወደ ታች እንዲያወርድ መመሪያ ሰጥቷል።

የምክር ቤቱ አባላት በተለይም ከክፍለ ሀገር የመጡ የምክር ቤት አባላት በአካባቢያቸው በፓርቲው አመራር፣ አባላትና ደጋፊዎች እንዲሁም በሕዝቡ ላይ የሚደርሰውን ወከባ በተለይም ከአስቸኳይ ጊዜ አዋጁ ጋር በተያያዘ እያደረሰባቸው ያለውን እስራት፣ ወከባና እንግልት አንስቶ ፓርቲው መወያየቱን ገልፀል።

ምክር ቤቱም ከአባላቱ የተሰጡትን ሀሳቦች በመያዝ የአስቸኳይ ጊዜ አዋጁን ከለላ በማድረግ በሕዝብና በፓርቲው አመራርና አባላት ላይ የሚደርሰውን እስራት፣ ወከባና እንግልት በተመለከተ በድጋሚ መግለጫ እንዲሰጥ ለሥራ አስፈፃሚው መመሪያ ሰጥቷል። ሌሎችንም የብሔራዊ ምክር ቤት ውሳኔዎች ሥራ አስፈፃሚው በትጋት እንዲያስፈፅም መመሪያ በመስጠትና የምክር ቤት አባላት በቀጣይ በተከታታይ ለሚደረጉ አስቸኳይና መደበኛ ስብሰባዎች ራሳቸውን እንዲያዘጋጁ አሳስቧል።¾

ይምረጡ
(1 ሰው መርጠዋል)
181 ጊዜ ተነበዋል

Sendek Newspaper

Bole sub city behind Atlas hotel

Contact us