You are here:መነሻ ገፅ»ዜና

ባለመግባባት ምክንያት በመኪና ሰዉ ገጭቶ የገደለዉ ተከሳሽ በእሥራት ተቀጣ

Wednesday, 16 August 2017 12:06

ተከሳሽ ዳንኤል ፉጄ የወንጀል ህግ አንቀጽ 540 ስር የተደነገገዉን በመተላለፍ በመኪና የጎን አካል ገጭቶ በመጣል የሰዉ መግደል ወንጀል በመፈፀሙ በፌዴራል ጠቅላይ ዐቃቤ ህግ በልደታ የልዩ ልዩ ወንጀል ጉዳዮች ዳይሬከቶሬት ዐቃቤ ህግ በመሰረተዉ ክሰ በእስራት ተቀጣ።

 የክስ መዝገብ እንደሚያስረዳዉ ተከሳሽ ድርጊቱ ህገ ወጥና የሚያስቀጣ ዉጤት ሊያስከትል እንደሚችል እያወቀ የሆነዉ ይሁን ብሎ ዉጤቱን በመቀበል የካቲት 8 ቀን 2007 ዓ.ም ከምሽቱ 3፡00 ሰዓት በኮልፌ ቀራኒወ ክፍለ ከተማ ወረዳ 02 ክልል ልዩ ቦታዉ ናትራን ግሮሰሪ ተብሎ ከሚጠራዉ አካባቢ ሚኒባስ መኪና ከካራ ቆሬ ወደ አየር ጤና አቅጣጫ ሲያሽከረክር በተመሳሳይ አቅጣጫ ከፊት ለፊቱ ላዳ ታክሲ ሲያሽከረክር ከነበረዉ ሟች ወንዱሙ ታደሰ ጋር በተፈጠረዉ አለመግባባት መኪናዉን አቁሞ በመዉረድ የሽቶ ጠርሙስ ወርዉሮ ሟች ሲያሽከረክር የነበረዉን መኪና የኋላ መስታወት ሰብሮ ሮጦ ወደ መኪናዉ በመመለስ ለማምለጥ ሲል ሟች እንዳያመልጥ ከመኪናዉ ፊት ቆሞ በሕግ አምላክ እያለዉ መኪናዉን ፊት ለፊት ነድቶበት በመኪናዉ የግራ ጎን አካል ገጭቶት መሬት ላይ በመጣል በኋላ ጎማዉ ወጥቶበት ባደረሰበት ጉዳት አድርሷል ተጎጂው በህክምና ሲረዳ ቆይቶ ይካቲት 18 ቀን 2007 ዓ.ም ህይወቱ ያለፈ በመሆኑ በፈፀመዉ የሰዉ መግደል ወንጀል ተከሷል።

የፌዴራል ዐቃቤ ህግ ተከሳሹ በፈፀመዉ ወንጀል ተጠያቂ መሆን የሚችልበትን በፖሊስ የምርምራ መዝገብ መሰረት  የሰዉ ምስክሮች የሟችን የሞት ምክንያት የሚገልፅ  ከዳግማዊ ምኒሊክ ሆስፒታል የተሰጠዉን የአስከሬን ምርመራ ዉጤት በሰነድ በመያዝ በማስረጃነት አቅርቧል::

ተከሳሽም ለፍርድ ቤቱ  የወንጀል ድርጊቱን ፈፅሜለሁ ጥፋተኛ ግን አይደለሁም በማለት የእምነት ክህደት ቃሉን በመስጠቱ የዐቃቤ ህግ ምስክሮች ቀርበዉ ተሰምተዋል። ፍርድ ቤቱም ግራ ቀኙን መርምሮ ተከሳሹን ጥፋተኛ ነህ ብሎታል::

 ተከሳሹ ወንጀል ድርጊቱን የፈፀመዉ  ሙያዊ ግዴታዉን ባለመወጣት በመሆኑ አስተማሪ ቅጣት እንዲወሰን ሲል ዐቃቢ ህግ የቅጣት አስተያየት አመልክቷል::

 የፌዴራል ከፍተኛ ፍርድ ቤት አራዳ ምድብ 4ኛ ወንጀል ችሎት መዝገቡን መርምሮ ተከሳሹ ሶስት ማቅለያ ተይዞለት  ሀምሌ 27 ቀን 2009 ዓ.ም  በዋለዉ ችሎት ተከሳሹን ያስተምራል ሌሎችን ያስጠነቅቃል ያለዉን  በ11 ዓመት ከ6 ወር ጽኑ እስራት  አንዲቀጣ ሲል ወስኗል ሲል የፌደራል ጠቅላይ ዐቃቤ ህግ የህዝብ ግንኙነትና የኮሙኒኬሽን ጉዳዮች ዳይሬክቶሬት የላከልን ዜና ያስረዳል።

ይምረጡ
(1 ሰው መርጠዋል)
227 ጊዜ ተነበዋል

Sendek Newspaper

Bole sub city behind Atlas hotel

Contact us