You are here:መነሻ ገፅ»ዜና

የኬሚካል ኢንዱስትሪዎች ኮርፖሬሽን ሶስት የመንግሥት ልማት ድርጅቶችን ጠቀለለ

Wednesday, 16 August 2017 12:09

አዳሚ ቱሉ ፀረ ተባይ ማዘጋጃ አክሲዮን ማኅበር፣ አዋሽ መልካሳ አሉሚኒየም ሰልፌትና ሰልፈሪክ አሲድ አክሲዮን ማኅበር እና ኮስቲክ ሶዳ አክሲዮን ማኅበር ከኢትዮጵያ ኬሚካል ኢንዱስትሪዎች ኮርፖሬሽን ጋር እንዲዋሀዱ የመንግሥት የልማት ድርጅቶች ሚኒስቴር ያቀረበውን የውሳኔ ሀሳብ ተቀብሎ የሚኒስትሮች ምክር ቤት ነሐሴ 5 ቀን 2009 ዓ.ም. ባካሄደው ስብሰባ ተቀብሎ አጸደቀ።


አክሲዮን ማኅበራቱና ኮርፖሬሽኑ እንዲዋሀዱ ያስፈለገው ተቋማቱ አሁን ባሉበት አቅም የኢንዱስትሪውን ዘርፍ ለማሳደግ የሚጠበቅባቸውን ሚና በአግባቡ ሊጫወቱ ስለማይችሉ የአመራር፣ የኢንቨስትመንት፣ የሰው ኃይል፣ የግብይት እና የአሠራር አቅማቸውን አቀናጅቶ በአጭር ጊዜ በማጎልበት የተጠናከረ የተወዳዳሪነት ቁመና እንዲይዙ ለማድረግ ነው። በውህደቱ በሚፈጠረው ኮርፓሬሽን አስተዳደራዊ ወጪ የመቀነስ ውጤት ሊኖረው የሚችል ሲሆን፣ በውህደቱ የተጣመሩ ተቋማት እንደየሥራ ባህሪያቸው የተመጣጠነ ውስጣዊ የአመራር ነጻነት ይኖራቸዋል። የተዋሀዱት ተቋማት ምርቶች ለግብርና፣ ለምግብ፣ ለኮንስትራክሽን፣ ለጤና፣ ለቆዳና ቆዳ ውጤቶች፣ ለጨርቃ ጨርቅ እና ለሌሎች በርካታ ኢንዱስትሪዎች ግብዓት የሚያገለግሉ ናቸው።


የተጠቀሱት የኬሚካል ማምረቻ አክስዮን ማኅበራት ከኬሚካል ኮርፖሬሽን ጋር ሲዋሃዱ የኮርፖሬሽኑን ማቋቋሚያ ደንብ ቁር 280/2005 ማሻሻል አስፈላጊ በመሆኑ የሦስቱ አክሲዮን ማኅበራት መብትና ግዴታዎች ወደ ኮርፓሬሽኑ ተዛውረው እንዲሻሻል ተደርጓል።

 

ይምረጡ
(1 ሰው መርጠዋል)
151 ጊዜ ተነበዋል

Sendek Newspaper

Bole sub city behind Atlas hotel

Contact us