You are here:መነሻ ገፅ»ዜና

የባህር ትራንስፖርትና ሎጀስቲክስ አገልግሎት ድርጅት አምስት ከፍተኛ ኃላፊዎች ፍ/ቤት ቀረቡ

Wednesday, 06 September 2017 13:28

በከባድ የሙስና ወንጀል ተጠርጥረው ባሳለፍነው አርብ (ነሐሴ 26 ቀን 2009 ዓ.ም) በቁጥጥር ስር የዋሉት፤ የባህር ትራንስፖርትና ሎጂስቲክስ አገልግሎት ድርጅት አምስት የሥራ ኃላፊዎች ከትናንት በስቲያ ችሎት ቀርበው የ14 ቀናት የጊዜ ቀጠሮ ተጠየቀባቸው፡፡ ፖሊስ በፌዴራሉ ከፍተኛ ፍርድ ቤት 2ኛ ወንጀል ችሎት ቀርቦ ተጠርጣሪዎቹ ፈፅመዋቸዋል ባላቸው ጉዳዮች ላይ ለችሎቱ ማብራሪያ ሰጥቷል፡፡

 

እንደመርማሪ ፖሊስ ገለፃ ከ774 ሚሊዮን የአሜሪካን ዶላር በላይ በሀገር ሃብት ላይ ጉዳት አድርሰዋል የተባሉት አምስቱ ከፍተኛ የሥራ ኃላፊዎች፤ 1ኛ አቶ ደሳለኝ ገ/ህይወት የወደብና ተርሚናል አገልግሎት ዘርፍ ምክትል ዋና ሥራ አስፈፃሚ፤ 2ኛ አቶ ሲሳይ አባፈርዳ የኮርፖሬት አገልግሎት ምክትል ስራ አስፈፃሚ፤ 3ኛ አቶ ሲራጅ አብዱላሂ የፕላንና ቢዝነስ ልማት መምሪያ ኃላፊ እንዲሁም 4ኛ ኢንጂነር አለሙ አምባዬ የመርከብ አገልግሎት ምክትል ዋና ስራ አስፈፃሚ እና 5ኛ አቶ ሳሙኤል መላኩ የፋይናንስ ኃላፊ መሆናቸውን ገልጿል፡፡

 

ተጠርጣሪዎቹ ፈፅመውታል በሚል በመርማሪ ፖሊስ በዝርዝር ከቀረቡት ጉዳዮች መካከል፤ በ2006 ዓ.ም መንግስት የህብረተሰብቡን ፍላጎት በማጥናትና ድጎማ በማድረግ ከውጪ ሀገር ያስገባውን 656 ሚሊዮን 613 ሺህ 55 ቶን ስኳር በእነሱ ምክንያት የት እንደደረሰ ሳይታወቅ ቀርቷል ብሏል፡፡ በማከልም ለባህር ትራንዚት ጅቡቲ ቅርንጫፍ በየወሩ የሚመደበው 10 ሚሊዮን የአሜሪካን ዶላር ተጠርጣሪዎቹ በአግባቡ ስራ ላይ ሳያውሉት ቀርተዋልም ሲል ይጠቅሳል፡፡

 

ከዚህም ባለፈ የመንግስትን የግዥ መመሪያ ስርዓት በመተላለፍ ለተለያዩ ደረቅ ወደብ የግንባታ ስራዎች ውል በመዋዋልና ከኮንትራክተሮች ጋር አለአግባብ በመመሳጠር ተጨማሪ የድንኳን ኪራይ በመሰብሰብ 700 ሺህ ብር የሚገመት ጉዳት አድርሰዋልም ሲል ፖሊስ አስረድቷል፡፡

 

ተጠርጣሪዎቹ በፈፀሙት የሥራ ክፍተት ወደውጪ በኤክስፖርት ስርዓት የሚላኩ ዕቃዎችን በቃሊቲና በሞጆ እንዲታሸጉ ማድረግ ሲገባቸው፤ ጅቡቲ ላይ እንዲታሸጉ በማድረጋቸው ከ2007 እስከ 2008 ዓ.ም 470 ሚሊዮን ብር ወጪ እንዲሆን ከማድረጋቸው በዘለለ በዘርፉ የተሰማሩ 1ሺህ 500 ዜጎችን ስራ እንዲፈቱ አድርገዋል በሚል ተጠያቂ አድርጓቸዋል፡፡ ከ2006 እስከ 2009 ዓ.ም ከውጪ በዱቤ የገቡ ዕቃዎች የወደብ አገልግሎት ሳይከፈልባቸው 10 ዓመትን ከማቆየት ባለፈ 250 ሚሊዮን ብር እንዲሰረዝላቸው አድርገዋል ሲል ተጠያቂ ናቸው ብሏል፡፡

 

 በጅቡቲ ወደብ በርካታ ንብረቶች በመቀመጣቸው አገሪቱ በዓመት እስከ 760 ሚሊዮን ዶላር እንድታወጣ ተገዳለች የሚለው የፖሊስ የምርመራ መዝገብ፤ መርከቦች ዕቃ ጭነው ከመጡ በኋላ ለሶስት ወር የወደብ ኪራይ ሳይከፍሉ በመቀመጣቸው በቀን 25 ሺህ ዶላር (ለአንድ መርከብ በ3 ወር ጊዜ ውስጥ 4 ነጥብ 6 ሚሊዮን ዶላር እንዲወጣ በማድረግ) አግባብነት የሌለው ወጪን በማውጣት ጉዳት አድርሰዋል ብሏል፡፡ ይህንንም ተግባር የፈፀሙት እስካሁን ካልተያዙ ሌሎች ባለስልጣናት ጋር በመመሳጠር መሆኑንም ፖሊስ ጠቁሟል።

 

ተጠርጣሪዎቹ በበኩላቸው መርማሪ ፖሊስ ካቀረበባቸው ጉዳይ ጋር ግንኙነት እንደሌላቸው በመጥቀስ፤ የነጋዴዎችና የባለሀብቶች ጉዳይ ነው ያሉ ሲሆን፤ ይህንንም በተመለከተ ጥናት አጥንተው ስለችግሩ ለመንግስት በተደጋጋሚ ማቅረባቸውን አስረድተዋል፡፡ አክለውም ይህ ችግር መንግስት ያልፈታው እንጂ በእኛ ኃላፊነት የመጣ አይደለም ሲሉም ለችሎቱ ተናግረዋል፡፡

 

መርማሪ ፖሊስ በበኩሉ ተጠርጣሪዎቹ የተያዙት ግንኙነት እንዳላቸው የሚያሳይ በቂ ማስረጃ በማግኘቱ መሆኑን ጠቁሞ፤ ለበለጠ ምርመራ የ14 ቀናት የጊዜ ቀጠሮ በጠየቀው መሠረት ፍርድ ቤቱ ጥያቄውን ተቀብሎ የአሥራ አራት  የምርመራ ቀን ፈቅዷል፡፡

ይምረጡ
(0 ሰዎች መርጠዋል)
117 ጊዜ ተነበዋል

Sendek Newspaper

Bole sub city behind Atlas hotel

Contact us