You are here:መነሻ ገፅ»ዜና

በአሜሪካ ኤምባሲ 39 አዳዲስ የሠላም ጓዶች ቃለመሐላ ፈጸሙ

Wednesday, 20 September 2017 13:19

 

 

የአሜሪካ ኤምባሲ የበላይ ጉዳይ ፈጻሚ ትሮይ ፍትሪል በአማራ፤ ትግራይ፤ ኦሮሚያ እና ደቡብ ክልሎች በእንግሊዝኛ ቋንቋ መምህርነት የበጎ ፍቃድ አገልግሎት ለሚሰጡ 39 አዳዲስ የሠላም ጓዶች በኤምባሲው ቅጥር ግቢ ቃለ መሐላ አስፈጽመዋል። ይህም በአሁኑ ወቅት በኢትዮጵያ በጤና፤ ግብርና እና ትምህርት ዘርፎች የተሰማሩትን አሜሪካውያን በጎ ፈቃደኞች ቁጥር 130 ያደርሳል።


ሰሞኑን ቃለ መሐላቸውን የፈጸሙት የሠላም ጓዶች፤ በኢትዮጵያ የእንግሊዝኛ ቋንቋ ትምህርትን ማስፋፋት ፕሮዤ የሆነው (PELLE) ስርየሚሰማሩ የአራተኛው ቡድን አባላት ናቸው። በሚሰማሩባቸው አካባቢዎች በሚገኙ ሁለተኛ ደረጃ ትምህርት ቤቶች በትንሹ በሦስት ክፍሎች ተመድበው ለ9ኛ ወይም 11ኛ ክፍል ተማሪዎች የእንግሊዝኛ ቋንቋ ትምህርት ይሰጣሉ። ቋንቋው በዓለም አቀፍ ደረጃ ተወዳዳሪ ለመሆን እንደ ዋነኛ መስፈርት ከማገልገሉም በላይ ለኢትዮጵያውያን ተማሪዎች በርካታ የዕድል በሮችን ይከፍታል፤ በዓለም አቀፍ ደረጃ የተሻለ ግንኙነት እንዲኖራቸውም ያደርጋል።


በጎ ፈቃደኛ የሠላም ጓዶች በሀገሪቱ አነስተኛ የህዝብ ቁጥር ባለባቸው አከባቢዎች በመሰማራት፤ በአካባቢው ከሚገኙ መምህራን፤ አስተዳዳሪዎች እና ተሟጋቾች ጋር በሚኖራቸው ትብብር የኅብረተሰቡን ፍላጎት የሚመጥኑ በርካታ ተግባራትን ያከናውናሉ። በትብብር የሚቀረጹ የልማት ሥራዎች፤ ሰፊ የማኅበረሰብ ተሳትፎን በማረጋገጥ የተሻለ እና ዘላቂነት ያለው ውጤት ያስገኛሉ። እንደ ጾታ እኩልነት፤ ትምህርት፤ የወጣቶች የአመራር ተሳትፎ እና ቴክኖሎጂ አጠቃቀምን የመሳሰሉ በርካታ ተግባራት በዚህ ፕሮዤ መካተታቸውን ከኤምባሲው የደረሰን ዜና ያስረዳል።

 

አዲሶቹ የሠላም ጓዶች ለበጎ አገልግሎት ሥራቸው የሚያግዝ የሦስት ወራት ስልጠና ተከታትለዋል። በስልጠናቸውም ስለማስተማሪያ ዘዴ፤ ፔዳጎጂ እና በአንድ ጊዜ ከ1,000 በላይ ተማሪዎችን በእንግሊዝኛ ቋንቋ ማበልጸጊያ ክፍለ ጊዜዎች በብቃት ለማስተናገድ የሚያስችላቸውን ክህሎት አዳብረዋል። በተጨማሪም፤ በምድብ ቦታቸው ከአካባቢው ማኅበረሰብ ጋር ለሚኖራቸው ግንኙነት እንዲረዳቸው ለ125 ሰዓታት የአማሪኛ፤ አፋን ኦሮሞ ወይም ትግሪኛ ቋንቋ ስልጠና ወስደዋል። ዛሬ ቃለመሐላ የፈጸሙትን ጨምሮ፤ በአጠቃላይ በኢትዮጵያ እስካሁን በበጎ ፈቃድ አገልግሎት የተሰማሩ የሰላም ጓዶች ቁጥር ከ3,600 ይበልጣል።


ስለ ሰላም ጓድ፤- ግንባር ቀደም የአሜሪካ ዓለም አቀፍ የአገልግሎት ተቋም ሲሆን፤ አሜሪካውያንን ከሀገራቸው ውጭ በመላክ፤ በዓለም ላይ ለሚታዩ አንገብጋቢ የሰው ልጆች ፍላጎቶች የመፍትሔ አካል እንዲሆኑ ያበረታታል። በጎ ፈቃደኛ የሠላም ጓድ አባላት በትምህርት፤ ጤና፤ ምጣኔ ሀብት ልማት፣ ግብርና፤ አካባቢ እና ወጣቶች ልማት ዘርፍ የሚስተዋሉ ችግሮችን በዘላቂነት ማቃለል የሚያስችሉ መፍትሔዎችን ለመቅረጽ ከአካባቢ አስተዳዳሪዎች፤ ትምህርት ቤቶች፤ የማኅበረሰብ አባላት፤ በአነስተኛ የንግድ ዘርፍ ከተሰማሩና ከሥራ ፈጣሪዎች ጋር በመሆን ይሰራሉ።

ይምረጡ
(0 ሰዎች መርጠዋል)
118 ጊዜ ተነበዋል

Sendek Newspaper

Bole sub city behind Atlas hotel

Contact us