You are here:መነሻ ገፅ»ዜና

የስኳር ኮርፖሬሽን ሠራተኞች፣ የደሞዝ ማስተካከያ ከጠየቅን አምስት ዓመት አለፈን አሉ

Wednesday, 20 September 2017 13:22

·        ኮርፖሬሽኑ የደሞዝ ማስተካከያ ጥናቱን ጨርሶ ለቦርድ አቅርቧል

 

 

አስሩ የስኳር ኮርፖሬሽን ሠራተኞች የደሞዝ ማስተካከያ ጥያቄ ከአምስት ዓመት በፊት ለኮርፖሬሽኑ ቢያቀርቡም እስካሁን ምላሽ እንዳልተሰጣቸው ለሰንደቅ ገልጸዋል።

በተለይ በስኳር ማምረት ላይ የሚገኙት መተሐራ፣ ወንጂ እና ፊንጫ ሠራተኞች ለከፍተኛ የኑሮ ውድነት መጋለጣቸውን ገልጸዋል። ስማቸው እንዳይጠቀስ የፈለጉ የሠራተኛ ማሕበር ኃላፊ ለሰንደቅ እንደገለፁት፣ “በየአመቱ ምርት እያመረትን ነው የምንገኘው። ሆኖም ለድርጅቶቻችን ትንሽ ፈሰስ እየተደረገ፣ ለስኳር ልማት ፈንድ በሚባል በተከፈተ የሒሳብ ቋት ከፍተኛውን የትርፋችን ድርሻ ይወሰዳል። ወደ መንግስት ካዝና እንደሚገባ ብንገነዘብም፣ የደሞዝ ጭማሪ ስንጠይቅ ግን ገንዘብ የለም የሚል ምላሽ ይሰጠናል። ሌላው ቀርቶ አሁን ፋብሪካዎች ጥገና ላይ እያለን ለምሳሌ የመለዋወጫ አቅርቦት የለም። ተርባይን ይገዛ ተባለ፣ አልተገዛም። ቦይለር ጥገና ያስፈልገዋል ተባለ፣ የተሰራ ነገር የለም። ሠራተኛው ተበድሮ ነው ችግሮቹን እየገፋ ያለው” ብለዋል።

ከስኳር ኮርፖሬሽን በኩል ያገኘነው መረጃ እንደሚያሳየው፣ ኮርፖሬሽኑ የደሞዝ ማስተካከያ ጥናቱን ጨርሶ ለቦርድ አቅርቧል። ቦርዱም ጥናቱን ከተመለከተ በኋላ ማስተካከያ ይደረግ በማለት ለኮርፖሬሽኑ መልሶታል። ስለዚህም የተሰጠውን አስተያየት ከግምት በማስገባት የጥናት ሰነዱ ላይ ክለሳ ይደረጋል ብለዋል።

የኮርፖሬሽኑ ሠራተኞች ግን ጥያቄ ካቀረብን አምስት ዓመት አልፎናል፤ የቦርዱ አስተያየት የሚመለከቱት ገና መስከረም 29 ቀን 2010 ዓ.ም ሲሆን፣ የጥናት ሰነዱ ተመልሶ ለቦርዱ ከተላከ በኋላ ቦርዱ የሚመለከተው በጥር ወር ውስጥ ነው። ይህ ማለት ጥያቄያችን ምላሽ ሳያገኝ ለአንድ ዓመት ተጨማሪ በእነሱ ቢሮክራሲ ውስጥ ይታሻል። አቤት ብንል መልስ ሰጪ የለም።

በደረሰን መረጃ መሰረት ነገ የሠራተኛ ማሕበራት መሪዎች ከመንግሥት ልማት ድርጅቶች ሚኒስትሩ ጋር የደሞዝ ማስተካከያውን በተመለከተ ውይይት እንደሚያደርጉ ታውቋል።

ይምረጡ
(1 ሰው መርጠዋል)
142 ጊዜ ተነበዋል

Sendek Newspaper

Bole sub city behind Atlas hotel

Contact us