You are here:መነሻ ገፅ»ዜና

አዲስ አበባ ዩኒቨርስቲ እና የ“ክስታኔ” ጉራጌ ህዝብ የልማት ማህበር በክስታንኛ መዝገበ ቃላት አዘጋጀ

Wednesday, 06 December 2017 12:53

 

በይርጋ አበበ

ከጉራጌ ብሄር ህዝቦች አንዱ የሆነውን “የክስታኔን ማህበረሰብ” ቋንቋ የሚገልጸው እና በክስታንኛ አማርኛ እና እንግሊዝኛ ቋንቋዎች የተዘጋጀው መዝገበ ቃላት የፊታችን እሁድ በብሄራዊ ቴአትር ባህልና ቱሪዝም ሚኒስትር ዶ/ር ሂሩት ወልደማሪም ይመረቃል።

መዝገበ ቃላቱን ያዘጋጁት የክስታኔ ጉራጌ ህዝብ የልማት ማህበር እና አዲስ አበባ ዩኒቨርስቲ ሲሆኑ መዝገበ ቃላቱን አዘጋጅቶ ለማጠናቀቅ ስምንት ዓመት እና ከአንድ ሚሊዮን ብር በላይ ገንዘብ ወጥቶበታል።

ከመፅሐፉ አዘጋጆች አንዱ የሆኑት አቶ ጥላሁን አትሬሶ በተለይ ለሰንደቅ ጋዜጣ እንደተናገሩት፤ መዝገበ ቃላቱ እንዲዘጋጅ የተፈለገበት ዓላማ የክስታኔ ቋንቋ እየጠፋ ስለመጣ ለቋንቋው ህልውና ማቆያ ሲባል ነው።

መዝገበ ቃላቱን ለማዘጋጀት ከአዲስ አበባ ዩኒቨርስቲ አቶ ታምራት ጉርሙ በመሪነት የተሳተፉበት መሆኑን የገለፁት አቶ ጥላሁን፤ እሳቸው እና አቶ ታምርአየሁ ሲማ ደግሞ ከክስታኔ ህዝብ ልማት ማህበር ተወክለው ማዘጋጀታቸውን ተናግረዋል።

“መዝገበ ቃላት ማዘጋጀት ከባድ ሥራ እና ከፍተኛ ወጭ ይጠይቃል” ያሉት አቶ ጥላሁን፤ “ለዝግጅቱ የሚያስፈልገውን ከፍተኛ ገንዘብ እና ልዩ ሙያዊ እገዛ የሰጠን የክስታኔ ብሄረሰብ ህዝብ ነው። ያለእነሱ ድጋፍ ከ8000 ቃላት በላይ ያሉትን መዝገበ ቃላት አዘጋጅተን ማቅረብ አንችልም ነበር” ብለዋል።

በቋንቋው የተጻፈ ታሪክ የሌለው ህዝብ ህልውናው አደጋ ላይ መሆኑን የሚናገሩት አቶ ጥላሁን፤ መዝገበ ቃላቱ የተዘጋጀው “በጠባብ ብሄርተኝነት ስሜት ሳይሆን ማንነትን የማስቀጠል ስራ ነው። የክስታኔ ህዝብ የዘመናት እምነቱ ‘ከኢትዮጵያ የጠበበ አገር የለምንም’ የሚል ነው” በማለት ተናግረዋል። መፅሀፉ በ772 ገፆች የተዘጋጀ ሲሆን 300 ብር የመሸጫ ዋጋው ነው።

ዶ/ር ሒሩት ወልደማርያምን ጨምሮ በርካታ ጥሪ የተደረገላቸው እንግዶች እና ከፍተኛ የመንግሥት የሥራ ኃላፊዎች በምረቃ ሥነ-ሥርዓቱ ላይ ይገኛሉ።   

ይምረጡ
(2 ሰዎች መርጠዋል)
60 ጊዜ ተነበዋል

Sendek Newspaper

Bole sub city behind Atlas hotel

Contact us