You are here:መነሻ ገፅ»ዜና

የፖሊስ ምርመራ በቄሮዎች ላይ ሳይሆን ወንጀል በፈፀሙት ላይ ነው

Wednesday, 17 January 2018 13:16

በይርጋ አበበ

 

የፌዴራል ፖሊስ “ቄሮ” ላይ ምርመራ አደርጋለሁ ማለቱን ተከትሎ መግለጫው በስህተት ተተርጉሟል ሲል የመንግሥት ኮሙዩኒኬሽን ጉዳዮች ጽ/ቤት ገለፀ።


የኮምኒኬሽን ጉዳዮች ጽ/ቤት ኃላፊ ሚኒስትር ዶ/ር ነገሪ ሌንጮ ትናንት በጽ/ቤታቸው ለመገናኛ ብዙሃን በሰጡት ወቅታዊ መግለጫ፤ በኦሮሚያ ክልል ለተነሳው ግጭት የፌዴራል ፖሊስ በቄሮዎች ላይ ምርመራ እንደሚያደርግ መግለጹን ተከትሎ የመንግስት አቋም በማይገልፅ መልኩ መግለጫው ተጣሞ ቀርቧል ብለዋል።


ዶ/ር ነገሪ “በኦሮሞ ባህል፣ ቋንቋ እና የገዳ ሥርዓት ትዳር ያልመሰረቱ ወጣት ወንዶች ቄሮ ይባላሉ። ነገር ግን ሆን ብለው አላስፈላጊ ትርጉም በመስጠት እና አንዳንዶች ደግሞ ከጠላት ጋር በማያያዝ ከሽብር ቡድኖች ጋር እያያያዙ የሚያናፍሱት ወሬ አላስፈላጊ አጀንዳ በመሆኑ መንግሥት የሚጋራው እንዳልሆነ ለመጠቆም እፈልጋለሁ” ብለዋል።


ሚኒስትሩ ቄሮ የሚባል ህጋዊ እውቅና ያለውም ሆነ ህቡዕ ቡድን እንደሌለ ገልጸው “ቄሮ የሚለውን ቃል ብቻ በመውሰድ የሆነ የሥራ ፈት ቡድን አድርጎ መቅረጽ ትክክለኛ አጀንዳ አይደለም። እነዚህን ወጣቶች ተጠቃሚ የሚያደርግ አጀንዳ ተቀርፆላቸዋል” ብለዋል።


የፌዴራል ፖሊስ በቄሮዎች ላይ የጀመረውን ምርመራ አቋርጧል ወይ? ተብለው የተጠየቁት ዶ/ር ነገሪ፤ “የመንግስት አጀንዳ እነዚህን ወጣቶች ተሳታፊ እና ተጠቃሚ ማድረግ ነው። ነገር ግን ማንም ሰው ወጣትም ይሁን በየትኛውም የዕድሜ ክልል የሚገኝ ቢሆን እና በየትኛውም ክልል የሚኖር ቢሆን በወንጀል ከተሳተፈ ከተጠያቂነት አያመልጥም። ስለዚህ በአጠቃላይ ቄሮዎች ላይ ሳይሆን ምርመራ የሚደረገው ወንጀል ከፈፀሙ አካላት ጋር በሙሉ ነው። የፌዴራል ፖሊስም ይሁን መንግሥት ያቋቋማቸው በክልል ደረጃም ያሉ ህግ አስከባሪዎች አስፈላጊውን የህግ እርምጃ ከመውሰድ ወደ ኋላ አይሉም” ሲሉ የመንግሥትን አቋም ይፋ አድርገዋል።

ይምረጡ
(0 ሰዎች መርጠዋል)
200 ጊዜ ተነበዋል

Sendek Newspaper

Bole sub city behind Atlas hotel

Contact us