You are here:መነሻ ገፅ»ዜና

አቶ በቀለ ገርባን ጨምሮ ሰባት የኦፌኮ አባላት ከእሥር ተለቀቁ

Wednesday, 14 February 2018 12:01

 

የኦሮሞ ፌዴራሊስት ኮንግረንስ (ኦፌኮ) ተቀዳሚ ምክትል ፕሬዚደንት አቶ በቀለ ገርባን ጨምሮ ሰባት የፓርቲው አባላት የተመሠረተባቸው ክስ ተቋርጦ በትላንትናው ዕለት ከእስር ተለቀዋል።


ከእስር የተለቀቁት የኦፌኮ አባላት አቶ በቀለ ገርባ፣ ጉርሜሳ አያና፣ አዲሱ ቡላላ፣ ደጀኔ ጣፋ፣ ጌቱ ጋሩማ፣ ተስፋዬ ሊበን እና በየነ ሩዳ ናቸው።


የኢህአዴግ ሥራ አስፈፃሚ ኮሚቴ በቅርቡ በወሰነው መሠረት በሁከትና ብጥብጥ፣ በሽብር እንዲሁም በሀይማኖት አክራሪነት ተሳትፈዋል በሚል ተከሰው የተቀጡ እና ጉዳያቸው በክስ ሒደት ላይ ያሉ ተከሳሾች ክስ የማቋረጥ እና ይቅርታ የማድረግ ተግባር ሲከናወን መቆየቱ ከፌዴራል ጠቅላይ ዐቃቤ ሕግ የተገኘ ዜና ጠቁሟል።


የፌደራል ጠቅላይ አቃቤ ህግ በእነ አቶ በቀለ ገርባ ላይ የተጀመረው ክስ እንዲቋረጥ መወሰኑን ከትናንት በስቲያ ሰኞ ዕለት ማስታወቁ የሚታወስ ነው። ሆኖም ግን ተጠርጣሪዎቹ በችሎት ጉዳያቸውን በሚከታተሉበት ጊዜ በችሎት መድፈር እያንዳንዳቸው የአንድ ዓመት እና የስድስት ወር ቅጣት የተጣለባቸው ከመሆኑ ጋር ተያይዞ ጉዳያቸው በፌደራል የይቅርታ ቦርድ እንዲታይ ግድ ሆኗል። የይቅርታ ቦርዱ የውሣኔ ሃሳብ ለሀገሪቱ ርዕሰ ብሄር ቀርቦ በመፅደቁ እሥረኞቹ በትናንትናው ዕለት ከቤተሰቦቻቸው ጋር ሊቀላቀሉ በቅተዋል።

ይምረጡ
(0 ሰዎች መርጠዋል)
1830 ጊዜ ተነበዋል

Sendek Newspaper

Bole sub city behind Atlas hotel

Contact us