You are here:መነሻ ገፅ»ዜና

የወለኔ ሕዝብ ዴሞክራሲያዊ ፓርቲ የታሰሩ አባሎቹ እንዲፈቱለት ጠየቀ

Wednesday, 21 February 2018 11:33

የወለኔ ሕዝብ ዴሞክራሲያዊ ፓርቲ (ወ.ህ.ዴ.ፓ) የወለኔን የማንነት ጥያቄ በማቅረባቸው ብቻ ለእስር የተዳረጉ አባሎቹ መንግሥት በገባው ቃል መሠረት በይቅርታ ወይንም በምህረት እንዲለቀቁለት ጥያቄ አቀረበ።

 

ፓርቲው ጥያቄውን በጹሑፍ ለደቡብ ብሄር ብሄረሰቦችና ሕዝቦች ክልል አስተዳደር የጸጥታና የፍትሕ ቢሮ በቅርቡ ማቅረቡን የፓርቲው ሊቀመንበር አቶ አብዲ ተማም ለሰንደቅ ጋዜጣ አስታውቀዋል።


ወ.ህ.ዴ.ፓ በምርጫ ቦርድ በ1999 ዓ.ም ተመዝግቦ የሚንቀሳቀስ ሕጋዊ ፓርቲ መሆኑን ያስታወሱት አቶ አብዲ ገዥው ፓርቲ ኢህአዴግ የአገሪቱን የመድብለ ፓርቲ ሥርዓት ለማስፋትና ዴሞክራሲውን ከማጎልበት አንጻር እስረኞችን ለመፍታት የወሰደው እርምጃ ፓርቲያቸው እንደሚደግፈው ጠቁመዋል።


በክልሉ በጉራጌ ዞን በገደባኖ ጉታዘር ወለኔ ወረዳ በ2004 ዓ.ም የወለኔ የማንነት ጥያቄ መነሻነት ግጭት ተቀስቅሶ የተወሰኑ የፓርቲው ከፍተኛ አመራርና አርሶአደር አባሎቻቸው የመንግስት መዋቅር አፍርሰዋል፣ ሕዝቡን አሳምጸዋል፣ ያልተፈቀደ ስብሰባ አድርገዋልና የመሳሰሉ ምክንያቶችን በመጥቀስ ከ70 በላይ የፓርቲው አባሎች ታስረው እንደነበር አቶ አብዲ አስታውሰዋል። ሆኖም የፓርቲው ከፍተኛ አመራር በፍርድ ቤት በነበረው ክርክር በነጻ እንዲሰናበቱ መወሰኑን ተከትሎ የታሳሪዎች ቁጥር ቀንሷል ብለዋል። የተቀሩ ታሳሪዎች ከ3 እስከ 15 ዓመት እስር ተፈርዶባቸው የእስር ጊዜያቸውን ጨርሰው ከወጡት ሌላ የ65 ዓመት አዛውንት ጨምሮ 11 ያህል የፓርቲው አባላት አሁንም በእስር ላይ ናቸው ብለዋል።


በአሁኑ ሰዓት በወልቂጤ እና በወሊሶ ማረሚያ ቤቶች ከሚገኙ እስረኞች መካከል አቶ ደንበል መሀመድ፣ አቶ ታለግን አወል፣ አቶ ምላዙ ቲጃን፣ አቶ ናስር ሰኢድ፣ አቶ ዙቢር ሁሴን፣ አቶ ጀማል ገረመው፣ አቶ ሙሁዲን አብዱልበር፣ አቶ አረብ ቆሬቻ፣ አቶ በድሩ ኡመር፣ አቶ ምእራጅ ሁሴን፣ አቶ ዝይን ቦንሳ መሆናቸውን የፓርቲው ሊቀመንበር አረጋግጠዋል።


ወ.ህ.ዴ.ፓ በእስር ላይ የሚገኙ ስማቸው የተጠቀሱት አባሎቹ የደቡብ ብሔር ብሔረሰቦችና ሕዝቦች ክልላዊ መንግሥት ጉዳዩ የሚመለከታቸው አካላት ትኩረት በመስጠት የይቅርታው ተጠቃሚ ያደርጉዋቸው ዘንድ በይፋ ጠይቋል።


የወለኔ ሕዝብ የራሱ ባህል፣ ቋንቋ፣ ታሪክ፣ ወግ ያለው ማህበረሰብ ከመሆኑ ጋር ተያይዞ በሕገመንግሥቱ ለሌሎች ብሄር ብሄረሰቦች የተፈቀደው ራስን በራስ የማስተዳደር መብት እንዲረጋገጥለት አሁንም ሠላማዊ ትግሉን መቀጠሉን አቶ አብዲ ጠቁመዋል። 

ይምረጡ
(0 ሰዎች መርጠዋል)
1004 ጊዜ ተነበዋል

Sendek Newspaper

Bole sub city behind Atlas hotel

Contact us