You are here:መነሻ ገፅ»ዜና

ኮሎኔል ደመቀ ዘውዱ እና ንግስት ይርጋን ጨምሮ በርካታ የወልቃይት ማንነት አስተባባሪ ኮሚቴዎች ከእሥር ተፈቱ

Wednesday, 21 February 2018 11:39

 

በይርጋ አበበ

 

የወልቃይት ህዝብ የማንነት ጥያቄ አስተባባሪ ኮሚቴ ሰብሳቢ ኮሎኔል ደመቀ ዘውዱ እና ወይዘሪት ንግስት ይርጋ የተመሰረተባቸው ክስ ተቋርጦ ከእሥር ተፈቱ።


የጸረ ሽብር አዋጅ ቁጥር 652/2001 አንቀጽ ሶስትን በመተላለፍ ተቃውሞዎችን በመምራትና ማደራጀት በሚል ክስ ተመስርቶባት የነበረችው ወጣት ንግስት ይርጋ ትናንት ክሷ መቋረጡ ተገልጿል። በ2008 ዓ.ም በጎንደር ከተማ የተነሳውን ተቃውሞ ተከትሎ በቁጥጥር ስር ውላ በፌዴራሉ ከፍተኛ ፍርድ ቤት ልደታ ምድብ አራተኛ ወንጀል ችሎት ጉዳይዋ ሲታይ የቆየችው ተጠርጣሪዋ፤ የቀረበባትን ክስ እንድትከላከል ቀነ ቀጠሮ ተሰጥቷት የነበረ ቢሆንም ከቀጠሮው በፊት ክሷ ተቋርጦ ትናንት አመሻሽ ከእስር ወጥታለች።


ከዚህ ጋር በተያያዘ በአማራ ክልል ጠቅላይ ፍርድ ቤት ጉዳያቸው ሲታይ የቆዩት የወልቃይት ህዝብ የማንነት ጥያቄ ኮሚቴ አስተባባሪ ኮሎኔል ደመቀ ዘውዱ ክሳቸው ተቋርጦ ከእስር ቤት የተፈቱት ባሳለፍነው ሰኞ አመሻሽ ሲሆን፤ ከእስር ከወጡ በኋላም በርካታ ቁጥር ያለው የጎንደር ከተማ ህዝብ አቀባበል አድርጎላቸዋል። ኮሎኔል ደመቀ ዘውዱ ከአማራ ቴሌቪዥን ጋር ባደረጉት ቃለ ምልልስ ‹‹የጎንደር ህዝብ እና የአማራ ክልል መንግሥት ከጎኔ ሆነው ለዚህ ስላደረሱኝና ከእሥር እንድፈታ ስለረዱኝም አመሰግናለሁ›› ብለዋል። ኮሎኔል ደመቀ ዘውዱ እጃቸው ከተያዘበት ሃምሌ 2008 ዓ.ም ጀምሮ እስካላፈው ሰኞ የካቲት 12 ቀን 2010 ዓ.ም ድረስ በእስር ላይ ቆይተዋል።


በሌላ ዜና በእነ ተሻገር ወልደሚካኤል መዝገብ በሽብርተኝነት ክስ ተስርቶባቸው ጉዳያቸውን በፌዴራሉ ከፍተኛ ፍርድ ቤት ልደታ ምድብ አራተኛ ወንጄል ችሎት ሲከታተሉ የነበሩ 32 ተጠርጣሪዎች ክሳቸው ተቋርጦ ከእስር ተፈተዋል። እስከ ትናንት ማክሰኞ ምሽት ድረስ በእነ ተሻገር ወልደሚካኤል መዝገብ ክስ ከተመሰረተባቸው 35 ተጠርጣሪዎች መካከል ሁለተኛ ተከሳሽና ሁለቱ የዋልድባ ገዳም መነኮሳት ክሳቸው አልተቋረጠም ነበር። ሁለቱን መነኮሳት ጨምሮ በዚህ መዝገብ ጉዳያቸው ሲታይ የቆዩት ተጠርጣሪዎች ክስ የተመሰረተባቸው ባሳለፍነው ሰኔ 2009 ዓ.ም ነበር። 

ይምረጡ
(1 ሰው መርጠዋል)
3288 ጊዜ ተነበዋል

Sendek Newspaper

Bole sub city behind Atlas hotel

Contact us